አሮና ጻምኣ አጫቱዋ
1 መና ጎዳይ ሙሳ ሀዋዳን ያጌዳ፤ 2 "ኔን፥ ‘ህንተ ዛርያን ዛርያን ህንተ ካፓቱዋፐ ሁጲያን ሁጲያን እት እት ጻምኣ ኡባና ታማነ ላኡ ጻምኣ ታዉ እምተ’ ያጋደ እስራኤላቱዋፐ አካ። እት እት አሳ ሱን ጻምኣ ቦላን ጻፋ። 3 እት እት ዛርያ ካፖ እት ጻምኣ ግድያ ድራዉ፥ ሌዊያ ጻምአን አሮና ሱን ጻፋ። 4 ጋከትያ ዱንካንያ ግዶን ታን ኔናና ጋከትያ ማርካተ ታቦታ ስንን ዎ። 5 ታን ዶርያ አሳ ጻምአይ አጫና፤ ሀዋዳን ኦደ ህንተ ቦላን እስራኤላቱ ዙዙምያ ዙዙን ታን ሙለ ይሳና" ያጌዳ።
6 ሙሴ እስራኤልያ አሳዉ ኦድና፥ ኡንቱንቱ ካፓቱ ታማነ ላኡ ጻምአቱዋ፥ እት እት ዛርያ ካፓቱ እት እት ጻምኣ አዉ እሜድኖ። ሄ ጻምአቱዋ ግዱዋን አሮና ጻምአይካ ደኤ። 7 ሙሴ ሄ ጻምኣ ኡባ ማርካተ ዱንካንያ ግዶን መና ጎዳ ስንን ዎዳ።
8 ዎንተ ጋላስ ማርካተ ዱንካንያ ግዶ ሙሴ ገሌዳ ዎደ፥ ሌዊያ ዛረ ግድያ አሮና ጻምአይ አጬዳዋ፥ ጉምቤዳዋ፥ ጪሼዳዋነ ጪሺደ ላዉዝያ ግያ ም አይፍያ አይፌዳዋ በኤዳ።17:8-10 እብራ. 9:4 9 ሄዋፐ ጉይያን፥ ሙሴ ጻምኣ ኡባ መና ጎዳ ስንፐ እስራኤልያ አሳ ኡባኮ አሄዳ። አሳይ ኡንቱንታ በኤዳዋፐ ጉይያን፥ ካፓቱ ባረንቱ ጻምኣ ጻምኣ አኬድኖ። 10 መና ጎዳይ ሙሳ፥ "አሮና ጻምኣ ታቦታ ስንን ዛራ ዎ። ሄዋ ማካሌዳዋንቱ ታ ቦላ ላኤን ዙዙሚደ ሀይቀናዳን፥ ኡንቱንቶ ማላታ ኦደ ናጋ" ያጌዳ። 11 መና ጎዳይ አዛዜዳዋዳን ሙሴ ኦዳ።
12 እስራኤልያ አሳይ ሙሳ፥ "ኑን ሀይቃና፤ ያና፤ ኑን ኡባይካ ያና! 13 መና ጎዳ ዱንካንያኮ፥ ሀራይ አቶ ማታ ሺቅያ ኡራይ ኦንነ ሀይቃና። ስም ኑን ኡባይካ ሀይቄቶ?" ያጌድኖ።