1 यहोवा देवे मोशेहे कोयो, 2 "इस्राएलवालाहां कोजी के इस्राएलवालामेहें रोत नेताहां इस्राएलवालाआ विसमेहें रोनारा पारका माअहोंमेहें, कोडोज बी काहा नाहां रोतो, जो तियाआ पोर्‍याहा मोलेक देवताहा* गाराहा कोए, तियाहा नक्की माइत टाकी देवाअहूं जोवे; आन माअहें तियाहा डोणाटुहूं जोवे. 3 आंय बी तिया माअहुंउं विरुद्दाम ओत कोइत तियाहा तियांआं माअहोंम रोत याआ कोअते आरवीहीं के तिये तियाआ पोर्‍ये मोलेक देवताहा आपीत कोइत माआ पवित्र जागाहा एठु कोअयुहू, आन माआ सोका नावोहो एठो ठरव्योहो. 4 आन जर एखु तियाआ पोर्‍याहा मोलेक देवताहा गाराहा कोए, आन माअहें तियाआ बाप्तिमेहें आगे-फाश्येए कोए आन तियाहा ने माए, 5 ताहरुउ आंय सोताहा तिया माअहुंउं आन तियाआ घराणाआ विरुद्दाम जात कोइत तियाहा आन जेत्ते तियाआ मानित कोइत मोलेक देवताअरी सिनालाआ कोए तियां आखाहा बी तियांआं माअहोंअ विसमेहें रोत आरवीत टाकिहीं.✝

6 "ताहां जों माहुंउं कागल पांड्याआ नेत पुतोहो जागाड़नाराआ वाते लागनाराआ आन तियांआं फासाड़ी जात कोइत सिनालाआ होसऱ्योअ बोणे, ताहां आंय तिया माहुंउं विरुद्दाम जात कोइत तियाहा माआ माअहोंअ विसमेहें रोत आरवीत टाकिहीं.✝ 7 तियाहा काजे तुमू सोताहा सोके कोआ; आन पवित्र बोणीत रोवा; काहाके आंय तुमाआ यहोवा देव होय.✝ 8 तुमू माआं कायदाआ मानजा, आन तियींइं पालन बी कोअजा; काहाके तुमुहूं पवित्र कोअनारु आंय यहोवा देव होय. 9 जो माअहुंउं तियाआ आयहीही नेताहां तियाआ आब्हाहा हाराप आपे, तो माइत टाकी देवाय; तिये तियाआ आयहीही नेताहां तियाआ आब्हाहा हाराप आप्युहू तिहींइं काजे तियाआ रक्त तियाआज बोसी रोय.✝

10 "जर एखु पारकी बोईंइ आरी सिनालो कोए, ताहां जिये एखा बिहीराआ बोईंइ आरी सिनालो कोअयो ओय ताहां तिया माट्योहो आन तियी बोईंहीं बेनुहूं माइत टाकुहूं जोवे.✝ 11 जर एखु तियाआ जिजीह्हीही राखे; तो तियाआ आब्हाआज डिल उगाड़नारु ठोरे; तियाहा काजे तियां बेनुहूं माइत टाकाअहूं जोवे, तियांआं रक्त तियांआंज बोसी रोय.✝ 12 जर एखु तियाआ वोवड़ीह्हीही राखे, ताहां तियां बेनुहूं माइत टाकुहूं जोवे; काहाके तियां उलटो काम कोअयोहो, आन तियांआं रक्त तियांआंज बोसी रोय.✝ 13 जर एखु माटी एखा माटीइरी तेहेंज कोइत काम कोए, जेहें कोइत एखी बोईंइरी ताहां तियां एक खाराब काम कोअयोहो, तियाहाकोत ते बेनु नक्की माईंत टाकाअहूं जोवे, आन तियांआं रक्त तियांआंज बोसी रोय.✝ 14 जर एखु तियाआ लाडीही आन हावेह्हेहे बेनुहूं राखे, ताहां तो महापाप होय; तिहींइं काजे तो माटी आन तें बोईं तियां तिनुहूं आगीमेहें पेटाड़ी देअहूं जोवे, जिहींवाअहीं तुमाआ विसमेहें महापाप ने ओवे.✝ 15 जर एखु माटी पाल्ल्या जनवारोहो राखतू ओय, ताहां तो माटी आन जनवार बेनुहूं माइत टाकुहूं जोवे. 16 जर एखु बोईं पाल्ल्या जनवारोअ आहने जात कोइत तियाअरी राखाय, ताहां तियी बोईंहीं आन जनवारोहो माइ देजा; आन तियां बेनुहूं माइत टाकाअहूं जोवे, तियांआं रक्त तियांआंज बोसी रोय.✝

17 "जर एखु तियाआ बोअह्हींहीं, ते खाजगी ओय नेताहां काका-बाबाआ ओय, तियीइ उगड़ाअलो डिल देखे, आन तियाआ बोअह्हीं बी तियाआ उगड़ाअलो डिल पाले, ताहां ए इज्जोतेए गोठ होय, तियां बेनुहूं तियांआं जातीइ माअहोंअ सामने आरवी देअहूं जोवे; काहाके जो तियाआ बोअह्हींइं डिल उगाड़े तियाहा सोताआ गुनाआं वोजू सोताहा आखलुहूं पोड़े.✝ 18 फाश्योअ जर एखु माटी एखी मुन्सोलु आवल्यी बोईंइरी हुवीत कोइत तियीइ डिल उगाड़े, ताहां तो माटी तियीइ वोहत्ला रक्ताआ उगाड़नारु ठोरे, आन ते बोईं बी तेहेलीज ठोरे; तिहींइं काजे तियां बेनुहूं तियांआं माअहोंम रोत आरवी देवाअहूं जोवे.✝ 19 तुमाआ जिजीह्हीही आन फुयीह्हीही मा राखहा, काहाके जो तियीही राखेहे तो तियाआ आहनेए कोर्‍याआ इजोत वेरेहे; तिहींइं काजे तियां बेनुहूं तियांआं पापोअ वोजू तियांहांज आखलुहूं पोड़े. 20 जर एखु तियाआ काकीह्हीही राखे, ताहां तो तियाआ काकाह्हाआ इजोत वेरेहे; तियाहा काजे ते बेनु तियांआं पापोअ वोजू लेत कोइत बिगर पोर्‍याआज मोइत जानारे.✝ 21 जर एखु तियाआ पाबीह्हीही नेताहां वोवड़ीह्हीही राखीत लेय, ताहां ओं सोगदायीइ वेवारो रोय; आन तो माटी तियाआ पायहोअ इजोत वेरनारु ठोरे, तियाहा काजे ते बेनु वांज्ये रोय.✝

22 "तुमू माआं कायदा आन माआं नियमोहों मानजा; जियावाअहीं एहेलोहो ने ओवुहूं जोवे के जिया देसोमेहें आंय तुमुहूं लेत जाहो, तो तुमुहूं उखली देय. 23 आन तियां देसोअ माअहुंहूं आंय तुमाआ सामने रोत काडोहो तियांआं रितीरिवाजोपोअ मा सालहा; काहाके तियां माअहूं जे एं आक्खे पापे कोअयेहे तिहीं वाअहीं माहूं तियां माअहुंउरी सोगदाय हासवाअहे. 24 पोन आंय तुमुहूं कोहो के तुमू ते तियांआं देसोअ मालिख बोणहां, आन आंय या देसोहो जियामेहें दुदोअ आन मोदोअ तार्‍यी वोहतीही तुमाआ आधिकारोम कोइ देहीं; आंय तुमाआ यहोवा देव होय जिये तुमुहूं बिहीरा देसोअ माअहुंउं रोत आलाग कोअयेहे. 25 तिहींइं काजे तुमू सोका आन एठा जनवारोम, सोका आन एठा सिड़ाम फरक कोअजा; आन एखु जनवार नेताहां सिड़ो नेताहां कोड्लीज जातीइ पुंयपोअ होरतींडनारु जिवजोर कोड्लोज बी काहा नाहां रोतू, जियाहा आंय तुमाआ कोअते एठो ठोरव्योहो, तियावाअहीं सोताहा एठे मा कोअहा. 26 तुमू माआं काजे पवित्र बोणीत रोजा; काहाके आंय यहोवा सोताहा पवित्र होय,✝ आंय तुमुहूं आन देसोअ माअहुंहूं याअकाजे आलाग कोअयेहे के तुमू हादाजोलम माआंज बोणीत रोअहूं जोवे.

27 "जर एखु माटी नेताहां बोईं, कागलपांड्यू नेताहां पुतोअ जागाड़नारु ओय, ताहां तियाहा माइत टाकाअहूं जोवे; एहेलाहा डोणाटुहूं जोवे, तियांआं रक्त तियांआंज बोसी रोये."✝