Arca da aliança
A Arca da Aliança era o símbolo mais sagrado de Israel — representava a presença de Deus no meio do seu povo. Sobre ela brilhava a glória do Senhor entre os querubins.
ቃላ ጫቁዋ ታቦታ
"ኡንቱንቱ ኦዶሩዋ ምፐ አዱሳተይ ላኡ ዋነ ባጋ፥ ጎምፓይ እት ዋነ ባጋ፥ ጌሳይ ቃይ እት ዋነ ባጋ ግዴዳ ታቦታ መኖ። ሶያነ ካርያ ዋላካይ ባይና ዎርቃን ሼሻ፤ አ ዩሹዋካ ዎርቃ ትገን ዩሻ አ። ሄ ታቦታዉ ኦይዱ ዎርቃ ሳጋየቱዋ ትጋደ ኦይዱ ገደቱዋን እት ባጋና ላኡ ሳጋየቱዋ፥ ቃይ የንኮ ባጋና ላኡ ሳጋየቱዋ አ። ሄዋፐ ጉይያን ኦዶሩዋፐ ካሱዋ ከሳደ ዎርቃን ሼሻ። ታቦታ ቶካናዉ፥ ታቦታ ምይያን ደእያ ሳጋየቱዋን ካሱዋ አ። ቶክያ ካሶቱ ታቦታ ሳጋየቱዋ ግዶን ደእኖ፤ ኡንቱንቱ ሄዋፐ ኡባካ ከሶፕኖ። ታቦታ ግዶን ታን ነዉ እምያ፥ ታሙ አዛዛቱ ጻፈት ኡቴዳ ላኡ ማሰቴዳ ማርካተ ሹቻቱዋ ዎ።
"ዋላካይ ባይና ዎርቃፐ ላኡ ዋነ ባጋ አዱቂያ፥ እት ዋነ ባጋ አክያ አቶ ግያ ሳኣ ቁምእያ መ። ቁምእያዉ ዉርሰ ላኡ ባጋ ጋጻን ላኡ ክሩቤልያ፥ ቆጸቴዳ ዎርቃፐ መ። እት ክሩብያ እት ባጋ ጋጻን፥ ላኤን ክሩብያ የንኮ ባጋ ጋጻን ላኡዋካ ቁምእያና ጋ ኦይደ መ። ክሩበቱ ባረንቱ ቀፍያ ደንደ፥ አቶ ግያ ሳኣ ቁምእያ ባረንቱ ቀፍያን ኩዋይ ዎኖ፤ ቃይ እቱ እቱዋኮ ስም ኡቲደ፥ ቁምእያ ጼልኖ። ቁምእያ ታቦታዉ ቦላ ባጋን ዎ፤ ቃይ ታን ነዉ እምያ አዛዛቱ ጻፈቲደ ማሰቴዳ ሹቻቱዋ ታቦታ ግዶን ዎ።
ማርካተ ታቦታ ቦላ ቁምእያ ቦላ ደእያ ላኡ ክሩበቱዋፐ ግዱዋን ታን ኔናና ጋከታደ እስራኤልያ አሳዉ ታን እምያ አዛዙዋ ኡባ ያን ነዉ እማና።
ታቦታ ኦሱዋባ
ባጻልኤል ኦዶሩዋ ምፐ ታቦታ ጊግሴዳ። ሄ ታቦታይ አዱሳተይ ላኡ ዋነ ባጋ አዱቄ፤ ጎምፓይ እት ዋነ ባጋ አኬ፤ ጌሳይካ እት ዋነ ባጋ ቄ።
ጾሳ ዱንካንያ ቶከ
ሄዋፐ ጉይያን መና ጎዳይ ሙሳ፥ "ኮይሮ አግናዉ ኮይሮ ጋላስ፥ ኔን መና ጎዳ ዱንካንያ ቶካ። ቃላ ጫቁዋ ታቦታ አ ግዶን ዎ፤ ሄ ታቦታ ጋርዱዋን ካማ።
ያቲደ ታሙ አዛዛቱ ጻፈቴዳ ማርካተ ቃላ አፊደ፥ ታቦታ ግዶን ዎዳ፤ ቶክያ ካሱዋ ታቦታን አዳ፤ አቶ ግያ ሳኣ ቁምእያ ታቦታ ቦላ ዎዳ። ሄዋፐ ጉይያን ታቦታ ጾሳ ዱንካንያ ገልሴዳ፤ ገንያ ጋርዱዋ ሶቲደ፥ መና ጎዳይ አዛዜዳዋዳን ቃላ ጫቁዋ ታቦታ ካሜዳ።
ሙሴ መና ጎዳና ሃሳያናዉ ጾሳ ዱንካንያ ገልያ ዎደ፥ ማርካተ ታቦታ ቦላን ደእያ አቶ ግያ ሳኣ ቁምኡዋ ቦላን፥ ላኡ ክሩበቱዋፐ ግዱዋና መና ጎዳይ ሃሳይያ ኮሻ ስሴዳ፤ እካ አናና ሃሳዬዳ።
ያትና ኡንቱንቱ መና ጎዳ ደርያፐ ደንዲደ፥ ሄዙ ጋላሳ ኬሻ ኦግያ ቤድኖ። መና ጎዳ ጫቁዋ ታቦታይ ኡንቱንቱ ሸምፕያ ሳኣ ደማናዉ ሄ ሄዙ ጋላሳን ኡንቱንቱፐ ስንዉ ቤዳ። ኡንቱንቱ ዱንካኔዳ ሳኣፐ ደንድያ ዎደ ኡባን፥ መና ጎዳ ሻሪ ጋላስ ጋላስ ኡንቱንቱፐ ቦላና ደኤ። ታቦታይ ደንድያ ዎደ ኡባን ሙሴ፥ "አቤት መና ጎዳዉ፥ ደንዳ! ነ ሞርከቱ ላለትኖ፤ ኔና እጽያዋንቱካ ነ ስንፐ ባቃትኖ" ያጌ። ታቦታይ ሸምፕያ ዎደ ኡባን ሙሴ፥ "አቤት መና ጎዳዉ፥ ሀ ዳሮ ሻአን ፓይደትያ እስራኤልያ አሳኮ ኔን ስማ" ያጌ።
አሮና ጻምኣ አጫቱዋ
መና ጎዳይ ሙሳ ሀዋዳን ያጌዳ፤ "ኔን፥ ‘ህንተ ዛርያን ዛርያን ህንተ ካፓቱዋፐ ሁጲያን ሁጲያን እት እት ጻምኣ ኡባና ታማነ ላኡ ጻምኣ ታዉ እምተ’ ያጋደ እስራኤላቱዋፐ አካ። እት እት አሳ ሱን ጻምኣ ቦላን ጻፋ። እት እት ዛርያ ካፖ እት ጻምኣ ግድያ ድራዉ፥ ሌዊያ ጻምአን አሮና ሱን ጻፋ። ጋከትያ ዱንካንያ ግዶን ታን ኔናና ጋከትያ ማርካተ ታቦታ ስንን ዎ። ታን ዶርያ አሳ ጻምአይ አጫና፤ ሀዋዳን ኦደ ህንተ ቦላን እስራኤላቱ ዙዙምያ ዙዙን ታን ሙለ ይሳና" ያጌዳ።
ሙሴ እስራኤልያ አሳዉ ኦድና፥ ኡንቱንቱ ካፓቱ ታማነ ላኡ ጻምአቱዋ፥ እት እት ዛርያ ካፓቱ እት እት ጻምኣ አዉ እሜድኖ። ሄ ጻምአቱዋ ግዱዋን አሮና ጻምአይካ ደኤ። ሙሴ ሄ ጻምኣ ኡባ ማርካተ ዱንካንያ ግዶን መና ጎዳ ስንን ዎዳ።
ዎንተ ጋላስ ማርካተ ዱንካንያ ግዶ ሙሴ ገሌዳ ዎደ፥ ሌዊያ ዛረ ግድያ አሮና ጻምአይ አጬዳዋ፥ ጉምቤዳዋ፥ ጪሼዳዋነ ጪሺደ ላዉዝያ ግያ ም አይፍያ አይፌዳዋ በኤዳ። ሄዋፐ ጉይያን፥ ሙሴ ጻምኣ ኡባ መና ጎዳ ስንፐ እስራኤልያ አሳ ኡባኮ አሄዳ። አሳይ ኡንቱንታ በኤዳዋፐ ጉይያን፥ ካፓቱ ባረንቱ ጻምኣ ጻምኣ አኬድኖ። መና ጎዳይ ሙሳ፥ "አሮና ጻምኣ ታቦታ ስንን ዛራ ዎ። ሄዋ ማካሌዳዋንቱ ታ ቦላ ላኤን ዙዙሚደ ሀይቀናዳን፥ ኡንቱንቶ ማላታ ኦደ ናጋ" ያጌዳ። መና ጎዳይ አዛዜዳዋዳን ሙሴ ኦዳ።
አሳይ ዮርዳኖሳ ሻፋ ፕናናዉ ባረንቱ ዱንካንያፐ ከሴዳ ዎደ፥ ቃላ ጫቁዋ ታቦታ ቶኬዳ ቄሳቱ አሳፐ ስንን ሀመቴድኖ። ካ ጫክያ ዎድያን ኡባን ዮርዳኖሳ ሻፋይ ኩንዳ። ግዶፐነ፥ ቃላ ጫቁዋ ታቦታ ቶኬዳ ቄሳቱ ዮርዳኖሳ ሻፋ ጋክና፥ ኡንቱንቱ ገዲ ሃ ጋጻ የዳ ዎደ፥ ቆሞፐ ዱገ ጎግያ ሃይ ኤቂ አጌዳ፤ ህን ዳርስ ሃኮ ሳን፥ ጻርታና ግያ ሳን ደእያ አዳማ ጌተትያ ካታማን እት ሳኣ ሺቂደ ዶረቴዳ። ዱገ አራባ ጋን ደእያ ማጽነ አባዉ ጎግያ ሃይ ቃይ ኡባይ ዱጺደ አት ባሼዳ። ያትና፥ አሳይ ያርኮ ካታማ ሄፍን ፕኔዳ። እስራኤልያ አሳይ መላ ጋድያ የደ ፕንያ ዎደ፥ አሳይ ኡባይ ፕኒደ ዉራና ጋካናዉ ጾሳ ቃላ ጫቁዋ ታቦታ ቶኬዳ ቄሳቱ ዮርዳኖሳ ሻፋ ግዶን መላ ቢታን ኤቄድኖ።
ጾሳ ቃላ ጫቁዋ ታቦታ ቶኬዳ ቄሳቱ ዮርዳኖሳ ሻፋ ግዶፐ ከሲደ መላ ቢታ ኡንቱንቱ የዳዋን፥ ኤለካ ዮርዳኖሳ ሃይ ባረ ሳኣ ስሚደ ካሰ ጎግያዋዳን ጋጻ ጋካናዉ ኩሚደ፥ ጎገ ዶሜዳ።
ያርኮ ኩንዴዳ
እስራኤልያ አሳዉ ያዬዳ ጋሱዋን ያርኮ ካታማ ድርሳ ፐንገቱ ጎርደቲደ ናገቲኖ፤ ካታማ ገላናዉነ ካታማፐ ከሳናዉ ዳንዳይያ ኦንነ ባዋ። መና ጎዳይ ኢያሳ፥ "ጼላ፥ ታን ያርኮ ካታማ አ ካትያና አ ምኖ ኦላንቻቱዋካ ነ ኩሽያን አደ እማድ። ኔንነ ነ ኦላንቻቱ ሳልፒደ፥ ኡሱፑን ጋላሳይ ጋካናዉ ሀቼ ሀቼ ካታማ ድርሳ እት ገደ ዩይ አተ። ቃይ ላፑን ቄሳቱ ዶርሳቱዋ ካጭያፐ ከሴዳ ላፑን ማላካታቱዋ ኦይቂደ፥ ጾሳ ቃላ ጫቁዋ ታቦታ ስንና ሀመትኖ። ላፑን ጋላስ ቄሳቱ ማላካታቱዋ ፑንሽን፥ ኦላንቻቱ ሳልፒደ፥ እትፐ ካታማ ላፑ ገደ ዩይ አተ። ሄዋፐ ጉይያን ማልካታቱዋ ፑኑዋ ጎቺደ ፑንያዋ ስስያ ዎደ፥ ኤለካ አሳይ ኡባይ ባረ ቃላ ቁ ኦደ ዋሶ። ያቶፐ ካታማ ድርሳ ግምቢ ኩንድና አሳይ ኡባይ ስንዉ ላዉሁ ጊደ ገላና" ያጌዳ።
ነዌ ናአይ ኢያሱ ቄሳቱ ዋ ጼጊደ፥ "መና ጎዳ ቃላ ጫቁዋ ታቦታ ቶክተ፤ ህንተፐ ላፑን ቄሳቱ ላፑን ማላካታቱዋ ኦይቂደ፥ ቃላ ጫቁዋ ታቦታፐ ስንዉ አደ ሀመትኖ" ያጌዳ። አሳ፥ "ስንዉ ቢተ፤ ካታማ ዩይ አተ፤ ኦላዉ ጊጌዳዋንቱካ መና ጎዳ ቃላ ጫቁዋ ታቦታ ስንን ሀመትኖ" ያጊደ አዛዜዳ።
ሄዋ ድራዉ ማላካታቱ ፑነትና አሳይ ዋሴዳ። ማላካታቱ ፑኑዋን አሳይ ባረ ቃላ ቁ ኦደ ዋሴዳ፤ ኤለካ ካታማ ድርሳ ግምቢ ኩንድ አጌዳ! ሄዋፐ ጉይያን አሳይ ኡባይ ስንዉ ላዉሁ ግ ገልነ ካታማ ኦይቂ አጌዳ።
ፕልስጼማቱ ጭታን ጭታን ግዲደ፥ እስራኤላቱዋና ኦለታናዉ ደንዴድኖ፤ ኦላይ ሱልና፥ ኦይዱ ሻአ እስራኤላቱዋ ዎዳ ፕልስጼማቱዋን እስራኤላቱ ጾነቴድኖ። ኦላንቻቱ ሺቄዳ ሳኣ ስሜዳ ዎደ፥ እስራኤልያ ጭማቱ፥ "ሀቼ መና ጎዳይ ኑና ፕልስጼማቱዋን አያዉ ጾንሴዴ? ኑናና ባናዳንነ ኑና ኑ ሞርከቱዋ ኩሽያፐ አሻናዳን ጾሳ ቃላ ጫቁዋ ታቦታ ሴሎፐ አነ አሆይተ" ያጌድኖ። ሄዋ ድራዉ፥ አሳይ ሴሎ ኪትና፥ ክሩበቱዋ ግዱዋን አራታን ኡትያ ኡባፐ ዎልቃማ መና ጎዳ ቃላ ጫቁዋ ታቦታ አሄድኖ። ኤልያ ናናይ ላአቱ ሆፍኒንነ ፒንሃስ ጾሳ ቃላ ጫቁዋ ታቦታና ያን ደኢኖ።
መና ጎዳ ቃላ ጫቁዋ ታቦታይ ሺቄዳ ሳኣ ጋኬዳ ዎደ፥ እስራኤላቱ ኡባይ ቢታይ ቃጻና ጋካናዉ ባረንቱ ቃላ ቁ ኦደ፥ "ጾሳ ቃላ ጫቁዋ ታቦታይ ጋኬዳ" ያጌድኖ።
እስራኤላቱዋ ጫቡዋ ፕልስጼማቱ ስሲደ፥ "ሀዌ እብራዌቱ ሺቄድኖ ሳን ስሰትያ፥ ዎልቃማ ዋላሳይ አዬ?" ያጌድኖ።
መና ጎዳ ታቦታይ ኡንቱንቱ ሺቄዳ ሳኣ ዬዳዋ ፕልስጼማቱ ኤሪደ ያዬድኖ። ሀዋዳን ያጌድኖ፤ "ጾሳይ ኡንቱንቱ ሺቄዳ ሳኣ ዬዳ። አየ አና ኑኖ! ሀዋ ማላባይ ሀዋፐ ካሰ ሀን ኤረና። አየ አና ኑኖ! ሀ ዎልቃማ ጾሳቱዋ ኩሽያፐ ኑና አሻናዌ ኦኔ? ሀ ጾሳቱ ግብጼቱዋ ዎራን ቦሻ ኡባን ሾጬዳዋንታ። ህንተንቶ ፕልስጼማቶ፥ ምንተ! አሳዳን ኦለትተ! ሄዌ ዮፐ፥ ህንተንቱ ኡንቱንታ ካሰ አይለተን ሞዴዳዋዳን፥ ኡንቱንቱካ ህንተንታ ሞዳናዋንታ። ሄዋ ድራዉ፥ አሳዳን ኦለትተ!" ያጌድኖ።
ፕልስጼማቱ ኦለቲደ፥ እስራኤላቱዋ ጾኔድኖ፤ እስራኤላቱ ባረንቱ ዱንካንያኮ ባቃቴድኖ። ሄ ኦላን ዳሮ አሳይ ጎራኤቴዳ፤ እስራኤልያ ኦላንቻቱዋፐ ሀታሙ ሻአይ ሀይቄዳ። ጾሳ ታቦታይ ኦሞደቴዳ፤ ኤልያ ናናይ ላኡ፥ ሆፍኒንነ ፒንሃስ ሀይቄድኖ።
አሽዶዳ ካታማ ቦላነ ሄዋ ሄራን ደእያ አሳ ቦላ መና ጎዳ ኩሺ ዎልቃሜዳ፤ ጾሳይ ኡንቱንቱ ቦላን ቦሻ የዲደ፥ ጋፉዋ ሀርግያን ኡንቱንታ ሙሬዳ።
አሽዶዳ ካታማ አሳይ ሀኔዳባ በኤዳ ዎደ፥ "እስራኤልያ ጾሳ ኩሺ ኑ ቦላነ ኑ ጾሳ ዳጎና ቦላ ዎልቃሜዳ ድራዉ፥ እስራኤልያ ጾሳ ታቦታይ ኑ ማታን ጋምኦፖ" ያጌድኖ። ፕልስጼማ ካፓቱዋ ኡባ ባረንቱኮ ጼስ ሺሺደ፥ "እስራኤልያ ጾሳ ታቦታ ዋታኔ?" ያጊደ ኦቼድኖ።
ሽን ካፓቱ፥ "እስራኤልያ ጾሳ ታቦታይ ጋተ ጌተትያ ካታማ ቦ" ያጊደ ዛሬድኖ። ያትና፥ እስራኤልያ ጾሳ ታቦታ ጋተ አፌድኖ።
ሽን ታቦታይ ጋተ ጋኬዳዋፐ ጉይያን፥ መና ጎዳ ኩሺ ሄ ካታማ ቦላ ዎልቃሚደ፥ ሎይ ዎልቃማ ዳጋንዋ ዳጋንዳ፤ ያቲደ ካታማን ደእያ አሳ ናናቱዋፐ ጭማ ጋካናዉ ጋፉዋ ሀርግያን ሾጬዳ። ሄዋ ድራዉ፥ ጾሳ ታቦታ ኤቅሮና ካታማ የዴድኖ።
ጾሳ ታቦታይ ኤቅሮና ገልያ ዎደ፥ ኤቅሮና አሳቱ ሀዋዳን ያጊደ ዋሴድኖ፤ "ኑናነ ኑ አሳ ዎናዉ እስራኤልያ ጾሳ ታቦታ ኑኮ አሄድኖ" ያጌድኖ። ሄዋ ድራዉ፥ ፕልስጼማ ካፓቱዋ ጼስ ሺሺደ፥ "እስራኤልያ ጾሳ ታቦታ ሀዋፐ ድግተ፤ እ ጉየ ባረ ሳኣ ስሞ፤ ሄዌ ዮፐ፥ ኑናነ ኑ አሳ ዎና" ያጌድኖ። አያዉ ጎፐ፥ ካታማ ኡባን ሀይቁዋ ዳጋማይ ደኤ፤ ጾሳ ኩሺካ ካታማ ቦላ ዎልቃሜዳ።
ጾሳ ታቦታይ እስራኤልያ ስሜዳ
መና ጎዳ ታቦታይ ፕልስጼማ ቢታን ላፑን አግና ኡቴዳ። ሄ ዎደ ፕልስጼማ አሳቱ ቄሳቱ ዋነ ሻሬቻቱዋ ጼሲደ፥ "መና ጎዳ ታቦታ ኑን ዋታኔ? ኑን ጉየ አ ሳኣ አ ዎት የዳነንቶ፥ ኑዉ ኦድተ" ያጌድኖ።
ኡንቱንቱ፥ "እስራኤልያ ጾሳ ታቦታ ጉየ የድያዋ ግዶፐ፥ መላ የዶፕተ፤ አይ ሀኒደነ ህንተንቱ ባይዙዋ ያርሹዋ አዉ የድተ፤ ያቶፐ፥ ህንተንቱ ፓጻና፤ አ ኩሺ ህንተንቱ ቦላፐ አያዉ ክችቤነንቶካ ህንተንቱ ኤራና" ያጊደ ዛሬድኖ።
ኡንቱንቱ ሄዋዳን ኦድኖ፤ ኡንቱንቱ ንያ ላኡ ሚዛቱዋ አኪደ፥ ጋርያን ዋጼድኖ፤ ሚዛቱ ማራቱዋካ ሶን ጎርዴድኖ። ኡንቱንቱ መና ጎዳ ታቦታነ ቃይ ዎርቃ ኤጨረቱዋነ ጋፉዋ ማላትስ መዳ ምስለቱዋ የጌዳ ሳጽንያ ጋርያን ዎድኖ። ሄዋፐ ጉይያን፥ ሚዛቱ ቤት-ሸመሽ አፍያ ኦግያ ኦይቂ ስት ጊደ፥ "ህምባ!" ግ ዋሲደ ቤድኖ፤ ኡንቱንቱ ኦግያና ቢደ፥ ኡሸቻ ዎይ ሀድርሳ ስምበይክኖ፤ ፕልስጼማ ካፓቱ ሚዛቱ ጌዱዋ ካሊደ፥ ቤት-ሸመሻ ዛዋ ጋካናዉ ቤድኖ።
ቤት-ሸመሻ አሳቱ ሄ ዎደ ዎምባን ዛርጋ ጫኪኖ፤ ኡንቱንቱ ፑደ ቁ ግ ጼሊደ፥ ታቦታ በኢደ ናሸቴድኖ። ጋሪ ቤት-ሸመሽያ ኢያሱ ጋደ ጋኪደ፥ እት ዎልቃማ ዛላ ማታን ኤቄዳ፤ ኡንቱንቱ ጋርያ ም ቆኢደ፥ ጹግያ ያርሹዋዳን ሄ ሚዛቱዋ መና ጎዳዉ ያርሼድኖ። ሌዋቱ መና ጎዳ ታቦታነ ዎርቃ ሚሻና ደእያ ሳጽንያ ጋርያፐ ደንደ፥ ዎልቃማ ዛላ ቦላ ዎድኖ። ሄ ጋላስ ቤት-ሸመሻ አሳቱ ጹግያ ያርሹዋ መና ጎዳዉ ያርሼድኖ፤ ቃይ ሀራ ያርሾቱዋካ ያርሼድኖ።
ቂርያት-ይኣሪማ አሳቱ ዪደ፥ መና ጎዳ ታቦታ አፊደ ደርያ ሁጲያን ደእያ አብናዳባ ሶይ አሄድኖ። መና ጎዳ ታቦታ ናጋናዳን፥ አብናዳባ ናኣ ኤልኣዛራ ዱማዪደ ሱንድኖ።
ሳመል እስራኤልያ አሳ ቦላ ዳናቴዳ
ታቦታይ ቂርያት-ይኣሪማን ዳሮ ዎድያ ጋምኤዳ፤ ሄዌነ፥ ላታሙ ላይ ኬሻ ግድያዋ። እስራኤልያ አሳይ ኡባይ ካዮቲደ፥ መና ጎዳኮ ዋሴድኖ።
ሄዋፐ ስሚደ፥ "ጾሳ ታቦታ ድራዉ፥ መና ጎዳይ ኦቤድ-ኤዶማ ሶ አሳነ አዉ ደእያ ኡባባ አንጄዳ" ያግያዋ ካቲ ዳዊተ ስሴዳ፤ ሄዋ ድራዉ፥ ዳዊተ ኦቤድ-ኤዶማ ሶ ቢደ፥ ጾሳ ታቦታ ዳዊታ ካታማ ናሸቻን አሄዳ። መና ጎዳ ታቦታ ቶኬዳ አሳቱ ኡሱፑኑዋ ታንጌዳ ፓይዱዋን ፓይዱዋን ኡንቱንታ ኤሲደ፥ እት ኮሩማነ እት ቦልትቦልታ ማራ ዳዊተ ያርሼዳ። ዳዊተ ሱፍያ ግያ ቃጭናፐ ዳደቴዳ ኤፉድያ ማዪደ፥ ባረዉ ደእያ ዎልቃ ኡባን መና ጎዳ ስንን ዱሬዳ። እነ እስራኤልያ አሳቱ ኡባቱ ናሸቻን ሆምቦጪድነ ኡልቱዋ ፑኒደ መና ጎዳ ታቦታ ዳዊታ ካታማ አሄድኖ።
ጾሳ ታቦታይ ጌሻ ጎልያ ገሌዳ
ሄዋፐ ጉይያን ካቲ ሶሎሞነ መና ጎዳ ታቦታ ዳዊታ ካታማፐ፥ ጽዮነፐ ከሲደ፥ ጌሻ ጎልያ አሀናዳን፥ እስራኤልያ ጭማቱዋ፥ ዛራቱዋ ኡባ ካፓቱዋነ እስራኤልያ ጎልያ አሳቱዋ ካለያዋንታ የሩሳላመ ካታማ ሺሼዳ። ኤታኒማ ጌተትያ ላፑን አግናን፥ ዳስያ ባላይ ቦንቼትያ ዎደ፥ እስራኤልያ አሳይ ኡባይ ካትያ ሶሎሞነኮ ሺቄዳ።
እስራኤልያ ጭማቱ ኡባይ ጋክና፥ ቄሳቱ ታቦታ ደንድኖ። ሌዋቱነ ቄሳቱ፥ መና ጎዳ ታቦታ፥ ዱንካንያነ ዱንካንያ ግዶን ደእያ ጌሻ ሚሻቱዋ ኡባ ቶኪደ አሄድኖ። ካቲ ሶሎሞንነ አናና ደእያ እስራኤልያ ያአይ ኩመንይ ታቦታ ስንን ሺቂደ፥ ፓይዳናዉ ዳንዳየተና ጮራ ዶርሳነ መህያ ያርሼድኖ።
ሄዋፐ ጉይያን ቄሳቱ መና ጎዳ ቃላ ጫቁዋ ታቦታ ጌሻ ጎልያዉ ግዶ ጌሻ ቆልኡዋ፥ ኡባፐ አዳ ጌሻ ሳኣ ግያ ሳኣ አሂደ፥ ክሩበቱዋ ምስለቱ ቀፈቱዋፐ ጋርሳ ባጋና ዎድኖ። ምጨት ኡቴዳ ክሩበቱዋ ቀፈቱ ታቦታነ ታቦታ ቶክያ ካሱዋ ካሜድኖ። ካሶቱ ሎይ አዱሳ ግድያ ድራዉ፥ ኡንቱንቱ ጼራይ ኡባፐ አያ ጌሻ ሳኣ ስንን ደእያ ጌሻ ሳኣን ቤታናዉ ዳንዳዬ፤ ሽን ጌሻ ሳኣፐ ካረና ቤታናዉ ዳንዳየና። ኡንቱንቱ ሀቼ ጋካናዉ ሄ ሳኣን ደኢኖ። እስራኤልያ አሳይ ግብጼ ጋድያፐ ከሴዳ ዎደ፥ መና ጎዳይ ኡንቱንቱና ቃላ ጫቁዋ ጫቀቴዳ ሲና ደርያን ሙሴ ዎዳ ላኡ ማሰቴዳ ሹቻቱዋፐ አትና፥ ታቦታ ግዶን ሀራባይ አያይነ ባዋ።
ቄሳቱ ጌሻ ሳኣፐ ከስና፥ ሻሪ መና ጎዳ ጌሻ ጎልያ ኩሜዳ። ሄ ሻርያ ጋሱዋን ቄሳቱ ባረንቱ ኪታ ኦናዉ ዳንዳይበይክኖ፤ አያዉ ጎፐ፥ መና ጎዳ ቦንቹ አ ጌሻ ጎልያ ኩም ኡቴዳ።
"ቃይካ መና ጎዳይ ሀዋዳን ያጌ፤ ‘ህንተኖ፥ አማነተና አሳቶ፥ ስምተ፤ አያዉ ጎፐ፥ ታን ህንተ አስና። ህንተና እቱዋ እት ካታማፐ፥ ላኡዋ እት ያራፐ ዶራደ አካና፤ ህንተና ጽዮነ አሀና። ሄዋፐ ጉይያን፥ ታን ታ ዎዛናዳን፥ ህንተና ሄምያ ሄንንቻቱዋ ህንተዉ እማና። ኡንቱንቱ ህንተና ኤራተንነ አኬካን ሄማና’ " ያጌ።
ቃይካ መና ጎዳይ፥ "ሄ ጋላሳቱዋን ህንተ ሄ ቢታን ጮራትያ ዎደ፥ አሳቱ፥ ‘መና ጎዳ ጫቁዋ ታቦታ’ ጊደ ሃሳይክኖ። እ ኡንቱንቶ ካርህነ ጌና፥ ዎይ ሀሳየተና፥ ዎይ ባይናዌካ ኡንቱንቶ ቆፈተና፤ ቃይ ሀራይ ኦሰተና።
ሳሉዋን ኦሰትያ አያና ኦሱ ሳኣን ኦሰትያ አያና ኦሱዋፐ አ
ኮይሮ ጫቆ ጾሳዉ ጎይንያ ዎጋይነ አሳይ ኦዳ ጌሻ ጎሊ ደኤ። አያዉ ጎፐ፥ ኮይሮ ዱንካኒ ኤቄዳ፤ አ ግዱዋን ሙቃዳ ዎያዌ፥ ጻራጴዛይነ ጎዳ ስንን ዎያ ኡክይ ደኤ፤ ሄ ሳአይ ጌሻ ሳ ጊደ ጼሴቴ። ላኤን ጋርዱዋ ጉየ ባጋና ኡባፐ አያ ጌሻ ሳኣ ጌተትያ ዱንካኒ ደኤ። አ ግዱዋን እጻና ጩዋያናዉ ዎርቃፐ ኦዳ ሳጽኒነ ኡባ ሳና ዎርቃን ሼሼዳ ቃላ ጫቁዋ ታቦታይ ደኤ። ሄ ቃላ ጫቁዋ ታቦታን ማናይ ደእያ ዎርቃ ጻሩ፥ አሮና ጻምአይ አጬዳዌነ ቃይ ሙሴ ህጊ ጻፈቴዳ ላኡ ማሰቴዳ ሹቻቱ ደኢኖ። ሄ ቃላ ጫቁዋ ታቦታፐ ቦላ ባጋና አቶ ግያ ሳኣ ቁምእያ ባረንቱ ቀፍያን ገንያ ቦንቾ ክሩበቱ ደኢኖ፤ ሽን ሀ ኡባባ ሀእ ዉርስ ኦዳናዉ ዳንዳዮኮ።
ሳሉዋን ደእያ ጾሳ ጌሻ ጎሊ ዶየቴዳ፤ አ ጌሻ ጎልያን ጾሳ ቃላ ጫቁዋ ታቦታይ ቤቴዳ። ቃይ ዋልቃንይ ዎልቃሜዳ፤ ጉንይ ስሰቴዳ፤ ጉጉንይ ጉሜዳ፤ ቢታይ ቃጼዳ፤ ዎልቃማ ሻቻይካ ሻጬዳ።
Este artigo te tocou? Faça uma oração!
+581 estão orando agora.
Junte-se à corrente de oração.