Arca de noé
A arca de Noé é história de salvação e fidelidade. Deus instruiu Noé a construir a arca para salvar sua família e os animais do dilúvio — exemplo supremo de obediência e fé.
ताहां देवे नोहाहा कोयो, "आखा जनवारोहो आरवीइलोअ प्रश्न माआ सामने आयोहो; काहाके तियांआं वाखरी धरती तारासो वाअहीं पोआइत गोयीही, तियाहा काजे आंय तियांहां धरतीइ आरीज आरवीत टाकनारु. तियाहा काजे तू गोफेर साड़ोअ लाकड़ाआ एक जाहाज बोणावीत ले, तियामेहें खुल्यी बोणावजी, आन मायते-बारथे तियीपोअ डांबर्यो लागाड़जी. एहें कोइत तू तियाहा बोणावजी: जाहाज तिन होव आथ नांबी, पोन्नास आथ पोली, आन तीस आथोअ उसी लेजी. जाहाजेम एक खिड़की बोणावजी, आन तियीइ मोब एक आथ उसे रोत बोणावजी, आन जाहाजीइ एकी वोग एक बाआ मिकजी; आन जाहाजीम पेहली, दुसरी, तिसरी माली बोणावजी.
ताहां यहोवा नोहाहा कोयो, "तू ताआ पुरा कुटूंबाअ आरी जाहाजेम जा; काहाके माहूं यी वेलेए माअहूंम रोत निस्तु तुज माआ नजरेम धर्मी सापड़्युहू.
नोहू तियाआ पोर्या, लाडी, आन वोवड़ीह्हीहीं आरी लेत कोइत रेलेम रोत वासाइलाअ काजे जाहाजेम गोयु. सोके आन एठे, बेनू जातीइ जनवारे, सिड़े, आन धरतीपोअ होरतींडनारा जिवतोरोमेर्येए बी, बेन बेन, मोन्ज्ये जोड़ी-जोड़ी, जाहाजोमेहें नोहाआ जागे गोये, जेहें कोइत देवे नोहाहा आज्ञा आप्यीते. हांत दिहोअ फासाड़ी धरतीपोअ रेलेए पाईं उसे रोत पोड़ू वोल्यू.
आन जें गोये तें देवोअ आदेशोअ पुरमाणे आखी जातीइ जनवारोमेर्येए जोड़ी जोड़ी नर आन मादा गोये. ताहां यहोवा जाहाजोअ बाअणो वाली देदो.
धरतीपोअ सालीही दिही जाआं रेल ओवती रोयी; आन पाईं खुबुज वादीत गोयो, जियावाअहीं जाहाज उसे आखलाइत गोयी; आन ते धरतीपोअ रोत उसे तोरंगाइ वोल्यी. पाईं वादतो वादतो धरतीपोअ जास्तीज वादीत गोयो, आन जाहाज पाअयोंपोअ तोरंगाअती रोयी.
आन माअहें, जनवारे, होरतींडनारे जिवतोर, जुगोमेर्येए सिड़े, जें जें धरतीपोअ ओते बादे धरतीपोअ रोत आरवाइत गोये; निस्तु नोहू, आन जेते तियाअरी जाहाजेम ओते, तेज वासाअये.
आन एक होव पोन्नास दिहोअ फासाड़ी पाईं धरतीपोअ रोत सोरोसोरो आटाओ वोल्यो. हांतवा मोयनाआ होत्तरवे दिही, जाहाज अरारात नावोअ डोगोपोअ आलाइत गोयी.
फाश्योअ एहेलोहो ओवो के सालीही दिहोअ फासाड़ी नोहे तियाआ बोणावल्यी जाहाजेए खिड़की उगाड़ीत कोइत, एक कागड़ू उडाड़ी देदू: जाअहूं जाआं पाईं धरतीपोअ रोत उगाइत नाहां गोयो, ताअहूं जाआं कागड़ू एहें तेहें इंडतू रोयू. फाशोअ तिये धरतीपोअ रोत पाईं आटाइत गोयोहो के नाहां तों पालीइलोअ काजे तियाआ जागे रोत एकी पेरवीही बी उडाड़ी देदी. तियी पेरवीही गुडा मिकीइलाअ काजे किज आधार ने जोड़्यू, ताहां ते तियाआ जागे जाहाजीम वोलीत आयी: काहाके पुरी धरतीपोअ पाईंन पाईंज ओतो. ताहां नोहे आथ टाकीत कोइत तियीही तियाआ जागे जाहाजीम लेत लेदी. ताहां फाशुउ हांत दिही जाआं रुकाइत कोइत, तिये तियीज पेरवीही जाहाजेम रोत फाशीइ उडाड़ी देदी; आन पेरवी हांजेए वेले तियाआ जागे आयी, ताहां की देख्यो के तियीइ सासड़ीमेहें जेयतुनोअ एक कोवलो पान होय; तियावाअहीं नोहे जाइंत लेदो के पाईं धरतीपोअ रोत आटाइत गोयोहो. ताहरुउ तो हांत दिही जाआं रुकाइत कोइत तियीज पेरवीही उडाड़ी देदी; आन ते तियाआ जागे फाशीइ केदिहींज वोलीत कोइत ने आयी.
जेहलाम नोहाआ वय सोव होव एक वोरह्योअ ओतो, आन पेल्लाआ मोयनाआं पेल्लेए दिही पाईं धरतीपोअ रोत आटाइत गोयो. तेहेलाम नोहे जाहाजीइ बाअणो उगाड़ीत कोइत की देख्यो के धरती उगाइत गोयीही.
ताहां देवे नोहाहा कोयो, "तू ताआ पोर्या, लाडी, आन वोवड़ीह्ही नेहें जाहाजेम रोत निहीत आवा. सिड़े, आखी जातीइ होरतींडनारे जिवतोर जें धरतीपोअ फिरतींडतेहे– जेत्ते बी जिवनारे जिवतोर ताआ जागे होय, तियां आखाहा ताअरीज काडीत लेताव के धरतीपोअ तियांप रोत जाअखीलेहे बासे उबजुहूं जोवे; आन ते फुलेन-फले आन धरतीपोअ पसरीत जाअहूं जोवे."
फाशुउ देवे नोहाहा आन तियाआ पोर्याहा कोयो, "उनाआ, आंय तुमाअरी आन तुमाआ फासाड़ी जे तुमाआ पारवाड़ी आवे, तियीइरी बी शप्पत लेहो; आन आखा जिवता जनवारोअरी बी जे तुमाअरी होय, सिड़े, कोर्येए जनवारे, आन धरतीपोर्येए रानठ्ये जनवारे, धरतीइ जेत्ते जनवारे जाहाजेम रोत निठेहे तियांअरी बी शप्पत लेहो. आन आंय तुमाअरी माआं ए शप्पत लेहो के आखे जनवारे फाशेए रेले वाअहीं ने आरवाय, आन धरती आरवीइलोअ काजे फाशीइ रेल ने ओवे."
आंय वाद्लामेहें माआं बाण मिक्यीही, ते माआं आन धरतीइ विसमेहें शप्पतेए निशाणी रोये.
विश्वासोवाअहीं नोहे वेगी केदिहीं नाहां देख्यी एहली गोठीइ सुसना जोड़्यी तेहेलामेहें आदरमानो वाअहीं भक्ती कोइत सोताआ कुटूंबाहा वासाड़ीलोअ काजेहे जाहाज बोणायी, आन एहें कोइत तिये दुन्याहा दोशी ठरव्यी आन विश्वासो वाअहीं तो धर्मी जिवनोअ वारिस बोण्यु.
एं आत्मे मोन्ज्ये पेल नोहाआ दिहोमेहें जेहेलाम तो जाहाज बोणावतुतो, तेहलामेहें देव धिर खेटीत तियांआं वाट जोवतुतो, तिया वाडोहो जियां तियाआ आदेश टाली देदू तें एंज आत्मे ओते, तिया जाहाजोमेहें निस्ते आंठुज जोंएं पांअयोंम रोत वासाअये. तिया पांअयोंअ नमुना जो बाप्तिस्मा, तियाआ अर्थ डिलोअ मोल तुवीइलो नाहां, पोन सोकु दिमाक मिकीइलाअ देवोअरी रोअलोअ होय. तों ओमे ईसु ख्रिस्ताआ फाशोअ जिवीत उठीइला वाअहीं आपाआ तारण ओवोहो. तो होरगाम गोयुहू आन देवोअ हाजाड़्यी वोग होय, आन देवदुत, होरगामेर्युउ आधिकार आन सेक्ती तियाआ आथोम होय.
जेहेलाहा नोहाअ दिही ओता, तेहेंज कोइत माहुंउं बेटाह्हाआ बी आविइलोअ ओवे. काहाके जेहेलाम रेल आवल्यी तिया गालाहा माअहें खातेतेन-पितेते, आन तियांमेहें वेहेवाले बी ओवतेते. जाअहूं जाआं नोहू जाहाजीम ने सोढ़्यू, आन एक्काइजे रेल आवित कोइत तियां आखाहा वोहाड़ीत लेत ने गोयी, ताअहूं जाआं तियांहां किज मुंदू ने गोयू; तेहेंज माहुंउं बेटाह्हाआ बी आविइलोअ आवे. तियी वेले बेन जोएं खेतोमेहें रोय, एक विसाइत जाय आन बिहीरो रोत जाय. बेन बाय कोअटी ओड्या कोए, तिहींमेएं एक विसाइत जाय आन बिहीरी रोत जाय.