1 यहोवा देवे मोशेहे आन आरोनोहों कोयो, 2 जाहां एखा माहुंउं डिलोअ साम्बड़ापोअ हुज नेताहां गुंबड़ू नेताहां पांडू डाग ओय, आन तिहीं वाअहीं तियाआ साम्बड़ापोअ वोडा दुखोअ होस काविंहीं देखाय, ताहां तियाहा आरोन पुंजाराआ जागे नेताहां तियाआ बेटाह्हा जे पुंजारा होय तियांमेर्‍याआ एखाआ जागे लेत जाअहूं जोवे. 3 जेहेलाम पुंजारु तियाआ साम्बड़ापोऱ्याआ दुक्ताहा पाले, आन जर तिया दुक्ताआ जागे रुंग्हें पांडे ओत गोये ओय आन दुक्तो साम्बड़ाप रोत माय देखाय, ताहां तो जाइंत लेअहूं जोवे के वोडा दुखोअ दुक्तो होय; आन तों पालीत कोइत पुंजारु तिया माहुंहूं एठो ठोरवुहूं जोवे. 4 जर तियाआ डिलोअ साम्बड़ापोऱ्युउ डाग पांडू ओय आन साम्बड़ापोअ उंडे रोत ने देखाअतू ओय, आन तियी जागेए रुंग्हें पांडे ने ओवये ओय, ताहां पुंजारु तियाहा हांत दिही जाआं अलग कोइत मिकुहूं जोवे; 5 आन सांतवे दिही पुंजारु तियाहा पाले, आन जर तों सांदो जेहलोन तेहलोज ओय आन तियाआ साम्बड़ामेहें ने पोसर्‍योय, ताहां पुंजारु तियाहा फाश्युउ बी हांत दिही जाआं केंडीत मिकुहूं जोवे; 6 सांतवे दिही पुंजारु फाश्युउ तियाहा तापासुहूं जोवे, आन जर तों सांदो कोमाअलो देखाय आन साम्बड़ामेहें ने पोसर्‍योय, ताहां पुंजारु तियाहा सोको ठोरवुहूं जोवे; काहाके तों सादो सांदो होय; आन तों माहुंउं तियाआ आंगड़े तुवीत कोइत सोको ओवुहूं जोवे. 7 पोन पुंजाराआ तापासीइलाआ फासाड़ी जर तिया सोका ठोरवाअला माहुंउं साम्बड़ामेहें तों सांदो वादार पोसरीत जाय, ताहां तो पुंजाराहा फाशुउ देखाड़ुहूं जोवे; 8 आन जर तों सांदो साम्बड़ाम पोसरीत गोयोहो एहलोहो पुंजाराहा देखाय, ताहां तो तियाहा एठो ठोरवुहूं जोवे; काहाके तों वोडो दुख होय.

9 जर वोडा दुखोअ होसर्‍यीइ बिमारी एखा माअहुंहूं ओय, ताहां तियाहा पुंजाराआ जागे लेत जाअहूं जोवे; 10 आन पुंजारु तियाहा तापासुहूं जोवे, आन जर तियाआ साम्बड़ापोअ पांडी हुज ओय, आन तिहींइं रुंग्हें बी पांडे ओत गोयेय, आन हुजेपोऱ्योअ सांदो पाकीत गोयोय, 11 ताहां तियाआ साम्बड़ामेहें तो जुनो वोडो दुख होय; तियाहा काजे पुंजारु तियाहा एठो ठोरवुहूं जोवे; तो तियाहा आलाग ने मिके; काहाके तों एठो होय. 12 आन जर एखा माअहुंउं साम्बड़ाअरीइ वोडो दुख फुटीत कोइत मुंडोअहीं रोत्ते गुडाआ खेटवोअहीं जाआं तों पुरो डिल पोइत साम्बड़ाम पोसर्‍योय ओं पुंजारु पाले, 13 ताहां पुंजारु तियाहा पुरो डिलुज वारुहूं तापासुहूं जोवे, आन जर वोडो दुख तियाआ पुरे डिलेज पोसरीत गोयोय, ताहां तो तिया माअहुंहूं सोको ठोरवुहूं जोवे; काहाके तियाआ पुरो डिल पांडो ओत गोयोहो, ताहां तों सोको होय. 14 पोन जाहां तियाआ डिलोपोअ साम्बड़ो उपटीत माहां साल्योज देखाय, ताहां तों एठो ठोरुहूं जोवे. 15 साम्बड़ो उपटीत गोल्यो माहां पालित कोइत पुंजारु तियाहा एठो ठोरवुहूं जोवे; काहाके तेहेलोहो विण साम्बड़ाआ माहां एठोज रोहे; तों वोडो दुख होय. 16 पोन तों विण साम्बड़ाआ माहां फाश्योअ पांडो ओत गोयो, ताहां तों माहुंउं पुंजाराआ जागे जाअहूं जोवे; 17 आन पुंजारु तियाहा तापासे, आन जर ते बिमारी फाश्यीइ पांडी ओत गोयीय, ताहां पुंजारु तियाहा सोको ठोरवुहूं जोवे; तो सोको होय.

18 जर एखाआ साम्बड़ामेहें फोड़ निहीत कोइत हाजू ओत जाय, 19 आन तिया फोड़ाआ जागापोअ पांडी हुज नेताहां रात्बाअलुहूं पांडू डाग ओय, ताहां तों पुंजाराहा देखाड़ुहूं जोवे; 20 पुंजारु तियाहा तापासे, आन जर तों साम्बड़ाप रोत उंडे देखाय, आन तियाआ रुंगहे बी पांडे ओत गोयेय, ताहां तो तिया माहुंहूं एठो ठोरवुहूं जोवे; काहाके ओं वोडा दुखोअ दुक्तो होय, जों फोड़ाम रोत फुटीत कोइत निहींयोहो. 21 पोन पुंजारु तियाहा तापासे तिहींइं फासाड़ी तियापोर्‍येए रुंगहे पांडे ने ओवेय, आन तिया साम्बड़ाआ जागे उंडू खाडू ने ओवुय, ताहां पुंजारु तिया माअहुंहूं हांत दिही जाआं केंडीत मिकुहूं जोवे; 22 आन जर तों तेदिहीं जाआं साम्बड़ामेहें हुदाअलीज पोसरीत जाय, ताहां पुंजारु तिया माअहुंहूं एठो ठोरवुहूं जोवे; काहाके ते वोडा दुखोअ दुख होय. 23 पोन जर तो डाग ने पोसरे आन होय तियीज जागे तेतुहूज रोय, ताहां तो फोड़ाआ डाग होय; पुंजारु तिया माअहुंहूं सोको ठरवे.

24 "नेताहां एखा माहुंउं दुक्तो डाजल्याआ सांदी ओय, आन तियी सांदीमेहें रात्बाअलुहू पांडू डाग बोणीत जाय, 25 ताहां पुंजारु तियाहा तापासुहूं जोवे, आन जर तियी सांदीमेर्‍येए रुंगहे पांडे ओत गोयेय आन साम्बड़ाम रोत तियी जागे उंडू खाडू देखाअतुय, ताहां तों वोडो दुख होय; जों तियी डाजल्यी सांदीइ जागे रोत फुटीत निहींयोहो; पुंजारु तिया माहुंहूं एठो ठोरवुहूं जोवे; काहाके तियामेहें वोडा दुखोअ बिमारी होय. 26 पोन पुंजारु तापासे तेहलाम सांदाआ जागापोर्‍येए रुंगहे पांडे ने देखाय, आन साम्बड़ाप रोत जारिक उगड़ातो आन सोमोक कम ओवीही एहेलोहो पुंजाराहा देखाय, ताहां तो तियाहा हांत दिही जाआं केंडीत मिकुहूं जोवे; 27 आन सांतवे दिही पुंजारु तियाहा तापासुहूं जोवे, आन जर तो पांडू डाग पोसरीइतु गोयुय, ताहां पुंजारु तिया माहुंहूं एठो ठोरवुहूं जोवे; काहाके तियाहा वोडा दुखोअ बिमारी होय. 28 पोन जर तो डाग साम्बड़ामेहें ने पोसर्‍युय आन जिहीं ओतु तिहींज ओय, आन ते सांदी बुजाअती गोयीय, ताहां तो डाजल्याआ सांदो हुज्योहो कोत पुंजारु तिया माहुंहूं सोको ठोरवुहूं जोवे; काहाके ते सांदी डाजल्या वाअहीं ओवीही."

29 फाश्योअ जर एखा माट्योअ नेताहां बोईंइ मुंडोम, नेताहां माट्योअ दाड़ीमेहें सांदो ओय, 30 ताहरुउ पुंजारु सांदाहा पाले, आन जर तो साम्बड़ाप रोत उगड़ातो देखाय, आन तियामेहें पिवलाअलेहे सिणले सिंग्ये ओय, ताहां पुंजारु तिया माअहुंहूं एठो ठोरवुहूं जोवे; तो सांदो मुन्काआ नेताहां दाड़ीइ वोडो दुख होय, मोन्ज्ये विवलीइनारो दुख होय. 31 पुंजारु खोजलीइनारी बिमारीही तापासीत पालुहूं जोवे; साम्बड़ाप रोत उंडे कायने ओय, आन तियामेहें काल्ले सिंग्ये ने ओय, ताहां पुंजारु तिया बिमारीवालाहा हांत दिही जाआं केंडीत मिकुहूं जोवे. 32 हांतवे दिही पुंजारु दुखोहो तापासुहूं जोवे, तेहेलाम जर तो खोजलीइनारी दुख ने पोसर्‍यो, आन तियामेहें पिवलाअलेहे सिंग्ये ने ओय, आन ते साम्बड़ाप रोत उगड़ातो ने देखाय, 33 ताहां तों माअहुंउं सिंग्ये ते कात्रावीत लेअहूं जोवे; पोन विवलीइनारी बिमारीइ जागेए सिंग्ये ने कात्रुहूं जोवे; आन पुंजारु तिया माअहुंहूं फाश्युउ बी हांत दिही जाआं केंडीत मिकुहूं जोवे; 34 आन सांतवे दिही पुंजारु बिमारीही तापासुहूं जोवे, जर खोजलीइनारी बिमारी साम्बड़ापोअ ने पोसर्‍यी ओय, आन ते साम्बड़ाप रोत उंडे ने देखाअती ओय, ताहां पुंजारु तिया माअहुंहूं सोको ठोरवुहूं जोवे; आन तो माहुंउं तियाआ आंगड़े तुवीत कोइत सोको ओत जाअहूं जोवे. 35 पोन जर तों सोको ठोरे तिहींइं फासाड़ी बी विवलीइनारी बिमारी पोसरे, 36 ताहरुउ पुंजारु तियाहा तापासुहूं जोवे, आन जर ते साम्बड़ाम पोसर्‍यी ओय, ताहां पुंजारु तें पिवले सिंग्ये ने होदुहूं जोवे; काहाके तो माहुंउं एठो होय. 37 पोन विवलीइनारी बिमारी जिहींन तिहींज होय, तिहींपोअ काल्ले सिंग्ये होय एहलोहो देखाय, ताहां ते बिमारी हुदरीत गोयीही, आन तों माहुंउं सोको होय; पुंजारु तियाहा सोकोज ठोरवुहूं जोवे.

38 जर एखा माट्योअ नेताहां बोईंइ साम्बड़ापोअ पांडे डागे ओय, 39 ताहां पुंजारु तापासुहूं जोवे, जर तियाआ साम्बड़ामेहें डागे कमी पुवरे ओय, ताहां तो ओलखीत लेअहूं जोवे के ते साम्बड़ापोअ निहील्यी एक दाद होय; तो माअहुंउं सोको होय.

40 "जर एखाआ मुन्काआ सिंग्ये ओदरीत गोयेय, ताहां तो टालगो ते रोय, पोन सोको होय. 41 आन जियाआ निहांणापोऱ्येए सिंग्ये ओदरीत गोयेय, ताहां तों टालगो ते ओय, पोन तों सोको होय. 42 पोन जर तों टालगो पोड़्योहो तिहींइं नेताहां निंडाआ रानेहें पुवरु डाग देखाय, ताहां टालगो पोड़्योहो तिहीं वोडो दुख उबऱ्योहो. 43 तियाहा काजे पुंजारु तापासुहूं जोवे, जर तियाआ टालगा मुंडोम नेताहां टालगे निंडेज साम्बड़ापोऱ्याआ वोडा दुखोअ होस पुवरु डाग देखाय, 44 ताहां तों माहुंउं वोडा दुखोवालो होय आन एठो होय; आन पुंजारु तियाहा नक्की एठो ठोरवुहूं जोवे; काहाके तो वोडा दुखोअ डाग होय."

45 "जियाहा वोडो दुख लागोय, तियाआ आंगड़े फाट्ले रोअहूं जोवे; आन तियाआ सिंग्ये फेंगराअलेहे रोअहूं जोवे, आन तो तियाआ उपर्‍युउ ओठ टापित कोइत एठो एठो एहें कोइत आअड़ीतोज जाअहूं जोवे. 46 जेताहा दिही जाआं तों दुख तियामेहें रोय, तेताहा दिही जाआं तों एठोज रोअहूं जोवे; काहाके तों एठो होय कोत एखलोज रोअहूं जोवे, तियाआ वोहती हाद्दीइ बारथे रोअहूं जोवे."

47 जाहां वोडा दुखोअ होसर्‍येए डागे साअकाअरी ओय, तों साअको ऊनोअ ओय नेताहां हुत्रावो साअको ओय, 48 तो डाग तिया हुत्रावाआ नेताहां ऊनोअ साअकाआ एकी वोल नेत बिहीरी वोल, नेताहां तो डाग साम्बड़ाम नेताहां साम्बड़ाआ बोणल्यी एखी वस्तुमेहें ओय, 49 आन तो डाग जर निल्लू ओय नेताहां रात्बाअलुहू ओय, ताहां ओलखीइजा, काहाके तो वोडा दुखोअ डाग होय आन तो डाग पुंजाराहा देखाड़ुहूं जोवे. 50 आन पुंजारु तो डाग तापासुहूं जोवे, आन तेहेला डागोवाली वस्तुहू हांत दिही जाआं अलग कोइत मिकुहूं जोवे; 51 तिहीं रोत सांतवे दिही पुंजारु तिया डागोहो तापासीत पालुहूं जोवे, आन जर तिया साअकाआ एकी वोग, नेताहां बिहीरी वोग, साम्बड़ाम नेताहां साम्बड़ाआ बोणल्यी एखी वस्तुमेहें पोसरीत जाय, ताहां तो पोसरीइनारु डाग वोडो दुख होय कोत ओलखीइजा; ते वस्तु एठी होय. 52 तों साअको हुत्रावो ओय नेताहां ऊनोअ ओय, एकी वोग ओय नेत बिहीरी वोग ओय, साम्बड़ापोअ ओय नेताहां साम्बड़ाआ एखी वस्तुपोअ तो डाग ओय, तो डाग नुकसान कोअनारो वोडो दुख होय; तियाहा काजे ते वस्तु आगीमेहें पेटाड़ी देअहूं जोवे.

53 "पोन जर पुंजारु तिया साअकाहा तापासे, एकी वोग नेताहां बिहीरी वोग, नेताहां साम्बड़ाआ तियी वस्तुमेहें नाहां पोसऱ्यु एहलोहो देखाय, 54 ताहां जियी वस्तुमेहें डाग ओय, तियी वस्तुहू तुवीइलाअ आदेश आपुहूं जोवे, ताहां तियी वस्तुहू फाश्‍यीइ बी हांत दिही जाआं केंडीत मिकुहूं जोवे; 55 तिहींइं फासाड़ी पुंजारु फाशुउ तुवीइलाअ फाटी तापासुहूं जोवे, आन जर डागोअ रंग ने बोदलाअयू, आन डाग ने पोसर्‍यु, तेबी जाईंत लेजा के तों एठो होय; तियाहा आगीम पेटाड़ी देजा, काहाके तों मायते ओय, नेताहां उपोअ ओय, तेबी तों नुकसान कोअनारु डाग होय. 56 पोन जर पुंजारु तापासे आन तो तुवल्यु भाग वाहींक पुसाअलू देखाय, ताहां साअकाआ नेताहां साम्बाड़ाआ नेताहां एकी वोग नेत दुसरी वोग तेतुज भाग फाड़ीत काडुहूं जोवे. 57 पोन जर तो डाग साअकाआ एकी वोग नेताहां बिहीरी वोग, नेताहां साम्बड़ाआ कोड्ली बी वस्तुमेहें उबरील्यु देखाय, ताहां ते वस्तु आगीम पेटाड़ी देअहूं जोवे. 58 जर तिया साअकाअरी एकी वोग नेताहां बिहीरी वोग, नेताहां साम्बड़ाआ जे बी वस्तु ओय ते तुवयी तिहीं रोत तो डाग निहीत जाय, ताहां ते वस्तु फाश्यीइ एकवारी तुवजा, ताहां सोकी ओत जाय."

59 हुत्रावो नेताहां ऊनोअ साअको, नेताहां साम्बड़ाआ एखी वस्तुमेहें जो वोडा दुखोअ डाग ओय, तियाहा सोको नेत एठो ठोरवीइलोअ ओज नियम होय.