1 फाशुउ यहोवा देवे मोशेहे कोयो, 2 "इस्राएलवालाहां ओं को, के जर एखू माहुंउं यहोवा देवे मोन्या कोअयेहे तियां कामोमेर्‍याआ एकाहा बी सुकीत कोइत पापी ओत जाय; 3 आन जर अभिशिक्त पुंजारु एहेलोहो काम कोए जियावाअहीं माअहें दोशी ठोरे, ताहां तियाआ पापोअ वाखरी तो एक पुरा निर्दुस गोदाहा यहोवा देवोअ जागे पापोअ गाराहा कोत इसुहूं जोवे. 4 तो तिया गोदाहा मिलापवाला तोंबाआ बाओपोअ यहोवा देवोअ आगाड़ी लेत जात कोइत तियाआ मुन्कापोअ आथ मिकुहूं जोवे, आन तिया गोदाहा यहोवा देवोअ सामने गाराहा कोअहूं जोवे. 5 आन अभिशिक्त पुंजारु गोदाआ रक्तामेहें रोते थोड़ोक लेत कोइत मिलापवाला तोंबामेहें लेत जाअहूं जोवे; 6 आन पुंजारु तियाआ आंगली रक्तामेहें बुलीत कोइत आन तियामेहें रोते थोड़ोक लेत कोइत पवित्र जागाआ विसमेर्‍याआ पोड़दाआ आगाड़ी यहोवा देवोअ सामने हांत वारी साटारुहूं जोवे. 7 आन पुंजारु तिहींमेऱ्योअ रक्त मिलापवाला तोंबामेहें होय तियां यहोवा देवोअ सामनेवाला हाजा वास मारनारा तुमाणाआं देवान्याआ हिंगोपोअ हारुहूं जोवे; फाश्योअ गोदाआ उगरीइल्यो आखो रक्त देवान्याआ थुड़ोम जो मिलापवाला तोंबाआ बाअपुरे होय, तिहीं ओली देअहूं जोवे. 8 ताहरुउ तो पापोअ गाराहा कोअल्या गोदाआ पुरी सरबीही तियाप रोत आलाग कोअहूं जोवे, मोन्ज्ये जियी सरबी वाअहीं आते टापाइत रोतेहे आन जेत्ती सरबी तियांमेहें लोक्ठीत रोतीही, 9 आन बेनु किडनी आन तियांआं उपर्‍यीइ सरबी जे कंबरेए जागे रोतीही आन किडनी नेहें कांअजाआ उपर्‍यीइ सरबी, यां आखाहा तो एहें कोइत आलाग कोअहूं जोवे. 10 जेहेलेहे होमजोणोअ इसल्या गाराहाआ गोदाआ सरबीही तियाप रोत आलाग कोअतेहे, तेहें कोइत पुंजारु याहां आगीइ देवान्यापोअ पेटाड़ुहूं जोवे. 11 पोन तिया गोदाआ सांबड़ो, गुडा, मुन्को, आते, साआं, 12 आन आखो माहां, मोन्ज्ये पुरा गोदाहा पोड़ावाआ बारथे सोका जागामेहें, जिहीं खाआं टाकतेहे, तिहीं लेत जात कोइत लाकड़े पेटाड़ीत कोइत पेटाड़ी देअहूं जोवे.✝

13 "जर इस्राएलवालाआ आखे माअहें सुकीत बी पाप कोए आन ते गोठ माअहुंउं नजरेए आडोल ओय, आन तें माअहें यहोवा देवोअ एखा आदेशोअ विरुद्दाम काविंहीं कोइत दोशी ठर्‍ये ओय; 14 आन जेहेलाम तियांआं आथे ओवल्यू पाप तियांहां नजरे आवे, ताहां इस्राएलवाले माअहें एका गोदाहा पापोअ काजे गाराहा इसुहूं जोवे. तें तियाहा मिलापवाला तोंबाआ आगाड़ी लेत जाअहूं जोवे, 15 आन इस्राएलोअ माअहूं मेएं डाया माटी ओय ते जिवज्योअ आथोहो यहोवा देवोअ आगाड़ी गोदाआ मुन्कापोअ मिकुहूं जोवे, आन तो गोदू यहोवा देवोअ सामने गाराहा कोअहूं जोवे. 16 ताहरुउ अभिशिक्त पुंजारु गोदाआ रक्तामेहें रोते जाराक मिलापवाला तोंबामेहें लेत जाअहूं जोवे; 17 आन पुंजारु तियाआ आंगल्यी रक्तामेहें बुली-बुलीइ तियाहा विसमेर्‍याआ पोड़दाआ आगाड़ी हांत वारी यहोवा देवोअ सामने साटारुहूं जोवे. 18 आन तियाज रक्तामेहें रोते देवान्याआ हिंगोपोअ जे यहोवा देवोअ आगाड़ी मिलापवाला तोंबामेहें होये, तिहीं हारी देअहूं जोवे; आन उगरीइल्यो आखो रक्त तुमाणाआ देवान्याआ थुड़ोमेहें जो मिलापवाला तोंबाआ बाओपोअ होये, तिहीं ओली देअहूं जोवे. 19 आन तिया गोदाआ पुरी सरबी काडीत कोइत देवान्यापोअ पेटाड़ुहूं जोवे. 20 जेहेलोहो पापोअ काजे गाराहा कोइलोअ गोदाअरी कोअयोतो तेहेंज कोइत याअरी बी कोअहूं जोवे; एहें कोइत पुंजारु इस्राएलवालाआ कोअते गाराहा आपुहूं जोवे, ताहां तियांआं तो पाप माफ ओत जाये. 21 आन तो गोदाहा पोड़ावाआ बारथे लेत जात माअहोंअ पापोअ वोतीइ गाराहा कोअहूं जोवे; जेहेलोहो सोताआ वोतीइ गोदाहा गाराहा कोअयुतो; ओ माअहोंअ पापोअ वोतीइ गाराहा ठोरे.✝

22 "जाहां एखु मुख्य माटी पाप कोइत, मोन्ज्ये आपाआ यहोवा देवोअ एखा आदेशोअ विरुद्दाम सुकवात काविंहीं सुक कोइ देये, 23 आन तियाआ पाप तियाहा मुंदू जाय, ताहां तो एका निर्दुस बोकड़ू गाराहा कोइलाआ कोअते लेत आवे; 24 आन बोकड़ाआ मुन्कापोअ आथ मिके, आन बोकड़ाहा तिया जागापोअ गाराहा कोअहूं जोवे जिहीं आगीइ गाराहा जनवारे यहोवा देवोअ आगाड़ी गाराहा कोअतेहे; ओं पापोअ कोअते गाराहा ठोरे. 25 ताहरुउ पुंजारु तियाआ आंगल्यी वाअहीं तिया जनवारोअ रक्तामेहें रोते जाराक लेत कोइत आगीइ गाराहाआ देवान्याआ हिंगोपोअ हारुहूं जोवे, आन तियाआ उगरीइल्यो रक्त आगीइ गाराहाआ देवान्याआ थुड़ोम ओली देअहूं जोवे. 26 आन तो तियाआ पुरी सरबीही होमजोणोअ कोअते गाराहा सरबीइ होस देवान्यापोअ पेटाड़ुहूं जोवे; आन पुंजारु तियाआ पापोअ बाप्तिमेहें गाराहा आपुहूं जोवे, ताहां तों माफ ओत जाय.

27 "जर सादा माअहूं मेर्‍योअ एखु सुकवात पाप कोअयू, मोन्ज्ये एखु एहेलोहो काम जियाहा यहोवा देव मोन्या कोअयो ओय तियाहा कोअयो, ताहां तो दोशी ठोरे, 28 ताहां तों तिया पापोअ वाखरी एक निर्दुस बोकड़ीइ गिद्ली गाराहा कोइलोअ कोअते लेत आवुहूं जोवे; 29 आन तियीही पापोअ वोतीइ गाराहा कोए ताहां तियीइ मुन्कापोअ तों सोताआ आथ मिकुहूं जोवे, आन आगीइ गाराहा कोइलोअ जागापोअ पापोअ वोतीइ गाराहा कोअहूं जोवे. 30 आन पुंजारु तिया रक्तामेहें सोताआ आंगल्यी बुलीत आगीइ गाराहाआ देवान्याआ हिंगोअरी हारी देअहूं जोवे, आन तियाआ उगरीइल्या रक्ताहा तियाज देवान्याआ थुड़ोम ओली देअहूं जोवे. 31 आन तो तियाआ पुरी सरबीही होमजोणोअ काजे गाराहा कोइलोअ जनवारोअ सरबीइ होस आलाग कोअहूं जोवे, ताहरुउ पुंजारु तियाहा देवान्यापोअ यहोवा देवोअ कोअते हाजी गोंदेए कोअते पेटाड़ुहूं जोवे; आन एहेंकोइत पुंजारु तियाआ कोअते गाराहा आपुहूं जोवे, ताहां तियाहा माफी जोड़े.✝

32 "जर तो पापोअ वोतीइ गाराहा कोइलोअ काजे एका मेडाआ गिद्ली लेतावे, ताहां ते निर्दुस रोअहूं जोवे, 33 आन तो तियाआ आथ पापोअ काजे गाराहा कोइलोअ जनवारोअ मुन्कापोअ मिकुहूं जोवे, आन तियाहा पापोअ उस्ती तिहींज गाराहा कोअहूं जोवे जिहीं आगीइ गाराहा कोइलोअ जनवारोअ गाराहा कोआतीही. 34 ताहरुउ पुंजारु पापोअ काजे गाराहा कोअयोय तिया रक्तामेहें रोते सोताआ आंगल्यी बुलीत आगीइ गाराहाआ देवान्याआ हिंगोपोअ हारुहूं जोवे, आन आन तियाआ आखा उगरीइल्या रक्ताहा तियाज देवान्याआ थुड़ोम ओली देअहूं जोवे. 35 आन तो तियाआ पुरी सरबीही होमजोणोअ गाराहाआ मेडाआ बासाआ सरबीइ होस आलाग कोअहूं जोवे, आन पुंजारु तियी सरबीही देवान्यापोअ यहोवा देवोअ काजे गाराहा कोत पेटाड़ुहूं जोवे; आन एहेंकोइत पुंजारु तियाआ पापोअ कोअते गाराहा आपुहूं जोवे, आन तियाहा माफी जोड़े.