1 "तुमू तुमाआ काजे मुर्ती मा बोणावहा, आन मा एखू कोरवीइल्यी मुर्ती नेताहां डोणोअ टावर उबा कोअहा, आन तुमाआ देसोम सित्रावाला डोंण मा थापोन कोअहा आन तियाआ भक्ती बी मा कोअहा; काहाके आंय तुमाआ यहोवा देव होय.✝ 2 तुमू माआं आरामोअ दिहोहो मानजा आन माआं पवित्र जागाअ बिक मानजा; आंय यहोवा देव होय.

3 "जर तुमू माआं नियमोपोअ सालहा आन माआं आदेश मानित कोइत तियींइं पालन कोअहा, 4 ताहां आंय तुमाआ काजे वेले वेलेपोअ वोरहात पाड़ीहीं, ताहां खेत तियीइ पाकाय उब्जाड़े, आन पुंय साड़े तियां तियांआं फलवे आप्या कोए; 5 तुमू दाराक्शे तोड़ीइलाअ होमसे बी मोल्याज कोअहा, आन ओइलोअ होमसे जांआं दाराक्शे तोड़्याज कोअहा, आन तुमू पेट पोइत रोटू खाया कोअहा, आन तुमाआ देसोम मानमान्ये रोहा.✝ 6 आन आंय तुमाआ देसोम होक आराम आपीहीं, तुमू हुवाहा आन तुमुहूं कोडोज ने बिवाड़े; आन आंय तुमाआ देसोम खाराब जनवारोहो ने रोअहूं देंव, आन तारवाअ तुमाआ देसोम ने साले. 7 आन तुमू तुमाआ दुस्मनोहों देत कोइत ओड़ीत लेहा, आन ते तुमाआ तारवाइ वाअहीं माआंय. 8 तुमामेर्‍येए पास माअहें होव माअहुंहूं गुगदाड़े आन होव माअहें दाहा हाजार माअहुंहूं गुगदाड़े; आन तुमाआ दुस्मोन तारवाइ वाअहीं तुमाआ आगाड़ी माआंय; 9 आन आंय तुमापोअ मेरवानीइ नजर मिकीहीं आन तुमुहूं वादाड़ीहीं आन वादाड़ीहीं, आन तुमाअरी माआ वायदो पुरो कोअहीं. 10 आन तुमू मिकल्या जुनो ओनोहों खाहा, आन नवो ओन रोय तेबी जुना ओनोहों सापड़े काडहा. 11 आन आंय तुमाआ विसमेहें माआं रोअलाआ थानोक मिकीहीं, आन आंय तुमुहूं सीस ने कोओ. 12 आन आंय तुमाआ विसमेहें फिर्‍या कोअहीं, आन तुमाआ देव बोणीत रोहीं, आन तुमू माआं माअहें बोणीत रोहा.✝ 13 आंय तुमाआ तो यहोवा देव होय, जो तुमुहूं मिसर देसोम रोत याअ काजे काडीत लेतावयू के तुमू मिसरवालाआ गुलाम ने बोणीत रोअहूं जोवे; आन आंय तुमाआ जुहोरोहो तोड़ीत टाक्योहो, तुमुहूं होल्ले उबे राखीत कोइत सालाड़्येहे.

14 "जर तुमू माआं ने उनाअहा, आन या आखा आदेशोहो ने मानहा, 15 आन माआं नियमोहो रिकामा जाअहां, आन तुमाआ आत्मा माआं गोठीइ सीस कोए, आन तुमू माआं आखी आदेशोअ पालन ने कोअहा, एतोज नाहां तुमू माआं वायदाहा तोड़हा, 16 ताहरुउ आंय तुमाअरी ओं कोअहीं; मोन्ज्ये आंय तुमुहूं उसकाहीज ओसविहीं, बिमारी आन जोरु मोकलिही, आन जियावाअहीं तुमाआ डोआ तुंद्राअलाहा ओत जाय, आन तुमाआ मोन जास्ती नाराज रोय. आन तुमाआ बियारु ओइलाआ वाया जाय, काहाके तुमाआ दुस्मोन तियाआ फोल खात जाय; 17 आन आंय बी तुमाआ विरुद्दाम ओत जाहीं, आन तुमू तुमाआ दुस्मोनोअरी हारात जाहा;आन तुमाआ दुस्मोन तुमापोअ राज सालाड़े, आन एखू ओड़ीत लागनारो ने बी रोय तेबी तुमू गुगदाहा. 18 जर तुमू यीं गोठीही वेठीइलाअ पोअ बी तुमू माआं गोठी ने उनाअहा, ताहरुउ आंय तुमाआ पापोअ वाखरी तुमुहूं हांत भाग शिक्शा आपीहीं, 19 आंय तुमाआ सेक्तीइ वोडाय मुड़ीत टाकीहीं, आन आंय तुमाआ काजे जुगोहो लोड़ाअ होस आन धरतीही इसत्लेए होस बोणावी देहीं; 20 आन तुमाआ पुरी मेहेंनत वाया जाय, काहाके तुमाआ खेत तियाआ पाक ने उब्जाड़े, आन साड़े तियांआं फलवे ने आपे.

21 "जर तुमू माआं विरुद्दाम साल्याज कोअहा, आन माआं कोअलोअ ने उनाअहा, ताहां आंय तुमाआ पापोअ पुरमाणे तुमापोअ फाश्यु हांत भाग ओड़सन टाकीहीं. 22 आंय तुमाआ विसमेहें रानठ्ये जनवारे मोकलीहीं, जे तुमाआ पोर्‍याहा तुमाप रोत लेत जाते रोय आन तुमाआ कोर्‍याआ जनवारोहो आरवीत टाके, आन तुमाआ गोणती कमी ओवे, जिहींवाअहीं तुमाआ सड़क्यी हुंद्ल्यी पोड़ीत जाय.

23 "जर तुमू यीं शिक्शा वाअहीं बी तुमू ने हुदराहा, आन माआं विरुद्दाम सालतेज रोहा, 24 ताहां आंय बी तुमाआ विरुद्दाम सालिहीं, आन तुमाआ पापोअ वाखरी आंय सोताहाज तुमुहूं हांत भाग डोंड आपिहीं. 25 आंय तुमापोअ एक एहेलिही तारवाआ सालविहीं, जे वायदो तोड़ीइलाअ पुरीन पुरी बोदलू लेय;आन जाहां तुमू तुमाआ होयरोम जात कोइत टोलु वोलीत रोहा, तेहेलाम आंय तुमाआ विसमेहें मोराय पसराविहीं, आन तुमू तुमाआ दुस्मोनोअ आथोम होपी देवाअहा. 26 जाहां आंय तुमाआ ओनोअ आदार कम कोइ देहीं, तेहेलाम दोहो बोईं एकीज सुलीपोअ रोटू सुड़वे, आन ताहरीइ ते तोलीत तोलीत वाटी देय; तुमू रोटू खाहा, पोन ने ताराअहा.

27 "जर यापोअ बी तुमू माआं गोठ ने उनाअहा, आन माआं विरुद्दाम सालते रोहा, 28 ताहां आंय माआं न्यायोम तुमाआ विरुद्दाम सालिहीं, आन तुमाआ पापोअ वाखरी तुमुहूं हांत भाग डोंड फाश्यूउ बी आपीहीं. 29 तुमुहूं तुमाआ बेटाह्हांआं आन बेटिह्हींइं माहां खाअहूं पोड़े. 30 आन आंय तुमाआ पुजाआ उसा जागाहा ओदारी देहीं, आन तुमाआ दिहोअ देवान्याहां फोड़ीत टाकीहीं, आन तुमाआ तोड़ोहो देवताआ कोड़ल्यी मुर्तीपोअ उडाड़ी देही; आन माआं आत्माहां तुमाआ सीस ओत जाय. 31 आंय तुमाआ होयरोहों उजाड़ी देहीं, आन तुमाआ पवित्र जागाहा उजाड़ी देहीं, आन तुमाआ हाजो गुंदाअनारो हाजी गोंद मान्य ने कोअहीं. 32 आन आंय तुमाआ देसोहो हुंद्लो कोइ देही,आन तुमाआ दुस्मोन जे तियाम रोतेहे ते यीं गोठीवाअहीं बोगलाय. 33 आंय तुमुहूं देसो देसोम वेरासेर कोअहीं, आन तुमाआ फासाड़ी तारवाआ उमाइत रोहीं; आन तुमाआ देस हुंद्लो ओत जाय, आन तुमाआ होयर उजाड़ पोड़ीत जाय.

34 "ताहां जेताहा दिही जांअ दुस्मोनोअ देसोम रोहा आन तुमाआ देस उजाड़ रोय, तेताहा दिही तुमाआ देस आरामोअ दिही मान्या कोए, ताहांज तो देसोहो आराम मिले, मोन्ज्ये तियाआ आरामोअ दिहोहो मान्या कोए. 35 जेताहा दिही तो देस उजाड़ पोड़ीत रोय तेताहा दिही बी तियाहा आराम रोय, मोन्ज्ये जो आराम तुमाआ तिहीं तिया कायम रोअला वाअहीं तियाहा ने मिल्युतो तो तियाहा तेहेलाम जोड़े. 36 आन तुमामेर्‍येए जे वासाइत रोय आन ते दुस्मोनोअ देसोम रोय, तियांआं दिलोम आंय बिक फोहाड़ीहीं; आन ते खाको खोकड़ीइला वाअहीं बी गुगदे वोले, आन ते एहेलेहे गुगदे जेहेलेहे एखू तारवाइप रोत वासाइलाअ काजे गुगदेहे, आन कोडोज फाट ने लागे तेहेंज ते उठलीत पोड़े. 37 कोडोज ओड़ीत लागनारो ने ओय तेबी सोमजा तारवाइ बिके वाअहीं एकानेकाहा आद्लाइत पोड़तेज जाय, आन तुमुहूं तुमाआ दुस्मोनोअ सामने उबो रोअहूं जाराक बी सेक्ती ने रोय. 38 ताहां तुमू देसोअ देसोअ विसमेहें पोतीत कोइत आरवाइत जाहा, आन तुमाआ दुस्मोनोअ पुंय तुमुहूं खात जाय. 39 आन तुमामेर्‍येए जे वासाइत रोय ते तियांआं दुस्मोनोअ देसोमेहें तियांआं गुनाआं वाखरी ओगलीत जाय; आन तियांआं डायहांआं खाराब कामोअ वाखरी बी ते तियांआंज होस ओगलीत जाय.

40 "पोन जर ते सोताआ आन तियांआं डायहांआं गुनाहां मानित लेय, जे तियां माआं विरुद्दाम विश्वास तोड़ीत कोइत आन ओं बी मानित लेय के आमू यहोवा देवोअ विरुद्दाम साल्येते, 41 तिहींज वाअहीं तो आपाआ विरुद्दाम ओत कोइत आपुहूं दुस्मोनोअ देसोम लेतावयुहू. जर तेहेलाम ते तियांआं तियांआं कठीण मोनोहो* नम्र कोए, तियांआं पापोअ डोंडोहो मानित लेय;✝ 42 ताहां जो वायदो आंय याकोबोअरी कोअयोतो तियाहा आंय ओर कोअहीं, आन जो वायदो आंय इसाहाकोअरी आन जो वायदो आंय अब्राहामोअरी कोअयोतो तियांहां बी आंय ओर कोअहीं, आन या देसोहो बी आंय ओर कोअहीं.✝ 43 पोन तो देस तियांआं वासी हुंद्लोज पोड़ीत रोय, आन तियांआं वासी हुंद्लोज रोत कोइत बी आरामोअ दिहोहो मानतो रोय; आन ते माअहें तियांआं पापोअ डोंडोहो मानित लेय, याआज वाखरी के तियां माआ आदेशोहो ने मान्यीते, आन तियांआं आत्माहां माआं नियमोपोअ सीस ओती. 44 एतोहो ओवो तेबी जाहां ते तियांआं दुस्मोनोअ देसोम रोये, ताहां आंय तियांहां एहेंकोइत ने सोड़ो, आन ने तियांहां एतिही सीस कोअहीं के तियांहां एकसोट्येज आरवी देंव, आन माआं तिया वायदाहा तोड़ी देंव जो आंय तियांअरी कोअयोहो; काहाके आंय तियांआं यहोवा देव होय; 45 पोन आंय तियांआं हाजलायीइ काजे तियांआं वेगाअ डायहांअरी कोअल्या वायदाअ ओर कोअहीं; जियांहां आंय देस देसोअ डोआअ सामने मिसर देसोम रोत काडीत लेतावयू के आंय तियांआं देव ठोरो; आंय यहोवा देव होय."

46 जे जे विधी आन नियम आन कायदा यहोवा देवे सोताअहें रोत इस्राएलवालाआ काजे सिनाय डोगोपोअ मोशेवाअहीं ठोरव्याते ते एज होय.