1 Aba ladimurehan Aburemei lun Heremíasi, lariñaga lun:

2 —Ráramaba tubenari litenpulun Aburemei, bariñageime uganu le ñein: Sun lílana Hudá ha ebelurubaña lídangiñe bena le lun háhuduragun lun Aburemei, aganba huméi uganu le, 3 le luganute Aburemei Suntigabafu, le Lubungiute Ísüraeli: Ígira huméi luriban hibagari luma luriban hóuserun, ábame nígirunün lun hasigirun aganawa lidan fulasu le. 4 Memenigida humá hawagun ha eyeedubalün ariñaga: Anuhán litenpulun Aburemei, anuhán litenpulun Aburemei!

5 —Anhein haransera hibagari luma hóuserun, buidu huguyame hama híbiri gürigia; 6 ánhaña masagarahan humá méteñuhaña, würiña hilaaña úmari, máfaragun huguyame gürigia maduruntiña lidan fulasu le, meseriwidun huguyame kultu houn amu búngiugu, le aubei hagadeiragua hungua, 7 nígirubadün lun hasigirun aganawa ya, lidan fulasu le níchugubei houn hagüchagu lun sun dan.

8 —Huguya hemenigitün luagu burí dimurei le iyeeniti, meseriwínbei hun lun ni kata. 9 Íweruhatün, áfaraha, agabarahatün, fiñú huguya le málati, águdaha huguya kupali lun Baali, seriwi huguya houn búngiugu, 10 lárigiñe aba hiabin tidoun ténpulu to, to nitenpulun arufudagua hungua nun. Haritaguatün luagu chóurugua humá hungua ya; luagu gayara lan hasigirun adaaguei burí katei le, le aubei magundan nan. 11 Haritaguatün funagia luagu haramudaguagüle lan híwerutiña nitenpulun? Ariha naali sun katei le. Au le Aburemei ariñagubalin. 12 Heiba tidan nisanduariun Siló, furumiñeti fulasu le nanúadirubei lun naganóun ñein, hariheime le nadügübei ñein ladüga luriban nageira Ísüraeli. 13 Lau sun wéridi naadün lan saragu wéiyaasu luagu hóuserun, máhagidün hidin lau le nubeibei, móunabungubei humagidina. Au, le Aburemei ariñagubalin. 14 Ligía kei lubéi nadüga tun Sanduariu to Siloboun, ítara luba nadüga tun ténpulu to, to anuadirúaboun nun, to níchuguboun hun luma houn hagüchagu, to giñe uáguboun hemenigida. 15 Nachagarubadün niñúarürugugiñe kei meha nachagaruniña híbirigu ha ladügawagun Éfürain.

16 —Buguya Heremíasi, mafurieidabá hawagu gürigia ha. Mayumuraguabá nun hawagu. Lugundun maganbun nubadibu. 17 Marihin bumuti san le hadügübei lidan burí luburugute Hudá luma lidan burí lémeri Herusalén? 18 Isaanigu abudaha watu, wügüriña ébedei, würiña añoundaguoun fulúaru lun hadaagun durudia lun hadagaragüdün tun bungiu to unboun hagúara lurúeite sielu. Bóugudin luéi lira, anabagua hamutina lau hadagaragüdün diwéin houn amu búngiugu. 19 Gama lumoun sügǘ lau hanabagunina, anabaguatimatiña houngua, lun habusigarigua. Au, le Aburemei ariñagubalin. 20 Ligía nachoururunbalin houn, au, le Aburemei, luagu narariragüdaali lan sun nigañi luagun fulasu le, hawagun gürigia, hawagun animaalugu, luagun burí tídibu wewe le áraabubei luma luagun le alubahóubei. Ítara luba kei aban gudáü le méñeguchati.

21 Lariñahare Aburemei Suntigabafu le Lubungiute Ísüraeli houn lumutuniña:

—Adüga huméi sun adagaragüdüni le gudawarügüti luma adagaragüdüni le habusenrun, hou huguyame lídangiñe úi ligía. 22 Gama lumoun dan le nasagarunbaliña hagüchagu Ehiptugiñe mariñaguntiña ni kata houn libügürü adagaragüdüni le gudawarügüti ni amu luwuyeri adagaragüdüni. 23 Le nariñagubei houn, lun gaganbadi hamá nun; ítara luba lan auba lan Habungiute, hagíame numutuniña. Ariñaga au houn lun hagaburidun keisi nariñaguni houn, lun buídubei lan lidin houn. 24 Gama lumoun maganbun hamutina, madügün hagía gasu nau, ábarüga hígiraguagüdün houngua lun luriban hagaburi. Lubaragiñe hamuga háluahanina, rúrügü haméi hanagan nuagun. 25 Lúmagiñe háfuridun hagüchagu Ehiptugiñe chülǘ lumoun dan le, óunaha naaña sun nani profetagu hun aban lárigi aban. 26 Gama lumoun maganbun humutina, madügün huguya gasu nau, wuribatimarügü hóuserun sügǘ hau hagüchagu.

27 —Buguya, Heremíasi, ariñagabéi sun burí katei le houn, íbini madügün hamá gasu bau; wáguaba houn, íbini móunabun hamanibu. 28 Ariñagabá houn: "Añahán gürigia ha máhabaña haganbuni Aburemei le Habungiute, maha hagía larufudahóun houn. Gumugua inarüni hayumulugugiñe sunsuinagubei".

29 Herusalén, sabei bídiburi, fuibei!

Beremuha aban uremu híruti luagu burí wübü le mageirawati!

Lugundun gáñiha Aburemei houn bumutuniña, ígira laaña.

30 Lariñahare Aburemei:

—Adügaaña lílana Hudá katei le magundantina lau: Ru hamutiña hagübüri haguariuan tidoun ténpulu to anuadirúaboun nun, aba hawiyedunu. 31 Adügatiña aban latarü lun Tófeti luagu fulasu mawübüriti le lani Ben-inomu, lun háguduniña hasaanigu, katei le mariñagun numuti houn, machülügubeiti lidoun nisaminan. 32 Ligía nariñagunbei au le Aburemei luagu lachülürüba lan weyu lun mariñagunhaña lanme lun fulasu ligía Tófeti, ni fulasu wayati le lani Ben-inomu, luéidigiame Fulasu Wayati lánina Áfarahani, ligíaba liri. Ábame hábunahaniña hilaguaaña Tófeti ladüga madarihaña lanme amu fulasu. 33 Héigibei dunuru géigaditiña úi hama animaalu gáñitiña hágubu gürigia hagía, úabei kaba lan abugahaña. 34 Nagumuchaguagüdübei eremuhani lánina fedu luma ugundani, luma uremu lánina maríei uburugugiñe luma lídangiñe sun Herusalén. Lerederuba kei aban fulasu mageirawati.