1 «Babilónia, rariba luéigiñe lálana barúeihan,

ñuruba lidan kaliki.

Ítara biña meha kei aban würi mámarigiru;

wéndetu ani hínsiñegutu,

guentó mítarandigiaali.

2 Guentó ábanhadibu idamuni

ragübei amuligülei, hürüboun fulúaru,

gidaboun bubelun, róuguaboun bugudun,

asurusugüdabéi biyada, hiñuguabei duna eibu;

3 Ariha hamabu súngubei madaüragunga,

surusu sunsuinagubei.

Nafayeiragüdaadibu luagu le badügübei,

ani siñabei lararamunina ni aban lau layumuragun».

4 Lariñahare Wesefuragüle,

Bungiu le Sándubei le Lubungiute Ísüraeli,

le gíribei Aburemei Suntigabafu:

5 «Ñuruba maniñu nibureintu Kalüdéana,

beluba lidoun luburiga

ladüga maguarúnwadigiaalime bun harúeite néchanigu.

6 Dan buga le gáñiñadina lubéi hama numutuniña,

aba nederegeruniña lun busiganu,

aba nígiruniña lun hábürühan labun bubafu.

Magudemehabútibu houn,

aba bíchugun lihürü anügüni hawagun wéiyaaña mutu.

7 Bariñaga: "Urúeibadina lun sun dan";

masaminaruntibu libügürü burí katei le,

maritagun buguya ida luba lan lagumuchun sun katei.

8 Aganbabéi lubeiti katei le guentó,

buguya würi to hínsiñehabuboun lun wendei,

to darangilañuboun luagu tala le lálana arúeihani,

to ariñaguboun tídangua: "Nuguya, úatu amu nuéidigia;

meredebadina kei hiñaru hilaali túmari,

merede nuguyame marahüñüga".

9 Liábinba biángubei lamiselu le bun sódini lidan ábanmeme weyu:

Berederuba kei würi hilaali túmari ani marahüñüga,

íbini lanarime babiñarahadi luma liibe bibiñegu,

10 chóuruguati yebe basandiragun bungua lidan buriban,

aba bariñagun búnguarügü:

"Úati arihitina".

Eyeeda lumutibu lichú bau luma bisubudin.

Ariñagatibu búnguarügü:

"Nuguya, úatu amu nuéidigia".

11 Gama lumoun liábinba lamiselu buagun,

ani siñá bubéi ararama lau babiñarahan;

lábürühaba aban lamiselu buagun le básiñarun eredera;

aban lamiselu le yebe magurabun bumuti,

ligíaba ñübuin buagun sódini.

12 Ítaramemeba lau babiñarahan

le badügübei lúmagiñe biñüraü,

wariha anhein eseriwida bun,

wariha ánhaña anufudeda gürigia buéi.

13 Gámaadibu saragu eweridihatiña,

darí lun labuchadun buagu.

Ñübuin hamaati bánigu ha aríagubalin sielu,

ha egesihabaña lau haríaguniña waruguma,

ha ariñagubaña bun kaba lan asusereda sagü hati,

ñübuin hamá oucha hesefurunibu!

14 Gama lumoun ítara haba kei sagadi sáühali,

lágudubaña watu gemeti,

ani siñabei hesefurun lídangiñe leñegura.

Lugundun mámabei aban watu le lauti eñeguraü

le lunti lañuurún abacharagua larügürügü.

15 Ítara luba hagumuchun bani gabiñarahatiña,

ha úmabaña badaradura saragu lidan sun bibagari.

Aba lárügüdüni kada aban lémeri,

úabei ni aban lun lesefurunibu.