1 Wein-aban irumu lau Sedekíasi danbei le lagumeserun arúeiha, arúeihati unsu irumu Herusalén. Amutáli, ligía meha tíribei lúguchu, liráü Heremíasi le Libünáana.

2 Gama lumoun wuribati lóuserun ligibugiñe Aburemei kéigubeirügü lóuserun Hoakimü. 3 Ligía lagañidunbei Aburemei luma Herusalén labu Hudá, aba labugaguniña luáriua.

Lárigiñe, aba liñuragun Sedekíasi lungua luéi lagumadihan lurúeite Babilónia. 4 Weyu diisi lidan lidiisin hati lidan linefun lirumudiri larúeihan Sedekíasi, aba lidin Nabukodonosoru hau sun lisudaranigu luagun Herusalén aba legeyedaguni hau lisudaranigu. Aba líchugunu likianpun-agei ligibugiñe, luma geyegua lau, aba híchaahan hebu lun hawarirun lisudaranigu lun hageindagun luma. 5 Rédeiti uburugu geyewaguañu hau súdaragu darí irumu unsu lidan larúeihan Sedekíasi. 6 Weyu nefu lidan ligadürün hati lidan irumu ligía, ligía laweiridaguntima ilamaü fulasurugu, madarihaña gürigia kaba lan heiga. 7 Ábati hadügün aban huyu luagu lubarieirun uburugu, aba lanurahan urúei hama sun lisudaranigu áriebu lau sun geyegua hamaniña Kalüdéana. Aba háfuridun luéigiñe bena le labadinaguabei bián baríeiru luéigiñe lémeri lufulurin-agei urúei, aba hárügüdün luéigiñe lémeri fulasu wayati le lani Hordán. 8 Gama lumoun aba héibaahani súdaragu Kalüdéana urúei Sedekíasi, aba hárügüdüni luagu fulasu mawübüriti le lani Herikó, aba hígiruni sun lisudaranigu aba hafanreinragun. 9 Aba hárügüdüni Kalüdéana urúei, aba hanügüni ligibugiñoun lurúeite Babilónia uburugu Ribülá, lumúanrugu Amatü. Aba lasiadiruni Nabukodonosoru Sedekíasi, 10 aba lóunahan adürühei hachügü lirahüñü Sedekíasi hama sun wügüriña wéirigutiña Hudá liñúarü. 11 Aba lóunahan asagaragüdei lagu Sedekíasi, aba hagüraguni lau güringüri, aba hanügüni Babilónioun, ñein lubéi leredera adaürǘwa darí lounwen.

12 Weyu diisi lidan liseingün hati lidan irumu disinéfu lidan larúeihan Nabukodonosoru, le lurúeite Babilónia, aba lachülürün Nebusaradán Herusaléun, anihán wügüri le lánibei urúei minisi, lememe giñe gumadan tani furisun to tani palasiu, 13 aba lágudunu ténpulu, lani urúei palasiu tuma sun muna to uburuguboun, tótima haban íñugutiña, 14 aba háguruni súdaragu Kalüdéana ha úarabaña luma baríeiru burí le geyegubei lau Herusalén. 15 Lárigiñe, dandu buga ha erederubaña uburugu, kei ha ásügürübaña lumoun lurúeite Babilónia, aba lanügüniña Nebusaradán Babilónioun, hama giñe híbiri gadiñetiña. 16 Fiúrügüñanu hádangiñe gürigia ha gudemetimabaña lígira lun hábunaguni múa.

17 Aba hañaünrühani Kalüdéana ílagu lauti buronse le buga ténpulurugubei: Wagabu, ebu, óunwenbu lagei duna, aba hanügüni sun buronse Babilónioun. 18 Barǘ hamuti giñe lagei baligi, chóbuli, tíbaaha mecha, kopu wéinamuti, guliyeru luma sun ílagu lauti buronse le ayusurúbei lidan kultu. 19 Barǘ lumuti giñe Nebusaradán sun ílagu lauti golu luma pülata: Lagei leñegura watu, kopu wéinamuti, lagei baligi, lebu sanudelu, guliyeru luma weru burí le tagei diwéin to idewesei lun Aburemei. 20 Bián wagabu, óunwenbu lagei duna hau duusu bágasu láutiña buronse ha ágüdahabalin, luma burí ebu le ladaagüdübei urúei Salomón tun ténpulu, siñati lasubudirun lihürü. 21 Kada wagabu ñeinñein lóugiñe widü méturu luagu liñun, kei burí seingü méturu dimí ligaranan; hunrenti múnadagiñe libiti, sedü sentimeturu liduru buronse ligía. 22 Kada wagabu ñeinñein aban kapitéli lauti buronse lóugiñegua, lóugiñe bián méturu liñun, geyegua lau ñeinñein aban liraüraü ayarawaguni lauti buronse, wéndegüdawati lau güranáda. Aban labu biángubei wagabu ligía. 23 Ñeinñein san güranáda luagu kada liraüraü ayarawaguni ligía le luágubei kada kapitéli, arihúatu gádürü-wein-disisi lídangiñe.

24 Daü lumuti giñe Nebusaradán Seraíasi, le fádiri le íñugutimabei, Sofoníasi le fádiri le lárigibei Seraíasi hama ǘrüwa ha óunigihabaña tubenari ténpulu. 25 Hádangiñe lílana uburugu, daü lumuti úfisi le haubei súdaragu, sedü wügüriña ha eseriwidubalin urúei ha uburugubaña lidan oura ligía, ha agumadihabaña luma urúei milidaru le abudahabei wügüriña lun hasudarahan, hama ǘrüwa-wein lílana uburugu, ha íñugutiña. 26,27 Aba lanügüniña Nebusaradán sun ha ligibugiñoun lurúeite Babilónia, uburugu Ribülá le lumúanrugubei Amatü. Aba láfaraguagüdüniña lurúeite Babilónia ñein.

Ítara liña hasagarúniwa lánigu Hudá hageiragiñe. 28 Anihán hiibe gürigia ha lasagarubaña Nabukodonosoru hageiragiñe: Ǘrüwa-milu-wein-ǘrüwa Hudaagiñe, lidan lisedün lirumudiri larúeihan; 29 lidan irumu disiwídü, sagati widü-san-darandi-biama Herusaléngiñe; 30 lidan irumu wein-ǘrüwa, sagati Nebusaradán sedü-san-bián-wein-seingü Hudaagiñe, hadan súngubei, gádürü-milu-sisi-san gürigia asagarútiña hageiragiñe.

31 Weyu wein-seingü lidan duusu hati, irumu darandi-sedü lúmagiñe lanügüniwa Hoakín le lurúeite Hudá lageiragiñe, ligía lagumeserun Ewili-merodákü arúeiha Babilónia, aba buidu lan lóuseruni lurúeite Babilónia Hoakín, aba lasagaruni furisunrugúgiñe, 32 buiti lóuseruni sügǘ lau lóuseruniña híbiri urúeigu ha Babilóniabaña luma. 33 Ítara liña gayara lan laragachunu Hoakín daüguaü to buga layusuruboun furisunrugu, hou ligía luma urúei lidan sun líbiri dan le labagaridubei. 34 Ibihati giñe Hoakín fáyeiti sagü weyu lúmagiñe lurúeite Babilónia darí lounwen.