1 Lidan lagumeserun larúeihan Hoakimü, le liráü Hosíasi, Hudá, aba ladimurehan Aburemei lun Heremíasi, 2 lariñaga lun:

—Ráramaba tibürürünrugu ténpulu, ábame bariñaguni sun le nariñagubei bun houn gürigia ha ñǘbuinbaña lídangiñe burí luburugute Hudá áhuduragua ténpulurugu. Mígiraba ni kata mariñagunga. 3 Háfugadügü hadügün gasu bau, ábame hígiruni luriban hóuserun, ábame mabeichun nániña luagu luriban hagaburi, kei yebe naritagun nadügün. 4 Ariñagabá houn luagu nariñahare lan, au le Aburemei: «Anhaün madügün gasu nau, magunfulirun hugíame lau arufudahani le níchugubei hun, 5 madügün huguyame gasu lau heweridihan profetagu ha nóunahabaña humoun saragu wéiyaasu, meberesentün hau, 6 nadügüba tun ténpulu to kei nadüga tun to Siloboun. Nadügübei uburugu le ábanme hénpulu lánina íñarawaguni houn néchanigu ha ubouagubaña».

7 Aganba hamuti fádirigu, profetagu hama lílana fulasu dimurei burí le lariñagubei Heremíasi ténpulurugu. 8 Lásurun lariñaguni le lariñagubei Aburemei lun, aba hárügüdüni fádirigu hama profetagu, aba hariñagun lun:

—Bounwe! 9 Ida luba bariñagun lidan liri Aburemei luagu ítara tuba lan ténpulu to kei to Siloboun, ani lagünrinchawaguba lan uburugu le aba lanme lerederun úouga aganóutiña ñein?

Aba haguriridágun sun lílana fulasu geyegu lau Heremíasi ténpulurugu.

10 Dan haganbunbalin ábutigu Hudá le asuseredubei, aba houdin tídangiñe lani urúei palasiu lun ténpulurugun, aba hañuurun ñein luagu Bena Iseri. 11 Ábati hariñagun fádirigu hama profetagu houn ábutigu luma houn lílana fulasu:

—Lunti lasiadirún wügüri le lun lounwen ladüga adimurehaali kóntüra uburugu le. Aganba humuti hungua.

12 Aba ladimurehan Heremíasi houn ábutigu luma houn lílana fulasu, lariñaga houn:

—Aburemei óunahabalina adimureha lidan liri, luma ariñagei sun le haganbubei nariñagun kóntüra ténpulu to, luma uburugu le. 13 Aranse huméi higaburi, aganba huméi Aburemei le Hubungiute, ábame móunahan lani wuribani le uágubei nariñaga hun huagun. 14 Auti, húhaburuguñadina, adüga huméi le habusenrun nau. 15 Gama lumoun subudi huméi le buidu: Luagu ánhana lan háfara hilagubei, dandu huguya kei lílana fulasu le, gadurunbadün luagu háfarun aban gürigia madurunti; lugundun ninarün luagu Aburemei lan óunahabalina ariñagei katei le hun furangu.

16 Ábati hariñagun ábutigu houn fádirigu, houn profetagu luma houn lílana fulasu:

—Mébunati lasiadirún gürigia le lun lounwen; lidan liri Aburemei le Wabungiute ladimureha woun.

17 Aba hásaarun fiu ábutigu, aba hariñagun houn gürigia ha óundaragubaña ñein:

18 —Lidan meha lidaani Esekíasi le lurúeite Hudá, adimurehati meha Mikeasi, le Moresétina houn lílana Hudá lidan liri Aburemei, lariñaga houn:

"Lariñahare Aburemei Suntigabafu:

Lerederuba Sión kei aban ichari le awouhóuaali,

lerederuba Herusalén lidan günringuaü, lárigirugurügaalime eredera

láhüchüba sagadi luagu tuwübüri ténpulu".

19 —Áfara hamuti funagia urúei Esekíasi hama lílana fulasu Mikeasi luéigiñe lira? Lubaragiñe lira: Sándirügüti urúei inebesei lun Aburemei, aba lamuriahan luma lun gudemehabu lan houn. Ábati móunahan lani Aburemei wuribani le yebe uágubei lariñaga hawagun. Wagíameti anüga óunwenbu ihürügu luagu lanarime áfarahani?

20 Adimurehati giñe profeta Uríasi, le liráü Semaíasi le uburuguna Kiriatü-hearimü lidan liri Aburemei kóntüra uburugu le luma kóntüra ageiraü, ítara kei ladimurehan Heremíasi. 21 Aganba lumuti urúei Hoakimü hau sun lánigu hama ábutigu, aba labusenrun urúei láfaruni. Gama lumoun dan lasubudirunbalin Uríasi, aba lanufudedun, aba lanurahan Ehiptun. 22 Aba lóunahani urúei Hoakimü, Elünatán le liráü Akübóru lun Ehiptun hama amu burí wügüriña, 23 anügei Uríasi Ehiptugiñe, aba hederegeruni lun urúei Hoakimü, le óunahabei áfarei aba háguruni lúgubu lárigiñe háfaruni lidoun umúahaü le ñein lubéi lichugúa hágubu hilaguaaña ha furumiñeguarügü.

24 Aba ladimurehan Aikamü le liráü Safán luagu lufulesein Heremíasi, aba mederegerúniwa lan houn lílana fulasu lun háfaruni.