Arca da aliança

Kasegema ante vogisima tro hu’zamofo naneke

10 Hagi huge’za akasia zafareti mago vogisi tro hiho. Ana vogisimofona zaza’amo’a 110 sentimita hinkeno, atupa’amo’a 66 sentimita hinkeno, mareri’amo’a 66 sentimita hino. 11 Ana vogisimofo agu’afine fegi’anena golinutike’za eri anonevazita agema’aramintera golinutike eri avozaze hutma eri pehe hiho. 12 Hanki 4'a rinire golire tro huta fenkami kaziga agente agentera tare tare hutma ome rekamarente eme arekamarente hiho. 13 Ana nehuta Akasia zafa antrenteta tare zota trohuta golinuti eri ano vazinteho. 14 E’i ana tare zafa ana vogisima erisga huno vu’zana anama 4'a rekamarente’naza rinifinka antaninteho. 15 Hagi ana zotarerena, huhagerafi vogisimofo rinifinkatira avazuhu otreta atrenkeno anante meno. 16 Ana vogisima trohu vagaresnunka, tare havere’ma kasegema kregamisuana, ana vogisimofo agu’afi anto. 17 Hanki ana vogisimofona, asunku zamofo trare hutma avaza’a goliretike tro hinkeno, zaza’amo’a 110ni’a sentemita hinkeno, atupa kaziga’amo’a 66si’a sentemita hino. 18 Hanki hamanu golia ruguta huta tare serabimie nehaza ankerontre tro huteta, vogisimofo avaza’are asunku tra’mofo agofetu rugaraga agentera anteho. 19 Serabimie nehaza ankerontre’ma tro’ma hanazana, anama asunku zamofo tra’ma tro’ma hanaza golinutike, rugaraga agentera ana ankerontrena trohunteho. 20 Ana Serabim ankeroremokea zanavugosa ohumi ahumi nehuke, kepri huke asunku tra’mofo negenakeno zanageko’namo’a, rufanara huno ana vogisia refiteno. 21 Hagi tare havere’ma huhagerafi huvempahu kasegema kre tamami’noa erita ana vogisimofo agu’afinka nenteta, asunku tra’mofo avaza’a erita refiteho.

22 Nagra e’i ana asunku tra’mofo agofetu’ma Serabim ankerontremofo amu’nompi emani’ne’na maka kasegeni’a negasmi’nena, Israeli veara zamasmigahane.

Kasegema ante vogisima tro hu’zamofo naneke

1 Hagi Bezaleli’a akasia zafareti kasegema ante bokisia tro hu’ne. Ana bokisimofo zaza’amo’a 110ni’a sentimita higeno, atupa kaziga’amo’a 66si’a sentimita higeno, anagamuma mareri’amo’a 66si’a sentimita hu’ne.

Anumzamofo seli mono noma azeri oti’saza naneke

1 Ra Anumzamo’a amanage huno Mosesena asmi’ne, 2 Nagranema atruma hanaza seli mono nona, kasefa kafumofo ese ikamofona ese zage knare azeri otiho. 3 Huhagerafi huvempa kasege vogisia anampinka nentetma, tavravenuti hunargintenkeno agu’afi meno.

20 Hagi anante Mosese’a 10ni’a kasegema me’nea havererena erino Anumzane huhagerafi vogisimofo agu’afi anteteno, ana vogisima erisga huno vu azota zafararena ana vogisire me’nea riniramimpi vazinteteno, ana vogisimofo avaza’a asunku zamofo trarema nehaza avaza’a erino ana vogisia runkanire’ne. 21 Ana huteno Ra Anumzamo’ma huo huno’ma hunte’nea kante anteno Mosese’a vogisia erino ana seli mono nompinka ome nenteno, hunaragi tavrave hantintegeno ana vogisia azeri agu’a ate’ne.

89 Anante Mosese’ma seli mono nompima ufreno Ra Anumzamo’enema nanekema hunaku’ma nehigeno’a, Ra Anumzamofo huhagerafi huvempage vogisimofo asunku trarema huza nehazare tare ankeromofo zanamema’a tro hunte’naza amu’nozanifinti Ra Anumzamo’a kea Mosesena humi’ne.

33 Hagi anantetira Israeli vahe’mo’za erigafa hu’za Ra Anumzamofo agona Sainai atre’za tagufa zage gnamofo agu’afi kana vu’naze. Ra Anumzamofo huhagerafi huvempage vogisia kofi’za tagufa zagegnafi vugote’za nevzageno, kuma’ma ome ante’za manisare zameri hutere huno vu’ne. 34 Seli nonkumazmima atre’za nevzageno’a, Ra Anumzamofo hampomo’a zagegnafina turuna huzmante’ne. 35 Hagi huhagerafi huvempage vogisima kofi’za vunaku nehzageno’a, Mosese’a anage hu’ne, Ra Anumzamoka otinka ha' vahetia zamahe panini huge’za nefresage’za, kagrima ha’ma renegantaza vahe’mo’za koro freho. 36 Hagi huhagerafi huvempage vogisima inaregoma umanigeno’a, Mosese’a anage hutere hu’ne. Ohampriga’a Israeli vahe’motarera ete eno.

Aroni azompare amosre ahente’nea naneke

1 Hagi Ra Anumzamo’a Mosesena anage huno asami’ne, 2 Israeli vahera zamasamige’za mago’mago naga nofimofonte kva vahe’mokizmi azompa zamente zamente 12fu’a eri’za eme kaminagenka, zamagi’a krentetere ana azomparera nehunka, 3 Livae naga’mokizmi azomparera Aroni agi krento. Na’ankure mago’mago naga’nofitema ugota hu’naza vahe’mokizmi azomparera zamagia krentegahane. 4 Hagi mika ana azomparamina erinka atrumahu seli mono nompima huhagerafi huvempage vogisimofo avuga keagama nehute eme anto. 5 Hagi Nagrama huhamprintesugeno pristi eri’zama erisia ne’mofo azomparera agata hagegahie. Hagi ana zama fore’ma haniretira mago’ene Israeli vahe’mo’zama ke hakare’ma hugantesazana kezmia ontahigahue. 6 Anage higeno Mosese’a miko Israeli vahera 2fu’a naga nofi’mokizmia zamasimige’za mago’mago naga nofimo’za vugotama huzmante’nemofo azompa eme nemiza, Aroni azompanena anampi eri’za eme ami’naze. 7 Mosese’a mika ana azomparamina erino atruhu seli mono nompi Ra Anumzamofo avugama ome ante’ne. 8 Hagi anante knazupa Mosese’a atruma hu seli mono nompima vuno ome keana, Livae nagapinti ne' Aroni azumparera agata hageno amosare’a ahenteno, almoni zafa raga rente’no uzate’ne. 9 Mosese’a Ra Anumzamofo avugatira ana azomparamina erino atiramino Israeli vahete vige’za, anampinti ke’za zamagra’a azompare eritere hu’naze. 10 Hianagi Ra Anumzamo’a Mosesena anage huno asmi’ne, Aroni azompa ete erinka huhagerafi huvempage vogisimofo avuga ome ante’negeno, ana azompamo’a avame’za me’nena Nagri’ma ke hakarema hunenantaza zana vagarenke’za, ofri maniho. 11 Higeno Mosese’a Ra Anumzamo’ma huoma huno asmi’nea zana amage anteno hu’ne.

14 Anante pristi vahe’mo’za huhagerafi huvempage vogisia eri’za vugota nehazage’za, Israeli vahe’mo’za ana pristi vahe’mokizmi zmavariri’za Jodani tina takahenaku seli nozamia tagana vazi’za e’neri’za maka’za zamia retro hu’naze. 15 Hagi maka kafufina ne’zama hamare knarera Jodani timo’a tusi ti hagetere nehiane. Hagi e’i ana knarekino timo’a amutu’amutu nehifi pristi vahe’mo’za huhagerafi huvempage vogisia eri’za Jodani timofo ankenare ehanati’za zamagia timpi eme razageno, 16 kamaniti’ma e’nea timo’a taneno ogamanu afete Zaretani tavaonte me’nea rankuma Adamua, magopi ome ante hihi huno agonagna huno marerigeno, kami kazigama fri’nea hagerintegama evia timo’a tane vagarege’za hagage mopare vu’za kantu kaziga Jeriko tava’onte uhanati’naze. 17 Hagi Ra Anumzamofo huhagerafi huvempage vogisima zamafunte’ma kofi’naza pristi vahe’mo’za, timofo amu’nompima hagegema hu’nere oti hanaveti’nage’za, ana maka Israeli vahe’mo’za Jodani timo’ma hagagema hu’nea moparera evu vagare’za kantu kaziga vu’naze.

18 Anagema hige’za Ra Anumzamofo huhagerafi huvempage vogisima eri’za oti’naza pristi vahe’mo’za, Jodani timofo amu’nompintira atre’za ankenarega e’za, timpinti’ma zamagiama erisga hu’za mopare’ma razageno’a, Jodani timo’a ete hageno ko’ma hu’neaza huno evu’ne.

Jeriko rankumamo’ma fragu vazirami’nea zamofo naneke

1 Hagi Jeriko kumapi vahe’mo’za Israeli vahe’mokizmigu koro nehu’za kumapima ufre kafantamina erigi vagarazageno, mago’mo’e huno fegira atiramige, marerigera osu’ne. 2 Hagi Ra Anumzamo’a amanage huno Josuana asami’ne, Antahio! Jeriko kuma’ene, kini vahe’ane, hanave sondia vahe’anena ko kagri kazampi ante’noe. 3 Hanki kagrane maka sondia vahe’zaganena, Jeriko kumamofona mago mago zagefina magoke zupa kagitere nehinkeno, vuno 6si zage knare uhanatino. 4 Hagi 7ni’a pristi vahe huzamantege’za 7ni’a ufema ve sipisipimofo pazivete’ma tro’ma hu’naza ufena e’neri’za huhagerafi huvempage vogisimofo avuga viho. Hanki 7ni zage knarera kagrane sondia vahe’enena Jeriko kumamofona 7ni’a zupa kaneginke’za pristi vahe’mo’za ufena reho. 5 Hagi pristi vahe’mo’zama erivazu hu’zama zazate’ma ufema resagenkama nentahinka, ana maka vahera zamasamige’za ivimo agazamo nehu’za rankegege hiho. Anama hanageno’a, Jeriko rankumamofo have keginamo’a fragu vaziramina, ana makamotma kefatgo hutma ana kumapina ufreho. 6 Hagi Nuni nemofo Josua’a pristi vahera kehige’za azageno anage huno zamasami’ne, Ra Anumzamofo huhagerafi huvempage vogisia erisga hutma nevinke’za, 7ni’a pristi vahe’mo’za 7ni’a ufema ve sipisipimofo pazivenuti’ma tro’ma hu’nazana eri’za, huhagerafi huvempage vogisimofo avuga vugoteho. 7 Anante Josua’a Israeli vahera zamasamino, Vuta Jeriko rankumara ome kagigahaze. Hianagi zamatrenke’za sondia vahe’mo’za Ra Anumzamofo huhagerafi huvempage vogisimofo avuga vugoteho.

20 Hanki pristi vahe’mo’za ufema ete nerage’za vahe’mo’zama nentahi’za, ana ufenkrafamofo avariri’za ivimo agazamo huza rankege nehazageno, rankumamofo have keginamo’a fragu vaziramige’za, maka vahe’mo’za zamavune ante’za miko kazigati ufre’za Jeriko rankumara ome eri’naze.

2 Hagi Filistia vahe’mo’za rama’a sondia vahe zamazeri retrotra hute’za, avazuhumpi hu’za nevu’za, Israeli vahera tusi’a ha' ome huzamante’za 4 tauseni’a sondia vahe ana zupa zamahe fri’naze. 3 Hagi Israeli sondia vahe’mo’zama ha’tetima azage’za kva vahe’mo’za hu’za, na’a higeno Ra Anumzamo’a tatregeno Filistia vahe’mo’za hara hutagateraze? Hagi tagra Ra Anumzamofo huhagerafi huvempage vogisia Sailo kumatetira omerineta hatera nevanunkeno, ha' vahetimo’za tahe’zankura ana zamo tagu’vazigahie.

4 Anagema hute’za sondia vahe huzmantage’za Sailo kumatetira Ra Anumzamofo huhagerafi huvempage vogisima tarega kazigama Serobimi ankerontrema mani’nakeno Anumzamo’ma amu’nompima nemania vogisia ome eri’naze. Hagi Elina tare mofavrearare Hofani’ene Finiasikea ana hugagerafi huvempage bogisine e’na’e.

5 Hagi seli nonkuma’ma ome ante’za mani’nafima ana huhagerafi huvempage vogisima eri’za ehanatizage’za, Israeli vahe’mo’za kezanke hu’za rankema hu’naza agasasamo’a mopa azeri tore hu’ne. 6 Hagi ana agasankema Filistia vahe’mo’zama nentahi’za, Hibru vahe seli nonkumapina naza fore nehie, hu’za hu’nazanagi henkama antahi’zana Ra Anumzamofo huhagerafi huvempage vogisi Hibru vahe’mo’za eri’za e’nazanke antahi’naze. 7 Hagi Filistia vahe’mo’za tusi koro nehu’za amanage hu’naze, Israeli vahe’mokizmi mago anumzazamimo seli nonkuma zamifina e’ne, hu’za nehu’za e’inahukna zana kora nonkonaza forehie. 8 Tagra tusi’a hazenkefi manigahu’ne, iza taza huno hankavenentake anumzazmimofo azampintira tavretregahie? E’i ruzahu ruzahu knazanteti ka’ma kopima Isipi vahe’ma zamazeri haviza hu’nea anumzane. 9 Hagi Filistia vahe’mota ru Hibru vahe’mo’zama tagri kazokzo eri’zama eri’nazankna huta, tagra zamagri kazokzo eri’za erisunki, vene’ne mani’nonanki oti hanaveti’neta hara huzmantesune. 10 Hagi ana zupa Filistia vahe’mo’za hanavetiza hara hu’za Israeli vahera zamarotago hu’za rama’a vahe 30 tauseni’a zamahe fri’zageno manizama’amo’za atre’za fre’za seli nonkuma zamirega vu’naze. 11 Hagi ana zupage huhagerafi huvempage vogisia Filistia vahe’mo’za zamahe’za nehanre’za, Elina tare ne' mofavre’ararena Hopnine Finiasinena zanahe fri’naze.

6 Hagi Asdotima mani’naza vahe’ene, tva’ozamire’ma me’nea kumatamimpi vahe’enena Ra Anumzamo’a azana rusuteno usgenkna namunteti zamazeri haviza hu’ne. 7 Hagi anazama fore’ma hiazama Asdoti vene’nemo’za nege’za amanage hu’naze, Israeli vahe Anumzamofo huhagerafi huvempage vogisia tagranena omanenianki, erita ome atresune. Na’ankure Agra azana rusuteno hara huneranteno, Dagoni havi anumzantinena hara hunente. 8 Hagi Filistia mopafima mika 5fu’a kuma’ma kvama hu’naza vahezaga ke hutru hu’za amanage hu’naze, ama Israeli vahe Anumzamofo huhagerafi huvempage vogisia na’a hugahune? Hazageno ana ranra kva vahetamimo’za kenona hu’za, Israeli vahe Anumzamofo huhagerafi huvempage vogisia Gati kumate erita viho, hazage’za Israeli vahe Anumzamofo huhagerafi huvempage vogisia eri’za Gati kumate vu’naze. 9 Hianagi ana huhagerafi huvempage vogisima eri’za Gati kumate’ma vazageno’a, ana kumapi vahera ositeti’ma vuno ra vahete’ma vu’neana Ra Anumzamo’a azana rusuteno usagenkna ranra namunteti zamazeri haviza nehige’za tusi zamagogogu hu’naze. 10 Ana hige’za ana huhagerafi huvempage vogisia huzmantazage’za eri’za rankumate Ekroni vu’naze. Hianagi Ekroni vahe’mo’za rankege hu’za amanage hu’naze, Israeli vahe Ra Anumzamo’a vahetia zamahe friku higeta ama huhagerafi huvempage vogisia erita neaze. 11 Hagi miko Filistia ranra kva vahetamina ete ke hutru hu’za amanage hu’za zamasami’naze, amafintira Israeli vahe Anumzamofo huhagerafi huvempage vogisia huzmantenke’za eri’za kuma’arega ometreho. Ana’ma osanazana tagri vahe’mo’za rama’a frigahaze. Na’ankure Ra Anumzamo’a azana rusuteno hara hunezmantege’za, ana kumapi vahe’mo’za fri’zankura tusi koro hu’naze.

Filistia vahe’mo’za huhagerafi huvempage vogisima ete atrazageno Israeli vahetega vu’nea naneke

1 Hagi 7ni’a ikampi Filistia vahe’mokizmi mopafina Ra Anumzamofo huhagerafi huvempage vogisimo’a me’ne. 2 Filistia vahe’mo’za pristi vahe’ene avune vahe’zamia kehazage’za age’za amanage hu’za zamantahige’naze. Inankna huta Ra Anumzamofo huhagerafi huvempage vogisia atre’nunkeno kuma arega vugahie? 3 Hazageza ana pristi vahe’ene avune vahe’mo’za zamasami’za, Israeli vahe’mokizmi Anumzamofo huhagerafi huvempage vogisia amnea atresage’za eri’za ovugahazanki, kumi ofama huzantamine eri’neta erita viho. Hagi anama hanageno ana knazamo’ma vagaresigeta, ama knazana Anumzamo neramie huta antahigahaze.

10 Hagi ana vahe’mo’zama ana kema nentahi’za tare a' bulimakaontrena zanavre’za karisire renente’za, anentazani’a zamavare’za bulimakao kegina agu’afi ome atre’naze. 11 Hagi Ra Anumzamofo huhagerafi huvempage vogisine anama golireti’ma tro hu’naza kafane usagenkna namunema ante’naza vogisia karisifi erinte’naze. 12 Hagi ana bulimakaomokea kana atre’ne vugantigama osu Bet-Semesima me’nea kazigama vu’nea kante vufatgo hu’ne nevu’ne krafa hume vu’na’e. Hagi anama huke nevakeno’a Filistia kva vahe’mo’za zanavariri’za Bet-Semesi mopa atupare ome zanatre’naze.

13 Hagi ana knazupa Bet-Semesi vahe’mo’za hoza agupofi witi hoza nehamare’za kesga hu’za huhagerafi huvempage vogisima nege’za, tusi’a muse hu’naze. 14 Hagi ana bulimakaomokea Josua hozafi Bet-Semesi ehanatike ra have me’nea asoparega emani’na’e. Hagi ana karisia taganavazi’za Ra Anumzante kresramana vunte teve eri’za, ana tare bulimakaontrena znahe’za Ra Anumzamofonte kresramana vu’naze. 15 Hagi pristi vahe’mo’za Ra Anumzamofo huhagerafi huvempage vogisine, golireti’ma tro’ma hu’naza kfane usagenkna namunema ante’naza vogisia eri’za ra have agofetu ante’naze. Ana hute’za ana zupa Bet-Semesi vahe’mo’za Ra Anumzamofontega kre fanane hu ofa nehu’za mago’a ofanena kresramna vu’naze.

1 E’ina hige’za Kiriat Jearimi vene’nemo’za ana huhagerafi huvempage vogisia eme eri’za kuma’zamirega vu’za, Aminadapu noma agonare me’nere ome ante’naze. Ana nehu’za ana ne’mofo nemofo Elisana pristi azeri otizageno pristia manino kegava hu’ne. 2 Hagi 20'a kafunaza za’zate huhagerafi huvempage vogisimo’a Kiriat Jearimia me’negeno, Israeli vahe’mo’za Ra Anumzamo’a tatre’ne hu’za krafagea hu’naze.

Huhagerafi huvempa vogisi Obed-edomu nonteti emeri’za Jerusale vu’naza nanake

12 Hagi kini ne' Devitina anage hu’za eme asami’naze, Obed-edomune maka naga’ane maka zazminena Ra Anumzamo’a asomu huzamante’ne. Na’ankure Ra Anumzamofo huhagerafi huvempage vogisia agri’ene me’negu anara hu’ne. Higeno Deviti’a vuno Obed-edomu nompintira Anumzamofo huhagerafi huvempage vogisia ome erige’za tusi’a musenkase nehazageno, Jerusalemi rankumapina erino ufre’ne. 13 Hagi ana huhagerafi huvempage vogisima eri’naza vahe’mo’zama 6si’a zupama zamagama renakere’za vazageno’a Deviti’a mago ve bulimakaonki mago anenta bulimakaonki huno aheno kresramana vu’ne. 14 Hagi Deviti’a pristi vahe efeke za’za kukena hu’neno Ra Anumzamofo avuga avoreno musenkase hu’ne. 15 Hagi Deviti’ene mika Israeli vahe’mo’za tusi musenkase hu’za kezanke nehu’za ufena nere’za, Ra Anumzamofo huhagerafi huvempage vogisia eri’za mareri’naze.

Seli nompinti huhagerafi huvempage vogisi erino ra mono nompi e’nea naneke

1 Hagi Solomoni’a maka Israeli ranra vahe’tamine, mago mago naga’nofimofo kva vahe’tamine, nagazamire’ma ugagotama hu’naza vahetamina mika kehige’za agri avuga Jerusalemi kumate etru hu’naze. Hagi ke’ma hige’zama eme atru’ma hu’nazana, huhagerafi huvempage vogisi Deviti rankuma Saioni agonare’ma me’nereti omeri’za ra mono nompi eme antehogu kehu tru hu’ne. 2 Hagi maka Israeli vene’nemo’za kini ne' Solomoni avuga ka’ma kokampima fugagi’noma ki’za mani’zama e’naza zanku’ma antahimi’za ne’zama kre’za nene’za musemahu knare Etanimie nehaza 7ni ikante, eme atru hu’naze. 3 Hagi ana maka Israeli ranra vahe’ma emeri atruma hutazageno’a, pristi vahe’mo’za huhagerafi huvempage vogisia erisga hu’naze. 4 Hagi ana pristi vahe’mo’zane, Livae vahe’mo’za huhagerafi huvempage vogisine, atruhu seli none, ana seli nompima ruotge’ma hu’nea zantaminena maka eri’za mareri’naze. 5 Hagi Solomoni’ene maka Israeli vahetmima emeri atruma hu’naza vahe’mo’zanena sipisipi afutamine, bulimakao afutamina ohampriga’a ahe’za huhagerafi huvempage vogisimofo avuga kresramna vu’naze. 6 Ana nehazageno pristi vahe’mo’za huhagerafi huvempage vogisia eri’za, ra mono nomofo hunaragintazageno ruotge’ma huno ruotagetfama hu’nefinka serabimi ankerontrema tro huntazageno zanageko’namoke’ma kantu kamati rufanara huntenapi henka kaziga ome ante’naze. 7 Ana’ma hazageno’a, ana ankerontremofo zanageko’namo’a kantu kamati rufanara huke ana huhagerafi huvempage vogisine, zafama hu’za eri’zama vu’naza zafararena refitente’na’e. 8 Hagi ana zafararemokea za’za huke agaterena’ankino ruotge’ma hu’nea mono nompintira amne ana zafararemofo atumpa kegahazanagi, mono nomofo megitira onke’naze. Hagi ana zotararena meninena anante me’na’e. (Ko’ma avontafema kre’nea knagu menine hu’ne). 9 Hagi ana huhagerafi huvempage vogisimofo agu’afina mago zana omane’neanki, Isipiti’ma atirami’za neazageno’ma, Ra Anumzamo’ma Israeli vahe’enema huhagerafi huvempage nehuno, Sainai (Horepi) agonare’ma Mosesema have tafetrente’ma kreteno ami’nea kasege me’ne. 10 Hagi ana huhagerafi huvempage vogisima eri’za ufraza pristi vahe’mo’zama hunaragintageno ruotge’ma hu’nea mono nompinti’ma ete atiramizageno’a, hampomo Ra Anumzamofo mono nompina avite’ne. 11 Hagi pristi vahetmimo’za mono nompina eri’zazmia e’ori’naze. Na’ankure hampomo’ene Ra Anumzamofo hihamu masa’amo’enena Ra Anumzamofo mono nompina avite’ne.

14 Hagi ke nontahita mani fatgo nosaza mofavre nagamota, Nagrite ete eho huno Ra Anumzamo’a hu’ne. Na’ankure nagra tamagri kva mani’noe. Mago kumapintira mago vahe nevre’na mago nagapintira tare vahe zamavaretere hu’na Saioni agonare vugahue. 15 Ana hute’na Nagri nagu’amo’ma hu’nenia zama hu’nesaza vahe kva huhampari zamantegahue. Ana hanuge’za manine’za Nagri antahi zanteti’ene ama' antahizanteti kegava huramante’za tamavre’za vugahaze. 16 Hagi ana knafima rama’a vahe’ma ome forehu hakarema huta ana mopafima mani avi’matesanuta, Nagri huhagerafi huvempage vogisima ko’ma knare knafima tamagranema me’nea zankura tamagesa antahi atresageno ovugahie. Ana vogisigura tamagesa ontahi tamagane kaninemita onkegahaze. Ana nehutma ru’enena huhagerafi huvempage vogisia kasefara trora osugahaze huno Ra Anumzamo’a hu’ne.

Jiu vahe’mokizmi ra mono nomofo naneke

1 Hagi korapa hagerafi huvempa kemofona mono hu trake’a megeno mono hunte seli mono nona ama mopafina me’ne. 2 Seli mono nompina tarefi hunaragintene. Ese’ma hunaragintepinka tavima rekru hunte azota megeno, nezante sipa megeno ana agofetura breti me’ne. E’i anama hunaragi ante’neama’agura ruotge hu’ne hu’za nehaze. 3 Hagi anantera tavrave tafizageno amefiga’agura ruotage huno ruotge hu’ne hu’za hu’naze. 4 Anampinka mananentake’za kre manavu ita korire tro huntenaza megeno, erihagerefi huvempe ke hu’za nehazaza vogisi zafareti trohu’naza me’ne. Ana vogisimofona agu’afina korire trohunaza kavofi mana neza megeno, Aroni azompare agatama hagenea megeno, hagerafi huvempama hu’nea kasegea haverera me’ne. 5 Ana vogisimofo agofetura kumimofo nona huno apasezane, korireti tare masanentake ankero tro huntegeno, zanagekonanu rutareke ana vogisia refitakeno me’ne. Hianagi menina ana miko’zamofo agafa’a eri ama osugahue.

19 Hagi monafima me’nea Anumzamofo ra mono nomofo kafamo’a anagi hagro higeno, Agrama huvempa ke huno huhagerafi’nea vogisimo’a, Agri mono nompintira efore higeno, kopasinamo’a trege huno vuno eno higeno, ranke huno monage nehigeno, imi e’nerigeno, tusi ko’mopa ko ru’ne.