1 Anihán ñunsu lúmagiñeti Aburemei Suntigabafu le Lubungiute Ísüraeli, libügürü Moabü:

«Fugiabu uburugu Nebu, günrinwagua!

Ragüwati Kiriataimü aba lǘnabudawagüdün!

Fuíwati habarieirun múarugun!

2 Gumugua luéirigun Moabü,

haransehaña áganiñu uburugu Esübón,

lun hagumuchaguagüdüni Moabü keisi aban néchani.

Buguya giñe Madümén, bagünrinchawaguba giñe,

ani súnwandan lasiadirubadibu wuribu.

3 Aganbúati agúarahani Oronaimügiñe:

"Günringuaü luma óunwenbu agadeiruni!"

4 Gádeiha Moabü;

aganbúati hagúarahan lirahüñü.

5 Anihein águiraü hágurugu ha amudeireinabaña

luéigiñe luwübüri Luitü;

ha aragachubaña uburugun Oronaímü,

agúarahatiña lau igarigu ladüga óunwenbu lamiselu.

6 Anuraha humá! Sefulá le gayaraati!

Ítara humá kei búbugati lidan fulasu mageirawati!

7 «Moabü, hemenigiñahatibu luagu bere luma birisin,

gama lumoun bárügüdüwaba giñe.

Lanügǘba Kemosu le bubungiute

lidoun amu ageiraü habu sun lufadirinigu

hama gürigia ha wéirigubaña.

8 Lachülürüba günringuaü lidoun sun burí uburugu,

mesefubei ni aban;

lerederuba fulasu wayati luma fulasu le wǘbüguati lidan günringuaü.

Au, le Aburemei ariñagubalin.

9 Ru humá arünaü lun Moabü lun lidin áhamaheina;

lugundun hagünrinchaguaali

ladüga lerederuba burí luburugute lidan günringuaü

úouga ni aban aganóuti ñein».

10 (Íñarawaguati le madügünti wadagimanu le uáguti lariñaga Aburemei lau ugundani! Íñarawaguati le areiduti lefeinte lun máfarahan lan!)

11 Súnwandanha darangilañu lan awinwanduni Moabü, masagarúnñahagiña lílana hageiragiñe. Ítara haña kei diwéin to igirúboun lun tañuuragun, to meserúnboun lídangiñe aban ágeidinaü lidoun amu, ligía meferidiradi lubéi tisemén ni tíhemen.

12 Gama lumoun lariñahare Aburemei: Lachülürüba weyu danme nóunahan gürigia éseroun diwéin tuguya lidoun amu ágeidinaü, ábame habouchaguni ágeidinaü le erederubei málouga. 13 Ábameti labusigaridagun Moabü lau Kemosu le lubungiute, ítara kei buga labusigaridagun Ísüraeli lau Beteli le meha uágubei líchigei sun lemenigin.

14 «Mariñagalátia Moabü: "Ganigitiwa,

wuriburuguna héretiña wagía".

15 Aniteeli agünrinchaguti Moabü luma burí luburugute.

Ha buídutimabaña hádangiñe ha nibureindeinabaña ñein hóunweguba.

Urúei le gíribei Aburemei Suntigabafu ariñagubalin.

16 Layarafaduña lilamiserun Moabü.

Lúnrügaali lachülürün halamiserun.

17 Lubesinanigu Moabü

hama sun ha subudihabúbaña lun laganbahoun luagu,

hayahuaha luagu, hariñagame:

"Ariha humá, halagua wewe le seini lánina erei,

lubaduna uéiriguni!"

18 «Rariba lídangiñe bubara le wéirigubei,

uburugu Dibón, ñuruba múarugu,

ladüga anitén le agünrinchagubalin Moabü buagun,

günringua laali sun bubarieirun.

19 Uburugu Aroerü, ráramaba laru üma, barihame,

bálügüdañame ha móunwegunbaña ka lan asuseredubei.

20 Ǘnabugüdüwa Moabü, anihein buin lau anufudei.

Hayahuaha lau igarigu luagu!

Ariñaga humá laru duna Arünón luagu günrinwagua lan Moabü!»

21 Chülüha abeichúni le ariñawagúaalibei luagun burí uburugu le lídanbei fulasu gawübüriguati: Olón, Haasü, Mefatü, 22 Dibón, Nebu, Betü-dibülataímü, 23 Kiriataimü, Betü-gamulu, Betü-meón, 24 Keriotu, Bosurá labu burí sun luburugute Moabü, le yarafabei luma le dísebei.

25 Lariñahare Aburemei:

«Halagua lere Moabü,

günringua lubafu».

26 Bacharuagüda huméi Moabü,

ladüga liñuragun lungua luagun Aburemei.

Ábameti labalabahan Moabü lidan lewerahan guánarügü,

ábame ladügǘn bula lau.

27 Moabü, ma adaaguañahatibu bula lau Ísüraeli,

adimureha buguyaha luagu lau mínsiñehabuni,

kamá hamuga aban híweruti ligía?

28 Furí humá uburugugiñe lílana Moabü;

heiba aganawa laganagua dübü wéinamuti kei wagugua.

Ha adügübaña hamasa lárurugu gudungu.

29 Subudi wamuti lanarime lanaagun Moabü lungua:

líñugun, lupantan luma lanarimegu.

30 Subudi lumuti giñe Aburemei lumabuchahan,

adimuredügü lan luma lásurun erere.

31 Ligía nayahuba lubéi agúaraha nuguyame hawagu sun lílana Moabü

luma hawagu lílana Kirü-eresi.

32 Nayahuba buagu, beibei-agei le lani Sibümá,

Sügǘ lau layahún luagu Haserü.

Chülüti burí meha bilimun yagürounmeme luéi barana,

chülüti meha darí Haserü.

Gama lumoun günrinwagua balubahan beibei.

33 Maganbúnhali agúarahani lánina ugundani

lufulurin-ágeirugu Moabü.

Gumuha diwéin lídangiñe tagei.

Úaaña kaba lan achuinragua beibei,

úaali uremu lánina ugundani.

34 Agúarahatiña lílana Esübón lau igarigu,

chülüti hagúarahan darí Elalé luma Haasü,

luma lúmagiñe Sóarügiñe darí Oronaímü luma Egülátü-selisíya,

ladüga íbini lísensen duna le burí Nimürímübei mábeiha.

35 Lariñahare Aburemei:

«Nagünrinchagubaña lílana Moabü ha awarirubaña luagun burí wübü,

adagaragüda tidan hasanduariun gibe tubungiutegu

luma águdaha kupali houn habungiutegu».

36 Ligía tamumehanbei nanigi luagu Moabü luma hawagu lílana Kirü-eresi

kamá hamuga tamuri fidu lidan ábunahani,

ladüga féridiha irisini le meha lóundaragubei.

37 Heluha sun ábulugu, sawa sun ídiumaü;

adügaaña súngubei biti luagu háhabu,

daügua hagía daüguaü súsutu.

38 «Ayahunirügüñein aganbúa luagu

sun tábulugu muna Moabü luma lidan sun lémeri,

ladüga günringua nan Moabü kei aban weru le meseriwínti.

Au, le Aburemei ariñagubalin».

39 Hayahuaha luagu Moabü!

Buin liña lau anufudei!

Areidalá lefeinte lau aban igaburi le nibusigarídünati!

Saliguaali lun ábanme katei hanufunati houn sun lubesinanigu.

40 Lariñahare Aburemei:

«Láhamaruba lágani Moabü luagun

kei aban ágila lau tarüna tulegu.

41 Lábürühaba burí uburugu tuma muna to héreboun labun lubafu ágani,

lídanme weyu ligía hadadagaruba wuriburuguna Moábüna

kei würiña agaridutiña.

42 Lagünrinchawaguba Moabü,

ladüga liñuragun lungua nuagun,

au, le Aburemei.

43 Ligía nariñagunbei au, le Aburemei:

Ítara haba lílana Moabü kei animaalugu ha éibaahoutiña

o ha lan yarafaaña lun héiguadun lidoun huyu o tidoun sádara.

44 Le esefuruti hawéi éibaahatiña,

léiguaduba húyurugun,

le áfuriduti húyurugugiñe,

lábürühaba tidoun sádara,

ladüga nanügübei lidaani labeichún Moabü luagun.

Au, le Aburemei ariñagubalin.

45 «Añahein anurahatiña ha méreeña áluaha haramudagun

lábugiñe lamuñan Esübón,

gama lumoun láguduña Esübón le luburugute urúei Sihón,

ani léibaahaña ligeme,

láguduñein luwübüri burí Moabü,

ageiraü súsuti ligía.

46 Fugiabu buguya Moabü!

Féridihadibu, lageira Kemosu!

Háfuridagüdüwaba birahüñü hageiragiñe.

47 Gama lumoun nasansirubei lubunurun Moabü lagumuhóun oura;

au, le Aburemei ariñagubalin».

Anihán siadi le líchugubei Aburemei kóntüra Moabü.