1 Anihein lani Bungiu sífiri nuagu,

lugundun anúadira láadina Bungiu;

óunaha láadina apurichihei iseri uganu houn gudemetiña,

awalidaguagüdaña ha nidiheribaña,

adimureha houn adaürǘtiña ha furisunrugubaña luagu áfuriduni;

2 íchigei uganu houn gürigia,

luagu chülühali lan weyu,

luéyuri lesefuruniña Bungiu lumutuniña,

weyu le lunbei lageindagun Wabungiute hama wáganiñu waweigiñe,

óunaha láadina ámalihaña sun ha hírubaña,

3 íchiga aban ridi lánina ugundani

houn lílana Sión ha nidiheribaña leweñegua íruni,

ibiñein lánina ugundani leweñegua águiraü,

daüguaü lánina fedu teweñegua ludu.

Hadügübei le úaraguabei,

ítara haba kei tídibu wewe

le lábunagubei Bungiu lun larufuduni luéirigun.

4 Lábunawaguayaba le günringuawaalibei,

tararamayaba binadu burí muna to meha günrinwaguaaruboun lúmagiñe binarü,

aransehóua ligíame uburugu burí le günringuaalibei.

5 Hóunigirubaña terencha hibiñanigu,

hichari tuma burí hinadürigu beibei.

6 Hariñagame hun: Lufadirinigu Aburemei,

eseriwidutiña lun Wabungiute.

Héigibei harisin amu néchanigu,

daügua humeime hawenden.

7 Ani kei súfurihadün lubéi ǘnabuguni luma anabúni dóbuli,

heresibiruba dóbuli irisini hageira,

ani magumuchadibei hugundan.

8 Lugundun hínsiñeti irichaü lun Aburemei,

iyereeguti íweruhani luma áfarahani lun.

Líchugubei hafayeiruaha houn,

ábame ladügün aban daradu magumuchaditi hama.

9 Subudiwabaña hadügawagun hadan néchanigu;

sunme ha arihitiña,

hasubudirubei luagu gürigia lan ha biní laaña Aburemei hagía.

10 Gúndaatina luma Aburemei!

Buin niña lau ugundani luma Nubungiute,

lugundun sefu láadina, gáñeigüda láadina.

Ítara niña kei aban adari le adaürüti liridin,

o kei lan aban adari to ewendedutu lau burí tílagu lauti golu.

11 Lugundun ítara kei láhüchün nadü,

hüchagua ligía fuluri hilaali lidan fuluri-agei,

ítara luba ladügün Aburemei lun láhüchün lagañeirun,

ábame heremuhan sun néchanigu lun.