1 Dan laganbunbei Pasuru, le liráü Imerü, le fádiri ani óunigihati le wéirigutimabei ténpulurugu lariñaguni Heremíasi katei le, 2 aba lóunahan abuleseirei, aba hagüürüni luagu aban tonpu wewe le luágubei lubenari Benhamín le gíribei Bena Íñugiñeti, tubadu ténpulu. 3 Aban weyu lárigiñe, aba lóunahan afaragadei Heremíasi luéigiñe tonpu, ábati lariñagun Heremíasi lun:

—Sansi laali Bungiu biri le Pasuru, luagu Magoru-misabíbü. 4 Lugundun lariñahare Aburemei: "Nadügüba lun banufudedun buáriuagua, hanufude hagíame bumadagu buéi; háfaragubaña háganiñu bumadagu bigibugiñe tau eféin. Nederegerubaña sun lílana Hudá lúhaburugun lurúeite Babilónia, ábame lanügüniña Babilónioun o láfaraguniña tau gusiñu. 5 Nederegerubei giñe sun lirisin uburugu le, sun lumúan, sun burí katei gebegiti le ñeinbei luma sun harisin lurúeitegu Hudá houn háganiñu lun hanügüni Babilónioun. 6 Buguya Pasuru, banügǘba Babilónioun hau sun biduheñu. Bóunweba ñein, ábame babunún ñein hau sun bumadagu ha únbaña badimureha iyeeni".

7 Aburemei, aba badaürünina lidan bererun,

héretibu nuéi ani gañei bumutina.

Eherahóuati nau sun oura, adaawaguati bula nau.

8 Sagü nadimurehan,

luágugubeirügü lanarimeniga luma günringuaü nadimureha.

Anabúatina adügǘwa ligía bula nau sun dan

ladüga nadimurehani bererun.

9 Ánhana ariñaga:

«Masaminarundigiaadina luagun Aburemei,

madimurehandigiaadina lidan liri»,

aba nasandiruni bererun nídangua

kei aban watu gemeti le ebeluruti lidoun sun nabu.

Áfaaguatina yebe lun nawanduni,

gama lumoun siñá numuti.

10 Aganbatina hagülülühan gürigia:

«Anihein anufudei lidan sun fulasu!»

Hariñaga: «Adüga wamá lidurun Heremíasi!»

Íbini numadagu agurabatiña nabulieidagun lun nábürühan.

Hariñaga: «Fagua gayaraabei weyeeduni lun wagañeiruni

ábameti waguburahani luagu sun le ladügübei woun».

11 Gama lumoun Nabureme, abunhein numa

kei aban awuribuhati le meferidirati;

hábürühaba ha éibaahabalina,

siñaame hagañeirunina;

heferidiruba, hanügüba busiganu le mabulieidúati.

12 Aburemei Suntigabafu,

buguya le óuchagubei lau irichaü,

buguya le arihubalin sun le haritagunrugubei gürigia,

arufudabéi babeichuniña gürigia ha nun,

ladüga ru naali nikesin búhaburugun.

13 Heremuha lun Aburemei!

Sefu lumutiña Bungiu gürigia ha nidiheribaña háhaburugugiñe wuribatiña.

14 Íñarawaguala weyu le nagaraüdünwabei,

mabinirualá weyu le tágurahanbalina núguchu!

15 Íñarawaguala le agundaaraguagüdübalin núguchi lau uganu

le ariñawagúbei lun luagu wügüri lan irahü liraübei!

16 Ítarala gürigia ligía

kei burí uburugu le lagünrinchagubei Aburemei lun sun dan!

Aganbalá agúarahani lánina igarigu binaafin

luma areinchuni lánina wuribu amidirugu,

17 ladüga máfarun lumutina Bungiu turageirugu núguchu!

Tuguyañoun hamuga numuaha,

magaraüdǘnwatina hamuga.

18 Ka uagu náfurida turageirugugiñe núguchu

lúnrügü náfagun igarigu luma idiheri,

luma lun nagumuchuni nibagari buin lau busiganu?