1 Aba lariñagun Aburemei nun:

—Agañeihabá aban ágeidinaü le lauti múa, banügame fiu agabutihatiña ha lílana fulasu hama fiu fádirigu ha ábutigu búmagua. 2 Ábame bidin luagun fulasu le mawübüriti le lani Ben-inomu, ligibugiñe bena le gíribei Lubenari Tiésütu, ábame bariñaguni uganu le lunbei nariñaguni bun ñein. 3 Bariñagame houn: "Lurúeitegu Hudá, hama lílana Herusalén, aganba huméi luganute Aburemei Suntigabafu, le Lubungiute Ísüraeli: Nóunaha aban lanarime wuribani luagun fulasu le, sunme le aganbuti luagu, ladindinraguba larigeirugu. 4 Ladüga hígirunina Ísüraelina, aba hadügüni fulasu le fulasume terencha; águdahatiña kupali ñein houn amu búngiugu ha buga ibidiñetiña houn, ni houn hagüchagu, ni houn lurúeitegu Hudá, aba habuinchagüdüni lau hata gürigia maduruntiña. 5 Adügatiña burí giñe latarü lun hágudahaniña hasaanigu keisi adagaragüdüni gudawarügüti lun Baali, katei le mariñagun nubéi houn, maritagúngubei numuti. 6 Ligía anitebei lubéi dan lun mámaali lanme Tófeti liri fulasu le, ni fulasu wayati le Ben-inomu, Fulasu Wayati lánina Áfarahani, ligíaba liri. Au, le Aburemei ariñagubalin. 7 Nagünrinchagubei laransehan Hudá luma Herusalén lidan fulasu le. Nadügüba lun háfaraguniña háganiñu, lun leseriwidun hágubu lun héiginme dunuru hama animaalu gáñitiña. 8 Nadügübei uburugu le ábanme fulasu mageirawati, ábame katei hanufunati. Sunme ha ásügürütiña ñéingiñe, hanufudedaguba, ábame taweiridun hanigi lau harihin günringua lan sunsuinagubei. 9 Nadügüba lun héiginiña gürigia harahüñü guánarügü, hougua hagíame houngua danme hegeyedaguni háganiñu uburugu".

10 —Lárigiñeme bariñaguni katei le, ábame babouchaguni ágeidinaü hagibugiñe gürigia ha úarabaña buma, 11 bariñagame houn: "Lariñahare Aburemei Suntigabafu: Nagünrinchagubei uburugu le hau sun lílana kei labouchawagun ágeidinaü le lauti múa le siñaali laranserún. Habunúba gürigia hilaguaaña Tófeti, ladüga úaalime amu fulasu lun habunún ñein. 12 Ítara luba nadüga lun uburugu le, hau sun lílana. Nígirubei kei Tófeti. Au, le Aburemei ariñagubalin. 13 Muna burí to Herusalénboun, hani lurúeitegu Hudá palasiu luma burí tábulugu muna to ñéinñaha lubéi hágudaha kupali houn amu búngiugu, lanügüba kei fulasu burí wíyeti ligibugiñe Aburemei ítara giñe kei Tófeti".

14 Lárigiñe, aba lagiribudun Heremíasi Tófetigiñe le buga ñeinhin lubéi lóunahei Aburemei adimureha lidan liri, aba lararamun tibürürünrugu ténpulu, aba lariñagun houn gürigia:

15 —Lariñahare Aburemei Suntigabafu, le Lubungiute Ísüraeli: "Nóunahaali sun abeichúni le uágubei nariñaga luagun uburugu le luma luagun sun aüdü le yarafabei lun, lugundun máhatiña haganbuni nererun".