1 Aburemei, ánhana asigeneha buma, garichatibu súnwandan;

gama lumoun lau sun lira, busentina hamuga nálügüdünibu libügürü fiu katei.

Ka uagu buidu lubéi lidin houn gürigia wuribatiña?

Ka uagu darangilu lubéi habagaridun ha gachansihadibaña?

2 Bunagua bumutiña, aba lárügüdün hálagüle,

aba haweinamudun aba hagindun.

Yarafatibu houn hayumulugugiñe,

gama lumoun tidan hanigi dísetibu hawéi.

3 Ánhabuti buguya, Nabureme, subudi bumutina;

aríagu biña nun ani subudi bumuti lueirin bínsiñe nun.

Barübaña gürigia ha keisi mudún lun háfarawagun;

makübáña lubá luéyuri áfarahani.

4 Dariba san ídaame mábeiñu lan múa, ani saü ligíame sagadi áraabu?

Hóunweguña animaalugu hama dunuru ladüga hariban lílana fulasu,

ha aritagubaña luagu marihinbani le hadügübei.

5 «Anhein buchá lubéi buagu,

éibaagua kóntüra gürigia ha eibu umutiña,

ida lubagia béibaagun kóntüra gürigia ha gabayuagutiña?

Anhein chugegua bubéi aba béiguadun lidan múa le úaraguati,

Kábagia badüga lidan lidabiaran Hordán?

6 Íbini bíbirigu ha hádangiñetiña biduheñu garabaguaaña buagun,

wáguatiña anababu banagangiñe.

Mafiñerabá hawagu ni ánhaña adimureha bun lau dimurei buiti.

7 «Ígira naali nageira,

mabusenrun naaru to meha nániboun.

Ru naaña gürigia ha meha wéiribei hínsiñe nun háhaburugun háganiñu.

8 Gürigia ha, ha meha nánigubaña

ítara haña nun guentó kei aban liñún dabiararugu;

áünhatiña nubaroun, ligía heyereegudúnbei nun.

9 Ítara haña numutuniña kei aban dunuru le buíduburiti liyu,

le úmabei hageindagua amu dunuru.

Higougu sun animaalugu áraabuna;

óundaragua humá lun hadinerun!

10 Saraguhaña ábutigu ha áganiñu adügüraguti nubeibein-agei,

adüga hamaali múa le meha hínsiñetimabei nun fulasume mageirawati.

11 Ígira hamaali lidan günringuaü, málouga, ani ariha numuti layahun.

Málaali sun fulasu, gama lumoun úati ebereseruti lau.

12 Ñǘbuintiña wügüriña gáñitiña lídangiñe sun wübü

lídangiñe fulasu mageirawati,

ladüga au, le Aburemei,

anuhein aban eféin numa to lunboun tagünrinchaguni fulasu

lúmagiñe lagumeseha dagá lumoun lébeha,

ani úabei darangilaü ni ka un.

13 Bunaguatiña türigu, aba halubahan hiiyu;

málati sun hawadigimari.

Mabuidunti alubahani, ladüga lanarime nigañi».

14 Lariñahare Bungiu hawagu gürigia wuribatiña ha lubesinanigu Ísüraeli, ha agünrinchagubalin múa le líchugubei keisi alagan houn Ísüraelina ha lumutuniña:

—Náhulubaña hamúanrugugiñe, ábame nasagaruni Hudá hádangiñe. 15 Gama lumoun lárigiñeme náhuluniña, hagudemedubaya nun, ábame nagiribudagüdüniña hamúanrugun, lun hageiroun. 16 Inarüni luagu hagía lan arufudahabaña houn numutuniña lun háfiñurun lidan liri Baali, gama lumoun guentó, gayaraabei haganóun haganagua numutuniña, ánhaña ánhara lun ligaburi hafiñerun numutuniña nuagu, fiñú hagíame lidan niri ariñageina: "Luagu libagari Aburemei". 17 Ánhañati gürigia ha mídintiña lau le nubeibei, náhulubaña lau sun hálagüle, ábame nagünrinchaguniña. Au, le Aburemei ariñagubalin.