ፓይዱዋ 26

ላኤን እስራኤልያ አሳ ፓይዱዋባ

1 ቦሻፐ ጉይያን፥ መና ጎዳይ ሙሳነ ቄስያ አሮና ናኣ ኤልኣዛራ፥✝26:1 ፓይ. 1:1-46 2 "የለቶደፐ ላታሙ ላይነ ሄዋፐ ቦላና ደእያ እስራኤላቱዋ፥ ኦላዉ ባናዉ ዳንዳይያዋንታ ኡባቱዋ፥ ኡንቱንቱ ጎልያን ጎልያን ፓይድተ" ያጌዳ።

3 ሙሴነ ቄሲ ኤልኣዛር ዮርዳኖሳ ሻፋፐ ሄፍን ባጋና፥ እያርኮ ማታን፥ ሞኣባ ደምባን ኡንቱንቱና ሃሳዪደ፥ 4 "መና ጎዳይ ሙሳ አዛዜዳዋዳን፥ የለቶደፐ ላታሙ ላይነ ሄዋፐ ቦላና ደእያ አሳ ፓይድተ" ያጌድኖ።

ግብጼፐ ከሴዳ እስራኤላቱ ሀዋንታ፦

5 እስራኤልያ ባይራ ናኣ ሮቤላ ዛራቱ: ሀኖካ ያራቱዋ፥ ፓሉ ያራቱዋ፥ 6 ሄጽሮና ያራቱዋነ ካርማ ያራቱዋ። 7 ሀዋንቱ ሮቤላ ዛራቱዋ፤ ኡንቱንቱ ኡባና 43,730። 8 ፓሉ ናአይ ኤልኣባ፤ 9 ኤልኣባ አቱማ ናናይ ነሙኤላ፥ ዳታናነ አቢራማ፤ ሀ ዳታንነ አቢራም ማባራይ ዶሬዳዋንታ። ኡንቱንቱ ቆራሀነ አ ካልያዋንቱና ዙፐቲደ፥ ሙሴ ቦላ፥ አሮና ቦላነ መና ጎዳ ቦላ ማካሌድኖ። 10 ቢታይ ዶየቲደ፥ ኡንቱንታ ቆራሃና እትፐ ምቴዳ፤ ኡንቱንታ ካልያ ላኡ ጼታነ እሻታሙ አሳ ታማይ ሚና ሀይቄድኖ። ያትና ኡንቱንቱ አሳይ በኢደ ዱጽያ ማላታ ግዴድኖ። 11 ሽን ቆራሀ አቱማ ናናይ ሄ ጋላስ ሀይቂበይክኖ።

12 ስሞና ዛራቱ ባረንቱ ያራን ያራን: ነሙኤላ ያራቱዋ፥ ያሚና ያራቱዋ፥ ያኪና ያራቱዋ፥ 13 ዛራሀ ያራቱዋነ ሻኡላ ያራቱዋ። 14 ሀዋንቱ ስሞና ዛራቱዋ፤ ኡንቱንቱ ኡባና 22,200።

15 ጋዳ ዛራቱ ባረንቱ ያራን ያራን: ጻፎና ያራቱዋ፥ ሀጋ ያራቱዋ፥ ሹና ያራቱዋ፥ 16 ኦዝና ያራቱዋ፥ ኤራ ያራቱዋ፥ 17 አሮዳ ያራቱዋነ አርኤላ ያራቱዋ። 18 ሀዋንቱ ጋዳ ዛራቱዋ፤ ኡንቱንቱ ኡባና 40,500።

19 ይሁዳ አቱማ ናናይ ኤራነ ኦናና፤ ሽን ኡንቱንቱ ካናነ ጋድያን ሀይቄድኖ። 20 ይሁዳ ዛራቱ ባረንቱ ያራን ያራን: ሼላ ያራቱዋ፥ ፓሬሳ ያራቱዋነ ዛራሀ ያራቱዋ። 21 ፓሬሳ ዛራቱ ሄጽሮና ያራቱዋነ ሀሙላ ያራቱዋ። 22 ሀዋንቱ ይሁዳ ዛራቱዋ፤ ኡንቱንቱ ኡባና 76,500።

23 ይሳኮራ ዛራቱ ባረንቱ ያራን ያራን: ቶላአ ያራቱዋ፥ ፑዋ ያራቱዋ፥ 24 ያሹባ ያራቱዋነ ሽምሮና ያራቱዋ። 25 ሀዋንቱ ይሳኮራ ዛራቱዋ፤ ኡንቱንቱ ኡባና 64,300።

26 ዛብሎና ዛራቱ ባረንቱ ያራን ያራን: ሰሬዳ ያራቱዋ፥ ኤሎና ያራቱዋነ ያህላኤላ ያራቱዋ። 27 ሀዋንቱ ዛብሎና ዛራቱዋ፤ ኡንቱንቱ ኡባና 60,500።

28 ምናሰነ ኤፍሬማ አዉዋ ዮሴፎ ዛራቱ ሀዋፐ ካሊደ ጻፈቴድኖ። 29 ምናሰ ዛራቱ ምናሰ ናኣ ማኪራ ያራቱዋ፥ ማኪር ናኣ ጋላኣደ ያራቱዋነ ጋላኣደ ናናቱ ያራቱዋ። 30 ጋላኣደ ዛራቱ እኤዘራ ያራቱዋ፥ ሄሌቃ ያራቱዋ፥ 31 አስርኤላ ያራቱዋ፥ ሸኬማ ያራቱዋ፥ 32 ሻምዳአ ያራቱዋነ ሄፌራ ያራቱዋ። 33 ሄፌራ ናአይ ጻሎፍሃድ ማጫ ናናቱ ጻላላ የሌዳ፤ አዉ አቱማ ናእ ባዋ። ጻሎፍሃዳ ማጫ ናናቱ ሱንይ ማህሎ፥ ኖኦ፥ ሆግሎ፥ ምልኮነ ትርጾ። 34 ሀዋንቱ ምናሰ ዛራቱዋ፤ ኡንቱንቱ ኡባና 52,700።

35 ኤፍሬማ ዛራቱ ባረንቱ ያራን ያራን: ሹተላሀ ያራቱዋ፥ በኬራ ያራቱዋ፥ ታሃና ያራቱዋነ 36 ሹተላሀ ናኣ ኤራና ያራቱዋ። 37 ሀዋንቱ ኤፍሬማ ዛራቱዋ፤ ኡንቱንቱ ኡባና 32,500። ዮሴፎ ዛራቱ ባረንቱ ያራን ያራን ሄዋንታ።

38 ቢንያማ ዛራቱ ባረንቱ ያራን ያራን: በላአ ያራቱዋ፥ አሽቤላ ያራቱዋ፥ አህራማ ያራቱዋ፥ 39 ሻፉፋማ ያራቱዋ፥ ሁፋማ ያራቱዋ፥ 40 በላአ ናኣ አራዳ ያራቱዋነ በላአ ናኣ ናእማና ያራቱዋ። 41 ሀዋንቱ ቢንያማ ዛራቱዋ፤ ኡንቱንቱ ኡባና 45,600።

42 ዳና ዛራቱ ሹሃማ ያራቱዋ። 43 ሹሃማ ያራቱ ኡባና 64,400።

44 አሴራ ዛራቱ ባረንቱ ያራን ያራን: ይምና ያራቱዋ፥ ይሽዋሀ ያራቱዋ፥ ባሪአ ያራቱዋ፥ 45 ባሪአ ናኣ ሄቤራ ያራቱዋነ ባሪአ ናኣ ማልክኤላ ያራቱዋ። 46 አሴራዉ ሰራሆ ግያ ማጫ ናታ ደአዉ። 47 ሀዋንቱ አሴራ ዛራቱዋ፤ ኡንቱንቱ ኡባና 53,400።

48 ንፍታሌማ ዛራቱ ባረንቱ ያራን ያራን: ያእዝኤላ ያራቱዋ፥ ጉና ያራቱዋ፥ 49 የጼራ ያራቱዋነ ሽሌማ ያራቱዋ። 50 ሀዋንቱ ንፍታሌማ ዛራቱዋ፤ ኡንቱንቱ ኡባና 45,400።

51 ፓይደቴዳ እስራኤልያ አቱማ አሳይ ኡባና 601,730።

52 ቃይካ መና ጎዳይ ሙሳ፥✝26:52-56 ፓይ. 34:13፤ ኢያሳ 14:1-2 53 "ሀ ዛረቶ ኡንቱንቱ ሱን ሱን ፓይዱዋዳን ቢታይ ሻከቲደ፥ ላታ ግዲደ ኡንቱንቶ እመቶ። 54 ፓይዱዋን ጮራቶ ኡንቱንቱ ጮራተ ኬና፥ ፓይዱዋን ጉቶ ኡንቱንቱ ጉተ ኬና ሻካደ እማ። ኡባይካ ጻፈቴዳ ባረንቱ ፓይዱዋ ኬና ኬና አክኖ። 55 ሽን ቢታይ ሳማን ሻከቶ፤ እት እት ዛሪ ላትያ ቢታይ ኡንቱንቱ አዉዋ ዛርያ ሱንዳን ግዶ። 56 ላታ ኡባይ ፓይዱዋን ጮራቱዋፐነ ፓይዱዋን ጉቱዋፐ ግዱዋን ኤጻን ሻከቶ" ያጌዳ።

57 ባረ ያራን ያራን ፓይደቴዳ ሌዋቱ ሀዋንታ: ገርሾና ያራቱዋ፥ ቃሃታ ያራቱዋነ ማራራ ያራቱዋ። 58 ሀዋንቱካ ቃይ ሌዋቱዋ ያራቱዋ: ሊብና ያራቱዋ፥ ከብሮና ያራቱዋ፥ ማህላ ያራቱዋ፥ ሙሻ ያራቱዋነ ቆራሀ ያራቱዋ። ቃሃት አምራማ የሌዳ። 59 አምራማ ማቻት ሱንይ ዮከቤዶ፤ አ ግብጼን ሌዊያዉ የለቴዳ ናቶ። እዛ አምራማዉ አሮና፥ ሙሳነ ኡንቱንቱ ምቻቶ ሚርያሞ የላዱ። 60 አሮን ናዳባ፥ አቢሀ፥ ኤልኣዛራነ እታማራ የሌዳ።✝26:60 ፓይ. 3:2 61 ሽን መና ጎዳይ አዛዝቤና ታማ አ ስንን ያርሼዳ ዎደ፥ ናዳብነ አብሁ ሀይቄድኖ።✝26:61 ዎጋ 10:1-2፤ ፓይ. 3:4 62 የለቶደፐ እት አግናነ ሄዋፐ ቦላና ደእያ ፓይደቴዳ አቱማ ሌዋቱ ኡባና ላታማነ ሄዙ ሻአ። እስራኤላቱዋ ግዱዋን ኡንቱንቶ ላትያ ቢታይ እመትቤና ድራዉ፥ ኡንቱንቱ እስራኤላቱዋና ፓይደትበይክኖ።

63 ዮርዳኖሳ ሻፋፐ ሄፍን ባጋና፥ እያርኮ ማታን፥ ሞኣባ ደምባን ሙሴነ ቄሲ ኤልኣዛር እስራኤላቱዋ ፓይዴዳ ዎደ፥ ፓይደቴዳ አሳይ ሀዋ። 64 ሙሴነ ቄሲ አሮን ካሰ ሲና መላ ቢታን እስራኤላቱዋ ፓይዴዳ ዎደ፥ ፓይደቴዳ አሳፐ ሀራይ አቶ መጽ እት አሳይነ አትቤና። 65 አያዉ ጎፐ፥ መና ጎዳይ ሄ እስራኤላቱዋ ኦዲደ፥ "ኡንቱንቱ መላ ቢታን ቱሙ ሀይቃና" ያግ ዎዳ። ይፉነ ናኣ ካሌባፐነ ኔዌ ናኣ ኢያሱፐ አትና፥ ሀራይ እት አሳይነ አትቤና።✝26:65 ፓይ. 14:26-35