1 Anihán uganu líchugubei Aburemei lun Heremíasi:

2 —Lariñahare Aburemei le Lubungiute Ísüraeli: Abürühabei sun le ariñaga náalibei bun tidan aban líburu, 3 lugundun anitebei weyu lun nasansiruni habunurun numutuniña Ísüraelina hama Hudaana. Au, le Aburemei ariñagubalin. Nagiribudagüdübaña lidoun múa le meha níchugubei houn hagübürigu keisi hamegen.

4 Anihán ñunsu lúmagiñe Aburemei libügürü Ísüraeli luma Hudá. 5 Lariñahare Aburemei:

«Aganbúati agúarahani lánina lueirin anufudei luma lúan darangilaü!

6 Álügüdaha humá anhein gayara lubéi lágurahan aban wügüri.

Kati uagu narihaña wügüriña ayubiahóua lau gáriti

kamá hamuga hagariduña?

Ka uagu harumalida sun hagía?

7 Aniteeli aban lanarime weyu,

aban weyu le úagili amu libe!

Ábanbei dan le lidaani idiheri houn lumutuniña Hakobu,

gama lumoun nesefurubaña.

8 Au, le Aburemei Suntigabafu, nariñahare:

Nesefurubaña numutuniña lábugiñegiñe yugu le lánina amudirawaguni,

mamudiragundigia hamaañame terencha.

9 Ábame heseriwidun nun,

au le Habungiute, luma lun Dawidi,

le lunbei níchuguni harúeiteme.

10 «Nariñahare au, le Aburemei:

Manufudeda humá, lánigu Hakobu, le nubuein;

manufudedabá Ísüraeli,

ladüga nesefurubadibu hau sun birahüñü

lídangiñe ageiraü díseti le ñeinhin lubéi hanügaün.

Babagaridayaba darangilu mañawarihounga bun ani madiheriga.

11 Nariñahare au, le Aburemei,

luagu búmañadina lan lun nesefurunibu.

Nagünrinchagubaña sun néchanigu ha ídounbaña nachagaraguabu.

Ánheinti buguya, magünrinchagun nubadibu;

béirügü nubadibu keisi badüna lun babeichún;

mígirun nubadibu mabeichúnga».

12 Lariñahare Aburemei:

«Mareidaguaditi bugumein,

máraninati wuribati le buágubei.

13 Úati kaba lan etenira bun,

úati kaba lan agaraniha lun biti le buágubei

ani maraninatibu.

14 Bulíei hamaadibu sun bubúaligu,

meberesenhaaña bau.

Ladüga aba níbugunibu

kamá hamuga bágani au,

bei numutibu buidu luagu liibe wuribati le badügübei,

luagu liibe bifigoun.

15 Ka uagu bagúaraha luagu biti le buágubei?

Máraninati bigarigu.

Ladüga lueirin buriban

luma liibe bifigoun nóuserabu ítara.

16 Gama lumoun, sun le adügüti wuribati bun,

ladügǘba giñe wuribati lun,

ani hanügǘba báganiñu lidoun ageiraü le mama hageira;

nadügüba lun hasagarahóun ha asagarahabalibu,

luma lun líweruhoun hawéi ha íweruhabaña buéi.

17 Náguyugüdübei bátuadi bun,

nagaranihaba lun biti le buágubei,

íbini ánhaña ariñaga báganiñu:

"Fuiwa Sión, meberesenwaali lau".

Au, le Aburemei ariñagubalin».

18 Lariñahare Aburemei:

«Nasansirubei habunurun linechanin Hakobu,

gudemehabubadina lun hageira;

lararamayaba burí uburugu lidan guánarügü lárigirugu,

tuma burí palasiu lidan tubara.

19 Láfuriduba uremu lánina eteingiruni

luma éherahani lánina ugundani hádangiñe.

Malouguadunbaña ladüga nadügüba lun haganwoundun.

Michugúnbei mebereseni hau

lugundun níchuguba uéiriguni houn.

20 Ítara haba Ísüraelina kei meha furumiñe;

deregüdagu haba nigibugiñe,

nabeichubaña ha íchugubaña lidere dan houn.

21,22 Hádangiñeba láfurida hábuti;

láfuriduba aban agumadihati hádangiñe guánarügü.

Nadügüba lun hayarafadun nun, lugundun,

Kaba hamugagia ayarafada nun?

Hagíaba numutuniña, aume Habungiute,

Au le Aburemei ariñagubalin».

23 Ítara liña ligañi Aburemei kei aban luriban dan,

kei aban garabali le lauti herigini

le áfurubei hawagun wuribatiña.

24 Meredebei ligañi Aburemei,

darime adüga laali le laritagubei ladügün.

Lachülürüba dan lun gunfuranda humani burí katei le.