ፓይዱዋ 31

ምድያማ አሳቱዋ ቦላ ደንዴዳ ኦላ

1 መና ጎዳይ ሙሳ፥ 2 "እስራኤልያ አሳ ድራዉ፥ ኔን ምድያማ አሳ ቦላ ጾሳ ሀሉዋ ከሳ፤ ሄዋፐ ጉይያን፥ ኔን ሀይቃና" ያጌዳ።

3 ሄዋ ድራዉ፥ ሙሴ አሳ፥ "ምድያማ አሳ ቦላ መና ጎዳ ሀሉዋ ከሳና ማላ ኦላ ባናዉ፥ ህንተ አሳ ኦላ ሚሻ ዳንጭስተ። 4 እት እት እስራኤልያ ዛራቱዋፐ እት ሻአ አቱማ አሳ ኦላዉ የድተ" ያጌዳ።

5 እስራኤልያፐ ታማነ ላኡ ሻአ አቱማ አሳይ፥ እት እት ዛርያፐ እት ሻአ አሳይ፥ ኦላዉ ጊጌድኖ። 6 እት እት ዛርያፐ እት ሻአ አሳ ሙሴ ቄስያ ኤልኣዛራ ናኣ ፒንሃሳና ኦላዉ የዴዳ፤ ፒንሃስ ጌሻ ሚሻቱዋነ ማላታዉ ፑንያ ጹሩምባ ባረናና አኪደ ቤዳ። 7 መና ጎዳይ ሙሳ አዛዜዳዋዳን፥ ኡንቱንቱ ምድያማ አሳና ኦለቲደ፥ አቱማ አሳ ኡባ ዎድኖ። 8 ቃይ ምድያማ ካተቱዋ እቼሻቱዋ፥ ኤዋ፥ ረቄማ፥ ጹራ፥ ሁራነ ረባአ ግያዋንታ ዎድኖ። ኡንቱንቱ ቃይ ብኦራ ናኣ ባላማካ ማሻን ሲፌድኖ። 9 እስራኤላቱ ምድያማ ማጫ አሳቱዋነ ናናቱዋ ኦሞዲደ፥ ኡንቱንቱ ሚዛ፥ ኡንቱንቱ ዶርሳ ዉድያነ ኡንቱንቱ ሚሻ ኡባ ቦንቄድኖ። 10 ምድያማ አሳቱ ደኤዳ ካታማቱዋ ኡባነ ኡንቱንቱ ሞቱዋ ኡባ ታማን ጹጌድኖ። 11 ኡንቱንቱ አሳ፥ መህያነ ኦሞዴዳዋ ኡባ አክ አፌድኖ። 12 ኡንቱንቱ ኦሞዴዳ አሳቱዋነ ቦንቄዳባቱዋ ሙሴኮ፥ ቄስያ ኤልኣዛራኮነ እስራኤልያ ማባራኮ፥ ያርኮፐ ሄፍንን፥ ዮርዳኖሳ ሻፋ ማታን ደእያ ሞኣባ ደምባን ኡንቱንቱ ዱንካኔዳሳ አሄድኖ።

ኦላንቻቱ ስሜድኖ

13 ሙሴ፥ ቄሲ ኤልኣዛርነ ማባራ ካፓቱ ኡባይ ዱንካኔዳ ሳኣፐ ጋጻ ኡንቱንቱና ጋከታናዉ ከሴድኖ። 14 ኦላፐ ስሜዳ ጋዳዋቱ ቦላ፥ ሻላቃቱ ቦላነ ጼቱዋ ካፓቱ ቦላ ሙሴ ሀንቀቴዳ። 15 ሙሴ ኡንቱንታ ሀዋዳን ያጌዳ፤ "ማጫ አሳ ኡባ ህንተ አያዉ አሼድቴ? 16 ኡንቱንቱ ባላማ ዞርያን፥ ፓኦራ ግያ ሳን እስራኤልያ አሳይ መና ጎዳ ናቂደ፥ ኤቃዉ ጎይናናዳን ኦዳዋንታ፤ መና ጎዳ አሳ ቦላ ቦሻይ ዬዳዌ ሄዋሳ።✝31:16 ፓይ. 25:1-9 17 ሄዋ ድራዉ፥ ሀእ አቱማ ናናቱዋ ኡባ ዎተ፤ ቃይ አቱማ አሳና ግሴዳ ማጫ አሳ ኡባ ዎተ። 18 ሽን አቱማ አሳና ግሳቤና ማጫ ናናቱዋ ኡባ ህንተንቶ አሽተ። 19 ህንተ ግዶፐ አሳ ዎዳ ኡራይ ዎይ አሃ ቦቼዳ ኡራይ ኦንነ ዱንካኔዳ ሳኣፐ ጋጻን ላፑን ጋላሳ ኡቶ፤ ሄዛን ጋላስነ ላፑን ጋላስ ህንተናነ ህንተ ኦሞዴዳዋንታ ጌሽተ። 20 ቃይ ማዮ ኡባነ ጋልባፐ፥ ዴሻ እክሰፐነ ምፐ ኦሰቴዳዋንታ ኡባ ጌሽተ" ያጌዳ።

21 ቄሲ ኤልኣዛር ኦላፐ ስሜዳ ኦላንቻቱዋ ሀዋዳን ያጌዳ፤ "መና ጎዳይ ሙሴዉ እሜዳ ህግያ ማራይ ሀዋ: 22 ዎርቃ፥ ብራ፥ ናሃስያ፥ ብራታ፥ ቆርቆሩዋነ እርሳስያ ግያ ብራታ 23 ታማን ሜተተናባቱዋ ኡባ ታማ ግዶና አና፥ ሄዌ ጌያና። ሽን ሄዌ ቃይ ቱናተፐ ጌይያ ሃን ጌያናዉ ኮሼ። ቃይ ታማን ሜተትያባቱዋ ኡባ ቱናተፐ ጌይያ ሃን ጌሻናዉ ኮሼ። 24 ላፑን ጋላስ ህንተ ማዩዋ ሜጭተ፤ ህንተካ ጌይተ። ሄዋፐ ጉይያን፥ ዱንካኔዳሳ ገልተ" ያጌዳ።

ኦሞዱዋ ሻኬድኖ

25 መና ጎዳይ ሙሳ ሀዋዳን ያጌዳ፤ 26 "ኔን፥ ቄሲ ኤልኣዛርነ ማባራ ካፓቱ ኦሞደቴዳ አሳነ መህያ ኡባ ፓይድተ። 27 ኦላን ኦለቴዳ ኦላንቻቶነ አቴዳ ማባራዉ ላኡ ከሲደ ሻክተ። 28 ኦለቴዳ ኦላንቻቱዋ ጋኬዳ ሻኩዋፐ፥ አሳ ግድና፥ ሚዛ ግድና፥ ሀረቱዋ፥ ዶርሳቱዋ ዎይ ዴሻቱዋ ግድና፥ እቼሹ ጼቱዋፐ እቱዋ መና ጎዳዉ እሞታዳን እምተ። 29 ኡንቱንታ ጋኬዳ ባጋፐ አኬዳ ጊራ መና ጎዳ ግሻዳን ቄስያ ኤልኣዛራዉ እምተ። 30 ህንኮ እስራኤላቱዋ ጋኬዳ ሻኩዋፐ፥ አሳ ግድና፥ ሚዛ ግድና፥ ሀረቱዋ፥ ዶርሳቱዋ፥ ዎይ ዴሻቱዋ ግድና፥ መህያ ኡባፐ እሻታሙዋፐ እቱዋ አኪደ ሄዋ መና ጎዳ ዱንካንያዉ አዎትያ ሌዋቶ እምተ" ያጌዳ። 31 ሙሴነ ቄሲ ኤልኣዛር መና ጎዳይ አዛዜዳዋዳን ኦድኖ።

32-35 ኦላንቻቱ ባረንቶ አክና፥ አቴዳ ኦሞዱ 675,000 ዶርሳቱዋ፥ 72,000 ሚዛቱዋ፥ 61,000 ሀረቱዋነ አቱማ አሳና ግሳቤና 32,000 ማጫ ናናቱዋ። 36 ኦላን ኦለቴዳዋንታ ጋኬዳ ባጋ ሻኩ 337,500 ዶርሳቱዋ፤ 37 ኡንቱንቱፐ መና ጎዳዉ እሞታ ከሴዳዋንቱ 675. 38 ሚዛቱ 36,000፤ ኡንቱንቱፐ መና ጎዳዉ እሞታ ከሴዳዋንቱ 72. 39 ሀረቱ 30,500 ኡንቱንቱፐ መና ጎዳዉ እሞታ ከሴዳዋንቱ 61. 40 ማጫ አሳቱ 16,000 ኡንቱንቱፐ መና ጎዳዉ እሞታ ከሴዳዋንቱ፥ 32. 41 መና ጎዳይ ሙሳ አዛዜዳዋዳን፥ መና ጎዳ ጋክያ እሞታ ሙሴ ቄስያ ኤልኣዛራዉ እሜዳ።

42-46 ኦላንቻቱ አሄዳ ኦሞዱዋ ሙሴ ላኡ ከሲደ ሻክና፥ እስራኤልያ ማባራ ጋኬዳ ሻኩ 337,500 ዶርሳቱዋ፥ 36,000 ሚዛቱዋ፥ 30,500 ሀረቱዋነ 16,000 ማጫ አሳቱዋ። 47 እስራኤልያ ማባራ ጋኬዳ ሻኩዋፐ እሻታሙ እሻታሙ አሳፐ እቱዋነ እሻታሙ እሻታሙ መህያፐ እቱዋ ሙሴ አኪደ፥ መና ጎዳይ ባረና አዛዜዳዋዳን፥ መና ጎዳ ዱንካንያዉ አዎትያ ሌዋቶ እሜዳ።

48 ሄዋፐ ጉይያን፥ ኦላ ጋዳዋቱ፥ ሻላቃቱነ ጼቱዋ ካፓቱ ሙሴኮ ዬድኖ። 49 ኡንቱንቱ ሙሳ፥ "ኑን ነ ቆማቱ ኑ አዛዙዋ ጋርሳን ደእያ ኦላንቻቱዋ ፓይድና፥ እቱነ ፓጭቤና። 50 መና ጎዳይ ኑ ሸምፑዋ አሼዳ ድራዉ፥ ኑን ሁጲያን ሁጲያን አኬዳ ዎርቃ አሌቆቱዋ፥ ኩሽያ ሳጋየቱዋ፥ ገድያ አልቦቱዋ፥ ምግዶቱዋ፥ ሀይ ሎታቱዋነ ቆያን አያ አሌቁዋ መና ጎዳዉ እሙዋ አሄዶ" ያጌድኖ። 51 ሙሴነ ቄሲ ኤልኣዛር ዎርቃ አሌቆቱዋ ኡባ ኡንቱንቱፐ አኬድኖ። 52 ሻኣ ካፓቱነ ጼቱዋ ካፓቱ አሂደ መና ጎዳዉ እሜዳ ዎርቃይ ኡባይ ላኡ ጼቱ ኪሎ ግራመ ግድያዋ። 53 ሽን እት እት ኦላንቻቱ ኡባይ ባረንቱ ኦሞዱዋ ኦሞዱዋ ባረዉ አኬድኖ። 54 ሙሴነ ቄሲ ኤልኣዛር ሻኣ ካፓቱዋፐነ ጼቱዋ ካፓቱዋፐ አኬዳ ዎርቃ መና ጎዳ ስንን እስራኤልያ አሳ ሀሳይሳና ማላ፥ መና ጎዳ ዱንካንያ ግዱዋ ገልሴድኖ።