ፓይዱዋ 32

ዮርዳኖሳ ሻፋ ዶላሃ ባጋና ደእያ ዛራቱዋ

1 ሮቤላ ዛረቶነ ጋዳ ዛረቶ ሎይ ዳሮ መሂ ደኤ። ኡንቱንቱ ያእዜራ ቢታይነ ጋላኣደ ቢታይ መህያዉ እንጀ ግድያዋ በኤድኖ። 2 ኡንቱንቱ ሙሴኮ፥ ቄስያ ኤልኣዛራኮነ ማባራ ካፓቱዋኮ ዪደ፥ ኡንቱንታ ሀዋዳን ያጌድኖ፤ 3,4 "መና ጎዳይ እስራኤልያ አሳን ጾንሴዳ ቢታቱ፥ አጻሮት፥ ድቦን፥ ያእዜር፥ ኒምር፥ ሀሰቦና፥ ኤልኣል፥ ሴብም፥ ናቦነ ባኦን መህያዉ እንጀ ቢታ፤ ኑዉ ህንተ ቆማቶ መሂ ደኤ። 5 ኑን ህንተና ናሸቼዳዋ ግዶፐ፥ ሀ ቢታቱ ኑ ህንተ ቆማቶ ላታ ጋደ ግዲደ እመትኖ። ኑና ዮርዳኖሳ ሻፋ ሄፍን ፕንፕተ" ያጌድኖ።

6 ሙሴ ጋዳ ዛራቱዋነ ሮቤላ ዛራቱዋ ሀዋዳን ያጌዳ፤ "ሀራ እስራኤልያ አሳይ ኦላ ብያ ዎደ፥ ህንተ ሀዋን ኡቲቴ? 7 መና ጎዳይ ኡንቱንቶ እሜዳ ቢታ እስራኤላቱ ፕነናዳን፥ ህንተ አያዉ ኡንቱንቱ ዎዛና ሹግሲቴ? 8 ቃዴሳ-ባርነፐ ሄ ቢታ ዎች ጼላናዉ ህንተ አዎቱዋ ታን የዴዳ ዎደ፥ ኡንቱንቱካ ሀዋዳን ኦድኖ።✝32:8-9 ፓይ. 13:17-33 9 ዋኒደ ጎፐ፥ ኡንቱንቱ ኤሽኮላ ዛንጋራ ከሲደ፥ ሄ ቢታ ጼሌዳ ዎደ፥ እስራኤላቱ መና ጎዳይ ኡንቱንቶ እሜዳ ቢታ ገለና ማላ፥ ኡንቱንቱ እስራኤላቱዋ ዎዛና ሹግሴድኖ። 10 መና ጎዳይ ሄ ጋላስ ሀንቁዋ ኤጽ ከሲደ፥ ሀዋዳን ያጊደ ጫቄዳ፤✝32:10-13 ፓይ. 14:26-35 11,12 ‘መና ጎዳ ባረንቱ ኩመን ዎዛናፐ ካሌዳ ቀኒዝያ ይፉነ ናኣ ካሌባፐነ ኔዌ ናኣ ኢያሱፐ አትና፥ የለቶደፐ ላታሙ ላይነ ሄዋፐ ቦላና ደእያ አቱማ አሳን ግብጼ ጋድያፐ ከሴዳዋንቱፐ እቱነ፥ ታን አብራሃማዉ፥ ይሳቃዉነ ያቆባዉ እማናዉ ጫቄዳ ቢታ በኤና። አያዉ ጎፐ፥ ኡንቱንቱ ታና ባረንቱ ኩመን ዎዛናፐ ካልበይክኖ’ ያጊደ ጫቄዳ። 13 መና ጎዳ ሀንቁ እስራኤልያ ቦላ ኤጽ ከሴዳ፤ ያትና ጾሳ ስንን ኢታ ኦዳ ሄ የለታ ኡባይ ዉር ያና ጋካናዉ፥ መላ ቢታን ኦይታሙ ላይ እ ኡንቱንታ ቶይላዬዳ። 14 ህንተኖ፥ ናጋራንቻ የለታቶ፥ መና ጎዳይ እስራኤልያ ቦላ ጉጅ ሀንቁዋ ኤጽ ከሳናዳን፥ ህንተ ህንተ አዎቱዋ ሳኣን ሀእ ኤቄድታ። 15 ህንተ መና ጎዳ ካልያዋ አጊደ ዎራ ስሞፐ፥ እ ቃይካ ባረ አሳ መላ ቢታን አግ ባሻና። ያቲደ ህንተ ሀ አሳ ኡባ ይሳና" ያጌዳ።

16 ኡንቱንቱ ሙሴ ማታ ዪደ፥ አ ሀዋዳን ያጌድኖ፤ "ኑን ሀዋን ኑ መሄቶ ድርሳ፥ ኑ ናናዉ ካታማቱዋ ኬጻና። 17 ሽን ኑን ኦላ ሚሻ ዳንጪደ፥ እስራኤልያ አሳ ኡንቱንቱ ሳኣ ጋና ጋካናዉ ኦለታናዉ ባና። ሄዋ ኬሻን፥ ሀ ጋድያን ደእያ አሳቱዋፐ ናገታናዉ፥ ኑ ናናይነ ማጫ አሳይ ግምበቲደ ኡቴዳ ካታማቱዋን ደእኖ። 18 እስራኤላቱ ኡባይ ባረንቱ ላታ ላታ አካና ጋካናዉ፥ ኑን ኑ ጎለ ስሞኮ። 19 ኑን ኑ ላታ ዮርዳኖሳ ሻፋፐ ሀፍን አዋይ ዶልያ ባጋና ላቴዳ ድራዉ፥ ኑን ዮርዳኖሳፐ ሄፍን ባጋና፥ ያን ኡንቱንቱና ላታ ላቶኮ" ያጌድኖ።

20 ሙሴ ኡንቱንቱ፥ "ህንተ ሀዋ ኦፐ፥ ህንተ መና ጎዳ ስንን ኦላ ባናዉ ጊጎፐነ 21 ህንተ ኦላንቻቱ ኡባይ ኦላ ሚሻ ዳንጪደ፥ መና ጎዳይ ባረ ሞርከቱዋ ባረ ስንፐ የደርሳና ጋካናዉ፥ ዮርዳኖሳ ሻፋ ጾሳ ስንን ፕኖፐ፥ 22 መና ጎዳይ ሄ ቢታ ጾኔዳዋፐ ጉይያን፥ ህንተ ስማናዉ ዳንዳዪታ። ያቶፐ፥ ህንተ ኦለታናዉ በስያ ኦላ መና ጎዳዉነ እስራኤልያ አሳዉ ኦለቲደ ፖሌድታ ግያዋ። ቃይ ሄ ቢታይ መና ጎዳ ስንን ህንተንቶ ላታ ቢታ ግዳናዋ።

23 "ሽን ህንተ ሄዋዳን ኦናን እጾፐ፥ መና ጎዳ ቦላ ናጋራ ኦታ፤ ስም ህንተና ህንተ ናጋራይ ጋክያዋ ቱሙ ኤርተ። 24 ህንተ ህንተ ናናዉነ ማጫ አሳዉ ካታማቱዋ ኬጽተ፤ ህንተ ዶርሳ ዉድያዉካ ባሉዋ ጊግስተ፤ ሽን ህንተ ጌዳዋ አገናን ኦተ" ያጌዳ።

25 ጋዳ ዛራቱነ ሮቤላ ዛራቱ ሙሳ፥ "ኑን ነ ቆማቱ ኔን ኑ ጎዳይ አዛዜዳዋዳን ኦና። 26 ኑ ናናቱነ ኑ ማጫ አሳቱ፥ ኑ ዶርሳቱነ ኑ ሚዛቱ ሀዋን ጋላኣደ ካታማቱዋን ደእሽኖ። 27 ሽን ኑን ነ ቆማቱ፥ ኦላዉ ዳንጬዳ ኦላንቻቱ ኡባይ፥ ኔን ኑ ጎዳይ ግያዋዳን፥ ኦለታናዉ መና ጎዳ ስንን ዮርዳኖሳ ሻፋ ፕናና" ያጌድኖ።

28 ሄዋ ድራዉ፥ ሙሴ ቄስያ ኤልኣዛራ፥ ኔዌ ናኣ ኢያሳነ እስራኤልያ ዛራቱ ካፓቱዋ ኡንቱንቱዋ አዛዜዳ።✝32:28-32 ኢያሳ 1:12-15 29 ሙሴ ኡንቱንታ ሀዋዳን ያጌዳ፤ "ጋዳ ዛራቱነ ሮቤላ ዛራቱ ኡባይ ኦላ ሚሻ ዳንጪደ፥ መና ጎዳ ስንን ህንተናና ዮርዳኖሳ ሻፋ ፕኖፐነ ህንተ ሄ ቢታ ጾኖፐ፥ ሄዋፐ ጉይያን፥ ጋላኣደ ቢታ ህንተ ኡንቱንታ ላትስተ። 30 ሽን ኡንቱንቱ ኦላ ሚሻ ዳንጪደ፥ ህንተናና ፕነናን እጾፐ፥ ኡንቱንቱ ካናነ ቢታ ህንተናና ላትኖ" ያጌዳ።

31 ጋዳ ዛራቱነ ሮቤላ ዛራቱ ዛሪደ፥ "ኑን ነ ቆማቱ መና ጎዳይ ጌዳዋ ኦና። 32 ኦላ ሚሻ ዳንጪደ፥ መና ጎዳ ስንን ኑን ካናነ ቢታ ገላናዉ ፕናና፤ ሽን ኑን ላትያ ላታይ ዮርዳኖሳፐ ሀፍን ባጋና ግዳናዋ" ያጌድኖ።

33 ሄዋ ድራዉ፥ ሙሴ ጋዳ ዛረቶ፥ ሮቤላ ዛረቶነ ዮሴፎ ናኣ ምናሰ ዛራቱዋፐ ባጋዉ አሞረቱ ካትያ ስሆና ካዉተነ ባሳነ ካትያ ኦጋ ካዉተ፥ ኡንቱንቱ ዩሹዋን ደእያ ካታማቱዋና እሜዳ። 34 ጋዳ ዛራቱ ድቦና፥ አጻሮታ፥ አሮኤራ 35 አጽሮት-ሾፋና፥ ያእዜራ፥ ዮግባሀ፥ 36 ቤት-ኒምራነ ቤት-ሃራና ጌተትያ ግምቢያን ድረቴዳ ካታማቱዋ ዛረደ ኬጼድኖ። ባረ ዶርሳቶካ ኡንቱንቱ ባሉዋ ጊግሴድኖ።

37 ሮቤላ ዛራቱካ ሀሰቦና፥ ኤልኣላ፥ ቅርያታይማነ፥ 38 ናባ፥ ባኣል-ማኦናነ (ሄ ካታማቱዋፐ እቱ እቱ ሱን ላሜድኖ) ሲብማ ጌተትያ ካታማቱዋ ዛረ ኬጼድኖ።

39 ምናሰ ናኣ ማክራ ያራቱ ጋላኣደ ቢደ፥ ኦላይ ኦይቂደ፥ ያን ደእያ አሞረቱዋ የደርሴድኖ። 40 ሄዋ ድራዉ፥ ምናሰ ናኣ ማክራ ያራቶ ሙሴ ጋላኣደ ቢታ እምና፥ ኡንቱንቱ ያን ደኤድኖ። 41 ምናሰ ዛረ ግድያ ያኢር ቢደ፥ ኡንቱንቱ ኦላይ ኦይቂደ፥ ሀቦት-ያኢራ ካታማቱዋ ያጊደ ሱንዳ። 42 ኖባህ ቢደ፥ ቃናታ ካታማነ አ ዩሹዋን ደእያ ሄራቱዋ ኦላን ኦይቂደ፥ ባረ ሱንን ኖባሀ ጊደ ጼሴዳ።