1 Lidan ligadürün lirumudiri larúeihan Sedekíasi, le liráü Hosíasi Hudá, aba ladimurehan Aburemei lun Heremíasi, 2 lariñaga lun:

—Adügabá agürügaü luma aban yugu, ábame bíchuguni luagu bigiina. 3 Óunahaba dimurei hama ha ñǘbuinbaña arihei urúei Sedekíasi barüina hagía ñunsu Herusaléun, lun lurúeite Edomu, lun lurúeite Moabü, lun lurúeite Amón, lun lurúeite Tiru luma lun lurúeite Sidón. 4 Bariñagame houn lun hariñagun houn harúeitegu luagu nariñahare lan au, le Aburemei Suntigabafu, le lurúeite Ísüraeli: 5 Lau óunwenbu ubafu nadügei ubóu, gürigia hama animaalugu ha lídanbaña, ani gayaraati níchuguni lun le unti nabusenra. 6 Ru naali múa le lábugiñoun lubafu Nabukodonosoru le lurúeite Babilónia, sun animaalugu áraabuna ru naaña lábugiñoun lagumadihan. 7 Sun néchanigu lábugiñebaña lagumadihan, ligía, liráü luma libari, darime lachülürün oura lun giñe lerederun lageira lábugiñe hagumadihan néchanigu wéinamutiña hama urúeigu gabafutiña. 8 Néchaniguti o urúeigu ha mígiraguagüdüntiña houngua lun herederun lábugiñe lagumadihan Nabukodonosoru, nabeichubaña lau wuribu, ilamaü luma sandi darí herederun súngubei lábugiñe lugumadin. Au, le Aburemei ariñagubalin.

9 —Ligía lubeiti madüga humá gasu hau profetagu ha, garíaahatiña o afuranguagüdütiña uénedü, ni hau gabiñarahatiña ha ariñagubaña luagu subudi hamani le lunbei lasuseredun, ha ariñagubaña hun lun míchaagun humá hungua labun lugumadin lurúeite Babilónia. 10 Iyeeni le hariñagubei hun, le lunbei lasuseredun hun, lun hasagarún hageiragiñe, ábameti nachagaragunün lun hóunwegun. 11 Ánhañati ha íchaagutiña houngua labun lubafu lurúeite Babilónia, nígirubaña lun herederun hageira lun haganóun ñein luma lun hábunagun hanadürigu ñein. Au, le Aburemei ariñagubalin.

12 Au, Heremíasi, aba nariñaguni sun katei le lun Sedekíasi, le Lurúeite Hudá, ariñaga au giñe lun:

—Rugua humá hungua labun lubafu lurúeite Babilónia hau sun hánigu, lun habagaridun. 13 Kábagia lebu lun bounwen labu sun bageira lau wuribu, ilamaü luma sandi? Ladüga ariñagaali Aburemei luagu ítara luba lan lasuseredun houn sun gürigia ha míchaaguntiña houngua labun lubafu lurúeite Babilónia. 14 Madüga humá gasu hau profetagu ha ariñagubaña hun lun mígiraguagüdün humá hungua labun lubafu lurúeite Babilónia, lugundun iyeeni le hariñagubei hun. 15 Lariñahare Aburemei luagu mama lan ligía óunahabaliña; iyeeni hadimurehabei lidan liri Aburemei. Ítara, lachagaragubadün Aburemei, ábame hóunwegun hau sun profetagu ha ariñagubalin burí katei le hun.

16 Adimurehatina giñe houn fádirigu luma houn sun lílana fulasu, nariñaga houn:

—Anihán lariñagubei Wabureme: "Madüga humá gasu hau profetagu ha achoururubalin hun luagu málühali lan anhein águyugüdawa tumegen burí ténpulu Babilóniagiñe. Iyeeni le hariñagubei hun. 17 Madüga humá gasu hau, rugua humá hungua labun lubafu lurúeite Babilónia gabagari humaamuga. Kábagia uagu liabin uburugu le lun lárigirugurügaali lanme eredera? 18 Anhein inarüni lubéi luagu profetagu lan hagía, ani inarüni lan luagu adimurehaadina lan houn, amuriaha hamá numa, au le Aburemei Suntigabafu, lun mígirun nan lun lanügǘn tumegen burí ténpulu le aniheinguabei tidan lani lurúeite Hudá palasiu luma uburugu Herusalén lun Babilónioun".

19-21 —Dan le lanügünbalin lurúeite Babilónia Hekoníasi, le liráü Hoakimü le lurúeite Hudá Herusaléngiñe lun Babilónioun úara hama sun wügüriña wéirigutiña ha Hudaabaña hama ha Herusalénbaña, manügün lumuti wagabu, ni óunwenbu lagei duna lauti buronse, ni ebu, ni líbiri burí ílagu le erederubei ténpulurugu, luma tidan lani lurúeite Hudá palasiu luma uburugu Herusalén: 22 "Lanügǘba Babilónioun, ábame lerederun ñein darime nabusenrun nanügüniya lidoun fulasu le. Au, le Aburemei ariñagubalin".