ፓይዱዋ 9

ላኤን ፓስጋ

1 እስራኤልያ አሳይ ግብጼፐ ከሴዳ ላኤን ላይን ኮይሮ አግናን ሲና መላ ቢታን መና ጎዳይ ሙሴዉ ሀዋዳን ያጊደ ሃሳዬዳ፤✝9:1-5 ከሳ 12:1-13 2 "እስራኤልያ አሳይ ፓስጋ ባላ ኬሬዳ ጋላሳን ቦንቾ። 3 ሀ አግናን ታማነ ኦይደን ጋላሳን፥ አ ኬሬዳ ዎደ፥ አዋይ ዉላና ሀንያ ዎደ፥ አ ዎጋ ኡባዳንነ አ አዛዞ ኡባዳን ቦንቾ" ያጌዳ። 4 ሙሴ እስራኤልያ አሳይ ፓስጋ ባላ ቦንቻና ማላ፥ ኡንቱንቶ ኦዴዳ። 5 ኮይሮ አግናዉ ታማነ ኦይደን ጋላስ፥ አዋይ ዉላና ሀንያ ዎደ ሲና መላ ቢታን ኡንቱንቱ ፓስጋ ባላ ቦንቼድኖ። እስራኤልያ አሳይ መና ጎዳይ ሙሳ አዛዜዳዋዳን ኡባባ ኦዳ።

6 ሽን ኡንቱንቱፐ አማሬዳዋንቱ ሀይቄዳ አሳ አሃ ቦቺደ ቱኔዳ ድራዉ፥ ሄ ጋላስ ፓስጋ ባላ ቦንቻናዉ ዳንዳይበይክኖ። ሄዋ ድራዉ፥ ኡንቱንቱ ሙሴኮነ አሮናኮ ሄ ጋላስ ዪደ፥ 7 ሙሳ፥ "ኑን ሀይቄዳ አሳ አሃ ቦቼዳ ድራዉ ቱኔዶ፤ ሽን ኬሬዳ ዎድያን ሀራ እስራኤልያ አሳና መና ጎዳዉ ያርሹዋ ሺሽያዋ ኑን አያዉ ድገቴቶ?" ያጌድኖ።

8 ሙሴ ኡንቱንታ፥ "መና ጎዳይ ህንተዋ ታዉ አዛዝያዋ ታን ስሳና ጋካናዉ ህንተ ታክሽተ" ያጌዳ።

9 ሄዋፐ ጉይያን መና ጎዳይ ሙሳ፥ 10 "ኔን እስራኤልያ አሳ ሀዋዳን ያጋ፤ ‘ህንተፐ ዎይ ህንተ ዛራቱዋፐ ኦንነ አሃ ቦቺደ ቱኖፐ፥ ዎይ ማንዳሬዳዋ ግዶፐ፥ እ መና ጎዳዉ ፓስጋ ባላ ቦንቾ፤ 11 ላኤን አግናን ታማነ ኦይደን ጋላስ አዋይ ዉላና ሀንያ ዎደ ፓስጋ ባላ ቦንቾ። ፓስጋ ዶርሳ እርሹ ገልቤና ኡክናነ ጫሞ ቦንጭያና ሞ። 12 ሳአይ ዎንታናዉ ሄ ዶርሳፐ አያነ አሾፖ፤ ቃይ አ መቀፐካ እቱዋነ መንፖ። ፓስጋ ባላዉ አ ዎጋ ኡባ ኦ።✝9:12 ከሳ 12:46፤ ዮሃ. 19:36 13 ሽን ማንዳርቤና ጌሻ አሳይ ፓስጋ ቦንቼናን እጾፐ፥ ሄዋፐ ስንዉ እ ታ አሳ ግዶፐ ቦሄቶ። አያዉ ጎፐ፥ መና ጎዳ ያርሹዋ ኬሬዳ ዎድያን እ ሺሽቤና። ሄ አሳይ ባረ ናጋራይ አሄዳ መቱዋ አካናዉ በሰ።

14 " ‘ህንተ ግዱዋን ደእያ በተ አሳይ ፓስጋ ባላ መና ጎዳዉ ቦንቻና ኮዮፐ፥ ፓስጋ ዎጋዳን ቦንቾ። በትያዉካ ጋደ አሳዉካ እት ማላ ዎጋይ ደኦ’ ያጋ" ያጌዳ።

ታማዳን ፖኤዳ ሻርያ

15 ዱንካኒ ቶለቴዳ ጋላስ ሻሪ ማርካተ ዱንካንያ ማዬዳ፤ ኦማርሳፐ ዶሚደ፥ ዎንታና ጋካናዉ ዱንካንያፐ ቦላና ደእያ ሻሪ ታማ ማላቴ። 16 ሄዋዳን ኡባ ዎደ ጋላስ ጋላስ ሻሪ ማዬ፤ ቃማ ቃማ ሄ ሻሪ ታማዳን ፖኤ። 17 ሄ ሻሪ ዱንካንያ ቦላፐ ደንድያ ዎደ አዉደነ እስራኤላቱ ባረንቱ ዱንካኔዳ ሳኣፐ ደንዲኖ፤ ቃይ ሄ ሻሪ ዎያ አይ ሳኣንነ እስራኤላቱ ዱንካኒኖ። 18 እስራኤላቱ መና ጎዳ አዛዙዋን ደንድኖ፤ ሄዋዳንካ፥ መና ጎዳ አዛዙዋን ዱንካኒኖ። ሻሪ ዱንካንያ ቦላን ጋምእያ ዎደ ኡባን ባረንቱ ዱንካኔዳሳን ጋምእኖ። 19 ሻሪ ዱንካንያ ቦላን ዳሮ ጋላሳ ጋምኦፐ፥ እስራኤላቱ መና ጎዳ አዛዙዋ ናጊኖፐ አትና፥ ሀቃነ ቢክኖ። 20 እት እት ገደ ሻሪ ዱንካንያ ቦላን አማሬዳ ጋላሳ ጋምኤ። መና ጎዳ አዛዙዋን ኡንቱንቱ ዱንካኒኖ፤ ቃይ ሄዋዳንካ፥ ጾሳ አዛዙዋን ኡንቱንቱ ደንድኖ። 21 እት እት ገደ ሻሪ ኦማርሳፐ ዎንታና ጋካናዉ ጻላላ ጋምኤ፤ ዎንትና ሻሪ ደንድያ ዎደ ኡንቱንቱካ ደንድኖ። ጋላሳ ግድና፥ ቃማ ግድና፥ ሻሪ ደንድያ ዎደ ኡንቱንቱካ ደንድኖ። 22 ሻሪ ዱንካንያ ቦላን ላኡ ጋላሳ ጋምእና፥ ዎይ እት አግና፥ ዎይ እት ላይ ጋምእና፥ እስራኤላቱ ባረንቱ ዱንካኔዳሳን ጋምኢኖፐ አትና ቢክኖ። ሽን ሻሪ ደንድያ ዎደ ኡንቱንቱካ ደንድኖ። 23 ኡንቱንቱ መና ጎዳ አዛዙዋን ዱንካኒኖነ ቃይ መና ጎዳ አዛዙዋን ደንድኖ፤ መና ጎዳይ ሙሴ ባጋና አዛዜዳዋዳን፥ ኡንቱንቱ መና ጎዳ አዛዙዋ ናጌድኖ።