Arca de noé
A arca de Noé é história de salvação e fidelidade. Deus instruiu Noé a construir a arca para salvar sua família e os animais do dilúvio — exemplo supremo de obediência e fé.
तत्यार भगवान नुह काजे कह्यु, "आखा माणसे धरती पर रीस ने खुन-खराबु कर र्या।" तेरेमां मे तीनु आखा जीवतेला जीव काजे धरती पर सी सार दीस। ने तु गोपेर नावेन झाड़कान लाकड़ान ढंड्यो बणाय ले। तीना ढंड्या मां खुणा बणावजी, ने माहे ने बाहर डमर्ये सी नीप देजी। "ने ढंड्या काजे असो बणावजी: चो तीन सोव हात नांबो, ने पचास हात चवड़ो, ने तीस हात उचो हवणु। ढंड्यो दुय माळ्यो बणावजी: तेरेम चे हीस्सा रवसे। नेचलु हीस्सु, ईचमाळ्ळु हीस्सु, ने उपेरलु हीस्सु। ढंड्या पर ढुपु बी बणावजी, ने ढुपा सी एक हात नेची खीड़की बणावजी। ने ढंड्यान एक धड़े बारनो बणावजी।
जत्यार नुह ढंड्यो बणाय लेदु तत्यार मालीक कह्यु, "तु आपसा घरन्या भेळुत ढंड्याम भराय जाजी; काहाकी मे ईनी टेमेन माणसे मां तु अतरुत धरमी माणुस छे।
नुह आपसा पुर्या, आपसी बायर ने उहड़ीस्याक लीन बचणे करीन ढंड्याम भरायु। ने चुखला, ने नी-चुखला दुयु भातीन जीव-जानवर्याक ने चिरला, ने जसु भगवान नुह काजे हुकुम आपीन कहलु तसुत भुयमां घीसड़ायन चालन्या जीव-जानवर्या माय्न बी दुय-दुय जुड़ा मतलब नर ने नारी ढंड्या मां नुह पुठ्ये भर्यु। सात दाहड़ा हय ज्या ती मुसळ-धार पाणी धरती पर पड़ने चालु हय ज्यु।
ने जसु भगवान हुकुम आपलु तसात चे नर ने नारी ढंड्याम भराय ज्या तत्यार भगवान ढंड्यान बारनो दी देदु।
ने धरती पर चाळीस दाहड़ा लग मुसळ-धार्यु पाणी पड़तु; ने पाणी बेसको अदुस बड़तो गुयो, तेरेमां ढंड्यो उपर हाकलायणे लाग्यो ने धरती पर सी उंचों उठ ज्यो। ने पाणी बड़तो-बड़तो धरती बेसको अदुस हय ज्यो, ती ढंड्यो पाणीन उपर तीरतो रह्यो।
ने जतरा बी माणसे, जीव-जानवर्या, घीसड़ायन चालन्या जीव-जानवर्या, सरग मां उडण्या चिरला ने जे-जे धरती पर हतला, चे आखा धरती पर मरीन सर ज्या, बाकुन नुह ने जतरा तेरे पुठ्ये ढंड्याम हतला चे अतरात बच ज्या।
ने एक सोव पचास दाहड़ा वीत ज्या ती धरती पर पाणी आटणे लाग ज्यो। ती सालेन सातवे महनान सतरे तारीक ढंड्यो अरारत नावेन बयड़ा पर टेक ज्यो।
ने जत्यार चाळीस दाहड़ा हय ज्या ती नुह ढंड्यान खीड़की उघाड़्यु, ने एक कागळाक उडाड़ देदु, ने जत्यार लग पाणी धरती परुन सुक्यो नी तत्यार लग कागळु अथुन-अथु फीरतु रह्यु। पछेन अळी आपसा धड़े सी एक पेरवा काजे बी उडाड़ीन देख्यु की पाणी कम हय ज्यो की नी। ती तीना पेरवा काजे पाय मेकणेन काय जागु नी जड़्यु ती ची पछीत नुह धड़े आय गुय, काहाकी आखी धरती पर पाणीत सी भरलो हतलो तत्यार चु तीनीक अघु हात करीन आपसा ढंड्याम भर लेदु। तत्यार अळी नुह सात दाहड़ा लग थुब्यु ने अळी पछु तीना पेरवा काजे ढंड्याम सी उडाड़ देदु। ती चु पेरवु सांती वेळाय पछी तेर धड़े आय गुय, ने ची आपसी मुंहडाम जेतुन नावेन झाड़कान एक ताब्लु पालु लीन आय, तेरेसी नुह जाण लेदु की पाणी धरती पर उस्टी गुयो। पछेन अळी हयु सात दाहड़ा लग वाट देखीन तीनात पेरवाक उडाड़्यु ने ची पछी कदी नी आवी।
ने जत्यार नुहान उमर छव सोव एक सालेन पेहला महनान पेहले दाहड़े पाणी धरती पर उस्टीन सुक गुय तत्यार नुह ढंड्यान छत उघाड़ीन देख्यु ती असो देख्यु की धरती परुन पाणी उस्टीन सुक गुय।
तत्यार भगवान नुह काजे असु कह्यु, "तु आपसा पुर्या, बायर ने उहड़ीस काजे लीन भेळात ढंड्याम सी नीकळी आव। ने आखा चिरला ने आखा जानवर्या ने आखा भातेन धरती पर घीसड़ायन चालन्या जीवतेला जानवर्या तार धड़े छे, तीनु आखा काजे तार भेळे उतारीन नेचु ली आव काहाकी धरती पर तींद्रे सी अदुस अवल्यात पयदा हय जाय, ने चे आखी धरती पर छावाय जाय।"
भगवान नुह काजे ने तेरा पुर्या काजे अघु कवतुत गुयु, "सामळु, मे तुंद्रे भेळु ने तुंद्रे पछळ जी तुंद्री अवल्यात आवसे, तींद्रे सी बी वायदु करु; ने आखा जीवतेला जानवर्या सी बी बुली बांदो, जे ढंड्याम सी खयड़े आवला छे। चिरला साते, ने आखा जानवर्या साते बुली बांदो। हंय सी कदी बी मुसळ-धार्यु पाणी पाड़ीन मे माणसे काजे ने जीव जानवर्या काजे नी मारो। मे ईनी बुली काजे कदी नी वीसरो।"
मे वादळा मां बाम मेल दम। जु बाम धरतीन ने मारे ईचमां जु वायदु हवलु छे, तेरी सहलाणी रवसे।
भगवान पर भुरसु करीन नुह आवणेवाळी मुसळ धार पाणीन गरान बारामां भगवान धड़े सी खबर सामळीन आपसा घराणा काजे बचाड़ने करीन चकराय्न ढंड्यो बणायु। असलु मुसळ धार पाणी धरती पर कदी नी पड़्यु। तेबी हय लग देखणेम नी आयो तेरे बारामां भगवान कह्ली वात पर भुरसु कर्यु। नुहान भुरसु देखीन भगवान तीनाक धरमी गीण्यु, ने असु करीन चु खरला धरमेन हकदार्यु बण गुयु। बाकुन कळीन दीसरा माणसे ढंड्याम भरायन मरीन सर गुया, असु करीन नुह आखी कळीन माणसे काजे गुनाळु ठेहराय देदु।
चे हीनु माणसेन आत्मा हतली जीनुक भगवानेन हुकुम काजे पाळन नी कर्या, जत्यार चु नुहान दाहड़ा मां भगवान दम धरीन वाट देख रवलु ने ढंड्यो बन्ने बाजी रह्लो, तीनाम बठीन थुड़ाक माणसे मतलब आठ माणसे पाणीन साहरे बचाड़ी गुया। ईनात पाणी काजे दाखलु बी मतलब बपतीस्मा ईसु मसी जीवतु हवणेन साहरे हय तुहुंंक बचाड़ने। हेरेसी डीलेन मुयळ काजे छेटे करीन मतलब नी हय, बाकुन वारलु डीमाक सी भगवानेन हक मां हय जाणेन मतलब छे। चु सरग पर जाय्न भगवानेन जेवड़े आन्गे बठी गुयु ने सरगेन वाळा काहवाळ्या ने हकदार्या ने ताकत हेरे हक मां करला छे।
जसों नुहुन दाहड़ा मां हवलो, असोत माणसेन पुर्यान आवणु बी हवसे। काहाकी जसों पाणी मां डुबणे सी पेहला दाहड़ा मां, जां लग की नुह ढंड्या पर नी चहड़्यु, तीनु दाहड़ा लग माणसे खात्ला ने पीदला, ने तींद्रे मां ईयाव हवतेला। ने जत्यार लग मुसळ धार्यु पाणी आय्न तीनु आखा काजे उह्वाड़ीन नी ली गुयो, तत्यार लग तीनुक काय बी पतु नी चाल्यु, तसोत माणसेन पुर्यान आवणु बी हवसे। तीनी टेमे दुय जणा खेत मां हसे, ने एक काजे लीन जाती रवसे ने दीसरा काजे चांहान रहणी देसे। दुय बायर घट्टी दळती रवसे ने एक काजे लीन जाती रवसे ने दीसरी काजे चांहान रहणी देसे।