10 "Ŵaisilaeli apanganye lisanduku kwa ibao ya nsonobali, lyalili ni uleu wa sentimita mia moja na kumi, ni nchijipi sentimita sitini na sita ni lisusa lyakwe sentimita sitini na sita. 11 Nliunichile lisanduku lyo kwa sahabu jakusalala paasa ni munkati ni kusyunguchisya nchenjeka wa sahabu mbande syose. 12 Nipele nkolosye pete ncheche sya sahabu ni kusitaŵilila mu ngongolo ncheche sya lisanduku lyo, pete siŵili upande umo ni pete siŵili upande wine. 13 Chinkolosye itela iŵili yakunyakulila kwa chitela cha nsonobali ni kuunichila kwa sahabu. 14 Itela yo ŵaijinjisye mu pete syasili mbande syose kuti anyakulile lisanduku lyo. 15 Fito syo sitameje mmomo mu pete sya lisanduku nkasiswekula. 16 Nipele mmiche mu lisanduku lya Lilangano ibao iŵili ya maganga yailembekwe malajisyo ichinampe."

17 "Nipele nkolosye chiunichilo cha Lisanduku lyo kwa sahabu jakusalala chati pane pakuŵilanjikwa peuto pa chanasa, uleu wakwe waliji sentimita mia moja na kumi ni nchijipi mwakwe sentimita sitini na sita. 18 Nsyane kwa sahabu yepanganyikwe iŵili yaili ni mapapiko yaikuŵilanjikwa makelubi ni kuiŵika mbesi siŵili sya chiunichilo cho. 19 Chepanganyikwe chimo mmiche kumbesi upande umo ni chine mmiche upande wine kumbesi, mpanganye ili ilumbikene ni chiunichilo cha lisanduku. 20 Yepanganyikwe yo itame kwakulolegana ni mapapiko gao gatambasukwile pachanya chiunichilo cha lisanduku ni kuchiunichila ni jwalijose ŵaliji nkuchilola chiunichilo cho. 21 Mmiche chiunichilo pachanya lisanduku ni mu lisanduku lyo mmiche ibao ya maganga yailembekwe ichinampe.

22 Chinjisimana ni mmwe pelepo, ni kukunguluka nomwe kutyochela pelepo pa chiunichilo pasikati ja yepanganyikwe iŵili yaili pa lisanduku lya lilangano, kuchinjimpa malajisyo gangu gose kwaligongo lya Ŵaisilaeli."

1 Nipele che Besaleli ŵakolosisye alila lisanduku kwa ibao ya nsonobali, lyalili ni uleu wa sentimita mia moja na kumi ni nchijipi sentimita sitini na sita, ni lisusa lyakwe sentimita sitini na sita.

1 AMBUJE ŵaasalile che Musa, 2 "Pa lyuŵa lyaandanda lya mwesi waandanda, nlijimiche Lisakasa Lyakusimanilana ni Akunnungu. 3 Nkati mwakwe nkaŵiche Lisanduku lya Lilangano, paujo pakwe nkaliunichile ni nguo jalusasa.

20 Nipele ŵajigele ibao iŵili ya maganga gagalembekwe makanyo ni kuiŵika mu Lisanduku lya Lilangano. Ŵajinjisye itela yakunyakulila mu pete ni ŵachiŵisile chiunichilo pachanya pakwe. 21 Nipele ŵalijinjisye alila Lisanduku lya Lilangano mu Lisakasa Lyakusimanilana ni Akunnungu ni kujikoleka nguo jalusasa kulichinga Lisanduku lyo, mpela AMBUJE iŵatite pakunnajisya.

89 Katema che Musa paŵajinjile mu Lisakasa lya Kusimanilana kwaligongo lya Akunnungu ku kukunguluka ni Ambuje Akunnungu, ŵapikene liloŵe cha pachanya pa chiunichilo cha Lisanduku lya lilangano, chichaliji pachanya pa lisanduku lya lilangano, lyalikuŵanjikwa chitengu cha chanasa, kutyochela pasikati pa aila yegumbikwe iŵili yaili ni mapapiko.

33 Nipele ŵatandite kutyoka ku Sinai chitumbi cha Ambuje Akunnungu, ni kwa moŵa gatatu ŵajesile akuno Lisanduku lya Lilangano lya Ambuje Akunnungu lichilongolelaga mmbujo mwao kwa moŵa gatatu go kwasosela liuto lya kuŵika chigono. 34 Kila lyuŵa paŵajesile, liunde lya Ambuje Akunnungu lyaliji pachanya pao muusi.

35 Katema kose lisanduku palyatokaga, che Musa ŵatite, "Njimuche Ambuje Akunnungu, mwapwilinganye achamagongo ŵenu, ni aŵala ŵakunchima autuche paujo penu." 36 Katema kose Lisanduku lya Lilangano palyajimi che Musa ŵatite, "Alakwe Ambuje Akunnungu mwaujile Ŵaisilaeli ŵaali ŵajinji nnope."

1 Nipele Ambuje Akunnungu ŵansalile che Musa, 2 "Mwasalile Ŵaisilaeli aiche nasyo mbokola kumi na mbili, lubokola lumo kwa kila chilongola jwa lukosyo. Nnembe lina lya kila mundu pa lubokola lwakwe. 3 Pa lubokola lwa lukosyo lwa Lawi nnembe lina lya che Haluni, kwayele tiluŵe lubokola lumo kwa kila chilongola jwa lukosyo. 4 Njigale mbokola syo ni kusijausya pa Lisakasa lya Kusimanilana kwaligongo lya Akunnungu paujo pa Lisanduku lya Lilangano, pelepo ni pachinjisimanaga ni mmwe. 5 Lubokola lwa mundu jutinansagule chilusipuche. Kwalitala lyo kudandaula kwa Ŵaisilaeli nkati ŵanyamwe tikumale."

6 Che Musa ŵakungulwiche ni Ŵaisilaeli. Ilongola wao wose ŵapele kila mundu lubokola lwakwe malinga ni lukosyo lwakwe, kwayele syaliji mbokola kumi na mbili. Lubokola lwa che Haluni lwaŵichikwe pamo ni mbokola syo. 7 Che Musa ŵasiŵisile mbokola syose syo paujo pa Ambuje Akunnungu pa Lisakasa lya Kusimanilana.

8 Malaŵi jakwe kundaŵi, che Musa ŵajinjile mu Lisakasa lya Kusimanilana. Mwelemo ŵalusimene lubokola lwa che Haluni jwa lukosyo lwa Lawi lusipwiche ni kutyosya isipusi yaikutyosya maluwa ni kusogola isogosi yejiu ya mlosi. 9 Nipele che Musa, ŵasityosisye mbokola syose ni kwalosya Ŵaisilaeli wose, ŵaiweni iyatyochele ni kila chilongola ŵalujigele lubokola lwakwe. 10 Ambuje Akunnungu ŵansalile che Musa, "Nluusye lubokola lwa che Haluni paujo pa Lisanduku lya Lilangano, nlugose kweleko nti chilosyo kwa ŵandu ŵakuungana une. Chindu chi chichilekasye kudandaula kwao nkati une kuti akawa." 11 Che Musa ŵatesile mpela iŵatite kulajiswa ni Ambuje Akunnungu.

14 Kwayele ŵandu ŵatyosile pachigono pala kuti ajomboche lusulo lwa Yolodani, ŵambopesi ŵalongolele akuno ali ajigele Lisanduku lya Lilangano. 15 Kele katema ko kaliji katema ka magungulo ni lusulo lwa Yolodani lwaliji lusewiche pakuŵa lukuseukaga katema ko. Ŵambopesi ŵaŵajigele Lisanduku lya Lilangano paŵakuiche ku lusulo ni makongolo gawo pagaliŵete pe mmeesi, 16 meesi gagajilimaga kutyochela kulutando galesile kwilima ni kwima nti likumba ni gajenele mpaka ku musi wa ku Adamu, musi wauli chiŵandi ni musi wa ku Saletani. Ni meesi gagajilimilaga ku Alaba, yaani bahali ja Njete nombego gajumwile ni ŵandu ŵajombweche kwaula ku Yeliko. 17 Katema Ŵaisilaeli paŵajombogaka, ŵambopesi ŵaŵajigele Lisanduku lya Lilangano lya Ambuje Akunnungu ŵajimi papajumu pasikati ja lusulo lwa Yolodani, mpaka ŵandu wosepe paŵamasile komboka.

18 Ŵambopesi ŵaŵalijigele Lisanduku lya Lilangano lya Ambuje Akunnungu lila paŵamasile komboka lusulo ni kupaliŵata papajumu mungulugulu lusulo, meesi ga mu lusulo lwa Yolodani gatandite kwilima sooni ni gasewiche mpela iyaliji kundanda.

1 Minango jakwinjila musi wa ku Yeliko jaugalikwe chamunkati kuti Ŵaisilaeli akajinjila. Nganapagwa namose jumo juŵakopweche pane kwinjila mmusi mo. 2 Nipele Ambuje Akunnungu ŵansalile che Yoshua, "Nnole, ngumpa machili ga kuupunda musi wa Yeliko pamo ni mwenye jwakwe ni ŵangondo ŵakwe. 3 Mmwe ni ŵandu ŵenu ŵa ngondo ŵaali ni yakumenyanilana nsyungule musi wo, kamo pe pa lyuŵa kwa moŵa sita. 4 Ŵambopesi saba kila mundu ali ajigele lipenenga lyakwe lya msengo wa ngondolo jankambaku chalongolele mbujo mwa Lisanduku lya Lilangano. Palyuŵa lya saba tinsyungule musi wo mala saba, kila jwambopesi achigombaga lipenenga lyakwe. 5 Nipele pachagombe kwa machili mapenenga gao go, ni ŵandu wose pachapikane kusona kwa mapenenga go anyanyisye kwannope, nipele likumba lya musi chiligwe paasi. Pelepo ŵandu ajinjile munkati kila mundu kutyochela peuto pajimi."

6 Pelepo che Yoshua mwana ju che Nuni ŵaaŵilasile ŵambopesi ni kwasalila, "Njigale Lisanduku lya Lilangano, sooni ŵambopesi ŵane saba ajigale mapenenga saba ga misengo ja ngondolo syankambaku, alongolele mbujo mwa Lisanduku lya Lilangano lya Ambuje Akunnungu." 7 Ni ŵasalile ŵandu, "Njaule mbujo nkausyungule musi, nombe ŵandu ŵaali ni yakumenyanilana alongolele mbujo mwa Lisanduku lya Lilangano lya Ambuje Akunnungu."

20 Mapenenga pagagombilwe ŵandu ŵanyanyisye, kwa liloŵe lya mapenenga ni kunyanyisya kwa ŵandu, likumba lya musi lyagwile. Kwayele kila mundu ŵajendelechele mmbujo kutyochela paŵajimi ni kwinjila mmusi ni kuujigala musi.

2 Ŵafilisiti ŵaajaulile Ŵaisilaeli ni kwagungumuchila, ni pakumala kuputana kwannope Ŵaisilaeli ŵaputikwe. Ŵaisilaeli elufu nne ŵaulajikwe ku ngondo ko. 3 Ŵangondo ŵaŵasigalile paŵausile pachigono, achachekulu ŵa ku Isilaeli ŵatite, "Ligongo chichi Ambuje Akunnungu akundile kuti Ŵafilisiti atupunde lelo jino? Twende tukajigale lisanduku lya lilangano lya Ambuje Akunnungu ku Shilo ko kuti Ambuje wo alongane ni uweji ku ngondo, akatukulupusye ni ŵammagongo ŵetu." 4 Kwayele ŵaatumile ŵandu kwele ku Shilo ko, nombewo ŵalijigele lisanduku lya lilangano lya Ambuje Akunnungu ŵa machili gose, ŵati chitengu chakwe cha umwenye chili pasikati ja yepanganyikwe iŵili yaili ni mapapiko yaikuŵilanjikwa makelubi. Aŵala achachanda ŵaŵili ŵa che Eli, che Hofini ni che Finehasi ŵaiche pamo ni alila lisanduku lya lilangano lya Ambuje Akunnungu.

5 Katema Lisanduku lya lilangano lya Ambuje Akunnungu palyaiche pachigono, Ŵaisilaeli wose ŵakwesisye liloŵe mwakusangalala, mpaka chilambo chose chatenganyiche. 6 Ŵafilisiti paŵapilikene malama ga sangalala, ŵatite, "Apikane malama gakogoya ku chigono cha Ŵaisilaeli! Ana yeleyi malumbo gakwe ichichi?" Piŵapilikene kuti lisanduku lya lilangano lya Ambuje Akunnungu liiche pa chigono cha Ŵaebulania, 7 ŵajogwepe kwannope, ni ŵatite, "Kuiche minungu ku chigono kwawo! Ulaje kukwetu! Pakuŵa indu yanti nnyi nganiitendecheje kunyuma ko. 8 Ulaje kukwetu! Ana ŵani chatukulupusye uwe kwa jele minungu ja machili ji? Jeleji ni minungu jijauleje Ŵamisili kwa iputiko yakupisyangana ku chipululu kula. 9 Sambano ŵanyamwe Ŵafilisiti, nlimbangane. Mputane ngondo mpela ŵangondo ŵamachili, nkaika kuŵa achikapolo ŵa Ŵaebulania mpela ŵanyawo iŵatite kuŵa achikapolo ŵetu. Nputane nawo nti ŵangondo ŵali ni umanyilisi."

10 Kwa yele Ŵafilisiti ŵaputile ngondo mwakulimba mpaka kwapunda Ŵaisilaeli, ŵaŵautwiche kila mundu ku nyuumba kwakwe. Pa lyuŵa lyo ŵandu ŵajinji ŵaulajikwe, pakuŵa ŵangondo ŵaakwenda wamakongolo elufu salasini pasikati ja Ŵaisilaeli ŵaulajikwe. 11 Lisanduku lya lilangano lya Ambuje Akunnungu lyajigalikwe ni Ŵafilisiti ni aŵala achachanda ŵaŵili ŵa che Eli, che Hofini ni che Finehasi ŵaulajikwe.

6 Ambuje Akunnungu ŵaajamwiche mwachikali ŵandu ŵa ku Ashidodi ni misinda jose jijaŵandichile nawo, ŵaichisye uwonasi ni kwalagasya ni yakwimbila. 7 Ŵandu ŵakutama ku Ashidodi paŵaiwe yele indu yo ŵatite, "Akunnungu jwa Ŵaisilaeli akutujamuka kwachikali uweji pamo ni nnungu jwetu Dagoni. Lisanduku lya lilangano lya Ambuje Akunnungu ngaikukomboleka kutama kukwetu." 8 Ŵaalajisye ŵantenga ni kwaŵilanga ilongola ŵa Ŵafilisiti ni kwausya, "Ana tutende nawo ichichi lisanduku lya lilangano lya Ambuje Akunnungu ŵa Ŵaisilaeli?" Nombewo ŵajanjile "Lisanduku lya lilangano nlijausye kwele ku Gati." Nipele ŵalijawisye ku musi wa Gati. 9 Nambo paŵalijawisye lisanduku lya lilangano lyo kwele ku Gati ko Ambuje Akunnungu ŵaujamwiche musi wo, ŵaatasile lipamba lyakogoya ŵandu ŵa musi wo, ŵaalagasisye ŵandu ŵa wele musi wo, achachanda ni achakulungwa, yaajinjile yakwimbila. 10 Kwayele ŵalijawisye lisanduku lya lilangano lya Ambuje Akunnungu lyo ku musi wa ku Ekiloni. Nambo lisanduku lya lilangano lya Ambuje Akunnungu lyo palyaiche kweleko, ŵandu ŵa musi wo ŵalisile achitiji, "Atuichisye lisanduku lya lilangano lya Ambuje Akunnungu ŵa Ŵaisilaeli kuti atuulaje uwe ni ŵandu ŵetu." 11 Nipele ŵaatumile ŵantenga ni kwasonganya sooni ilongola ŵa Ŵafilisiti ni kwasalila, "Nliusye lisanduku lya lilangano lya Ambuje Akunnungu jwa Ŵaisilaeli mu chilambo chakwe, nangaŵaga yeleyo tilituulaje uweji pamo ni ŵandu ŵetu." Ŵatesile yeleyo ligongo Akunnungu ŵaliji nkwajamuka ŵandu kwa chikali, ni ŵajinji ŵao ŵaliji awile, kwayele ŵandu ŵaliji ni lipamba lyekulungwa.

1 Lisanduku lya lilangano lya Ambuje Akunnungu palyatemi kwa Ŵafilisiti kwa miesi saba, 2 Ŵafilisiti ŵaaŵilasile ŵambopesi ŵa Dagoni ni ŵachisango ŵao ni kwausya, "Ana tutende ichichi nkati lisanduku lya Lilangano lya Ambuje Akunnungu? Ntusalile yachitujile kuliusya ku Isilaeli."

3 Ni ŵanyawo ŵajanjile, "Iŵaga nkusaka kuliusya lisanduku lya lilangano lya Ambuje Akunnungu ŵa Ŵaisilaeli, nkaliusya makono pe. Nambo ntende yaili yose nliusye ni sadaka ja kutyosya chileŵo nipele chi tinlame. Ni ŵanyamwe chimmanyilile kwachichi Akunnungu wanjamukaga."

10 Nipele ŵatesile mpela iŵatite kusalilwa, ŵasijigele ng’ombe siŵili sila ni kusitaŵila mutuka, ni ŵanache ŵakwe ŵaalesile mu lichinga. 11 Ŵaliŵisile lisanduku lya lilangano lya Ambuje Akunnungu mmutuka mo pamo ni lisanduku lyana inyago ya sahabu yelandane ni mapuku ni aila inyago ya yakwimbila. 12 Ng’ombe sila syagambile kwaula ku musi wa ku Beti Shemeshi pangali kugalauchila kulyo atamuno kunchiji, syaliji nkulila pisyajaulaga. Ilongola ŵa Ŵafilisiti ŵala ŵaakuilisye mpaka mumpika wa ku Beti Shemeshi.

13 Ŵandu ŵa ku Beti Shemeshi ŵaliji nkugungula ngano mu chiŵata. Paŵanyakwile mitwe jawo ni kulolechesya ŵaliweni lisanduku lya lilangano lya Ambuje Akunnungu, ni ŵasangalele kwannope. 14 Mutuka jo jajawile kungunda wa che Yoshua, mundu juŵatamaga ku Beti Shemeshi. Palyaiche pelepo lyajimi chiŵandika ni liganga lyekulungwa. Ŵandu ŵajipaswile sasu mutuka jila, nipele ŵasikite ngombe syo ni kusityosya mbopesi jakutinisya kwa Ambuje Akunnungu. 15 Nombe Ŵalawi ŵalitulwisye lisanduku lya lilangano lya Ambuje Akunnungu ni alila lisanduku lyalili ni inyago ya sahabu ni kuiŵika pachanya pa liganga lyekulungwa lila. Nipele pa lyuŵa lyo ŵandu ŵa ku Beti Shemeshi ŵapeleche mbopesi syakutinisya ni mbopesi sine kwa Ambuje Akunnungu.

1 Kwayele ŵandu ŵa ku Kiliati Yealimu ŵajawile ni kulijigala lisanduku lya lilangano lya Ambuje Akunnungu, ŵalijawisye ku nyuumba ji che Abinadabu, juŵatamaga ku chitumbi. Ŵantesile akundikwe kwa kwapopelela Akunnungu mwanagwe jwannume jwakuŵilanjikwa che Eleasali kuti aŵe jwakulilolela lisanduku lyo.

2 Lisanduku lya lilangano lya Ambuje Akunnungu lyatemi ku Kiliati Yealimu kwa yaka ishilini. Pa kele katema ko Ŵaisilaeli wose ŵaliji nkulilasika nombewo ŵapopesile kwa Ambuje Akunnungu kuti ŵakamusye.

12 Mwenye che Daudi paŵapilikene kuti Ambuje Akunnungu ŵapele upile ŵandu ŵapannango u che Obedi Edomu ni indu yose yakwete ligongo lya lisanduku lya lilangano lya Ambuje Akunnungu, ŵajawile kukulijigala lisanduku lya lilangano lya Ambuje Akunnungu mu nyuumba ji che Obedi Edomu ni kulijausya ku musi u che Daudi ali nkusengwa. 13 Ŵandu ŵaŵalijigele lisanduku lya lilangano lya Ambuje Akunnungu ŵala, paŵajesile sajo sita, che Daudi ŵaajimiche, ŵapeleche mbopesi ja ng’ombe jankambako ni mwanache jwa ng’ombe jwakwimbala. 14 Che Daudi ŵatyasile paujo pa Ambuje Akunnungu kwa machili gao gose ali awasile nguo ja chimbopesi. 15 Kwayele, che Daudi ni Ŵaisilaeli wose ŵalijawisye lisanduku lya lilangano lya Ambuje Akunnungu mpaka ku musi wa che Daudi kwa kuchina ni ali nkugomba mapenga.

1 Mwenye che Selemani ŵaasimanisye paujo pakwe, akula ku Yelusalemu achachekulu ni ilongola wose ŵa ngosyo ni achakulu ŵa mitundu ja Ŵaisilaeli, kuti aliichisye Lisanduku lya Lilangano lya Ambuje kutyochela ku Sayuni yaani musi u che Daudi. 2 Ŵandu wose ŵa ku Isilaeli ŵasongangene kwa mwenye che Selemani katema ka chindimba cha mwesi wa Esanimu yaani mwesi wa saba. 3 Achachekulu wose wa Ŵaisilaeli paŵaiche, ŵambopesi ŵajigele Lisanduku lya Lilangano. 4 Ŵalawi ni ŵambopesi ŵalisamisye Lisanduku lya Lilangano ni lisakasa lya kusimanilana pamo ni yoombo yose yaikundikwe kwa kwapopelela Akunnungu iyaliji mu lisakasa lyo. 5 Mwenye ni nsongangano wose wa Ŵaisilaeli ŵasongangene mbujo mwa Lisanduku lya Lilangano, nombe ŵambopesi ŵatyosisye mbopesi syesijinji sya ngondolo ni ng’ombe syangaŵalanjikwa. 6 Ŵambopesi ŵaiche nalyo Lisanduku lya Ambuje mpaka peuto pakwe nkati mwa Nyuumba ja Akunnungu, Peuto Papakundikwe kwannope kwa kwapopelela Akunnungu, elo kuusi kwa mapapiko ga inyago ya yepanganyikwe. 7 Mapapiko ga inyago ya yepanganyikwe yo yatambalukuswile mapapiko gao pachanya papaŵichikwe Lisanduku lya Lilangano ni itela yakwe yakunyakulila. 8 Itela yakunyakulila Lisanduku lyo yaliji yeleu nnope kwati yawonekaga kutyochela Peuto Papakundikwe kwannope kwa kwapopelela Akunnungu, mbujo mwa chuumba cha munkati, nambo ngawa chapaasa pa Peuto Papakundikwe kwannope kwa kwapopelela Akunnungu, nombeyo ili kweleko mpaka lelo. 9 Mwaliji mwangali chindu mu Lisanduku lyo ikaŵe maganga gaŵili gagasepekwe nti ibao yati che Musa ŵaiŵisile ku Holebu kula, apala Ambuje Akunnungu paŵaŵisile chilanga ni Ŵaisilaeli paŵatyosile ku Misili.

10 Yaliji, ŵambopesi paŵaliji nkutyoka Peuto Papakundikwe kwannope kwa kwapopelela Akunnungu, papopo liunde lyagumbele mu Nyuumba ja Ambuje Akunnungu. 11 Ŵambopesi nganakombola kupanganya masengo gao ligongo lya liunde lyo, pakuŵa lumbili lwa Ambuje Akunnungu lwagumbele mu nyuumba jakwe.

1 Lilangano lyaandanda lyakwete masyoŵelelo gakwe ga kupopelela ni peuto pakwe papaswela pakupopelela papataŵikwe ni ŵandu. 2 Pakolochekwe lisakasa lya yuumba iŵili, ni chuumba chakwe chandanda paŵilanjikwe papaswela nnope. Mwelemo mwaliji ni chindu chakuŵichila lumuli ni mesa ni mikate jijatyochekwe paujo pa Akunnungu. 3 Munkati mwa chuumba chandanda cho paliji ni nguo ja lusasa jijalekangenye yuumba iŵili ni panyuma pakwe paliji ni lisakasa lyalikuŵilanjikwa Papaswela nnope. 4 Ni mwelemo mwaliji ni chilisa cha sahabu chakututumisya ubani ni lisanduku lya lilangano, lyeuniche posepose kwa sahabu, munkati mwakwe mwana chiŵiga cha sahabu chichaliji ni mana ni nkongojo u che Haluni uwasipwiche ula ni maganga gagasepekwe nti ibao gagalembekwe Malajisyo likumi. 5 Ni penani pa lisanduku lyo kwaliji ni inyago iŵili yesepekwe yaikuŵilanjikwa makelubi yaikulosya ukulu wa Akunnungu, yana mapapiko ni mapapiko gao go gasambalukuchile kuunichila chiunichilo cha lisanduku lya lilangano peuto paakulechelesya Akunnungu sambi. Nambo sano ngatukukombola kwiŵecheta yeleyo yose kwannope.

19 Nipele nyuumba ja Akunnungu jajili kwinani jaugulikwe, ni nkati mwakwe lyawoneche lisanduku lya lilangano. Nombe kwatyochele kumesya ni ilindimo ni njasi ni chindendemesi cha chilambo ni ula jekulungwa ja maganga.