ፓይዱዋ 23

1 ባላም ባላቃ፥ "ሀዋን ኔን ታዉ ላፑን ያርሽያ ሳኣ ግምባ፤ ቃይ ላፑን ኮሩማ ቦራነ ላፑን ዶርሳ ኦርገቱዋ ኔን ታዉ ጊግሳ" ያጌዳ።

2 ባላም ጌዳዋዳን ባላቅ ኦዳ፤ ኡንቱንቱ ላኡካ እት እት ያርሽያ ሳኣን እት ኮሩማ ቦራነ እት ዶርሳ ኦርግያ ያርሼድኖ። 3 ሄዋፐ ጉይያን፥ ባላም ባላቃ፥ "ኔን ነ ጹግያ ያርሹዋ ማታን ሀዋን ኤቃሻ፤ ታን ገደኮ ባይ። መና ጎዳይ ታናና ጋከታናዉ ሀቀት ዬናን አገና። እ ታዉ ቆንጭስያዋ አያነ ታን ነዉ ኦዳና" ያጌዳ። ቃ ዞዘትያ መላ ሳኣ ከሴዳ። 4 ሄዋን ጾሳይ ባላማና ጋከትና ባላም፥ "ታን ላፑን ያርሽያ ሳኣ ጊግሳድ፤ እት እት ያርሽያ ሳኣን እት ኮሩማ ቦራነ እት ዶርሳ ኦርግያ ያርሻድ" ያጌዳ።

5 ባላም ጋናባ መና ጎዳይ አዉ ኦዲደ፥ "ኔን ባላቃኮ ስማደ፥ አዉ ሀ ትምቢትያ ኦዳ" ያጌዳ። 6 እ ባላቃኮ ስምያ ዎደ፥ ባላቅ ሞኣባ ካፓቱ ኡባና ባረ ጹግያ ያርሹዋ ማታን ኤቄዳ።

7 ሄዋፐ ጉይያን፥ ባላም ባረ ትምቢትያ ሀዋዳን ያጊደ ኦዴዳ፤

"ሞኣባ ካቲ አዋይ ዶልያ ባጋ ደረቱዋፐ፥

ሶርያ ጋድያፐ ታና ሀዋዳን ያጊደ አሄዳ፤

‘ሃያ፤ ያቆባ ታዉ ሸቃ!

እስራኤልያ አሳ፥ "ዉርተ!" ያጋ’ ያጌዳ።

8 ጾሳይ ሸቂቤናዋንታ ታን ዋታ ሸቆ?

መና ጎዳይ፥ ‘ዉርተ!’ ያግቤናዋንታ፥

ታን ዋታደ፥ ‘ዉርተ!’ ያጎ?

9 ታን ቃ ዛላ ሁጲያን ኤቃደ ኡንቱንታ ጼላይ፤

ዞዝያን ኤቃደ ታን ኡንቱንታ በአይ።

ኡንቱንቱ ባረካ ደእያ አሳ፤

ኡንቱንቱ ባረና ካዉተቱዋፐ እቱዋዳን ፓይድክኖ።

10 ባናዳን ጮራቴዳ ያቆባ ዘረ ኦን

ፓይዳናዉ ዳንዳዪ?

ሀራይ አቶ እስራኤልያ አሳዉ ኦይደን ኩሽያ ኦን

ፓይዳናዉ ዳንዳዪ?

ታ ሀይቁ ጽሎቱዋ ሀይቁዋ ማላ ግዶ፤

ታ ደኡዋ ዉርሰይካ ኡንቱንቱዋዳን ሀኖ!" ያጌዳ።

11 ባላቅ ባላማ፥ "ኔን ታ ቦላ ኦያባይ አዬ? ታን ኔና ታ ሞርከቱዋ ሸቃናዳን አሃድ፤ ሽን ኔን ኡንቱንታ አንጃዳፐ አትና፥ ሀራባ አይነ ኦባካ!" ያጌዳ።

12 ባላም ዛሪደ፥ "ታን መና ጎዳይ ታና ሃሳይስያዋፐ ሀራ ሃሳዮየ?" ያጌዳ።

ባላማ ላኤን ትምቢትያ

13 ሄዋፐ ጉይያን፥ ባላቅ አ፥ "ኡንቱንቱ ኔን በአናዉ ዳንዳይያ ሀራሳ ታናና ደንዳ። ኔን ኡንቱንቱፐ አማሬዳዋ በአናፐ አትና፥ ኡንቱንታ ኡባ በአካ። ኔን ሄዋን ታዉ ኡንቱንታ ሸቃርኪ" ያጌዳ። 14 ፕስጋ ግያ ደርያ ሁጲያን ደእያ ጾፊማ ደምባ አኪደ አፌዳ። ሄዋን ላፑን ያርሽያ ሳኣ ግምቤዳ፤ እት እት ያርሽያ ሳኣን እት ኮሩማ ቦራነ እት ዶርሳ ኦርግያ ያርሼዳ።

15 ባላም ባላቃ፥ "ታን ህንና ጾሳና ጋከትያ ዎደ፥ ኔን ሀዋን ነ ጹግያ ያርሹዋ ማታን ኤቃሻ" ያጌዳ።

16 መና ጎዳይ ባላማና ጋከቲደ ኪቲደ፥ "ኔን ባላቃኮ ስማደ፥ አዉ ሀ ትምቢትያ ኦዳ" ያጌዳ።

17 እ አኮ ስሚደ፥ ባረ ጹግያ ያርሹዋ ማታን ሞኣባ ቢታ ካፓቱና ኤቄዳዋ ደሜዳ። ባላቅ አ፥ "መና ጎዳይ ኦድያባይ አዬ?" ያጌዳ።

18 ባላም ባረ ትምቢትያ ሀዋዳን ያጊደ ኦዴዳ፤

"ጽፖራ ናኣ ባላቃ ደንዳ ስሳ፤

ታን ኦድያዋ ስሳ!

19 ጾሳይ ዎርዶታናዉ አሳ ግደና፤

ባረ ቆፋ ላማናዉ እ አሳ ናኣ ግደና።

እ ኦዲደ፥ ባረ ኦዴዳዋ ኦኔ?

ዎይ እ ባረ ጌዳዋ ፖለኔ?

20 ታን አንጃናዉ አዛዙዋ አካድ።

እ አንጅ ክቼዳ፤

ታን ሄዋ ላማናዉ ዳንዳይከ።

21 ያቆባ ዛርያዉ ኢታባይ ያናባይ፥

እስራኤልያ አሳዉ መቱ ጋካናባይ ታዉ ቤትቤና።

መና ጎዳይ ኡንቱንቱ ጾሳይ ኡንቱንቱና ደኤ፤

እ ኡንቱንቶ ካትያ ግድያዋ አዋዪኖ።

22 ጾሳይ ኡንቱንታ ግብጼፐ ከሴዳ፤

እ ምኖ መንዳን ኡንቱንቶ ደኤ።

23 ያቆባ ቦላ ጋካና ብታይ ባዋ፤

እስራኤልያ አሳ ቆሀና ሙሩኑካ ባዋ።

አሳይ ሀእ፥ ‘ያቆባዉነ እስራኤላዉ ጾሳይ ኦዳዋ በእተ’ ያጋና።

24 ሀ አሳይ ማጫ ጋማትዳን ደንዴዳ።

ባረ ኦይቄዳዋ ማና ጋካናዉነ፥

ባረ ዎዳዋ ሱ ኡሻና ጋካናዉ፥

ሸምፐና ጋሙዋዳን ኡንቱንቱ ኤቂ ደንድኖ" ያጌዳ።

25 ሄዋፐ ጉይያን፥ ባላቅ ባላማ፥ "ኔን ኡንቱንታ ሙለካ ሸቆፓነ ሙለካ አንጆፓ" ያጌዳ።

26 ባላም ዛሪደ፥ "መና ጎዳይ ግያዋ ኡባ ኦና ጋደ ታን ነዉ ኦዳበይክታ?" ያጌዳ።

ባላማ ሄዘን ትምቢትያ

27 ሄዋፐ ጉይያን፥ ባላቅ ባላማ፥ "ሃያ፤ ታን ኔና ሀራሳ አፋና። ኦን ኤሪ፥ ኔና ያ አፍና ጾሳይ ናሸቲደ፥ ኔና ኡንቱንታ ታዉ ሸቅሳነንቶ" ያጌዳ። 28 ባላቅ ባላማ መላ ቢታ ቦላና ዱገ ጼልያ ፓኦራ ደርያ ሁጲያ አፌዳ።

29 ባላም፥ "ኔን ሀዋን ታዉ ላፑን ያርሽያ ሳኣ ግምባ፤ ቃይ ላፑን ኮሩማ ቦራቱዋነ ላፑን ዶርሳ ኦርገቱዋ ታዉ ጊግሳ" ያጌዳ። 30 ባላም ጌዳዋዳን ባላቅ ኦዳ፤ እት እት ያርሽያ ሳኣን እት ኮሩማ ቦራነ እት ዶርሳ ኦርግያ ያርሼዳ።