1 «Hudá, bürüwañu liña bifigoun lau chíchili le lauti gürabu,

lau lígiri déimaani luagu tidübüri banigi to dereboun,

lóubawagu burí bani latarü.

2 Haritaguatiña birahüñü luagun burí latarü

hama burí guáriuagu sagüráutiña

ha meha híchugubaña lubadu tídibu wewe hilumatu

luma burí luagu wübü íñuburiti

3 luma luagu burí wübü áraabu.

Ladüga bifigoun, nadügüba lun líweruhoun birisin,

asagarahóua ligíame buwübüri burí le sagüráubei lidan sun fulasu.

4 Bígirubei múa le níchugubei bun keisi balagante,

ábame nígirunibu hadamunme báganiñu lidan fulasu le ibidiñeti bun,

ladüga durunguaali nigañi

kei aban watu gemeti le lunbei lagumuchaguagüdünibu».

5 Lariñahare Aburemei:

«Íñarawaguati sun le adiñurutu lanigi nuéi,

le íchugubalin lemenigin hawagu wügüriña,

afiñe ligía luagu hámaba lan ladarira ídemuei.

6 Ítara luba kei búbugati le lídanbei fulasu mageirawati,

le móunigirunwati, labadinagua burí dübü láhücha

lidan múa le mabuidunti tun nadü,

fulasu le úatiña aganóutiña ñein.

7 «Gama lumoun biniwati gürigia le afiñebei nuagu,

le íchugubalin lemenigin nuagu.

8 Ítara luba kei aban tídibu wewe le abunúti laru duna,

le achawaragubalin lílagüle lidoun duna,

ani manufudeti dan le liabin lumabeiniga,

ladüga hilumati lubana súnwandan.

Mafuudunti lidan lidaani lumabeinga,

ani ginti súnwandan.

9 «Úati ni kata geyeedaguaditi ani salufuri

kei hanigi gürigia.

Kaba gayara gunfurandalanu?

10 Au, le Aburemei, le subudihabúbei tun anigi,

subudinéi lilulin-agei aritaguni;

ani fáyeinei kada aban keisi ligaburi lóuserun».

11 Le arisiduti lau marumani,

ítara liña kei dunuru to áfugahaboun hagañén amu dunuru.

Lígirubei lirisin, lábugiñe sun héregili lan,

ani lagumuhóun oura, ábanraüyabei hanwoun ibidiougua tau.

12 Ítara tiña watenpulun kei aban lala urúei wéiriguti,

íñuñein lúmagiñe furumiñeti dan.

13 Aburemei, buguya lemeniginbei Ísüraeli.

Sun le ígirutibu, lanügüba busiganu,

sun le adiseduti buéi,

lagumuchaguba kei aban iri le abürüdǘti múarugu,

ladüga lígirunibu, buguya le lísensen duna diliti.

14 Areidaguagüdabana Nabureme, ábame nareidagun;

sálbabana, ábame nasalbarun,

ladüga búnrügüñein níchiga uéiriguni.

15 Ariñagatiña gürigia nun:

«Ka suserebei lun lererun Aburemei?

Gúnfulila guentó!»

16 Lau sun lira, mebegiruntina lun bóunahan wuribani hawagun,

mayumahan au lamiselu houn.

Subudi bumuti buidu ka lan nariñagubei,

lugundun biñuarü nariñagei.

17 Magarabaaguabá nun anufudeime,

lugundun buguya naramudaguagülebei lidan lidaani nigarigu.

18 Rúbaña ha éibaahabalina lidoun busiganu,

mamalá au bíchiga,

hagialá anufudeda, mama au.

Barüba íruni hawagun,

günringuabaña sunsuinagubei.

19 Aba lariñagun Aburemei nun:

—Beiba, bararamame luagu bena le gíribei Lubenari Aüdü, le ñéingiñe lubéi hebelura luma háfurida lurúeitegu Hudá, badügeime giñe ítara luagu sun bena le Herusalénbei. 20 Bariñagame houn gürigia: Urúeigu hama sun lílana Hudá, sun lílana Herusalén ha ebelurubaña luéigiñe bena le, aganba huméi lererun Bungiu. 21 Lariñahare Aburemei: Weyu lánina emeraaguni, luagu hínsiñehabu lun hibagari, manaagua humá anügüni, mebelaagüdün humeime luéigiñe lubenari Herusalén. 22 Masagara humá giñe ni aban anügüni húbiñegiñe lidan luéyuri emeraaguni, madügün huguyame ni aban luwuyeri wadagimanu lidan weyu ligía. Derege huméi luéyuri emeraaguni nun, kei meha nariñaguni houn hagüchagu. 23 Gama lumoun madügüntiña gasu nau, madügün haméi le nubeibei, dererügüti haganbun, máhatiña hadügüni le narufudahabei houn.

24 —Nariñahare au, le Aburemei: Adüga huméi le nubeibei, manüga humá anügüni ásügüragüda luéigiñe lubenari uburugu lidan luéyuri emeraaguni; mawadigimarida humá lidan weyu ligía. 25 Anhein hagunfulira le nubeibei hun, súnwandan ñéinbaña lan urúeigu luagu lálana larúeihan Dawidi, lun hebeluhan tidan hakarün luma hawagu hagabayun luéigiñe lubenari uburugu le, úara hama ábutigu, hama lumutuniña Hudá luma Herusalén. 26 Hayabinguaba gürigia lídangiñe burí luburugute Hudá le burí geyegubei lau Herusalén, luma lumúanrugugiñe Benhamín, luéigiñe fulasu mawübüriti luma lóubawagugiñe Négebü le dabíara. Hanügüba burí animaalugu ténpulurugun lun adagaragüdüni le gudawarügüti luma burí lun líbiri adagaragüdüni, fulúaruauti, kupali luma idewesei le lánina eteingiruni. 27 Gama lumoun anhein madügün humá le nubeibei, lun hareiduni luéyuri emeraaguni luma lun mebelaagüdün humá anügüni luéigiñe lubenari Herusalén lidan weyu ligía, níchuguba watu gemeti lubenari uburugu, aban watu gemeti le lunbei lagünrinchagunu palasiu burí to Herusalénboun, ani úabei ni aban lun gayara lani éñegucha.