ፓይዱዋ 25

እስራኤላቱ ፓኦራ ግያ ሳን ናጋራ ኦድኖ

1 እስራኤላቱ ሺጽማ ግያ ሳን ዱንካኔዳ ዎደ፥ አሳይ ሞኣባ ቢታ ማቼቱዋና ሻርሙጹዋ ዶሜዳ። 2 ሄ ማጫ አሳቱ ባረንቱ ጾሳቱዋ ያርሹዋ ማናዉ ኡንቱንታ ሾቤድኖ፤ ኡንቱንቱ ሚደ፥ ኡንቱንቱ ጾሳቶ ጎይኔድኖ። 3 እስራኤላቱ ፓኦራ ባኣላ ግያ ኤቃ ካሌዳ ድራዉ፥ መና ጎዳ ሀንቁ ኡንቱንቱ ቦላን ኤጽ ከሴዳ። 4 ያትና መና ጎዳይ ሙሳ፥ "መና ጎዳ ሀንቁ እስራኤልያፐ ዎራ ስማና ማላ፥ ሀ አሳ ካለያዋንታ ኡባ አፋደ፥ ሴታ ጋላስ መና ጎዳ ስንን ካቃ" ያጌዳ። 5 ሙሴ እስራኤልያ ዳናቱዋ፥ "ፓኦራ ባኣላ ግያ ኤቃዉ ጎይኔዳ ህንተ አሳ ኡባ ህንተ ሁጲያን ሁጲያን ዎተ" ያጌዳ።

6 ሙሴነ እስራኤልያ ማባራይ ኡባይ ጋከትያ ዱንካንያ ፐንግያን ዬክሽን፥ እስራኤላቱዋፐ እቱ ምድያማ ቢታ ምሽራቶ ኡንቱንቱ ስንና አደ፥ ባረ ጎልያ አሳኮ አሄዳ። 7 ቄስያ አሮና ናኣ ኤልኣዛራ ናአይ ፒንሃስ ሄዋ በኤዳ ዎደ፥ ማባራ ግዶፐ ደንዲደ፥ ቶራ ባረ ኩሽያን ኦይቂደ፥ 8 ሄ እስራኤልያ ብታንያ ካሊደ፥ ዱንካንያ ግዶ ገሌዳ። እስራኤልያ ብታንያነ ምሽራቶነ ላኡዋካ ቶራን ጫዲደ፥ ካን ከሴዳ። ሄዋዳን ሀንና፥ ቦሻይ እስራኤላቱዋፐ ቃረቴዳ፤ 9 ሽን ሄ ቦሻን ሀይቄዳ አሳይ ላታማነ ኦይዱ ሻአ።

10 ሄዋፐ ጉይያን፥ መና ጎዳይ ሙሳ ሀዋዳን ያጌዳ፤ 11 "ቄስያ አሮና ናኣ ኤልኣዛራ ናአይ ፒንሃስ እስራኤልያ አሳ ግዶን ታን ታ ቦንቾ ምሸትያዋዳን ምሸቴዳ ድራዉ፥ ኡንቱንቱ ቦላ ታን ሀንቀቴዳ ሀንቁ ዶቼዳ፤ ታንካ ኡንቱንታ ታ ሀንቁዋን ይሳበይከ። 12 ሄዋ ድራዉ፥ ታን ታ ሳሮተ ጫቁዋ አናና ጫቀትያዋ ፒንሃሳዉ ኔን ኦዳ። 13 እ ባረ ጾሳ ቦንቾ ምሸቴዳ ግሻዉነ እስራኤልያ አሳዉ አቶ ጊሴዳ ድራዉ፥ እነ አ ዘረቱ መናዉ ቄሰ ግዳናዋ" ያጌዳ።

14 ምድያማ ቢታ ምሽራትና ዎዳ እስራኤልያ ብታንያ ሱንይ ሳሉ ናኣ ዝምራ፤ ሳሉ ስሞና ዛራቱዋን እት ያራ ካፑዋ። 15 ሀይቄዳ ምድያማ ቢታ ምሽራት ሱንይ ኮዝቦ፤ እ አዉ ጹር ምድያማቱ ያራ ካፑዋ።

16 መና ጎዳይ ሙሳ ሀዋዳን ያጌዳ፤ 17 "ምድያማ ቢታ አሳቱዋ ሞርክተ፤ ኡንቱንታ ዎተ። 18 አያዉ ጎፐ፥ ኡንቱንቱ ህንተና ፓኦራን ጭሚደ፥ ህንተዉ ሞርከ ግዴድኖ፤ ቃይ ቦሻ ጋላስ ፓኦራን ዎዳ ምሽራት፥ ምድያማቱ ያራ ካፑዋ ናት ኮዝብ ጋሱዋን ኡንቱንቱ ህንተና ሞርኬድኖ" ያጌዳ።