1 Aba laganbuni Sefatíasi le liráü Matán, Gedalíasi le liráü Pasuru, Hukali le liráü Selemíasi, luma Pasuru le liráü Malükíasi lariñagun Heremíasi hagibugiñe lílana fulasu:

2 —Lariñahare Aburemei: "Le erederuti uburugu, lóunweba wuriburugu o lau ilamaü o lau sandi. Ánheinti le áfuriduti lun lederegeragun lungua houn Kalüdéana, lesefurubei libagari".

3 Lariñahare Aburemei:

—Lábürühaba uburugu le labun habafu lisudaranigu lurúeite Babilónia, lárügüdübei ani lásiñarubei ni aban eredera.

4 Ábati hariñagun lánigu urúei lun:

—Gasu lafarún wügüri le, lugundun lau lererun áfara lumuti haritagun súdara ha añaheinguabaña uburugu, hama sun híbiri gürigia. Mabusenrunti wügüri le buiti houn lílana fulasu, luéidigia wuribati.

5 Lariñaga urúei Sedekíasi houn:

—Buiti, adüga huméi le habusenrun lau: Siñati nadügün ni kata kóntüra huguya.

6 Ábati hárügüdüni Heremíasi, aba hádaruni lidoun lifusun Malükíasi le tibürürünrugubei furisun. Aba hagüraguni lau gúrudu, keiti ua lubéi duna lidan fusu ligía, luéidigia baribarabu, aba labuluchun Heremíasi lidan.

7 Aba laganbun aban Etiopía hádangiñe wügüriña safun ha lúbiñebaña urúei gíriti Éwedi-mélekü luagu da hamá lan Heremíasi fúsurugun. Lidan dan ligía lídanñein aban damuriguaü lidan fulasu le gíribei Lubenari Benhamín urúei. 8 Ábati láfuridun Éwedi-mélekü tídangiñe lani urúei palasiu, aba lidin ariñaga lun urúei:

9 —Uruei, mabuiduntitia le hadügübei wügüriña ha lau Heremíasi. Da hamá lidoun aban fusu, ani lóunweña lilama ñein, lugundun úaaru fein uburugu.

10 Ábati lariñagun urúei lun Éwedi-mélekü lun lanügün darandi wügüriña lúmagua lun hasagaruni Heremíasi fúsurugugiñe lubaragiñe lounwen. 11 Aba lanügüniña Ewedi-mélekü darandi wügüriña hagía, aba lidin tidan tagei daüguaü to palasiuruguboun, aba lasagarun gamisa wéiyaaru ñéingiñe, aba larariragüdünu lun Heremíasi lau gúrudu fúsurugun, 12 lariñaga lun:

—Ruboun gamisa burí to lábugiñe barüna luéi lélechunibu gúrudu.

Aba ladügüni Heremíasi ítara. 13 Ábati hachawaruni gúrudu, aba hasagaruni Heremíasi lídangiñe fusu. Lárigiñe, aba lerederun Heremíasi tibürürünrugu furisun.

14 Aba lóunaagüdün urúei Sedekíasi luagu Heremíasi lun larihini luagu lǘrüwan tebelaagüle ténpulu. Lariñaga urúei lun ñein:

—Nálügüdaadibu aban katei, busentina bóunabunina furangu.

15 Lariñaga Heremíasi lun:

—Ánhabu nóunaba, báfarubadina hilagubei, ánhana íchiga aban eweridiruni bun, madügünbadibu gasu nau.

16 Gama lumoun aba láfiñurun urúei Sedekíasi aramudaguarügü lun Heremíasi, lariñaga lun:

—Fiñutina bun luagu Aburemei le íchugubei ibagari woun, luagu máfarun nubadibu lan, mederegerun nubadibu giñe háhaburugun ha busenbaña háfarunibu.

17 Ábati lariñagun Heremíasi lun Sedekíasi:

—Lariñahare Aburemei Suntigabafu le Lubungiute Ísüraeli: "Ánhabu ederegeragua bungua houn lani lurúeite Babilónia heneraaligu hau sun biduheñu, hesefurubei hibagari, ani magudúnbei uburugu le. 18 Gama lumoun ánhabu mederegeragun bungua houn, hárügüdübei Kalüdéana uburugu le, ábame háguduni, ani mesefubadibu".

19 Lariñaga Sedekíasi lun:

—Hanufudetina hawéi huríu ha ásügürübaña hamoun Kalüdéana; ánhana ábürüha háhaburugun, hasufuriragüdübadina.

20 Lariñaga Heremíasi lun:

—Gama lumoun mábürühanbadibu háhaburugun. Adügabéi le lubeibei Aburemei le nariñagubei bun, ábame besefuruni bibagari. 21 Arufuda laali Bungiu nun le lunbei lasuseredun, anhein mahaméme urúei lederegeragun lungua: 22 Sun würiña ha erederutiña tidan luban urúei, le lurúeite Hudá, hasagarúba, ábame hederegerún houn lani lurúeite Babilónia heneraaligu, hariñagame würiña hagía:

«Hátima meni lumadagu urúei

yeeda hamá lun hagañeiruni,

aba habuluchagüdüni lugudi lidoun baribarabu,

ñéingiñe aba híchuguni hanagan luagun».

23 Aba lasigirun Heremíasi ariñaga lun urúei:

—Hederegerúaba sun búmarigu hama birahüñü houn Kalüdéana, ani mesefubadibu hawéi, bederegerúaba lun lurúeite Babilónia, ábame háguduni uburugu.

24 Ábati lariñagun Sedekíasi lun Heremíasi:

—Anhein hínsiñe lubéi bibagari bun, mariñagabei katei le ni ka un. 25 Anhein hasubudira ábutigu luagu adimurehaadina lan buma, hayabinba álügüdabu ka lan bariñagubei nun, luma ka lan nariñagubei bun, hariñagame bun luagu hesefurubadibu lan anhein bariñaga houn ka lan nariñagubei bun. 26 Bariñagame lubeiti houn luagu bayumuraguarügüña lan nun lun móunahananibuya tidoun luban Yónatan, luéi bounwen ñein.

27 Aba houdin sun lánigu urúei arihei Heremíasi, aba hálügüdaguni, gama lumoun aba lóunabuniña kei lariñaguni urúei lun. Ábati hígiruni lungua, lugundun úati ni aban asubudiruti le layanuhabei luma urúei. 28 Aba lerederun Heremíasi tibürürünrugu furisun darí weyu le lárügüdünwabei Herusalén.