1 Aba ladimurehan Aburemei lun Heremíasi, lárigiñe lesefuruni Nebusaradán, le gumadan tani furisun uburugu Ramá. Ladaürǘña meha dan le ladarirunbálin Nebusaradán, güragu lau güringüri hadan gürigia ha lílana Herusalén luma Hudá ha anügǘbaña Babilónioun.

2 Aba ladireiruni gumadan tani furisun Heremíasi lidoun fulasu daüti, aba lariñagun lun:

—Siadi lumuti Aburemei le Bubungiute fulasu le, lun lóunahani lamiselu le luagun, 3 guentoti gúnfulila lasiadiruni. Lasuseredunbei le hun, ladüga hafigouhan kóntüra Aburemei, madügün humuti le lubeibei. 4 Nagidaraali güringüri le aubei bagürawagua buéi guentó. Ánhabu busén bidin numa Babilónioun, keimoun; nóunigirubadibu. Gama lumoun anhein mabusenrun bubéi bidin, rédeiba. Anihán ageiraü bigibugiñe, gayaraati bidin le ñein lumuti babusenra. 5 Anhein himei bubalin bagiribudun, giribubá lumoun Gedalíasi, le liráü Aikamü, le libari Safán, le líchugubei urúei keisi gumadimati lidan burí luburugute Hudá, ábame baganóun luma, luma hama bumutuniña. Beiba le ñeinhin lumuti babusenra.

Lárigiñe aba líchugun gumadan idewesei luma éigini lun Heremíasi, aba lóunahani. 6 Aba lidin Heremíasi lumoun Gedalíasi uburugun Misüpá, aba lerederun aganawa luma, hama híbiri gürigia ha erederubaña fulasurugu.

7 Dan le hasubudirunbalin gumadangu hama súdaragu huríu ha erederubaña áraabu luagu rula lan lurúeite Babilónia Gedalíasi le liráü Aikamü keisi gumadimati fulasurugu, ani rula lan wügüriña, würiña hama irahüñü, gürigia ha gudemetimabaña ha manügǘnbaña Babilónioun labun lererehan.

8 Aba houdin Misüpá hau hamutuniña arihei Gedalíasi. Ñeinñein Ísümaeli le liráü Netaníasi hadan: Hoanán luma Yónatan ha lirahüñü Karéa; Seraíasi le liráü Tanhumeti; hama lirahüñü Efái le Netofána lumoun Hesaníasi, liráü aban wügüri Maakatüna, hama luwügüriñanigu. 9 Aba láfiñurun Gedalíasi houn:

—Manufudeda humá lun hederegeragun hungua houn Kalüdéana. Redei humá aganawa fulasurugu, deregegua humá hungua lun lurúeite Babilónia, ábame buidu lan lidin hun. 10 Au, neredera Misüpá lun nadimurehan huagu houn Kalüdéana danme hayabin ya. Huguya rugua humá hungua areidaha diwéin, furuda luma garaba, ítara luba gayara lan herederun lidan burí uburugu le hárügüdübei.

11 Aganba hamuti giñe huríu ha Moábübaña, ha Amonbaña hama ha Edomubaña hama ha lídanbaña amu burí ageiraü luagu ígira laaña lan lurúeite Babilónia fiu huríu lun herederun hamúanrugu, luagu giñe ru laali lan Gedalíasi keisi gumadimati houn. 12 Ábati hagiribudun lun Hudáun lídangiñe sun fulasu le buga ñeinhin lubéi hachagarawagua, aba hayabin lumoun Gedalíasi Misüpá. Aba giñe hareidahan diwéin, tuma saragu furuda.

13 Aba lidin Hoanán le liráü Karéa hama híbiri hábutigu súdaragu ha erederubaña áraabu, aba houdin Misüpá arihei Gedalíasi, 14 aba hariñagun lun:

—Ibidiñeti san bun luagu óunahala lan urúei Baalisi le Amonna Ísümaeli le liráü Netaníasi lun láfarunibu hilagubei?

Gama lumoun mafiñerunti Gedalíasi houn. 15 Ábati lariñagun Hoanán lun Gedalíasi aramudaguarügü:

—Ígiraba lun nidin áfarei Ísümaeli hilagubei. Kábagia uagu wígira lun láfarunibu? Lachagaraguágüdübaña lira sun huríu ha óundaraguaañabaña geyegua bau, ani ligíaba giñe lagünrinchaguagüle murusun le erederubei lídangiñe Hudá.

16 Lariñaga Gedalíasi lun:

—Madügabéi! Iyeeni le bariñagubei luagu Ísümaeli.