1 Lariñaga Aburemei nun:

—Beiba, bagañeihame aban galasunsiyu tautu gamisa to linu, ábame badaürünu biranaagua, gama lumoun madüdüragüdaboun lau duna lubaragiñe badaürünu. 2 Aba nagañeihanu galasunsiyu tuguya kei lariñaguni Aburemei nun, aba nadaürünu. 3 Ábayati ladimurehan Bungiu numa, lariñaga nun:

4 —Barüboun galasunsiyu to bagañeihaboun, to buáguboun, beiba lárurugun duna Éufüratesi, ábame baramudunu ñein lidan luhuyun aban dübü.

5 Ábati nidin larun duna Éufüratesi, aba naramudunu galasunsiyu ñein kei lariñaguni Bungiu nun.

6 Saragu dan lárigiñe, aba lariñagun Bungiu nun:

—Beiba anügoun galasunsiyu to uáguboun nariñaga bun lun baramudunu laru duna Éufüratesi.

7 Aba nidin, aba nasagarunu galasunsiyu tuguya lídangiñe fulasu le ñein lubéi naramudoun, gama lumoun ñalaaru, meseriwínharu lun ni kata. 8 Ábayati ladimurehan Aburemei nun, 9 lariñaga nun:

—Ítarameme luba nagünrinchaguni lupantan Hudá luma Herusalén. 10 Gürigia wuribatiña ha, ha máhabaña haganbuni nererun, hadügei lagübüri haritagun. Houdin hárigi amu búngiugu lun heseriwidun houn luma lun háhuduragun houn. Ítara haña kei galasunsiyu to, meseriwínharu lun ni kata. 11 Ítara kei támurudun galasunsiyu luagu iranaaguaü, ítara haña meha lánigu Ísüraeli hama lánigu Hudá numa, lun yebe hagíaba lan numutuniña, lun hasubudiragüdüni niri, lun hamuga hagíaba lan nuéirigun, gama lumoun maganbun hamutina. Au, le Aburemei ariñagubalin.

12 Ariñagabá giñe houn:

—Lariñahare Aburemei, le Lubungiute Ísüraeli: "Gayaraati labuinchawagüdün furumiñeguarügü ágeidinaü tau diwéin!" Hóunabubadibu Ísüraelina, hariñagame bun: "Ibidiñeti funagia woun luagu gayara lan labuinchawagüdün furumiñeguarügü ágeidinaü tau diwéin?" 13 Bariñagame houn: "Lariñahare Aburemei: Nabacharuadagüdaaña sun ha aganóubaña lidan ageiraü le; urúeigu ha añuurubaña luagu lálana larúeihan Dawidi, fádirigu hama profetagu hama sun ha aganóubaña Herusalén. 14 Lárigiñeme ábame nabuguchagüdüniña hawougua ítara kei labuguchun aban weru luagu amu lun labouchagun, dandu agübürigu kei isaanigu. Magudemenbaña nun; nagünrinchagubaña magudemehabuga. Au, le Aburemei ariñagubalin".

15 Ísüraelina, ayanuhaalitia Aburemei!

Mapantan humá, teni humá lun le lariñagubei.

16 Ru humá uéiriguni lun Aburemei le Hubungiute,

lubaragiñe lóunahani lanarime luburiga lun hachugeragun lidan,

heiguadaméti ladüga burí wewe áraabu;

lídanmeti hagúahan luagu larugounga luburigarügüba hadarira.

17 Anhaün madügün gasu,

nayahuba aramudaguarügü ladüga hupantan;

láwiyuhaba águiraü nágurugugiñe luéigiñe hanügǘn lánigu Aburemei adaürawagúa.

18 «Ariñagabá lun urúei luma tun urúei úguchuru:

"Rarí humá luéigiñe lálana arúeihani,

ñurú humá múarugu,

ladüga heigua ridi le meha ewendedagüdübalün hábulugugiñe".

19 Geyewagua luburugute burí Négebü;

siñati lásügürün ni aban.

Sagawagua sun lílana Hudá hageiragiñe

lun hanügǘniwa lidoun amu ageiraü.

20 Iñura huméi harihin,

ariha humá liabin ágani luéigiñe nórute.

Hagaña gürigia ha níchugubaña labun baríaahan,

gürigia ha meha áubaña bapantaha?

21 «Kábagia bariñaga Herusalén,

danme hagumadirunibu gürigia ha buga únbaña barufudaha?

Basandiruba igarigu kei würi to agaridutu.

22 Ánhabu álügüdaha ka lan uagu lasusereda le bun,

lunti basubudiruni luagu ladüga lan lanarime bifigoun;

ligía haragachaguagüdünbalibu, ani adüga haméi habusenrun bau!

23 Gayaraati funagia lasansiruni aban Etiopíana líwurin lura?

O gayaraati lagidaruni géigusi lédehan lura?

Ni giñe huguya le héchuhalibei adüga wuribani,

siñati hadügüni le buídubei.

24 Ligía nachagaraguagüdaadün lubéi kei ifei le

lanaahan garabali luéigiñe fulasu mageirawati.

25 Ligía bisinunbei Ísüraeli,

ligía badünabei lun nadügüni bun.

Au, le Aburemei ariñagubalin.

Ladüga babulieidagun nuéi,

aba bíchuguni bemenigin hawagu búngiugu ha iyeenitiña.

26 Nasurusugüdaadibu giñe,

lun banügün busiganu.

27 Ariha naali lueirin bínsiñehabu, bagabarahan,

lubusigaridüna ligaburi bahoruhan,

luma liwiye bóuserun luagu burí wübü luma burí áraabu.

Fugiabu buguya, Herusalén!

Átiribei san dan bau wíyeñu nigibugiñe?»