1 Lariñahare Aburemei:

—Lídanme dan ligía, auba Habungiute sun lani Ísüraeli türibu, hagíame numutuniña.

2 Lariña hare Aburemei:

«Arufuda numuti nareini lidan fulasu mageirawati

houn gürigia ha esefurubaña luéi óunweni.

Dan buga láluahan Ísüraeli aban fulasu lun lemeraagun,

3 ladüga lüha nariñagun lun Ísüraeli:

Hínsiñegubeiñadibu nun nageira, lau ínsiñeni le magumuchaditi

ligía nóuserunmemebalibu lau areini.

4 Nararamagüdayabadibu, Ísüraeli.

Biábinyaba lau panderu abinaha lau ugundani.

5 Bábunaguayaba beibei-agei luagu luwübüri Samaria,

ani ha ábunagutiña beibei, héigiba lídangiñe lin.

6 Lugundun lachülürüba aban weyu lun

hagúaragun óunigirutiña luagu luwübüri Éfürain:

"Higougu, keimoun Sión lun Aburemei le Wabungiute" ».

7 Lariñahare Aburemei:

«Heremuha lau ugundani hawagu lumutuniña Hakobu,

ha wéirigutimabaña hadan sun néchanigu.

Aganbualá heremuhan, ariñaga humá:

"Sefu lumutiña Aburemei lánigu,

ha erederubaña hádangiñe Ísüraelina".

8 Nagiribudagüdübaña lídangiñe lagumuhóun larigei ubóu

hayabinba marihintiña hama, danimatiña,

würiña dageinatiña hama ha águrahaaña;

Hagiribuduba saragu gürigia!

9 Hayabinba ayahuaheina luma afurieideina.

Nanügübaña le ñein lumuti saragu duna,

lídangiñe aban üma le úaraguati,

le ñein lumuti machugeragun hamá.

Ladüga au lúguchibei Ísüraeli,

Éfürain nígiramabei.

10 «Néchanigu, aganba huméi lererun Aburemei,

ani adimureha humá lidan burí kosu le díseburibei:

"Chagagua lumutiña Aburemei Ísüraelina,

gama lumoun lóundarubaña ábame lóunigiruniña

kei lóunigiruniña amainiruti mudún lilügüniña mudún".

11 Lugundun sefu lumutiña Aburemei lumutuniña Hakobu,

sefu lumutiña luéi aban néchani héretimati.

12 Hayabinba ábame heremuhan lau ugundani

lidan fulasu le íñutimabei Sión,

hagundaaraguba lau buiti le líchugubei Aburemei:

Türigu, diwéin luma garaba, mudún hama bágasu.

Ítara haba kei aban nadü-agei le túaguati,

meferidirun hamaalime here.

13 Habinahaba würiña irahüñü lau ugundani

kéigubeirügü wügüriña ha nibureingiña hama wéiyaaña mutu.

Níchuguba dǘgüdaguaü houn:

Nasansirubei hayahun lun ugundanime,

níchuguba ugundani houn le wéiritimati luéi hagarigu.

14 Nadügüba lun héigini fádirigu lubuidun-agei éigini,

luma lun gafanran hamá nánigu lidan liibe buiti le níchugubei.

Au, le Aburemei ariñagubalin».

15 Lariñahare Aburemei:

«Aganbúati aban umalali Ramá,

le hamalali ayahutiña lau igarigu,

Rakeli to ayahuboun hárigi tirahüñü,

máhatu lun támalihoun ladüga hilagua lan tirahüñü».

16 Gama lumoun lariñaga Aburemei tun:

«Rakeli, hebé bayahun,

hebé láwiyurun báguira,

ladüga gafayeiruahabei bigarigu:

Hayabinyaba birahüñü hageiragiñe áganiñu.

Au, le Aburemei ariñagubalin.

17 Anihein aban emenigini bun:

Hagiribuduba birahüñü hageiroun.

Au, le Aburemei ariñagubalin.

18 Aganba naaña lánigu Éfürain ekehara lau igarigu, hariñaga:

"Ítara niña meha kei aban liraüraü bágasu le mabuchahati,

gama lumoun gidá baali numabuchahan,

giribugüdabana búmaguoun,

ladüga buguya Aburemeibei le Nubungiute.

19 Asakürihaadina luagu nadisedun buéi;

ariha naali nungua lídanñadina lan figóu

ligía narufudunbalin nasakürihan lau náfarahani niyada,

sanditina busiganu luagu lifigouna niburein nan".

20 «Ítara haña lumutuniña Éfürain nun

kei aban isaani hínsiñeguti;

ligía isaani le hínsiñetimabei nun.

Lau sun nadeinhan lun, mabulieidun numuti;

gudemehabutu nanigi lun.

Au le Aburemei ariñagubalin.

21 «Ísüraeli, bíchaaha seini luagu üma,

ménrengun láamugaya badariruni;

arihabéi üma le buga ídanbei béibuga buidu.

Giribubá Ísüraeli,

giribubá lidoun burí buburugute!

22 Ídaba san leredera yagüroun yaroun ban

kamá aban isaani to acharagadutu.

Au, le Aburemei, nadügüba lun lasuseredun aban katei iseri lidan ubóu le:

Tóunigirubei lan würi wügüri!»

23 Lariñahare Aburemei Suntigabafu, le Lubungiute Ísüraeli:

—Danme le nasansiruni habunurun lílana Hudá, danme le lídanhaña hageira, haburuguterugu, hariñagayaba: "Binilei Aburemei wübü sánduti le ñein lubéi laganawa irichaü!" 24 Haganóuba lumutuniña Hudá, hama lílana burí luburugute, ábunagutiña nadü hama hóuniri habiñanigu ñein. 25 Níchuguba saragu éigini luma uniñein houn ha buchaañabaña uagu ani mere hagía.

26 Aba nagagudún, aba néfegechuni nagu. Ma nugundan lau nuénedü.

27 Lariñahare Aburemei:

—Lachülürüba weyu lun nadügün lun hagibedun gürigia hama animaalugu Ísüraeli luma Hudá. 28 Ani ítara kei buga aranseñu nan lun náhulahan, lun nachagahan, lun nagünrinchagun luma lun nadügün damichi, ítara luba giñe aranseñu nan lun nararamagüdün luma lun nábunagun. Au le Aburemei ariñagubalin.

29 —Lídanme dan ligía, mariñawagúnhalime: "Hóutiña agübürigu beibei garühütu aba láseiseidun hari hasaanigu". 30 Ladüga le éigiti beibei garühütu, ligíaba áseiseida lari. Lóunweba kada aban luagu lifigoun guánarügü.

31 Lariñahare Aburemei:

—Lachülürüba weyu lun nadügün aban iseri daradu luma Ísüraeli labu Hudá. 32 Mítaranbei daradu ligía kei le meha nadügübei hama hagüchagu dan le nárügüdünbalin háhabu lun nasagaruniña Ehiptugiñe; ladüga hagía, magunfulirun hamuti nidaradun, lau sun au lan buga Haburemebei. Au, le Aburemei ariñagubalin. 33 Anihán daradu le lunbei nadügüni luma Ísüraeli lídounme dan ligía: Níchugubei nilurudun tidoun lanigi, ábame nabürüdüni lidan lisaminan. Auba Habungiute, hagíame numutuniña. Au, le Aburemei ariñagubalin. 34 Memegeirúnwaalime lun larufudahan gürigia lun lumada o lun lan liduhe lun hasubudirunina, lugundun hasubudirubadina súngubei, lúmagiñe le wéiyatimahalibei dagá lumoun le ñǘraütimagilibei. Feruduna nubéi hariban, maritagundigiaadiname luagun hafigoun. Au, le Aburemei ariñagubalin.

35 Lariñahare Aburemei le íchugubalin weyu lun ladurangun wéyuagu

luma hati hama waruguma lun hadurangun áriebu,

le adügübei lun lánhingichun barana ahuuha ligía lugudi barana,

le gíribei Aburemei Suntigabafu:

36 «Ánheindügü hamuga achülüra weyu lun lachararun lúrudu

le burí níchugubei lun weyu, hati, waruguma, barana.

Ligíaba weyu ligía mámaaña lanme numutuniña Ísüraelina.

Au, le Aburemei ariñagubalin.

37 Lúndügü hamuga lamisurahóun sielu,

eibugúa ligía hamuga sun ubóu aríaahei chülǘ lumoun lagumeseha,

anhein hamuga asusereda ítara

ligíarügübei hamuga náguruni Ísüraeli nuáriua luagu sun lifigoun.

Au, le Aburemei ariñagubalin».

38 Lariñahare Aburemei:

—Lachülürüba aban weyu lunya lararamun nuburugute, lúmagiñe luéigiñe luayelesin Ananéli darí lumoun bena le gíribei Lubenari Kaaná. 39 Suruñu luba lébeha lidan laini lúmagiñe ñéingiñe darí luagun luwübüri Garebü, ñéingiñeme aba legeyedun luagun Goá. 40 Sunme wayati le ñein lubéi hábunahoua hilaaña, achagahóua ligía baligi ñeinhin, sun ichari le lóugiñebei liraüraü duna Sedurón darí lumoun larigei Habenari Gabayu luéigiñe oubaü le ñéingiñe lubéi laboucha weyu, anuadirúabei nun, ani magurúnwadigiaalime magünrinchawagun ligíame.