1 Málaali uburugu le meha buinbei hau gürigia!

Inebewati meha lidan sun ubóu,

tenegerügaali aban würi to hilaali túmari!

Herusalén, le urúei hadan néchanigu

maweirigunti luéi aban idamuni guentó!

2 Sagü áriebu layahun;

chun liña lubuyubu lau águiraü.

Úati ni aban ámalihati hádangiñe sun lubúaligu.

Garabaguaaña sun lumadagu luagun; láganihaña guentó.

3 Bóugudin luéi súfuri luma lidere wadagimanu,

lasufuriruñein Hudá adaürǘni guentó.

Laganóunña lidan amu ageiraü,

ani madariti emeraaguni.

Ragǘ hamá háñaha éibaahabalin,

aba híchuguni lidoun lénrengunga.

4 Híruha lémeri Sión!

Úaaña ñǘbuintiña efeduha!

Málougaali luagu burí lubenari uburugu,

ayahuatiña fádirigu, nidiheritiña würiña nibureingiña,

wuribati dan lun Herusalén.

5 Láganiñu agumadihabaña,

buiti lidin houn ha iyereehabúbaña lun lidan sun le hadügübei.

Nidiherigüda laali Bungiu luagu lifigoun,

barǘ lumutiña ágani lirahüñü adaürǘwa lidoun amu fulasu.

6 Gumugua sun luenden Herusalén,

ítara haña lábutigu kei usari áluaha sagadi lun heigin;

aduruuheinei hagudi héibuga habá habá ha éibaahabaliña.

7 Haritagua lumuti Herusalén weyu

le lerederunbei lábugua híruñu;

haritaguati luagu sun irisini;

le meha lúmabei lidan dan le sügühalibei;

haritagua lumuti dan le lábürühanbei labun lubafu lágani,

úati ñǘbuinti íderaguei,

dan le harihinbalin láganiñu

aba hadügün bula lau lagünrinchagun.

8 Gíbeeli lafigouhan Herusalén,

darí lun lanügǘn kei ni kata.

Ha meha wéirigubei hanügüni, meberesenhaaña lau,

ladüga ariha hamaali lasurusuhan.

Ligía layahuña lubéi, aba lagararaagun lau busiganu.

9 Buin tiña ladaüragun lau iwiyei;

maritagunti buga luagu le lunbei lasuseredun lárigiñe.

Guentó, ábürüha, úati kaba lan ámalihei.

Aburemei, arihabá lun nidiheri

luma liñun lanaagun nágani lungua!

10 Barüla ágani lirisin Herusalén lánime.

Ariha hamuti lílana uburugu hebelurun áganiñu ténpulurugun lau anarimeni,

gürigia ha únbaña bariñaga, Aburemei,

lun mebelubaña lan bitenpulunrugun!

11 Hayahuña sun lílana Herusalén,

háluahaña éigini;

ru hamuti harisin luagu éigini lun habagaridun!

Aburemei, arihabéi nagünrinchawagun!

Arihabéi gádantina!

12 Huguya le luágubei üma,

ráramagua humá asaminara anhein anihein

lubéi gáriti libe le nuágubei,

le asufuriragüdübalina saragu!

Aburemei óunahabalin lamiselu le nuagun

dan le ladurangunbei lanarime ligañi!

13 Chüti Aburemei aban watu gemeti íñugiñe

le aburuchagubalin nabu;

sétiti aban sádara nubá;

aba lagiribudagüdünina;

ígira láadina nábugua,

lun nasufurirun sun dan.

14 Ariha laali Aburemei nifigoun, aba lóundaruni

lárigiñe aba lagüürüni nigiina,

lagumuchuña lihürü nifigoun lau nere!

Ru laadina Bungiu háhaburugun gürigia

ha siñá numutiña awanda.

15 Adügati Aburemei bula hau sun ganigitiña háñaha

ageindagubaña nuéigiñe.

Óunahati súdaragu nuagun lun hagumuchun

hau nuwügüriñanigu ha ganigitimabaña.

Buregualá Aburemei Hudá,

kei taburechawagun beibei lun tadügün diwéin.

16 Ayahuagüda lumutina burí katei le.

Buinti nagu lau águiraü,

ladüga úati kaba lan ámalihana,

kaba lan íchiga gurasu nun.

Rédeiha nirahüñü lidan günringuaü

ladüga héretima lan wágani wawéi.

17 Tulé lumuti Herusalén lúhabu ayumuragua

gama lumoun úati kaba lan ámalihei.

Ariñagaali Aburemei lun hegeyedaguni áganiñu Hakobu,

katei le iyereehabúti Herusalén houn.

18 Adüga lumuti Aburemei le lubudubu,

lugundun magunfulirun numuti lugumadin.

Aganba humana, sun gürigia;

ariha huméi nigarigu!

Barüwagua wügüriña hama würiña ñǘbürigiña adaürǘwa!

19 Amuriahatina ídemuei hama nubúaligu,

mibihin numuti hámagiñe.

Hilaguatiña nufadirinigu hama wéiyaaña mutu uburugu.

Háluahaña yebe éigini lun habagaridun!

20 Aburemei, arihabéi gádantina!

Sanditina kamá lafaüncha naniguagu!

Buregua lumutu gáriti nanigi

dan le naritagun luagu mabuchaha nan.

Bóugudi, áfaragua tumutiña eféin nirahüñü,

ya múnada, anihein giñe óunweni.

21 Aganba hamuti gürigia nayahun,

gama lumoun úatiña ámalihatina.

Subudi hamuti sun náganiñu luáguti nilamiserun,

gúndaatiña lau badüga lan.

Chülügüdabei weyu le uágubei bariñaga,

lun lasuseredun houn kei lasuseredun nun!

22 Chülügüdabéi sun wuribani le adüga hamaalibei bigibugiñoun;

óuserabaña luagu hafigoun kei badüga nun,

gíbeti nayahun; sánditu nanigi!