1 Aba ladimurehan Aburemei nun, au Heremíasi, lariñaga nun:

2 —Ru hamá Ísüraelina harigei lun le bürüwañubei lidan daradu le. Badimureha houn lílana Hudá luma houn lílana Herusalén, 3 bariñagame houn: Lariñahare Aburemei, le Lubungiute Ísüraeli: Íñarawaguati wügüri le mídinti lau le lubeibei daradu le. 4 Daradu le buga nadügübei hama hagüchagu dan le nasagarunbaliña Ehiptugiñe, ageiraü le meha ítarabei houn kei aban régigi le ñein lubéi larürüdawaguagüda gürabu. Aba nariñagun houn: Adüga huméi le nubeibei, ábame au lan Hubungiute, huguyame numutuniña. 5 Anhaün adüga gasu nau, nagunfulirubei fiñún le meha nadügübei houn hagüchagu lun níchugun aban fulasu houn, fulasu le gádanbaliña guentó, múa rísiti le buiti lun ábunaguni.

Aba nóunabuni Aburemei, nariñaga lun:

—Anha Nabureme.

6 Ábati lariñagun Bungiu nun:

—Subudigüdabei uganu le lidan burí luburugute Hudá luma luagu burí lémeri Herusalén. Ariñagabá houn gürigia: "Aganba huméi ka lan lariñagubei daradu le, gúnfuli huméi. 7 Dan le nasagarunbaliña hagüchagu Ehiptugiñe ariñagatina houn lun hadügün gasu nau, ani lúmagiñe dan ligía darí guentó, anahamémegua ariñagei houn. 8 Gama lumoun madügüntiña gasu nau, madügün haméi le nubeibei, ábarüga hadügüni luriban haritagun. Máhatiña hagunfuliruni le lariñagubei daradu, ábati nábürügüdüni abeichúni le uágubei lariñaga daradu hawagun".

9 Aba lasigirun Aburemei ariñaga:

—Gürigia Hudaana hama lílana Herusalén, eledeguatiña nubá. 10 Hadügüñein figóu lememe meha hadügübei hagüchagu ha meha máhabaña haganbunina, aba houdin hárigi amu búngiugu eseriwida houn. Dandu Ísüraelina kei Hudaana, dürügua hamaali daradu le buga nadügübei hama hagüchagu. 11 Ligía nóunaha lubéi aban lamiselu hawagun, le ídangiñebei siñabei lan hesefurun. Íbinime ánhaña agúaraha amuriaha íderawaguni, maganbun nubaña. Au, le Aburemei ariñagubalin. 12 Ábameti houdin lánigu Hudá hama lílana Herusalén amuriaha ídemuei hama búngiugu ha únbaña hágudaha kupali, gama lumoun hásiñarubaña esefura danme lachülürün lamiselu. 13 Ítara kei liibe luburugute Hudá, ítara hiibe lubungiutegu, hayabinti lílana Herusalén, adügaaña saragu latarü lun hágudahan saragu kupali lun Baali. 14 Buguya Heremíasi, mafurieidabá lubeiti hawagu gürigia ha; mafurieidabá mayumuragun buguyame nun hawagu, lugundun maganbun nubadibu, maganbun nubaña danme hamuriahan numa lun níderaguniña labadinagua lamiselu.

15 —Ka táluahabei Ísüraeli to hínsiñeboun nun ténpulurugu, lárigiñe tadügün saragu katei wuribati? Haritaguatu funagia luagu lau lan tanügün agülei luma úi lun adagaragüdüni, ladiseduba lan wuribani tuéi, ani tesefuruba lan ítara? 16 Lidan meha amu dan, au le Aburemei, «oliwu hilumati le buíduburitu lin» liña meha nagúaruni. Ánheinti guentó nágudaali lubana, áhalahaneime lilimun lau wayuhuru héreti.

17 —Au, le Aburemei Suntigabafu, le ábunubalibu; óunahaadina lamiselu buagun, ladüga figóu le hadügübei Ísüraelina hama Hudaana, ladüga anabagua hamaadina lau hágudahan kupali lun Baali.

18 Aba lasubudiragüdüni Aburemei nun luagu anihein lan wuribani haritagun náganiñu hadügün. Aba léfegechuni nagu lun nasubudiruni. 19 Darangilu niña yebe, kei aban mudún le anügǘti lun lafarún, ibidiñoun nun luagu haransehaña lan nubá lun háfarunina. Hariñaga:

—Chaün waméi tídibu wewe guentó lau sun lin, gidá waméi ubouagugiñe, ua láamuga aritaguti luagun.

20 Gama lumoun buguya, Aburemei Suntigabafu,

aban aguseragüdüti richati buguya,

subudi bumuti lilulin-agei haritagun gürigia.

Arufudabéi babeichuniña gürigia ha nun,

ladüga ru naali nikesin búhaburugun.

21 Lariñahare Aburemei houn lílana Anatótu ha yebe abusenrubaña háfarunina, ariñaga hagía nun lun madimurehan nan lidan liri Bungiu anhein mabusenrun nubéi háfarunina:

22 —Nafayeiragüdaadün luagu hidurun; hóunweguba wügüriña nibureingiña wuriburugu, hilagua hagíame würiña lau ilamaü. 23 Meredebei ni aban hádangiñe, lugundun anitebei weyu lun nafayeiragüdünün luagu hidurun, ábame nanügün lamiselu huagun.