1 Aba ladimurehan Aburemei lun Heremíasi lidan lidiisin lirumudiri larúeihan Sedekíasi Hudá, le lidisiwídün lirumudiri larúeihan Nabukodonosoru.

2 Lidoun dan ligía, hageindaguña lisudaranigu lurúeite Babilónia luma Herusalén, ani ladaürǘña profeta Heremíasi tibürürünrugu furisun to lúbiñeboun lurúeite Hudá.

3 Ladaüragüdün Sedekíasi ladüga buga lariñagun Heremíasi, luagu: «Lariñahare Aburemei: "Nábürügüdübei uburugu le labun lubafu lurúeite Babilónia, 4 ani mesefubei urúei Sedekíasi hawéi Kalüdéana, lábürühaba labun lubafu lurúeite Babilónia, ani gasu larufudagun lungua ligibugiñe. 5 Lanügübei Nabukodonosoru Sedekíasi Babilónioun, le ñeinba lubéi leredera darimeya nagúarun luagu. Íbini hageindagun hama Kalüdéana, magañeirúnbadün. Au, le Aburemei ariñagubalin" ».

6 Aba lariñagun Heremíasi:

7 —Adimurehati Aburemei nun, lariñaga: "Liábinba biduhe Anaméli, le liráü biyaurite Salumu ariñaga bun lun bagañeihani lufulasun le Anatótubei, ladüga buguya lan yarafaguatimabei biduhegua luma". 8 Ítara kei lariñaguni Aburemei nun, aba liabin niduhe Anaméli numoun tibürürünrugun furisun, aba lariñagun nun lun nagañeihani lufulasun le Anatótubei, hamúanrugu lani Benhamín türibu, ladüga au lan garichabei lun nerederun lau, luagu liyarafagun waduhegua. Dan nasubudirúnbalin luagu lóunahan lan Aburemei, 9,10 aba nagañeihani fulasu ligía lúmagiñe niduhe Anaméli. Aba nederegerun disedü murusun pülata lun, ebegi le uágubei wadüga daradu, aba nadügüni daradu bürüwañu, tánpüwañu lau haseinin ha gefenbaña luagu. 11 Ábati nanügünu biángubei kopia lani daradu, aban darugu lau ligaburi daradu lánina agañeihani, to aban madourawaguntu, 12 aba níchugunu lun Baruku, le liráü Neríasi, le libari Maseíasi, ligibugiñe niduhe Anaméli, hama gefentiña ha aseinirubarun dugumedu, hama sun huríu ha ñúnbaña tibürürünrugu furisun. 13,14 Aba nariñagun lun Baruku hagibugiñe:

«Lariñahare Aburemei Suntigabafu le Lubungiute Ísüraeli: Barüboun bián kopia lani daradu to, to daruguboun tuma to daraguboun, ruboun lidoun aban weru lauti múa lun tadurarun saragu dan. 15 Ladüga lariñahare Aburemei Suntigabafu, le Lubungiute Ísüraeli: Lidan múa le, tagañeihóuayaba muna, ichari tuma beibei-agei».

16 —Lárigiñe níchugunu dugumedu lánina agañeihani tugía lun Baruku, le liráü Neríasi, aba nafurieidún lun Aburemei, nariñaga: 17 "Nabureme, lau óunwenbu bubafu badügei sielu luma ubóu. Úati ni kata siñati bun. 18 Arufuda bumuti bínsiñehabu houn saragu, gama lumoun bei bumutiña giñe gürigia luagu hafigoun hagübürigu. Bungiu wéiriti ani gabafuti, Aburemei Suntigabafu bíribei! 19 Wéirigutibu lidan baransehan luma lidan le badügübei. Ariha bumuti sun le hadügübei gürigia, aba bafayeiruni kada aban según le ladügübei. 20 Adügatibu milaguru luma burí seini Ehiptu, ani dagá lumoun dan le, adügameme bágili dandu hadan lánigu Ísüraeli keisi hadan sun gürigia, aganbahóuatiti luagu biri. 21 Sagá bumutiña bumutuniña ha Ísüraelina Ehiptugiñe lau óunwenbu bubafu, adügeina milaguru luma seini, anufudedaguagüdaña súngubei. 22 Ru bumuti múa le lun Ísüraeli, le rísibei ani buidu ligía lun ábunaguni, kei buga bariñaguni houn hagüchagu. 23 Gama lumoun dan le hebelurunbei fulasurugún aba hárügüdüni, mídintiña lau le bubeibei, mafalarun haméi arufudahani le bíchugubei houn, madügün hagía ni kata lídangiñe le bariñagubei houn. Ligía bóunahanbalin sun wuribani le hawagun.

24 Guentó adügaaña Kalüdéana hebu lun hawariruni baríeiru lun hábürühan luagun uburugu, ani lau wuribu, ilamaü luma sandi lábürügüdübei uburugu háhaburugun áganiñu. Nabureme, ariha baali luagu lagunfuliruña lan le bariñagubei. 25 Ani lau sun lira, Nabureme, ariñagatibu nun lun nagañeihani fulasu ligía hagibugiñe gefentiña, lau sun lábürühaba lan uburugu háhaburugun Kalüdéana».

26 Ábati lóunabuni Aburemei Heremíasi, lariñaga lun:

27 —Au Aburemeibei, Habungiute sun gürigia. Úati ni kata násiñarun. 28 Nariñahare lubeiti bun: Nadügüba lun lábürühan uburugu le lúhaburugun Nabukodonosoru le lurúeite Babilónia luma labun habafu Kalüdéana. 29 Kalüdéana ha ageindagubaña luma uburugu, hebeluruba uburugun, ábame hébeduni; hágudubei úara tuma muna burí to meha ñein lubéi hágudaha kupali tábulugu lun Baali, lun hanabagunina, dagagüdawa tuguya diwéin houn búngiugu terencha. 30 Lúmagiñe furumiñeti dan hadügüñein lánigu Ísüraeli hama lánigu Hudá katei le magundantina lau; meredegili hanabagunina Ísüraelina hau búngiugu ha guánarügü hadügübaña. Au, le Aburemei ariñagubalin. 31 Uburugu le, lúmagiñe weyu le lagumeserunbei ábunawagua, madügünti amu katei luéidigia lagañidagüdünina. Ligía nagumuchaguagüdaali lubéi 32 luagu sun le anabagua láadinabei Hudá luma Ísüraeli lau luriban hagaburi, kéigubeirügü harúeitegu, hafadirinigu, hani profetagu hama sun lílana Hudá luma Herusalén. 33 Ru hamaali hanagan nuagun. Lau sun merede lan narufudahan houn, madügüntiña gasu nau, maha hagía heresibiruni narufudahan. 34 Darí lun wíyeda hamaaru lan ténpulu to anuadirúaboun nun aba híchuguniña hagübüri habungiutegu ñein. 35 Adaaguatiña giñe latarü lun Baali luagu fulasu wayati le lani Ben-inomu, lun háguduniña hasaanigu keisi adagaragüdüni lun Moloku, afigougüdei Ísüraeli, lagübüri katei le mariñagun nubéi houn lun hadügüni ligía hadüga, le machülügubeiti lidoun nisaminan.

36 —Nariñahare au le Aburemei, le Lubungiute Ísüraeli libügürü uburugu le, le uágubei bariñaga luagu lábürühaba lan labun lubafu lurúeite Babilónia, ladüga wuribu, ilamaü luma sandi: 37 Nóundarubaña lílana lídangiñe sun ageiraü le ñeinhin lubéi nachagaraguaña dan le nagañidunbei, ábame nagiribudagüdüniña lidoun fulasu le, lun habagaridun darangilu ya, 38 hagíaba numutuniña, aume Habungiute. 39 Nadügüba lun ninebedun houn lidan sun habagari, buidu láamuga lidin houn luma houn hadügawagun, 40 nadügüba aban daradu le magumuchaditi hama: Meredebei nadügün buiti houn, nabuinchagüdübaña lau ayumahani lun híchugun uéiriguni nun. 41 Nagundaaruba lau nadügün buiti houn, ani nadügüba lun haganóun lidan fulasu le tau sun nanigi luma lau sun ninarün.

42 Ábaya lariñagun Aburemei:

—Ítara kei nóunahani lanarime wuribani le hawagun gürigia ha, nóunahabei giñe sun buiti le uágubei nariñaga houn. 43 Ani lidan ageiraü le, le uágubei bariñaga luagu lerederuba lan málouga, úouga gürigia ni animaalugu ñein, ani luagu lábürühaba lan labun habafu Kalüdéana, lagañeinhóuayaba fulasu ñein. 44 Lagañeinhóuba, ábame ladügǘn daradu bürüwañu, tánpüwa ani seini hameime gefentiña. Lasusereduba le lumúanrugu Benhamín, geyegua lau Herusalén luma burí luburuguterugu Hudá, dandu lidan fulasu burí le dabíararugubei kei lidan burí aüdü le lídanbei fulasu mawübüriti, luma lidan burí luburugute Négebü, ladüga nadügüba lun lasansiragun habunurun. Au, le Aburemei ariñagubalin.