Arca de noé
A arca de Noé é história de salvação e fidelidade. Deus instruiu Noé a construir a arca para salvar sua família e os animais do dilúvio — exemplo supremo de obediência e fé.
एस्से वजाई सेइं परमेशरे नूहे सेइं ज़ोवं, "सब प्रैणी केरो खातमों केरनेरो सवाल मेरे सामने एवरोए; किजोकि तैन केरे वजाई सेइं धरती ज़ुलमे सेइं भेरोई जेवरीए, एल्हेरेलेइ अवं तैन्न धेरती सने नाश केरि छ़डेलो। एल्हेरेलेइ तू गोपेर बुट्टेरे लेकड़रू अक ज़िहाज़ बना, तैस मां कमरे बनेइयां, ते अन्तर बेइर तैस पुड़ गारो लेइयां। इस तरीके सेइं तू तैस बनेइयां: ज़िहाज़ेरी लम्बाई 300 हथ, चौड़ाई 50 हथ, ते ऊँचाई 30 हथ भोए। ज़िहाज़े मां अक दारी बनेइयां, ते तैसेरे अक हथ बह तैसेरी छत बनेइयां, ते ज़िहाज़ेरे एक्की पासे अक दार रेखा, ते ज़िहाज़े मां पेइलो, दूइयोवं, ते ट्लेइयोवं हिस्सो बनेइयां।
तैखन यहोवा नूहे सेइं ज़ोवं, "तू अपने सारे घराने सने ज़िहाज़े मां गा; किजोकि मीं इस वक्तेरे लोकन मरां सिर्फ तूए अपने नज़री मां धर्मी मैल्होरोस।
नूह अपने मट्ठन, कौन्शी ते नुशन सने, पैनेरी हड़ैई करां बच़नेरे लेई ज़िहाज़े मां जेव। शुद्ध, ते अशुद्ध दूईये किसमां केरे जानबरन मरां, च़ुड़ोलू, ते धेरती पुड़ पेटेरे भारे च़लनेबालन मरां भी, दूई-दूई, मतलब नर ते मादा, ज़िहाज़े मां नूहे कां जेआं, ज़ेन्च़रे परमेशरे नूहे हुक्म दित्तोरो थियो। सत दिहाड़ना बाद हड़ाईयरु पानी धेरती पुड़ एजने लग्गू।
ते ज़ैना जे, तैना परमेशरेरे हुक्मेरे मुताबिक सब किसमां केरे प्रैणन मरां नर ते मादा जे। तैखन यहोवा ज़िहाज़ेरू दार बन्द कियूं।
धेरती पुड़ 40 दिहाड़न तगर पैनेरी हड़ाई भोती राई; ते पानी बड़ू बद्धतू जेवं, ज़ैस सेइं ज़िहाज़ उबरे छ़ुइयोने लग्गू, ते तैन धेरती पुड़ां उबरू छ़ुइयोवं। पानी बद्धते-बद्धते धेरती पुड़ां बड़ू बेद्धी जेवं, ते ज़िहाज़ पैनी पुड़मेइं तेरतू राव।
ते सारे मैन्हु, सारे जानबर, सारे पेटेरे भारे च़लनेबाले जीप जन्तू, सारां अम्बरेरां च़ुड़ोलू, ज़ैना-ज़ैना धेरती पुड़ थिये, सब धेरती पुड़ेरां मेरि मिटी जेआं; सिर्फ नूह, ते ज़ेत्रे तैस साथी ज़िहाज़े मां थिये, तैना बेच़ी जे।
ते 150 दिहाड़ना बाद पानी धेरती पुड़ां लगातार घटने लग्गू। तैस सालेरे सत्तोवं महीनेरे सतारोवं दिहाड़े, ज़िहाज़ अरारात नंव्वेरे पहाड़े पुड़ रुकी जेवं।
फिरी एरू भोवं कि 40 दिहाड़ना बाद नूहे ज़ैन ज़िहाज़ बनेवरू थियूं तैसेरी दारी खोलतां, अक कंव्व उडारू: ज़ांतगर पानी धेरती पुड़ेरां शुक्की न जेवं, तांतगर कंव्व इरां-उरां फिरतू रावं। फिरी नूहे एप्पु करां अक कबूतरी भी उडारी कि हेरे कि पानी धेरती पुड़ां घट भोवं कि नईं। तैस कबूतरी अपने पव रखनेरे लेई कोई ठार न मैल्ही, त तै तैस कां ज़िहाज़े मां वापस अई: किजोकि सैरी धरती पुड़ पानी-पानी थियूं तैखन नूहे अपनो हथ अग्रोवं केरतां तै एप्पु कां ज़िहाज़े मां नेही। फिरी होरे सत दिहाड़न तगर बेलगतां, तैने तैए कबूतरी ज़िहाज़े मरां फिरी उडारी। ते कबूतरी ड्लवझ़रे मौके तैस कां अई, त कुन हेरू कि तैसेरी च़ुंच़ी मां ज़ैतूनेरू अक नंव्वू पट्लोवे; एन हेरतां नूहे पतो लग्गो, कि पानी धेरती पुड़ेरां घेटी जेवरूए। फिरी तैने सत दिहाड़े होरे बेलगतां तैए कबूतरी फिरी उडारी; ते तै तैस कां फिरी कधे वापस न अई।
नूहेरी उमरारे 601 सालेरे पेइले महीनेरे पेइले दिहाड़े पानी धेरती पुड़ेरां शुक्की जेवं। तैखन नूहे ज़िहाज़ेरी छत पुटतां कुन हेरू कि ज़मीन शुकोरीए।
तैखन परमेशरे नूहे सेइं ज़ोवं, "तू अपने मट्ठन, कौन्शी ते नुशन सने ज़िहाज़े मरां निस्सी एई। कुन च़ुड़ोलू, कुन जानबर, कुन सब किसमेरे रेंगनेबाले जीप ज़ैना धेरती पुड़ पेटेरे भारे च़लने बालेन; ज़ेत्रे तीं सेइं साथी जीप जन्तू आन, तैना सब एप्पु साथी केढतां एई कि धेरती पुड़ तैन सेइं बड़े बच्चे पैदा भोन; ते तैना फुल्लन-फलन, ते धेरती पुड़ फैली गान।"
फिरी परमेशरे नूह ते तैसेरे मट्ठन सेइं ज़ोवं, "शुना, अवं तुसन सेइं ते तुश्शे बाद ज़ै तुश्शी खानदानी भोल्ही, तैस सेइं भी करार केरताईं; ते सब ज़ींते प्रैणन सेइं भी ज़ैना तुसन सेइं साथी आन, कुन च़ुड़ोलू कुन पैलतू जानबर, कुन धेरतरे सब जंगली जानबर, धेरतरे ज़ेत्रे भी जीप जन्तू ज़िहाज़े मरां निसोरेन। ते अवं तुसन सेइं अपनो ई करार केरताईं कि सब प्राणी फिरी पैनेरी हड़ैई सेइं नाश न भोल्हे, ते धेरतरो नाश केरनेरे लेई फिरी पैनेरी हड़ाई न एज्जेली।"
कि मीं बिदलारी मां अपनि बुन्ज़ल लट्ठ रख्खोरीए, तै मेरे ते धेरतरे दरमियान करारेरो निशान भोल्हो।
विश्वासे सेइं नूहे तैन गल्लां केरे बारे मां ज़ैना एजने बाले वक्ते मां भोनी बैली थी, परमेशरेरे तरफां हुक्म मैलतां परमेशरेरे प्यारे सेइं तैस पुड़ अमल कियूं, ते अक किश्ती बनाई ज़ैस मां तैसेरू सारू टब्बर बच़ू, एन केरने सेइं तैनी सारी दुनिया मुर्ज़म बनाई ते एप्पू तैस धार्मिकतारो बारस बनो ज़ै विश्वासे सेइं हासिल भोचे।
इन तैन मैन्हु केरि आत्मा आन ज़ैनेईं बड़े पेइले परमेशरेरो हुक्म न थियो मन्नोरो। ज़ैखन नूह किश्ती बनाने लगोरो थियो, त परमेशरे बड़े सबरी सेइं बलगू कि तैना पापन करां मन फिरान। पन सिर्फ अठ तैस भयानक तूफाने करां बच़े। पुराने वक्ते मां तैन केरि मुक्ति हुना इश्शे लेई ज़ैखन अस बपतिस्मो नेतम मिसाले। ज़ैस पैनी मां अस बपतिस्मो नेतम तैन इश्शे जानरो मैल दूर न केरे, पन ई अक निशाने कि असेईं परमेशरे करां माफ़ी मगोरीए ताके इश्शो मन असन परेशान न केरे। असन माफ़ी मैल्ही बटतीए किजोकि यीशु मसीह मेरतां ज़ींतो भोवरोए, ते तै सुर्गे जो जेवरो। तैड़ी हुनी तै परमेशरेरे देइने पासे खास ठैरी, तैड़ी तै सारे स्वर्गदूतन ते अधिकैरन ते शेक्तन पुड़ राज़ केरने लगोरोए।
ज़ेन्च़रे नूहेरे ज़माने मां भोरू थियूं, तेन्च़रे मैन्हेरे मट्ठेरे एजनेरे वक्ते भोनूए। किजोकि हड़ाई एजने करां पेइले भी लोक खाते पीते थिये, ते ड्लाह भी बनाते थिये, ते नूहेरे किश्ती मां गाने तगर एन सब किछ भोतू रावं। तैन पतो भी न थियो कि कुन भोनेबालूए, इड़ी तगर कि हड़ाई अव ते तैनी सब किछ रुड़ेइतां नेव, ते मैन्हेरे मट्ठेरू यानी मेरू एजनू भी एरू भोनूए। तैखन ऊडारे मां दूई मैन्हु कम केरते भोल्हे ते अक नियो गालो, ते दूइयोवं तैड़ी रालो। ते दूई कुआन्शां ढ्लाट पीती भोल्ही त अक नी गाली ते होरि तैड़ी राली।