1 Aba ladimurehan Aburemei nun, lariñaga:

2 «Beiba, badimurehame houn Herusalénna;

bagúaraguame lun haganbunibu buidu, bariñagame:

"Lariñahare Aburemei:

Haritagua numuti dan meha nibureingidibu,

gúnfulitibu meha numa,

lídanbei meha namarieidun buma,

hínsiñetina meha bun,

falá bumutina lídanbei básügürüni fulasu mageirawati,

múa le ñein lumuti mábunawagun lan ni kata".

3 Sánduti meha Ísüraeli nun,

lubuidun-agei meha nalubahan.

Ha meha adügütiña wuribati lun,

nabeichuniña lau nóunahan wuribani hawagun,

au le Aburemei ariñagubalin».

4 Ladügawagun Hakobu, iduheñugu Ísüraelina, aganba huméi lererun Aburemei. 5 Lariñahare Aburemei hun:

«Ka wuribati hadarirubei hagüchagu nuagu; hadisedunbei nuéi?

Aba houdin hárigi búngiugu ha ni kátabaña,

aba giñe hasalirun lun ni kátame.

6 Máluahan hamutina,

au le asagarubaliña Ehiptugiñe,

aba nadundehaniña lidan fulasu mageirawati,

fulasu mábeiti le buin umuti lau saragu gudungu,

múa madunariti, le hanarimeti dencha lan,

le ñein lumuti ua hamá aganóutiña,

le ñéingiñe lumuti másügürün lan ni aban.

7 Au anügübalün lidoun múa arandarati le,

lun heigin lídangiñe lubuidun-agei le áhüchübei ñein.

Gama lumoun aba hiabin, aba hawiyeduni numúan,

aba hahahünedagüdünina lun ageiraü le.

8 Máluahan hamutina fádirigu,

masubudirun hamutina ha arufudahabalin lúrudu nageira,

iñuraguatiña ábutigu houngua nuagun,

adimurehatiña profetagu lidan liri Baali,

aba houdin hárigi guáriua ha móunitiña lun ni kata».

9 «Ligía nariñagunbei au, le Aburemei:

Naguseragüdübadün hau sun hibañan.

10 Heiba luagun burí ubouhu le luéigiñebei oubaü

le ñéingiñe lubéi laboucha weyu harihame;

óunaha humá aban gürigia Kedarü lun larihin buidu,

ariha humaamugei anhein

11 aniheinhali lubéi aban hanechanin gibe tubungiutegu

asansirutiña habungiutegu.

Ani búngiugu ha mama tímatimaatiña!

Ánhañati numutuniña ígira hamaadina, au le haweirigunbei,

hawagu guáriua ha meseriwíntiña lun ni kata.

12 Hanufudeguabá lau katei le sielu!

Badadagara lau anufudei!

Au le Aburemei ariñagubalin».

13 «Adügaaña lílana nageira dóbuli figóu:

Ígira hamaadina au le lísensen duna wínwanti,

aba hadügün hafusun houngua,

fusu le fuduti le mágüdahanti duna.

14 «Mama idamuni Ísüraeli, mama lidan adamurawaguni lagaraüdǘwa.

Kati uagu lasagarahóua?

15 Adürürühatiña harahüñü liñún lubaroun,

iñura hamuti hamala, aba hígiruni lageira lidan günringuaü,

gudawaali burí luburugute,

úati ni aban erederuti lidan.

16 Bougua hamuti Ménfisina

hama Táfünesina bichügü.

17 Lasuseredunbei lira bun,

ladüga bígirunina au le Aburemei le Bubungiute,

léñaha adundehabalibu lidan bémeri.

18 Guentoti, Kati bagañeirubei lau bidin Ehiptu

ata duna lídangiñe Nilu?

Ka bagañeiruña lau bidin Asiria

ata duna lídangiñe Éufüratesi?

19 Labeichubadibu buriban guánarügü,

lasiadirubadibu magunfulirun ban numa.

Subudibéi lubeiti, arihabéime luagu wuriba lan

ani gifi ligía bígiruni Aburemei le Bubungiute,

luma míchugun ban inebesei nun,

liña lariñagun Aburemei Suntigabafu».

20 «Lúmagiñe binarü biñuragua bungua nuagun,

máhatibu baganbunina.

Ariñagatibu: "Mabusenruntina neseriwidun".

Lanwoun sun lira, róuntibu tuma aban horu,

ligibuagu sun wübü íñuti,

luma tábugiñe tídibu wewe hilumatu.

21 Buná numutibu keisi aban tídibu beibei to buítimatu,

kei tídibu beibei to fínutimaboun ila.

Gama lumoun ámuñeguaadibu saragu darí lun ibidiñeguaadibu lan nun!

22 Íbini ánhabu achibagua bungua lau achibaguagülei le héretimati,

ani yusubéime sun sabun le babusenrun,

narihamémebei lidasein bifigoun.

Au le Aburemei ariñagubalin.

23 Ida lubagia bariñagun: "Madaseiruntina,

méibugun au hárigi baaligu?"

Arihabéi ka lan buga bigaburibei lidan fulasu wayati,

arihabá lun sun le badügübei,

ítara biña kei aban kameyu maganbaditu

to éibaaguboun luagun sun oubaü,

24 o kei burigü hiñaru to áraabuna,

aba téibaagun dabíararugun ehenheina.

Lidan tabusenragun tungua úati gayaraati lederaaguagüdünu.

Anhoun láluaha aban burigü mabuchabei luagu anhoun darí lan,

súnwandan ladarirunu lidan lidaani tabusenragun tungua.

25 «Ísüraeli, magüreweidabéi bugudi éibaagua mageidinga,

mígiraba lun lamabeidun bagülerugu!

Gama lumoun bariñaga: "Siñati,

hínsiñetiña terencha nun ani néibuga hama" ».

26 «Ítara kei labusigaridagun híweruti dan le lárügüdüniwa íweruha,

ítara luba lanügün Ísüraeli busiganu,

lurúeitegu, lábutigu, lufadirinigu hama lánigu profeta;

27 ladüga ariñagatiña íbini lun aban tídibu wewe:

"Buguya núguchibei",

ariñaga hagía lun aban dübü:

"Buguya núguchuboun".

Nunti, michu hamuti hagibu, hanagan híchugubei nuagun.

Gama lumoun lidan hadariragun houngua lidan denchaü aba hariñagun nun:

"Higabu besefurawa!"

28 Hudá, Hagaña san bubungiutegu ha badügübaña?

Gíbetiña bubungiutegu kei liibe buburugute!

Ñübuin hamaati ariha anhein gayara hesefurunibu

danme lachülürün bilamiserun!

29 Ka nidurunbei huma,

garabaguaadün lubéi súngubei nuagun?

Au le Aburemei ariñagubalin.

30 Málati nabeichuniña hisaanigu,

mafurendeirún hamuti arufudahani.

Huguya guánarügü kei liñún gáñitiña,

áfaragua humutiña hani profetagu.

31 (Huguya giñe ha lirahüñüna dan le,

teni humá lun luganute Aburemei.)

Ísüraeli, ítara niña funagia kei aban fulasu mageirawati bun?

Odi kei aban fulasu le dénchati?

Nánigu, Ka uagu hariñaga:

Wagía wóunguaadiwa, magiribudúndigiaadiwa bun?

32 Gayaraati funagia tabulieiduni aban würi

to luntu tamarieidun tílagu burí lauti golu?

Ánhañati numutuniña, binarü habulieidana.

33 Ma lisubudin üma bun dan le báluahaña lan bubúali!

Máisturu buguya tidan lileskuelan wuribani!

34 Dáseiñutiña badaüragun lau hata gudemetiña hama maduruntiña

gürigia ha márügüdün bumutiña lidan ni aban duru.

35 Gama lumoun lau sun lira, ariñagatibu:

"Maduruntina, magañihali Aburemei numa".

Kei ariñaga bubéi luagu mafigoun ban, naguseragüdaadibu.

36 Ka uagu bóufudaha asansihaña bumadagu?

Lachararuba giñe Ehiptu bun kei lachararun Asiria.

37 Bagiribuduba Ehiptugiñe buin lau busiganu,

lugundun fui naaña ha buga uágubaña bemenigida,

ani magañeirúnbadibu ni kata lau bumadagua hama».