1 Dan le lageindaguña lubéi Nabukodonosoru le lurúeite Babilónia hau sun lisudaranigu ha lílana sun néchani ubouagu ha lábugiñebaña lubafu, kóntüra Herusalén, luma sun uburugu le yarafabei lun, aba ladimurehan Aburemei lun Heremíasi, lariñaga lun:

2 —Au, le Aburemei, le Lubungiute Ísüraeli, nariñaguña bun lun bidin ariñaga lun Sedekíasi le lurúeite Hudá, luagu nariñahare lan au le Aburemei: "Nadüga lun lárügüdüni lurúeite Babilónia uburugu le, lun láguduni. 3 Mesefubadibu, bábürühaba lúhaburugun; hárügüdübadibu ábame hederegerunibu lun, lárigiñeme barǘ hamaadibu lan ligibugiñóun, ábame banügǘn Babilónioun. 4 Lau sun lira, Sedekíasi le lurúeite Hudá, aganbabéi le lunbei nariñaguni bun: Mámaba tau eféin bafarúa. 5 Bóunweba darangilañu, lágudahouba ibiñein lidan bábunahoun kei lágudahoun lidan hábunahoun bagüchagu ha arúeihabaña bubaragiñe, hayahuba bárigi ariñageina Warúeite! Warúeite! Au le Aburemei ariñagubalin ani runei nererun".

6 Aban lariñaguni profeta Heremíasi sun le lun urúei Sedekíasi uburugu Herusalén. 7 Sunti dan le, añaha buga lisudaranigu lurúeite Babilónia ageindagua kóntüra Herusalén, Lákisi luma Aseká, uburugu burí baríeiruati ligíarügaali biama uburugu ligía eredera luma Hudá.

8 Aba ladimurehan Aburemei lun Heremíasi, lárigiñe ladügün urúei Sedekíasi aban daradu hama sun lílana Herusalén lun hígiragüdüniña sun idamunigu. 9 Lariñahare lidan daradu ligía lun sun lan ha gadamunbaña Ebüréana, lun lan hígiragüdüniña, lun ua lan ni aban gadamunti huríu líledi. 10 Aba hánharun sun ábutigu hama sun híbiri gürigia lun le lariñagubei daradu ligía, aba hígiragüdüniña hadamun, aba mafosurundigia hamaaña lan lun heseriwidun houn. 11 Lárigiñe, aba hasakürihan luagu hígiragüdüniña, ábaya hafosuruniña lun heseriwidun houn.

12 Ábati ladimurehan Aburemei lun Heremíasi, lariñaga lun:

13 —Au, le Aburemei le Lubungiute Ísüraeli, adügatina aban daradu hama hagüchagu dan le nasagarunbaliña Ehiptugiñe, le ñein lubéi meha heseriwida keisi idamuni. Aba nariñagun houn: 14 Lun sagü lan sedü irumu lun lan hígiragüdüni furumiñeguarügü ebüréu le alugurúti houn, le seriwihali houn luagu sisi irumu. Gama lumoun madügüntiña hagüchagu gasu nau, madügün haméi le nubeibei houn.

15 —Huguyati sansi humaali yebe higaburi, adüga humaali yebe le aubei nagundaara, lau hígiragüdüniña hupaisanun ha idamuni. Ariñaga huguya luagu hagunfulirubei lan daradu le hadügübei nigibugiñe tidan ténpulu to anuadirúaboun nun.

16 —Gama lumoun lárigiñe, aba lasansiragun haritagun, aba mineben lan niri hun lau hafosuruniña idamuni ha buga ígiragüda humaañabaña lunya heseriwidun hun keisi idamuni.

17 —Nariñahare lubeiti au, le Aburemei: Huguya, madügün humuti le nubeibei, ladüga mígiragüdün humutiña hupaisanun ha idamuni; nígiraali lubeiti wuribu, sandi luma ilamaü, lun ladügün aban katei hau le lunbei lanufudedagüdüniña sun néchanigu. Au, le Aburemei ariñagubalin.

18,19 —Adügatiña lábutigu Hudá luma Herusalén hama sun musu ha palasiurugubaña, fádirigu hama sun híbiri lílana fulasu aban daradu nigibugiñe: Aba habouchagun aban bágasu lidan bián murusun, aba hásügürün labadinaguagiñe biángubei murusun ligía. Gama lumoun lárigiñe aba hadüraaguni daradu, magunfuliruntiña lau hererun.

20 —Nábürügüdübaña lubeiti labun habafu háganiñu lun háfaraguniña, ábame leseriwidún hágubu lun héigini dunuru ha géigaditiña úi, hama animaalugu gáñitiña.

21 —Nábürügüdübei giñe Sedekíasi hau sun ha agumadihabaña luma háhaburugun háganiñu, háhaburugun lisudaranigu lurúeite Babilónia, lau sun láramaguaali lan lageindagun hama guentó.

22 —Nariñaguba houn lunya hayabin ageindagua luma uburugu le, lun hárügüdüni lun háguduni. Nadügüba lun lerederun líbiri luburugute Hudá málouga, úouga ni aban aganóuti ñein. Au, le Aburemei ariñagubalin.