1 Lidan lisedün hati, aba lidin Ísümaeli le liráü Netaníasi uburugu Misüpá libari Elisamá, hádangiñeti iduheñu ha lánina arúeihani arihei Gedalíasi. Ñǘdüntiña diisi wügüriña luma. Ñein Misüpá, dan le añaha lubéi eiga lidan aban, 2 aba lásaarun Ísümaeli hama diisi wügüriña ha lúmabaña sódini, aba háfaruni Gedalíasi tau eféin, Gedalíasi le buga líchugubei lurúeite Babilónia keisi gumadimati Hudá. 3 Áfaragua lumutiña giñe Ísümaeli sun huríu hama súdaragu Kalüdéana ha lúmabaña Gedalíasi uburugu Misüpá.

4 Larugan lárigiñe lafarún Gedalíasi, dan le úagiña aganbutiña luagu éibaaguti, 5 aba hachülürün gádürü-wein wügüriña Sikemügiñe, Silogiñe luma Samariagiñe sáwaguañu hádiuma, hucheche hadaüragun luma burí biti hawougua le hadüga houngua. Barüina haña giñe idewesei fulúaruauti luma kupali lun hadagaragüdün lun Aburemei ténpulurugu. 6 Ábati liabin Ísümaeli habaroun Misüpágiñe, ayahuaheina luagu üma. Kei le aubei ladunragua hama, aba lariñagun houn:

—Higougu harihei Gedalíasi le liráü Aikamü.

7 Gama lumoun kei hachülürün lamidangua uburugu, aba láfaraguniña Ísümaeli hama luwügüriñanigu, aba háguruniña lidoun aban fusu huliliti. 8 Gama lumoun ñéinñanu diisi hádangiñe wügüriña hagía ariñagutiña lun Ísümaeli:

—Máfarabawa, anihein türigu, sewada, garaba luma sírudu aramudañu wama áraabu.

Ábati máfaragun lániña Ísümaeli kei ladüga houn hapanaagu. 9 Fusu le ñeinhin lubéi líchigaña Ísümaeli wügüriña ha láfaragubaña, ligía lememe meha ladügagüdübei urúei Asá lun laramudagun luéi Baasá le lurúeite Ísüraeli. Wéiriti fusu ligía, gama lumoun buinti hau gürigia ha láfaragubaña Ísümaeli. 10 Aba giñe ladaüraguniña Ísümaeli lirahüñü urúei ha würiña hau sun gürigia ha erederubaña Misüpá, ha buga lígirubaña Nebusaradán lábugiñe laríaahan Gedalíasi. Aba ladaüraguniña Ísümaeli, aba lidin lau laritagun lun lásügürün lumúanrugun Amón.

11 Dan le laganbunbei Hoanán, le liráü Karéa hama hábutigu milidaru ha lúmabaña luagu áfarahani le ladügübei Ísümaeli, 12 aba hóundaruniña sun hamutuniña, aba houdin ageindagua luma. Aba hadariruni lurugabu lareidaha duna wéiriti le Gabaónbei. 13 Dan harihinbalin ha lanügübaña Ísümaeli adaürǘwa Hoanán hama sun hábutigu milidaru ha úarabaña luma, aba hagundaaragun, 14 aba houdin lumoun Hoanán. 15 Gama lumoun aba léibaagun Ísümaeli hama widü wügüriña hádangiñe luwügüriñanigu luéi Hoanán, aba houdin lageiroun Amón.

16 Aba larihin Hoanán hama hábutigu milidaru ha úarabaña luma hau súdaragu, würiña hama irahüñü hama ha buga íñugubaña lidan gumadi ha lanügübaña Ísümaeli dáüwañu Misüpágiñe lárigiñe láfaruni Gedalíasi, ha lagiribudagüdübaña Hoanán Gabaóngiñe. 17 Aba héibugun darí hachülürün Gerutu-Kimamü lurugabu Belén, le ñein lubéi hararamagua. Haritagunti buga lun hasigirun darí hachülürün Ehiptu, 18 lun hesefurun hawéi Kalüdéana, lugundun hanufudetiña hawéi, ladüga láfaruni Ísümaeli Gedalíasi, le yebe líchugubei lurúeite Babilónia gumadimatime fulasurugu.