1 Lidan meha dan le Hoakimü lan le liráü Hosíasi urúeibei Hudá, aba ladimurehan Aburemei numa, lariñaga nun:

2 —Beiba le ñein habéi Rekabüna, ábame badimurehan hama. Lárigiñe ábame banügüniña tidoun aban tídangiñe rumu to ténpuluruguboun ábame bíchugun diwéin houn.

3 Au, Heremíasi, aba nidin áluahei Hasaníasi le liráü ábanya gíriti Heremíasi, libari Hawasiníasi hau líbirigu hama lirahüñü hama sun Rekabüna, 4 Aba nanügüniña ténpulurugun, tidoun harumun lirahüñü Anán le liráü Igüdalíasi, le meha luwügürin Bungiu. Rumu tuguya, tubaduñoun harumun tábutigu ténpulu, tóugiñe lirumun Maseíasi, le liráü Salumu le lúniri ebelaagülei ténpulurugun. 5 Aba neseriwidun diwéin houn Rekabüna, nariñaga houn:

—Gurá humá murusun diwéin.

6 Hariñaga nun:

—Wagía mátuntiwa diwéin ladüga ariñagati bugaha Honadábü, le liráü Rekabü le wagücha woun lun matun wamá diwéin ni wagía, ni wadügawagun. 7 Ariñagati giñe woun lun mábunagun wamá muna, mábunagun ichari ni beibei-agei. Lariñaga woun lun tidan lan kianpu waganawa sun dan lun wabagaridun saragu ya lidan múa le le ñein wabéi keisi terencha. 8 Adüga wamuti le lubeibei wagücha Honadábü woun, mátuntiwa diwéin, ni wagía, ni wámarigu, ni wasaanigu, 9 mábunagun wagía muna lun waganóun tidan, machari wagía beibei-agei. 10 Tidan kianpu waganawa, gúnfuli wamuti sun le lariñagubei wagücha Honadábü woun. 11 Gama lumoun dan le lebelurunbei Nabukodonosoru le lurúeite Babilónia lidoun fulasu le, aba wayabin Herusaléun anuraheina hawéi súdaragu Kalüdéana hama Síriana; ligía awanha lubéi aganawa Herusalén.

12 Ábati ladimurehan Aburemei lun Heremíasi, lariñaga lun:

13 —Nariñaguña bun, au le Aburemei Suntigabafu le Lubungiute Ísüraeli, lun bidin, bariñagame houn lílana Hudá luma Herusalén lun hafurendeiruni arufudahani, lun hadügüni le nubeibei. Au le Aburemei ariñagubalin. 14 Gúnfulihaña ladügawagun Honadábü, le liráü Rekabü, lau le lariñagubei Honadábü houn lun matun hamá diwéin chülǘ lumoun dan le, ani matun hamutu lugundun gúnfuli hamani lererun hagücha. Rúhadina giñe dimurei hun saragu wéiyaasu ani madügün humuti le nubeibei. 15 Óunaha naaña sun nani profetagu humoun aban lárigi aban lun hariñagun hun: Ígira huméi luriban hóuserun luma luriban higaburi. Midin humá hárigi amu búngiugu, meseriwidun huguyame houn, ítara luba gayara lan hasigirun aganawa lidan fulasu le níchugubei hun luma houn hagüchagu, gama lumoun madügüntün gasu nau. 16 Gúnfuli hamuti ladügawagun Honadábü, le liráü Rekabü, le lariñagubei hagücha houn; ánhañati Ísüraelina, madügün hamuti le nubeibei. 17 Ligía nariñagunbei au, le Aburemei Suntigabafu le Lubungiute Ísüraeli: Nábürügüdübei sun luwuyeri wuribani le uágubei nariñaga luagun Hudá luma hawagun lílana Herusalén. Lugundun adimurehaadina hun, madügüntün gasu nau; agúahaadina hun, móunabun humutina.

18 Ariñagati giñe Heremíasi houn Rekabüna:

—Lariñahare Wabureme Suntigabafu, le Lubungiute Ísüraeli: "Kei adüga humaali lubéi le lubeibei hagücha Honadábü, 19 chouru numuti hun, au le Aburemei, le Suntigabafu, le Lubungiute Ísüraeli, luagu súnwandan lan ñeinbei lan aban ladügawagun Honadábü eseriwida nun".