1 Lariñahare Aburemei:

—Fugiabugu hóuniri mudún ha ígirubaña lun heferidirun luma lun hachagaragun nilügüniña mudún!

2 Lariñahare Aburemei, le Lubungiute Ísüraeli houn hóuniri mudún ha óunigirubaliña lumutuniña: "Chagaguagüda humaaña nilügüniña mudún, anuraagüda humaaña, móunigirun humutiña. Nabeichaadün lubeiti luéigiñe le hadügübei. Au, le Aburemei, ariñagubalin. 3 Au guánarügüba anügaña híbiri nilügüniña mudún lídangiñe ageiraü le ñeinhin lubéi nanuraagüdaña, ábame nóundaruniña, ábame nanügüniña hárigoun lun hemeilihan. 4 Níchuguba hóuniri lun hóunigiruniña, manufude hamaamuga, memegeirunme ni aban hádangiñe. Au, le Aburemei, ariñagubalin.

5 Lariñahare Aburemei: Lachülürüba aban weyu danme nadügün

lun gadügawagun lan Dawidi aban le tímatimaati,

aban urúei le arúeihati lau lichú aau,

le adügüti sun katei lau irichaü luma úarani fulasurugu.

6 Danme larúeihan, séfuñu luba Hudá,

ani chóuruñu luba giñe Ísüraeli.

Hagúahameti lun lau iri le: "Wabureme, Wasalbaragüle" ».

7 Lariñahare Aburemei:

—Anitebei weyu lun máfiñurun humá ariñaga: "Luagu libagari Aburemei le asagarubaliña Ísüraelina Ehiptugiñe", 8 hariñagame: "Luagu libagari Wabureme le asagarubaliña ladügawagun Ísüraeli lídangiñe ageiraü le nóruterugubei, luma lídangiñe burí líbiri fulasu le buga ñeinhin lubéi lachagaraguaña". Ábame hayabin aganawa hageira.

9 Uganu habügürü profetagu: Wéiriti nidiheri hawagu profetagu;

ámuñeguati nasandiragun nungua kamá hamuga bacharuañadina,

ítara kei aban wügüri le sügüguaaru diwéin lau,

luéigiñe Wabureme luma lererun le sándubei.

10 Buin liña fulasu hau gürigia gagabarahatiña,

hau gürigia ha éibaagubaña adüga wuribani,

ha ayusurubalin habafu lun hadügün marichaü.

Ligía líñaragunbalin Aburemei múa,

aba lamabeidun múa,

aba lágudun liluman sagadi.

11 Lariñahare Aburemei:

«Dandu profetagu keisi fádirigu,

minebenti Bungiu houn;

darí naaña adüga wuribati tidan nitenpulun.

12 Ligía búrigabei lubéi hémeri, guyé ligiame;

nadügüba lun hadarúniwa lun héiguadun.

Danme nafayeiragüdüniña luagu hadüga,

nanügüba lamiselu hawagun.

Au, le Aburemei, ariñagubalin.

13 «Ariha naaña profetagu Samariana

adüga katei le wuribati lábürühan nun:

Adimurehatiña luagu liri Baali,

yuriguagüda hamaaña nánigu ha Ísüraelina.

14 Ariha naaña profetagu Herusalénna,

adaagua katei wéiriti luriban:

Agabarahatiña, ani íweruha hagía lau iyeeni

rútiña gurasu houn ha wuribabaña

lun mígirun hamani luriban hóuserun.

Hagía hama lílana uburugu,

ítara haña nun kei Sodoma luma Gomora.

15 Ligía nariñagunbalin katei le hawagu profetagu, au, le Aburemei:

Néigagüdübaña katei le wéiriti ligifi,

nátagüdübaña duna le péisiniti,

lugundun barühali wuribani fulasu lidan sun ageiraü le,

hadüga profetagu Herusalénna».

16 Lariñahare Bungiu Suntigabafu:

«Ísüraelina, madüga humá gasu lau le hariñagun profetagu hun.

Iyeeni le hariñagubei, katei le hadüga houngua,

mama au ariñagubalin houn.

17 Ariñagatiña houn ha iyereegubei nererun houn:

"Buídubei lasalirun sun katei hun".

Ariñaga hagía houn ha afalarubalin luriban tayumahan hanigi:

"Miábinbei ni murusun wuribani huagun" ».

18 Gama lumoun: Kagia subudihabúbei lun katei aramudaguati le lani Wabureme?

Kagia arihubalin o aganbubalin lererun?

Kagia íchugubalin lidaani lun?

19 Ítara liña ligañi Aburemei keisi aban luriban dan,

kei aban ligarabalin herigini le áfurubei hawagun wuribatiña.

20 Meredebei ligañi Aburemei

darime adüga laali le laritagubei.

Lachülürüba dan lun hasaminarun

ani gunfuranda humeime katei burí le.

21 «Móunahan numutiña profetagu ha,

madimurehangubeitina houn,

gama lumoun aba héibaagun adimureha lidan niri.

22 Lun hamuga hasubudiruni sun le aramudaguatibei numa

hariñaguñein hamuga nererun lun nageira,

diñú hamuti hamuga luéi luriban lémeri,

lun lígiruni luriban lóuserun».

23 Lariñahare Aburemei:

«Aban funagia Bungiu au le lídanrügüti aban fulasu leredera,

lun lásiñarun narihini le hadaagubei?

24 Gayaraabei funa laramudagun furumiñeguarügü luéi narihin?

Buin liña sielu luma ubóu nau.

25 —Aganba naali hayeeni profetagu ha, ha ariñagubaña luagu lidan lan niri hadimureha, luagu adimureha hamá numa lidan uénedü. 26 Ídaba san lásura hadimurehan profetagu ha iyeeni, le hadüga houngua? 27 Lau burí uénedü le habahüdagubei hóuniwagua, hóuchuña lun habulieidaguagüdüniña nánigu nuéi ítara kei meha habulieidunina hagüchagu aba houdin lárigi Baali.

28,29 —Anhein gewenedü aban profeta aban uénedü, ariñagalá luagu aban lan uénedü, gama lumoun anhein leresibira nererun, adimurehalei keisi lubudubu! Siñati warufuduni ifei kei türigu. Ítara liña nererun kei watu gemeti, kei aban marüdiyu le añügürihati dübü. Au, le Aburemei ariñagubalin.

30 —Ligía kóntürañadina lubéi profetagu ha, hagía íweruhabalin nererun hawariuagua. Au, le Aburemei, ariñagubalin. 31 Nariñaguñein kóntürañadina profetagu ha ásügüragüdübaña katei le hadüga houngua kamá hamuga uganu le númagiñeti. 32 Kóntürañadina profetagu ha abahüdagubaña uénedü le iyeeni. Ha acharagadagüdübaliña numutuniña lau hayeeni. Móunahan numutiña, míchugun au dimurei houn, mabafutiña lubeiti lun híderagun gürigia. Au, le Aburemei ariñagubalin.

33 —Heremíasi, ánhabu lálügüda aban lílana fulasu o aban lan profeta o aban lan fádiri ka la lóunahabei Aburemei ariñaga, bariñagame houn: "Lariñahare Aburemei luagu huguya lan lihürübei ani lígiragüdaadün lan lun hábürühan". 34 Hawaguti profetagu ha yéetiña, fádirigu hama furumiñeguarügü lílana aüdü ha ariñagutiña "ñunsu lúmagiñeti Wabureme" nabeichagubaña hau sun tílana haban. 35 Danme lálügüdahan furumiñeguarügü luma aban gürigia, o luma aban lumada o liduhe, gayaraabei lariñagun: "Ka lóunabubei Wabureme? Ka lariñagubei?" 36 Gama lumoun mariñagadigia humá "ñunsu lúmagiñeti Wabureme" lugundun le ariñaguti dimurei le, nadügüba lun liabin lererun lihürügume. Sánsigua humaali lila lererun Bungiu le wínwanbei, le Hubungiute, le Aburemei Suntigabafu.

37 —Heremíasi, álügüdabaña profetagu: "Ka lan lóunabagülebei Wabureme? Ka lan lariñagubei?" 38 Ánhaña ariñaga "ñunsu lúmagiñeti Wabureme", bariñagame houn: "Lariñahare Aburemei: Kei ǘnhagua lubéi ayusurei dimurei le ueibei nerera hun, lun mayusurun humani. 39 Niñurubadün kei aban anügüni hǘrüti, huguya lau sun uburugu le níchugubei hun luma houn hagüchagu, ábame nígiragüdünün lun héiguadun dise nuéi. 40 Ani nábürügüdüba busiganu luma ǘnabuguni huagun lun súnwandan le hásiñarun abulieida".