1 Lariñahare Aburemei:

—Lídounme dan ligía, lasagarúba habu urúeigu, ábutigu, fádirigu, profetagu hama sun ha aganóubaña Herusalén lídangiñe hamúaha; 2 ábame higirún lubá weyu, hati hama sun waruguma, houn ha meha hínsiñebaña houn, seriwi hagía houn, falá hamaña, álügüdaha hagía hama, ani hudugua hagía houn. Úabei abudutiña lun lábununiña. Herederuba múarugu kei hádiga animaalugu. 3 Hame erederutiña wínwanñu hádangiñe gürigia wuribatiña ha, lidan furumiñeguarügü fulasu le ñein hamuti lárigiñeme nachagaraguniña, himei habéi óunweni luéi ibagari. Au, le Aburemei Suntigabafu ariñagubalin.

4 —Buguya, Heremíasi, subudigüdabei uganu númagiñeti le houn gürigia:

"Dan le héiguadun gürigia, sarayatiña;

dan hayuridagun, áluaha hamuti üma.

5 Ísüraeli, kati uagu bagarabaagua nun?

Ka uagu Herusalén bamahada nun, lun súnwandan?

Ka uagu babusenra berederun lidan maganbadi ani máhatibu bagiribudun nun?

6 Rúhadina narigei aganbaha,

gama lumoun maganbungidina luagu ni aban asakürihati luagu luriban,

lun hamuga lariñagun: Ka san le nadügübei?

Sun hagía éibaagueina haña lidan hémeri

kei gabayu ha siñawaaña herederúniwa wuriburugu.

7 Íbini yábura,

subudi tumuti lidaani tidin lídangiñe aban fulasu lidoun amu.

Sun dunuru subudi hamuti dan le líchugubei Aburemei lun houdin luagun amu oubaü.

Ánheinti huguya, numutuniña,

ibidiñeti nilurudun hun.

8 Ka uagu hariñaga luagu chu lan hau,

luagu anihein lan lilurudun Aburemei huma?

Sánsigua hamaaligu abürühatiña yéetiña?

9 Gama lumoun herederuba chu tau hagía lau busiganu,

luma lau anufudei kei animaalu ábürühatiña tidoun sádara

hageiti lichú hau anhein máhaaña lubéi lun nererun?

10 Ligía nederegerubaña lubéi hámarigu houn amu wügüriña,

runeime hamúan houn amu.

Ladüga sun hagía, dandu wéinamuhaña kei ñǘbürigiña,

luágunrügüñein agañeiruni marumanti hasaminara.

Dandu profetagu kei fádirigu, íweruhatiña lau eyeeraguni.

11 Ligibuagurügüñein hagumein numutuniña hagaraniha houn,

hariñaga luagu mama lan sandi wéiriti hawagubei,

ani sandi wéiriti.

12 Lunti hamuga hanügün busiganu lau hadügüni katei le,

le aubei magundan nan.

Gama lumoun masanditiña busiganu,

Ibidiñegubeihali houn ka lan busiganubei!

Ligía danme lubéi nabeichuniña,

hachugeraguba, ábame héiguadun kei ha híbiri.

Au, le Aburemei ariñagubalin".

13 Lariñahare Aburemei:

«Nadürüraaña numutuniña kei ladürürǘn türigu.

Meredebei ni aban lin beibei lidan beibei-agei,

ni aban igu luagu tídibu igu.

Ubanaürügübei sáühali eredera».

14 Hariñagame numutuniña:

«Ka uagu weredera ya?

Keimoun sun wagía lidoun burí uburugu, le baríeiruati,

le ñein tumuti áruma áfarawagua wamaamugagubei.

Láfaraguaadiwa Wabureme le Wabungiute;

líchuguña duna péisiniti woun,

ladüga wafigouhan ligibugiñe.

15 Agurabatiwa yebe awanseruni,

gama lumoun machülüti ni kata buiti woun.

Agurabatiwa yebe átuadi,

gama lumoun luéirinrügüñein anufudei ñübuin woun.

16 Aniteeli ágani!

Aganbúaali lahunduhan ligabayun Dángiñe.

Lidan le hahinhan, adadagarati sun múa.

Hayabiña agünrinchaguei fulasu lau sun buiti le lídanbei,

hama sun ha aganóubaña lidan».

17 Lariñahare Aburemei:

«Nóunaha hewe péisinitiña huagun lun hágürühanün,

úabei ibiñegu lun lerederuniña».

18 Máraninati nigarigu,

larariruña tuguraasun nanigi.

19 Aganbúati hayahun numutuniña fulasurugu:

«Úaali Bungiu uburugu Sión?»

Úaali lurúeite ñein?

Lariñaga Aburemei:

«Kame hanabaguana lau heseriwidun houn guáriua

luma houn búngiugu meseriwíntiña ha terencha?»

20 Sügüha lubachouga,

gumuha alubahani ani awanhamémegua masalbarúntiwa.

21 Súfuritina lau hasufurirun numutuniña;

beluha íruni luma anufudei nun.

22 Úati funa san árani Galaadü?

Úati funa kaba lan agaraniha houn ñein?

Ka uagu siñá lubéi hareidagun numutuniña?