Amor de casal
O amor de casal é celebrado na Bíblia como dom sagrado. O Cântico dos Cânticos exalta a beleza do amor conjugal — íntimo, exclusivo e forte como a morte.
Mbiche kota mhuli mnhumbula mwa hegwe,
kota mhuli kuli moko wa hegwe,
kwa vila igano lina mong’ho kota kubagama,
lina fihi ing’hang’hale kota isi ya wabagame.
Lyangulakaza kota ilapi lya chiluli,
kota ilapi likulu lya chiluli.
Mazi menji hagoweza kuzimya igano,
mazi tendema hagoweza kulyusa.
Wone munhu yahalavile sendi za heye zeng’ha kwa chiwalo cha igano,
yahabezigwe ng’hatu.
Goloko
Nakuisangalaza nhumbula ya heni, gwa yondikuganile,
nakuisangalaza nhumbula ya heni,
kwa kundola kamwe hela,
na kwa honhu hado ha ugasi wa hegwe kuli singo ya hegwe.
Unonele heni kwa mlomo wa hegwe!
Igano lya hegwe lyangusangalaza heni kusinda divai.
Unhunyhililo wa hegwe wangunhunyhilila goya,
na itagwa lya hegwe ndo kota unhunyhililo ujidigwe,
acho ndo chiwalo cha wadala kukugana.
Ulole vyouwele unojile, gwa yondilingukugana!
Ulole vyouwele unojile!
Meho ga hegwe ndo kota ga ng’hunda.
Mhinza
Ulole vyouwele unojile yondilingukugana!
Ena, ulole vyounojile!
Misolo midodi jowa ndo chinhanda cha hetwe.
Msongolo
Hamba Mkulu Nguluwi nakalonga, "Hainojile ayu mlume yawe yaliyeka. Ndomditila mtanzi yanojile."
Na alo lubavu yaluholile Mkulu Nguluwi kulawa kwa yula mlume, nakaludita kuwa mdala, nakamigala kwa ayo mlume. Ndo hala yula mlume loyalonjile,
"Ena! Ayu ndo izeje kulawa kuli mizeje jangu.
Na iwunde kulawa kuli miwunde jangu.
Ayu kochemigwa, ‘Mdala,’
kwa vila nakalavigwa kulawa kwa mlume."
Kwa chiwalo acho, mlume komleka mhaza na mayake na kilumba na mche wake, nawo awo weli wowa lukuli lumwe.
Yalingumpata mche nakapata chinhu chinojile,
ako ndo kunoga kulawa kwa Mkulu Nguluwi.
Nzasa ya hegwe itambichizwe,
usangalale kwa chiwalo cha mchewako youmuholile louwele msongolo.
Ndo kanoga kota ibala, kangujenda goya kota chifuno.
Mhambaga ya heye ikugalile kusangalala chila mhela,
ugale mazuwa gose na matombo ga heye.
Msongolo wa heni, lekachoni nakubatigwa ng’hatu na mdala mng’hondwa?
Lekachoni nakumkumbatila mmhambaga mdala wa mlume yunji?
Leka ahyo, hewo hawele weli kahi ila yumwe. Lelo choyalumbanize Nguluwi, munhu yaleche kulekaniza."
Yawele na igano kangwimililaga, kangulajilaga isungu, yawele na ligano kahela maya, halingidaya na hawele mjuvi. Yawele na igano kangunyenyetelaga, hambe yapale mzidi wa heye yuye hela na hambe yazudile himahima kahi hambe yawiche mnhumbula ya heye kukumbuchila kwa mbuli zihile, hambe yasangalale kwa chiwalo cha wihe ila kangusangalalaga kwa chiwalo cha kukomya. Yawele na igano kangwimililaga geng’ha na kanguwaga na makundo kuli mbuli zeng’ha na kangitumbilaga mbuli zeng’ha.
Hihyo du walume wawagane wache wa hewo kota ng’huli za hewo. Mlume yalingumgana mchewake kangigana yuye. Haduhu munhu yalinguulema lukuli lwa heye, ila kanguludita lugute na kululolela kota Kilistu vyoyalinguchiditila chilundo cha wanhu walingumkunda Kilistu,
Ila chila mlume yamgane mchewake kota vyoyalingigana yuye na chila mche yamhulichize mlume wa heye.
Kwa ago geng’ha, mibatilile igano kwa vila igano naliting’hanizaga chila chinhu kuli uhamwe wenele.
Fola kuwa wanhu weli kusinda yumwe, kwa vila howowa hamwe wokola mijito goya kwa kitanza. Wone yumwe hali hewo kogwa myage komwinula, ila wone munhu kogwa na kayeka, yowa ndo mbuli yihile ng’hatu kwa vila kowa haduhu wa kumtanza kwinuka. Wone kuwe na chipute wanhu weli wowasa hamwe leka kigalila ivuche, ila munhu koweza ndaze kigalila ivuche heye yaliyeka? Munhu yawele yaliyeka koweza kusumigwa na munhu yunji, ila wanhu weli woweza kumtowa na kumsumya munhu ayo. Kahi ng’weso itawigwe goya ng’hatu kwa nyuzi zidatu, haiweza kudumuka himahima.
Ndaze, Nguluwi hawaditile mweng’ha weli muwe lukuli lumwe na muhe yumwe? Ndaze, nayali yonuwila choni vyoyagaditile ago? Ndikomya nayali yonuwila hemwe mponde wana wawele womdumba heye. Ahyo milolele leka hawe haduhu ne yumwe hali hemwe yawele kowa kahela makundo kwa mche wake.
Malajizo ganji
"Mlume yaholile behi baha yaleche kuluta kuli ngondo na yaleche kupegwa mijito joneche jinji, yalechigwe yawe yelejehe kwa mwaka umwe, leka yekale haluga na kusangalala na mchewake.