1 Dimurei luagu Ehiptu. Ariha humá lun Wabureme:

Liábiña Ehiptun wariñu ligibuagu aban dúeri fureseti.

Adadagaratiña lubungiutegu Ehiptu ligibugiñe,

buin hagía Ehiptuna lau anufudei.

2 Lariñaga Wabungiute:

«Nafanreinraguagüdübaña Ehiptuna, lun hageindagun hámagua,

umadaü luma umadaü, uburugu luma uburugu,

arúeihani luma arúeihani.

3 Nabulieidaguagüdübaña, nagünrinchagubei haransehan.

Ábameti hálügüdahan hama haguariuan luma hama gabiñarahatiña,

hama hani hilaguaaña sífiri luma hama garíaahatiña.

4 Gama lumoun níchugubei Ehiptu labun lubafu aban aburemei dereti;

lagumadihaba aban urúei fásiti Ehiptu».

Wabureme Suntigabafu achoururubalin.

5 Lagumuchuba lidunari Nilu,

lamabeiduba duna sunsuinagubei,

6 língiduba burí chanili.

Lídiba burí léibaagun duna Ehiptuna

agumuchagueina darí lamabeidun,

lásaürüba burí maburu luma sagadi duruti;

7 Lásaürüba sun nadü le lárubei duna Nilu,

lanügübei garabali sun ídibu

ábame lagumuchagun.

8 Hayahuahaba sun ha óuchahabaña lidan duna Nilu;

hírudaguba ha esenihabaña.

9 Hadiheriduba ha nadagimeinbaña gamisa fínuburitu;

10 Labuchaduba hawagu adaagutiña gamisa,

bulíeigua hagíame gadiñetiña.

11 Ibidiouguati hau huguya lábutigu Soán,

eweridihatiña hátima chúbaña aau Ehiptu,

ha eweridihabaña ibidiouguati hau huguya lidan linarün katei!

Ida liñagia liábinbei hun lun hariñagun lun urúei Ehiptuna:

«Hadügawagun chu tau wagía,

hadügawagun binadu urúeigu»?

12 Hagañagia bánigu chu tau, urúei Ehiptuna, lun harufudahani

luma lun hasubudiragüdüni laransehan

Wabureme Suntigabafu bun lubá Ehiptu?

13 Ibidiouguati hau lábutigu Soán,

ígiraguagüdatiña lábutigu Ménfisi houngua lun heyeedúniwa,

barǘ hamaali lábutigu fulasu Ehiptu luéigiñe üma wuribati.

14 Rúhali Wabureme aban sífiri lánina bulíeiguaü hadoun;

barǘ hamuti Ehiptu luéigiñe üma wuribati lidan sun le ladügübei,

kei aban bacharuati le atuituihabei lárigi lewerahan.

15 Ani úati ni kata, ni rísiti ni gudemeti,

ni wéiriguti ni ǘnabuguti

lun gayara lan ladügün ni kata luagu lufulesein Ehiptu.

16 Lídanme weyu ligía, ítara haba Ehiptuna kei würiña, habuinchuba lau anufudei danme harihini liñuruni Wabureme lúhabu hawagun. 17 Hasandiruba Ehiptuna anufudei ligibugiñe Hudá; láurügüme haritagun luagu liri. Habuinchuba lau anufudei luagu le laritagubei Wabureme Suntigabafu lau Ehiptu. 18 Lídanme weyu ligía, ñeinbei seingü uburugu adimurehati ebüréu Ehiptu, fiñú hagíame gúnfuli lun Wabureme Suntigabafu. Luburugute Weyu, ligíaba liri aban lídangiñe uburugu ligía.

19 Lídanme weyu ligía, ñeinbei aban latarü deregewati lun Wabureme Ehiptu, lichugúba aban dübü lidan liri Wabureme yarafa lun láfadaragun Ehiptu. 20 Leseriwiduba kei seini lun laritawagún luagu Wabureme Suntigabafu Ehiptu. Danme hagúaragun lun Wabureme amuriaha ídemuei hawéi ha íchugubaña lidere dan houn, lóunahaba aban esefuragülei houn lun lesefuruniña. 21 Lasubudiraguagüdüba Wabureme lungua houn Ehiptuna, ábame hasubudiruni; hadügüba óundaruni lun, adagaragüda hagíame lun, ru hagíame idewesei lun. Hadügüba füramasei lun Wabureme ani hagunfulirubei. 22 Lóunahaba Wabureme sandi luagun Ehiptu, gama lumoun lárigiñeme ábame lagaranihan lun. Háluahabei Wabureme, ábame gudemehabu lan houn, ábame lagaranihan houn.

23 Lídanme weyu ligía, ñeinbei aban üma tuleti lúmagiñe Ehiptu darí Asiria. Gayaraabei hachülürün Asiriana chülǘ Ehiptu, gayaraame hachülürün Ehiptuna chülǘ Asiria, ábame háhuduragun Ehiptuna hama Asiriana lun Wabureme lidan aban.

24 Lídanme weyu ligía, lúaraduba Ísüraeli luma Ehiptu luma Asiria, ani ábanbaña abiniruni ubouagu. 25 Labinirubaña Wabureme Suntigabafu ariñageina: «Biní numuti Ehiptu le nánigu, Asiria, le nadügübei lau núhabu luma Ísüraeli, nánigu le nanúadirubei».