ፓይዱዋ 10

ብራፐ ኦሰቴዳ ጹሩምባቱዋ

1 መና ጎዳይ ሙሳ ሀዋዳን ያጌዳ፤ 2 "ላኡ ጹሩምባቱዋ ብራፐ ቆጻደ ኦ፤ ያታደ አሳ ሺቆ ጼጋናዉነ ቃይ ዱንካኔዳ ሳፐ ደንዳናዉ ደንናዳን ፑና። 3 ሀ ላኡ ጹሩምባቱ ፑነትያ ዎደ፥ አሳይ ኡባይ ጋከትያ ዱንካንያ ፐንጊ ኔኮ ሺቆ። 4 ሽን እት ጹሩምባ ጻላላይ ፑነቶፐ፥ እስራኤልያ ዛራቱዋ ካፓቱ ነ ስን ሺቅኖ። 5 ኔን ጹሩምባ ቁ ኦደ ፑንያ ዎደ፥ አዋይ ዶልያ ባጋና ዱንካኔዳ ዛራቱ ደንድኖ። 6 ጹሩምባ ላኤን ቁ ኦደ ፑንያ ዎደ፥ ገድሳ ባጋና ዱንካኔዳ ዛራቱ ደንድኖ። ጹሩምባይ ቁ ግ ፑነትያዌ ደንዳናዉ ማላ ግዶ። 7 ያአዉ አሳ ሺሻናዉ ጹሩምባ ፑና፤ ሽን ኮሻ ቁ ኦደ ፑኖፓ። 8 አሮና ናናይ ቄሳቱ ጹሩምባ ፑንኖ። ሀዌ ነዉነ ይያ የለታ ኡባዉ መና ዎጋ ግዶ።

9 "ህንተ ጋድያን መቱዋ ደንያ ህንተ ሞርክያና ህንተ ኦለታናዉ ከስያ ዎደ፥ ሄ ጹሩምባቱዋ ቁ ኦደ ፑንተ። ሄዋን መና ጎዳይ ህንተ ጾሳይ ህንተና ሄ ዎደ ሀሳዪደ፥ ህንተ ሞርክያፐ ህንተና አሻና። 10 ሄዋዳንካ፥ ቃይ ህንተ ናሸትያ ጋላስ፥ ባላ ቦንቻናዉ ህንተ ኬሬዳ ጋላስነ አግናይ ጼርያ ባላን፥ ህንተ ጹግያ ያርሹዋ ያርሽያ ዎደነ ህንተ እትፐተ ያርሹዋ ያርሽያ ዎደ ሄ ጹሩምባቱዋ ፑንተ፤ ሄዌ ጾሳ ስንን ህንተና ሀሳይስያዋ ግዳና። ታን መና ጎዳ፥ ህንተ ጾሳ" ያጌዳ።

እስራኤላቱ ሲናፐ ቤድኖ

11 ላኤን ላይን ላኤን አግናን ላታማን ጋላስ፥ ሻሪ ማርካተ ዱንካንያ ቦላፐ ደንዴዳ። 12 ሄዋፐ ጉይያን፥ እስራኤልያ አሳይ ሲና መላ ቢታፐ ደንዴዳ፤ ሻሪ ፓራና ግያ መላ ቢታ ጋኪደ ዎዳ። 13 ኡንቱንቱ ሀ ኮይሮ ቡሳዉ መና ጎዳይ ሙሴ ባጋና አዛዜዳዋዳን ደንዴድኖ።

14 ይሁዳ ዛራቱዋና ዱንካኔዳ ባጋይ ባረንቱ አርማ ኦይቂደ ኮይሮ ደንዴድኖ። ይሁዳ ዛራቱ ካፑ አምናዳባ ናኣ ናአሶና፤ 15 ይሳኮራ ዛራቱ ካፑ ጹኣራ ናኣ ናታንኤላ፤ 16 ዛብሎና ዛራቱ ካፑ ሄሎና ናኣ ኤልኣባ።

17 ሄዋፐ ጉይያን፥ ዱንካንያ ሾድና፥ ገርሾና ያራቱነ ማራራ ያራቱ ቶኪደ ደንዴድኖ።

18 ካሊደ ሮቤላ ዛራቱዋና ዱንካኔዳ ባጋይ ባረንቱ አርማ ኦይቂደ ደንዴዳ። ሮቤላ ዛራቱ ካፑ ሻደኡራ ናኣ ኤሊጹራ፤ 19 ስሞና ዛራቱ ካፑ ጹሪሻዳያ ናኣ ሻሉምኤላ፤ 20 ጋዳ ዛራቱ ካፑ ረኡኤላ ናኣ ኤልያሳፋ።

21 ሄዋፐ ጉይያን፥ ቃሃታ ያራቱ ጌሻ ሚሻቱዋ ቶኪደ ደንዴድኖ። ኡንቱንቱ ጋካናፐ ካሰቲደ፥ ዱንካኒ ቶለት ኡቴዳ።

22 ካሊደ ኤፍሬማ ዛራቱዋና ዱንካኔዳ ባጋይ ባረ አርማ ኦይቂደ ደንዴዳ። ኤፍሬማ ዛራቱ ካፑ አምሁዳ ናኣ ኤልሻማአ፤ 23 ምናሰ ዛራቱ ካፑ ፓዳጹራ ናኣ ጋማልኤላ፤ 24 ቢንያማ ዛራቱ ካፑ ጊድኦና ናኣ አብዳና።

25 ዉርሰን፥ ሀ ጩጉዋ ኡባዉ ጉየ ባጋን ናግያ ዳና ዛራቱዋና ዱንካኔዳ ባጋይ ባረ አርማ ኦይቂደ ደንዴዳ። ዳና ዛራቱ ካፑ አምሻዳያ ናኣ አህኤዘራ፤ 26 አሴራ ዛራቱ ካፑ ኦክራና ናኣ ፓግኤላ፤ 27 ንፍታሌማ ዛራቱ ካፑ ኤናና ናኣ አህራአ። 28 እስራኤልያ አሳይ ባረ ባጋን ባጋን ደንዲደ ብያ ማራይ ሀዋዳና።

29 ሙሴ ምድያማ አሳ ግድያ ባረ ቦሉዋ ረኡኤላ ናኣ ሆባባ፥ "ኑን መና ጎዳይ፥ ‘ታን ህንተንቶ እማና’ ጌዳ ሳኣ ቤቶ፤ መና ጎዳይ እስራኤልያዉ ሎኦባ ኦና ጌዳ ድራዉ፥ ኔን ኑናና ደንዳ። ኑን ነዉ ሎኦባ ኦና" ያጌዳ።

30 ሆባብ፥ "ቱይት፥ ታን ቢከ፤ ታን ታ ቢታ ታ አሳኮ ባና" ያጌዳ።

31 ሙሴ አ፥ "ሀያና፥ ኑና የጋደ ቦፓርኪ! መላ ቢታን ኑን ዱንካናናዉ በስያሳ ኔን ኤራሳ፤ ኔን ኑ ብያ ኦግያ ኑና ካለናዉካ ዳንዳያሳ። 32 ኔን ኑናና ቦፐ፥ መና ጎዳይ ኑዉ እምያ አንጁዋ ኡባ ኑን ኔናና ሻካና" ያጌዳ።

33 ያትና ኡንቱንቱ መና ጎዳ ደርያፐ ደንዲደ፥ ሄዙ ጋላሳ ኬሻ ኦግያ ቤድኖ። መና ጎዳ ጫቁዋ ታቦታይ ኡንቱንቱ ሸምፕያ ሳኣ ደማናዉ ሄ ሄዙ ጋላሳን ኡንቱንቱፐ ስንዉ ቤዳ። 34 ኡንቱንቱ ዱንካኔዳ ሳኣፐ ደንድያ ዎደ ኡባን፥ መና ጎዳ ሻሪ ጋላስ ጋላስ ኡንቱንቱፐ ቦላና ደኤ። 35 ታቦታይ ደንድያ ዎደ ኡባን ሙሴ፥ "አቤት መና ጎዳዉ፥ ደንዳ! ነ ሞርከቱ ላለትኖ፤ ኔና እጽያዋንቱካ ነ ስንፐ ባቃትኖ" ያጌ።✝10:35 ማዝ. 68:1 36 ታቦታይ ሸምፕያ ዎደ ኡባን ሙሴ፥ "አቤት መና ጎዳዉ፥ ሀ ዳሮ ሻአን ፓይደትያ እስራኤልያ አሳኮ ኔን ስማ" ያጌ።