1 ताहां यहोवा नोहाहा कोयो, "तू ताआ पुरा कुटूंबाअ आरी जाहाजेम जा; काहाके माहूं यी वेलेए माअहूंम रोत निस्तु तुज माआ नजरेम धर्मी सापड़्युहू. 2 आखी जातीइ सोका जनवारो मेर्‍येए ते तू हांत हांत जोड़वे मोन्ज्ये नर आन मादा लेजी; पोन जो जनवारे सोके कायनाहां, तियांमेर्‍येए बेन बेन लेजी, मोन्ज्ये नर आन मादा;✝7:2 लेवी 11 3 आन जुगोमेएं सिड़ामेर्‍येए बी हांत हांत जोड़े, मोन्ज्ये जोड़ी जोड़ी लेजी, के तियांआं वंश वासाइत कोइत पुरी धरतीपोअ बोणीत रोयतेहें. 4 काहाके ओमे हांत दिही फाश्या विते ताहां आंय धरतीपोअ सालीही दिही आन सालीही रात जाआं वोरहात पाड़तु रोहीं; आन जेते जनवारे आंय बोणायेहे तियां आखाहा धरतीइ उपोअ रोत आरवीत टाकीहीं." 5 यहोवा देवोअ यी आदेशोअ पुरमाणे नोहे कोअयो.

6 नोहाअ वय सोव होव वोरह्ये ओती, जेहेलाम रेल धरतीपोअ आयू. 7 नोहू तियाआ पोर्‍या, लाडी, आन वोवड़ीह्हीहीं आरी लेत कोइत रेलेम रोत वासाइलाअ काजे जाहाजेम गोयु.✝7:7 मत्तय 24:38,39; लुक 17:27 8 सोके आन एठे, बेनू जातीइ जनवारे, सिड़े, 9 आन धरतीपोअ होरतींडनारा जिवतोरोमेर्‍येए बी, बेन बेन, मोन्ज्ये जोड़ी-जोड़ी, जाहाजोमेहें नोहाआ जागे गोये, जेहें कोइत देवे नोहाहा आज्ञा आप्यीते. 10 हांत दिहोअ फासाड़ी धरतीपोअ रेलेए पाईं उसे रोत पोड़ू वोल्यू.

11 जाहां नोहाआ वय सोव होव वोरह्योअ दुसरा मोयनाआ सात्रावू दिही आयू; तेदिहींज वोडा उंडा दोर्‍याआ आखा उकला फुटीत निहीया आन जुगोअ पाअयोंअ बाअणे उगड़ीत गोये.✝7:11 2 पेत्र 3:6 12 आन वोरहात सालीही दिहीन सालीही रात्यी एक सारकू धरतीपोअ ओवतू रोयू. 13 तेदिहींज नोहू तियाआ पोर्‍या शेम, हाम, आन येपेत, आन तियाआ लाडीन तिनू वोवडीह्ही, 14 आन तियांआं आरी एकेक जातीइ आखे जोंगल्ये जनवारे, आन एकेक जातीइ आखे कोर्‍येए जनवारे, आन एकिकी जातीइ आखे धरतीपोअ होरतींडनारु जिवतोर आन एकिकी जातीइ उडनारे सिड़े जाहाजेम गोये. 15 जेता जनवारोमेहें जिवनोअ जिव ओतू तियांआं आखी जातीमेर्‍येए बेन बेन नोहाअ जागे जाहाजेम गोये. 16 आन जें गोये तें देवोअ आदेशोअ पुरमाणे आखी जातीइ जनवारोमेर्‍येए जोड़ी जोड़ी नर आन मादा गोये. ताहां यहोवा जाहाजोअ बाअणो वाली देदो.

17 धरतीपोअ सालीही दिही जाआं रेल ओवती रोयी; आन पाईं खुबुज वादीत गोयो, जियावाअहीं जाहाज उसे आखलाइत गोयी; आन ते धरतीपोअ रोत उसे तोरंगाइ वोल्यी. 18 पाईं वादतो वादतो धरतीपोअ जास्तीज वादीत गोयो, आन जाहाज पाअयोंपोअ तोरंगाअती रोयी. 19 पाईं धरतीपोअ खुबुज वादीत गोयो,एतोह जाआं के पुरी धरतीपोअ जेत्ता वोडा वोडा डोगोअ ओता, आखा बुडीत गोया. 20 पाईं पोनर आथ फाश्योअ उसे वादीत गोयो, आन डोगोअ बी बुडीत गोया. 21 आन सिड़े, कोर्‍येए जनवारे, जोंगल्ये जनवारे, आन धरतीपोअ आखे सालनारे जनवारे, आन धरतीपोअ गुजूगुजू पोआइत रोनारे आखे जिवतोर आन आखे माअहें मोइत गोये. 22 जें जें धरतीपोअ ओते, तियांमेर्‍येए जेत्ताआ नाकोमेहें जिवनोअ हावा ओती, तें आखे आरवाइत गोये. 23 आन माअहें, जनवारे, होरतींडनारे जिवतोर, जुगोमेर्‍येए सिड़े, जें जें धरतीपोअ ओते बादे धरतीपोअ रोत आरवाइत गोये; निस्तु नोहू, आन जेते तियाअरी जाहाजेम ओते, तेज वासाअये. 24 आन पाईं धरतीही एक होव पोन्नास दिही जाआं टापित मिक्यी.