1 धरती पर माणसेन जाती बेसकी हय गुय। ने तींद्‌री पुरे बी बेसकी हवी। 2 तत्‌यार भगवानेन पुर्‌या हतला, ने चे माणसे पुरे काजे देखीन वीच्‌यार्‌या की जे ते बेसकु वारु देखाये, करीन चे जे वारु लागे तीनु पुरे सी ईयाव करीन राख लेदा। 3 तत्‌यार भगवान कह्‌यु, "मारो मन माणसे सी जलम दुख मां नी रहे, काहाकी माणुस ते डीलुत छे; तेरी उमर एक सोव वीस सालेन रवसे।" 4 तीनु दाहड़ा मां धरती पर आखा सी मटा ताकुत वाळा माणसे रवतेला; ने तेरे पछेन भगवानेन पुर्‌यु माणसेन पुर्‌या धड़े आयु तत्‌यार तेर सी जे पुर्‌या हया चे आखा सी ताकुत वाळा हतला, ने तींद्‌रो नाव पेहला जमाना सी हवतो आय रयो।

5 यहोवा भगवान जो देख्‌यु की, धरती पर माणसेन पाप बड़ गुयु, ने तींद्‌रा मन मां जु बी वीच्‌यार आवे, चु वीच्‌यार कुहर्‌युत आवे।✝6:5 भजन सहीता 53:2 6 हेरेसी यहोवा भगवान धरती पर माणुस जात काजे बणायन बेसकु दुखी हयु। 7 तत्‌यार यहोवा भगवान वीच्‌यार कर्‌यु, "मे ईनुक नी बणावतु ती वारु रवतो, हय मे तीनु माणसे काजे बणावलु छे, तीनु माणसे काजे धरती पर सी सार दीस, ने आखा जानवर्‌या ने घीसड़ायन चालन्‌या जानवर्‌या, ने एकेक जीव काजे ने सरगेन चिरला काजे सार दीस।" 8 बाकुन तेबी भगवान काजे खुस करन्‌यु एक माणुस हतलु; चु नुह बाबु हतलु। हेरेसी यहोवा भगवान नुह पर गीण-दया बणीन रय।

9 नुहन घराणान काहणी जी छे। नुह धरमी माणुस हतलु, ने तीनी टेमे जत्‌रा बी माणसे हतला, तीनु माणसे मां चु ईमानदार हतलु, ने चु भगवानेन हजरी मां रय्‌न जीवतेलु। 10 नुहान तीन पुर्‌या हतला, सेम ने हाम ने येपेत। 11 तीनी टेमे धरती भगवानेन नींगा मां बीगड़ी रहली, ने जागे-जागे खुन-खराबु हय रहलु। 12 ने भगवान धरती भीणी भाळ्‌यु, ती देख्‌यु की जागे-जागे खुन-खराबु हय रहलु, माणसे पापी हय रहला ने धरती पर माणसे आपणो-आपणो जीवन बीगाड़ देदा।

13 तत्‌यार भगवान नुह काजे कह्‌यु, "आखा माणसे धरती पर रीस ने खुन-खराबु कर र्‌या।" तेरेमां मे तीनु आखा जीवतेला जीव काजे धरती पर सी सार दीस। 14 ने तु गोपेर नावेन झाड़कान लाकड़ान ढंड्‌यो बणाय ले। तीना ढंड्‌या मां खुणा बणावजी, ने माहे ने बाहर डमर्‌ये सी नीप देजी। 15 "ने ढंड्‌या काजे असो बणावजी: चो तीन सोव हात नांबो, ने पचास हात चवड़ो, ने तीस हात उचो हवणु। 16 ढंड्‌यो दुय माळ्‌यो बणावजी: तेरेम चे हीस्‌सा रवसे। नेचलु हीस्‌सु, ईचमाळ्‌ळु हीस्‌सु, ने उपेरलु हीस्‌सु। ढंड्‌या पर ढुपु बी बणावजी, ने ढुपा सी एक हात नेची खीड़की बणावजी। ने ढंड्‌यान एक धड़े बारनो बणावजी। 17 तुसे काजे मे जो कय र्‌यु चो समज। मे धरती पर बेसकु-मटु मुसळ-धार्‌यु पाणी पाड़ीस, ने सरगेन नेचे आखा जीव-जानवर्‌या काजे सार दीस: ने धरती पर वाळा आखा जीवतेला जीव, मर जासे। 18 बाकुन मे तारे साते वायदु करलु: तेरेमां तु आपसा पुर्‌या ने उहड़ीस्‌या ने आपसी बायर भेळे ढंड्‌या मां भराय जाजी। 19 ने धरती पर जतरा बी जीव-जानवर्‌या छे, तींद्‌रो एकेक जुड़ो ली आवजी। मतलब एक नर ने एक नारी काजे ढंड्‌या मां भर लेजी, काहाकी, चे तारे पुठी जीवतेला रहे करीन। 20 आखी जातीन चिरला मां सी ने आखी जातीन जानवर्‌याम सी, ने आखी जातीन धरती पर घीसड़ायन चालन्‌या जानवर्‌याम सी दुय-दुय नर-नारी ढंड्‌या मां जीवतेला भर लेजी। 21 धरती पर वाळी आखी भातीन खाणेन चीज तारे वाटे ने जानवर्‌या वाटे ढंड्‌या मां भर लेजी।" 22 ने भगवानेन हुकुम मानीन भगवान कहलु तसुत नुह कर्‌यु।