ፓይዱዋ 28

ሀቼ ሀቼ ሺሽያ ያርሹዋ

1 መና ጎዳይ ሙሳ፥ 2 "እስራኤላቱዋ ሀዋዳን ያጋደ አዛዛ፤ ‘ታ ቁማ፥ ታና ቶሹኩ ጊደ ሳዋና ማላ፥ ታማን ያርሽያ ታ ያርሹዋ ኬሬዳ ዎድያን ዎድያን ታዉ ናጊደ እምተ’ ያጋ። 3 ቃይ ኔን ኡንቱንታ፥ ‘መና ጎዳዉ ታማን ያርሽያ ያርሹ ሀዋ: ትላ ቦላና ደእያ፥ እት ላይ ግዴዳ ላኡ ዶርሳ ኦርገቱዋ ሀች ሀች ጹግያ ያርሾ ያርሽተ፤ 4 ዶርሳ ኦርገቱዋፐ እቱዋ ዎንታ፥ ላኤንዋ ኦማርስ ያርሽተ። 5 ቃይ ሄዋና እት ሊትሮ ግድያ ዛይትያን ሙናቀቴዳ እት ኪሎ ግራመ ሙሩታ ዛርጋ ልያ ካ ያርሾ ያርሽተ። 6 ሀዌ መና ጎዳ ቶሹኩ ጊደ ሳዋና ማላ፥ ሲና ደርያ ቦላን አዛዘቴዳ፥ ሀች ሀች ታማን ጹግያ ያርሹዋ። 7 ሄዋና ያርሽያ ኡሻ ያርሹ እት ዶርሳ ኦርግያዉ እት ሊትሮ ግድያ ዎይንያ ኤሳ። ኡሻ ያርሹዋ ጌሻ ሳኣን መና ጎዳዉ ጉስተ። 8 ኦማርስ ላኤን ዶርሳ ኦርግያ፥ ዎንታዋ ኦዳዋዳን ኦደ፥ ካ ያርሹዋናነ ኡሻ ያርሹዋና መና ጎዳ ቶሹኩ ጊደ ሳዋና ማላ፥ ታማን ያርሽተ።

ሳምባታ ጋላሳ ያርሹዋ

9 " ‘ሳምባታ ጋላሳን፥ ትላ ቦላና ደእያ እት ላይ ግዴዳ ላኡ ዶርሳነ ዛይትያን ሙናቀቴዳ ላኡ ኪሎ ግራመ ግድያ ሙሩታ ልያ ካ ያርሹዋነ ኡሻ ያርሹዋ ኦደ ያርሽተ። 10 ሀቼ ሀች ጹግያ ያርሹዋነ አ ኡሻ ያርሹዋ ቦላ፥ ሳምባታ ጋላሳ ኡባን ህንተ ያርሽያ ጹግያ ያርሹ ሀዋ።

አግናይ ጼርያ ጋላሳ ያርሹዋ

11 " ‘አግናይ ጼርያ ጋላሳ ኡባን፥ ላኡ ኮሩማቱዋ፥ እት ዶርሳ ኦርግያነ እት ላይ ግዴዳ ላፑን ዶርሳ ኦርገቱዋ፥ ኡባይካ ትላ ቦላና ደእያዋንታ፥ ጹግያ ያርሹዋ ኦደ፥ መና ጎዳዉ ያርሽተ። 12 እት እት ኮሩማና ዛይትያን ሙናቀቴዳ ሄዙ ኪሎ ግራመ ግድያ ሙሩታ ዛርጋ ልያ፥ እት ዶርሳ ኦርግያና ዛይትያን ሙናቀቴዳ ላኡ ኪሎ ግራመ ግድያ ሙሩታ ዛርጋ ልያነ 13 ላፑን ዶርሳ ማራቱዋፐ እት እት ዶርሳ ማራና ዛይትያን ሙናቀቴዳ እት ኪሎ ግራመ ግድያ ሙሩታ ዛርጋ ልያ ካ ያርሹዋ ኦደ፥ መና ጎዳ ቶሹኩ ጊደ ሳዋና ማላ፥ ታማን ያርሽያ ያርሹዋ ያርሽተ። 14 ቃይ ኡሻ ያርሾ እት እት ኮሩማና ላኡ ሊትሮ ግድያ ዎይንያ ኤሳ፥ እት ዶርሳ ኦርግያና እት ሊትሮነ ባጋ ዎይንያ ኤሳነ እት እት ዶርሳ ማራና እት ሊትሮ ግድያ ዎይንያ ኤሳ ሺሽተ። ሀዌ ላይ ግዶን አግናይ ጼርያ ጋላሳ ኡባን ያርሽያ ጹግያ ያርሹዋ። 15 ሀቼ ሀች ጹግያ ያርሹዋነ አ ኡሻ ያርሹዋ ቦላ፥ እት ዴሻ ኦርግያ ናጋራ ያርሹዋ ኦደ፥ መና ጎዳዉ ያርሽተ።

ፓስጋ ባላነ ኡክ ባላ ያርሾቱዋ

16 " ‘ኮይሮ አግናን ታማነ ኦይደን ጋላሳይ መና ጎዳ ፓስጋ ቦንችያ ጋላሳ ግዶ።✝28:16 ከሳ 12:1-13፤ ዛረ. 16:1-2 17 ቃይ ሄ አግናንካ ታማነ እቼሸን ጋላሳን ዶሚደ፥ ኡክ ባላይ ቦንቼቴ፤ ሄዋ ድራዉ፥ ላፑን ጋላሳቱዋን እርሹ ገልቤና ኡክ ሚተ።✝28:17 ከሳ 12:14-20፤ 23:15፤ 34:18፤ ዛረ. 16:3-8 18 ሄ ጋላሳቱዋፐ ኮይሮ ጋላሳን ጌሻ ሺቁዋ ሺቅተ፤ ዳቡርስያ ኦሶ አያነ ኦፕተ። 19 ላኡ ኮሩማቱዋ፥ እት ዶርሳ ኦርግያነ እት ላይ ግዴዳ ላፑን ዶርሳ ኦርገቱዋ፥ ኡባይካ ትላ ቦላና ደእያዋንታ፥ ታማን ያርሽያ ያርሹዋ ኦደ፥ መና ጎዳዉ ያርሽተ። 20 ካ ያርሾ እት ኮሩማና ዛይትያን ሙናቀቴዳ ሄዙ ኪሎ ግራመ ግድያ ሙሩታ ዛርጋ ልያ፥ እት ዶርሳ ኦርግያና ላኡ ኪሎ ግራመ ግድያ ልያነ 21 ላፑን ዶርሳ ማራቱዋፐ እት እት ማራና እት ኪሎ ግራመ ልያ ያርሽተ። 22 ቃይ እት ዴሻ ኦርግያ ናጋራ ያርሾ፥ ህንተ ናጋራ አቶ ጊሳናዉ ያርሽተ። 23,24 ሀቼ ሀች ዎንታ ጹግያ ያርሹዋነ አ ካ ያርሹዋ ቦላ፥ ሳዉዋ ቶሹኩ ግያ ቁማ ታማን ያርሽያ ያርሹዋ ጉጂደ፥ መና ጎዳዉ ያርሽተ። ላፑን ጋላሳዉ ሄዋዳን ኦተ። 25 ላፑን ጋላሳን ቃይ ጌሻ ሺቁዋ ሺቅተ፤ ዳቡርስያ ኦሶ አያነ ኦፕተ።

ሳምንታቱዋ ባላ ያርሹዋ

26 " ‘ሳምንታቱ ባላ ጋላሳን ህንተ መና ጎዳዉ ኦራ ካ ሺሽያ ዎደ፥ ጌሻ ሺቁዋ ሺቅተ፤ ዳቡርስያ ኦሶ አያነ ኦፕተ።✝28:26-31 ከሳ 23:16፤ 34:22፤ ዛረ. 16:9-12 27 ላኡ ኮሩማቱዋ፥ እት ዶርሳ ኦርግያነ እት ላይ ግዴዳ ላፑን ዶርሳ ኦርገቱዋ ሳዉዋ ቶሹኩ ግያ ጹግያ ያርሹዋ ኦደ፥ መና ጎዳዉ ያርሽተ። 28 እት እት ኮሩማና ዛይትያን ሙናቀቴዳ ሄዙ ኪሎ ግራመ ግድያ ሙሩታ ዛርጋ ልያ፥ እት ዶርሳ ኦርግያና ላኡ ኪሎ ግራመ ልያነ 29 ላፑን ዶርሳ ማራቱዋፐ እት እት ማራና እት ኪሎ ግራመ ልያ ካ ያርሾ ያርሽተ። 30 ቃይ እት ዴሻ ኦርግያ ናጋራ አቶ ጊስያ ያርሹዋ ኦደ ያርሽተ። 31 ሀቼ ሀች ጹግያ ያርሹዋነ አ ኡሻ ያርሹዋ ቦላ፥ ሀዋንታ ኡንቱንቱ ካ ያርሹዋና ያርሽተ። መሄቱ ትላ ቦላና ደእያዋንታ ግድያዋ ጌሺደ ኤርተ።