1 Wéiriti lagañidun Wabureme,

darí lun laburigadun Herusalén le wéndebei!

Rarigüda laali lubuidunmeraü Ísüraeli,

kei siélugiñe lun múarugun;

lidan ligañi, maritagungubeiti luagun lebu lugudi.

2 Mígirunti Wabureme ni aban luban Hakobu rara;

lidan murusun oura lagañidun,

günringua lumuti sun uburugu derebuguti le lani Hudá;

gumuguagüdati arúeihani hama arúeihatiña.

3 Dan le ladurangunbei ligañi,

aba ladüraaguni lubafu Ísüraeli.

Gidá lumuti lídehan lubafu wawéi

dan wagagibudagun luma ágani;

béhali aban watu uburugu Hakobu,

le águdubalin sun le ladarirun lubarua!

4 Wabureme, kei aban ágani,

aba lesetirunu gimara, aba lederaagüdüni larüna;

aba láfaraguniña ha hínsiñegutimabaña lidan wageira;

óunaha lumuti ligañi kei aban watu gemeti

tuagun likianpun-agei Herusalén.

5 Aba luadigimaridun Wabureme kei aban ágani.

Günringua lumuti Ísüraeli sunsuinagubei;

chagá lumutu sun burí lani palasiu luma liderebugu,

dati saragu idiheri lidoun Hudá.

6 Beluti tidoun lisanduariun lau erei kei aban híweruti;

günringua lumuti lubara óundaraguni.

Adügati Wabureme lun labulieidúniwa fedu

luma luéyuri emeraaguni uburugu Herusalén.

Lidan lanarime ligañi, máhati lun urúei luma fádiri.

7 Máhaali Wabureme lun lani latarü,

meberesenhali tau lani sanduariu;

derege lumuti baríeiru léñaha ágüdahabalin

uburugu, houn áganiñu.

Anihein agúarahani litenpulunrugu Wabureme,

kamá hamuga luéyuri fedu!

8 Fui lumuti Wabureme lubarieirun Herusalén.

Eledegua lumuti günringuaü

aba ladügüni memeraagunga.

Ábürüha baríeiru luma touba muna le lóuburagubei tau ludu,

héiguouga súngubei lidan aban.

9 Mebenariti uburugu, madaünda ligía,

günringua lubenari, anihein múarugu!

Lurúeite hama gumadimatiña,

añahein hadan gibe tubungiutegu;

úaali lilurudun Wabungiute.

Ni íbini houn lani profetagu,

madimurehanhali Wabureme!

10 Ñurutiña wéiyaaña mutu ha lílana Herusalén múarugu maniñu,

chagatiña sagoun hábulugun,

aba hadaüragun daüguaü súsutu arufudei hagarigu.

Buluguatiña würiña irahüñü Herusalénna

dagá hábulugu múarugu.

11 Buchá luagu nagu lárigi ayahuni,

sanditina kamá lafaüncha naniguagu;

gumuha nuguraasun lau narihini

haburugute numutuniña günringuañu,

lau narihin hóunwegun irahüñü

figigiña halama ǘmada.

12 Hariñaga irahüñü houn háguchunigu:

«Méiganhadiwa fein, maniñe diwéin!»

Sun añaha lan ábürüha ǘmadarugu kei buleseiwaaña le lánina óunweni,

sun añaha lan harünarugu háguchu íchigei lagumuhóun awaraguni.

13 Ka ítarabei kei buguya Herusalén?

Ka hénpulu gayaraabei níchuguni lun námalihanibu,

uburugu Herusalén le wéndebei?

Wéiriti bagünrinchagun kei lueirin barana;

kaba san gayara líchugun dǘgüdaguaü bun?

14 Uénedü le uágubei hadimureha bani profetagu bun,

mama amu katei luéidigia iyeeni.

Mafuranguagüdün hamuti bifigoun

lun lasansirun bubunurun,

adimurehatiña bun luagu uénedü le iyeeniti,

aba hafiñeragüdünibu.

15 Dan le harihinibu ásügürütiña,

aba hapouhan háhabu adüga bula bau;

aba híñaahan, ánhinha haméi hachügü,

hariñaga luagu Herusalén le wéndebei,

«Anihán san uburugu le unbei

hariñaga lubuiduntima fulasu ubouagu?»

16 Sun báganiñu ayanuhatiña wuriba buagu,

hariñaga labadinagua híñaahan

luma hayawadagun buagun:

«Günringua wamá sunsuinagubei».

Anihán weyu le wagurabahañahabei;

arihadügü wamá!

17 Adügalá Wabureme laritagun gúnfuliha lau lererun.

Günringualá le laritagubei lagünrinchagun lúmagiñe binarü,

ígirati lun léherahan ágani bau aba líchuguni lubafu iñu.

18 Herusalén le wéndebei,

bamuriaha luma Wabureme lun líderagunibu!

Bayahuaha wéyuagu áriebu!

Merederalá bayahun, memeraaguagüdabei bagu!

19 Saraba! Bagúaraha áriebu, wáguaba danmeme.

Sagabei sun le tídanbei banigi ligibugiñe Wabureme,

ígirabei lun léibaagun kei duna éibaaguati;

bayumuragua lun luagu habagari birahüñü,

ha óunwegubaña halama ǘmada.

20 Wabureme

saminabá luagu úagili lan ni aban bóuserun ítara.

Gasu funagia héiginiña úguchurugu hasaanigu ha guragiña?

Gasu funagia háfarawagun fádirigu hama profetagu tidan sanduariu?

21 Arihúatiña ñǘbürigiña

hama wéiyaaña mutu riwagu ǘmada

áfarawaguatiña wügüriña hama würiña

nibureintiña tau eféin.

Áfarahatibu lidan luéyuri bigañi,

áfarahatibu magudemehabuga!

22 Barühadibu denchaü lídangiñe sun oubaü,

kamá hamuga liábiña lidoun aban fedu;

úati ni aban esefuruti lidan luéyuri bigañi.

Áfaragua lumutiña ágani ha nagüriarubaña.