1 Lariñaga Aburemei nun:

—Beiba tidan lani urúei palasiu, bariñageime uganu le, 2 ligibugiñe lurúeite Hudá, le ñunbei luagu lálana larúeihan Dawidi, luma hagibugiñe lumusuniña hama gürigia ha lílana uburugu: "Aganba huméi lererun Aburemei. 3 Adüga humá irichaü luma úarani lidan fulasu le, sefu humaña gudemetiña hawéi ha asufuriragüdübaliña, móusera humaña terencha wuriba, ni méteñuhaña ni würiña ha hilaaña úmari. Máfara humá gürigia maduruntiña. 4 Anhein hadüga le nubeibei hun, ñeinmemebaña urúeigu añuurutiña luagu lálana larúeihan Dawidi, hebeluhaba tidan karü luma hawagu gabayu luéigiñe tubenari palasiu to, úara hama hánigu hama lílana fulasu. 5 Gama lumoun anhein madügün humá le nubeibei, tagumuchaguba palasiu to. Au, le Aburemei, ariñagubalin".

6 Lugundun lariñahare Aburemei tibügürü lani lurúeite Hudá palasiu:

«Ítara biña nun keisi wübü Galaadü, keisi luwübüri Líwanu,

gama lumoun fiñutina luagu nadügübadibu lan fulasume mageirawati.

7 Nóunahaba gürigia tau áruma buagun lun hagünrinchagunibu.

Háchuahabei lubuidun burí buagaburi le hibúari,

ábame háguruni wáturugun».

8 —Hásügürüba gürigia lílana saragu néchani lubadugiñe uburugu le, ábame hálügüdagun houngua, hariñagame: "Ka uagu ladügei Aburemei katei le lun óunwenbu uburugu le?" 9 Hóunabame: "Ladüga hígiruni daradu le meha ladügübei Aburemei le Habungiute hama, aba heseriwidun houn amu búngiugu".

10,11 Mayahua humá luagu urúei Hosíasi,

mayahua humá luagu lounwen;

luagulá Salumu le liráü hayahua,

le lunbei lidin lun magiribudúndigiaali lan;

marihindigia laali múa le ñein lubéi lágurahoua.

Ladüga lariñahare Aburemei libügürü Salumu, le liráü Hosíasi, le lurúeite Hudá, le arúeihabei lárigiñe lúguchi, le áfuridubei lídangiñe fulasu le:

—Magiribudúnhali 12 hilarügübei lidan ageiraü le ñeinhin lubéi hanügei, marihindigia laali lageira.

13 «Fugiabu buguya le ábunagubarun bani palasiu

tuma burí buban íñuburitu lau wuribani luma maricharaguni,

buguya le nadagimeingüdübei gürigia

ani mafayeirun bumuti lebegi hawadigimari houn!

14 Buguya le ariñagubei: "Nadüga aban nani palasiu wéiritu,

lau burí rumu wéinamuti tidan".

Aba badügün burí funedera tuagu furaraboun lau hibúari

aba befeindihanu lau funati.

15 Haritaguatibu funagia luagu laganóuniwa lan

geyegu lau hibúari, ligía lan arúeihanibei?

Buiti meha dan lun búguchi lidan libagari;

ladüga adüga lumuti meha sun katei lau irichaü luma úarani,

ligía meha buidu lubéi lidin lun.

16 Ageindagua lumuti bugaha haricha gudemetiña,

ligía buidu lubéi buga lidin lun.

Ladüga subudi lánina kei Lubungiute.

Au, le Aburemei ariñagubalin.

17 Ánheinti buguya, luágurügüñein agañeiruni marumanti baritagua;

Ígira bumuti madurunti lun lounwen,

ru buguya lidere dan lun bageira».

18 Lariñahare Aburemei libügürü Hoakimü le liráü Hosíasi, le lurúeite Hudá:

«Úabei ni aban ayahuti lárigi danme lounwen.

Úabei ariñaguti:

"Níbiri! Nitu!

Nabureme! Nurúeite!"

19 Labunúba keisi aban burigü,

aduruuhóuarügübei bóugudin luéi Herusalén».

20 «Hudá, wariba luagun luwübüri Líwanu ábame bagúaragun!

Iñurabéi bumalali dabíararugu Basán!

Wáguaba luéigiñe burí luwübüri Abarímü,

ladüga áfarawagua sun bubúaligu.

21 Adimurehatina meha bun dan le lidan ban lubuidun bidaani,

gama lumoun máhatibu baganbunina.

Ítara liña badügüni lúmagiñe ñǘraügidibu:

Máhatibu baganbuni nererun!

22 Ladurugudubaña garabali sun bábutigu hama bubúaligu

ábame hanügǘn bóugudi luéi hageira.

Berederame lau lueirin busiganu ladüga sun wuribani le badügübei.

23 Darangilutibu guentó lidan bumasa,

labadinagua burí hibúari anügǘti Líwanugiñe,

Gama lumoun basufuriruba danme liabin gáriti bun,

le lánina águrahani».

24 Ariñagaali Wabureme lun Hekoníasi le liráü Hoakimü, le lurúeite Hudá:

—Fiñú numuti luagu nibagari: "Íbini anhein hamuga ábantibu bagü le lánina aseinihani luagu núhabu le nóunwenren, nagucharubadibu yebe ñéingiñe. 25 Lun nederegerunibu houn báganiñu, ha uéibaña banufudeda saragu. Nederegerubadibu lun Nabukodonosoru le lurúeite Babilónia luma houn Kalüdéana. 26 Nágurubadibu buguya tau sun búguchu lidoun aban fulasu le mámabei hageira, ñeinba hóunwegua biángubei". 27 Ítara liña lubeiti magiribudúnbaña lidoun fulasu le ñeinhin lubéi lueirin hayumahan hagiribudun.

28 Aban san weru bóuguaali o aban lan asiedu le mabusenrúnwaali,

le meseriwínhali Hekoníasi?

Ka uagu lagurúa habu sun lirahüñü lidoun aban fulasu le ibidiñewati?

29 Múa, múa, múa,

aganbabéi lererun Aburemei!

30 Lariñahare Aburemei:

«Bürǘ huméi wügüri le tidan líburu

keisi aban wügüri masaaniguti,

keisi aban wügüri le wuribabei lidin lun lidan libagari.

Ladüga machülübei ni aban hádangiñe ladügawagun

añuura luagu lálana larúeihan Dawidi lunya larúeihan Hudá».